بەرپرسێکی یەكگرتووی ئیسلامی: عەبادی خۆی لە دابینکردنی مافەكانی خەڵكی كوردستان دەدزێتەوە

"هەموو ئەو هێرشانەی دەکرێنە سەر کورد بەهۆی ئەوەوەیە کە دەوڵەتمان نییە"

فەرهاد مەلاساڵح، ئەندامی دەستەی كارگێڕیی ئەنجومەنی جێبەجێكردن، (مەكتەبی سیاسی)ی یەكگرتووی ئیسلامیی كوردستان، لە دیمانەیەكی تایبەتی (باس)دا، قسە لەبارەی رەوشی كوردستان و كشانەوەیان لە حكوومەت و هەڵبژاردنەكانی داهاتوو و هەڵوێستی عەبادی دەكات.


سەرەتا رای دەگەیەنێ: ”هەڵوێستی فەرمیی یەكگرتوو ئەوەیە كە لەگەڵ ئەوەی لە كابینەی حكوومەت كشاوینەتەوە، بەڵام تا سەرئێسقان باوەڕمان بە قەوارەی هەرێمی كوردستان و تەواوی خەون و ئاواتەكانی گەلەكەمان هەیە و پشتیوانیی یەكڕیزی و یەكپارچەیی خاكی هەرێمی كوردستان دەكەین“.


روونیشی كردەوە: "كشانەوە لە حكوومەت نە بۆ دژایەتیی هیچ كەس و لایەنێكە، نە بۆ چەپڵەی لایەنێكی ترە، لەگەڵ ئەوەشدا پێمان وایە دەبێ هەرێمی كوردستان وەكوو قەوارەیەكی فەرمیی خەڵكی كوردستان بمێنێتەوە".


فەرهاد مەلاساڵح جەختی كردەوە، ئەوان هەرێمی كوردستانیان گەیاندە كەناری ئارامی، پاشان لە حكوومەت كشانەوە، گوتیشی: ”تا شەڕی داعش هەبوو هەرگیز رێگەمان بە خۆمان نەدا لە دەرەوەی حكوومەت بین، لەدوای 16ی ئۆكتۆبەریش كە مەترسیی سەربازی لەسەر كوردستان هەبوو بیرمان لەوە نەكردەوە لە حكوومەت بكشێینەوە، ئێمە ساڵی رابردوو یاداشتێكمان دایە حكوومەت، ئەگەر مووچە و گوزەرانی خەڵك باش نەكات دەكشێینەوە، بەڵام ئەوكات رێگەمان بەخۆمان نەدا و گوتمان هەرێمی كوردستان پێویستی بە پاڵپشتی و مانەوەی ئێمە هەیە، بۆیە لە حكوومەت ماینەوە“.


ئەو بەرپرسەی یەكگرتوو پێی وایە، ئێستا هەندێك دەرگای پەیوەندی لەگەڵ بەغدا بوونەتەوە و ئومێد وایە هەرێمی كوردستان بە دانوستاندنەكانی لەگەڵ بەغدا بگاتە ئەنجام، گوتیشی: ”بەغدا خۆی لە چارەسەركردنی كێشەكانی هەرێمی كوردستان دەدزێتەوە، لەدوای 16ی ئۆكتۆبەریشەوە هەرێمی كوردستان ئامادەیی خۆی پیشان داوە بۆ چارەسەركردنی كێشەكان، بەڵام بەغدا خۆی دزیوەتەوە، وڵاتانیش فشار دەخەنە سەر بەغدا، کەچی وەكوو پێویست نەهاتووەتە پێش“.


ئەو لەگەڵ ئەوەدایە كورد لە بەغدا كۆدەنگ و یەكڕیز بن: "بۆ هێنانەدیی خواستەكانی خەڵكی هەرێمی كوردستان، یەكگرتوو لەگەڵ كۆدەنگییە لە بەغدا، دەبێ هەموومان پاڵشتیی بودجە و دارایی كوردستان بین، لانی كەم لە 17% كەمتر نەبێت“.


مەلاساڵح باوەڕی وایە، ئیرادەیەك لە بەغدا هەیە نایەوێت مافەكانی هەرێمی كوردستان بدات، دەشڵێت: ”عەبادی خۆی دەدزێتەوە و مافەكانی خەڵكی كوردستان نادات، ئەگەر ئێمە هەرێمێكین لە چارچێوەی عێراقێكی فیدراڵ، ئەوە دەبێت بەغدا مافەكانی خەڵكی كوردستان بدات“.


ئەندامەكەی دەستەی كارگێڕیی مەكتەبی سیاسیی یەكگرتووی ئیسلامی، گوتیشی: ”دەبێ هەموو ماددە دەستوورییەكان جێبەجێ بكرێن، لە سەرووی هەموویانەوە گەڕاندنەوەی ناوچە دابڕاوەكان بۆ سەر هەرێمی كوردستان، ئەویش بەپێی ئەو میكانیزمە دەستوورییانەی كە لە دەستووری عێراقدا دیاری كراوە، بەداخەوە ئێستا ناوچە دابڕێندراوەكان تەعریب دەكرێن، ئێمە دژی ئەو هەوڵەین و نابێ رێگەی پێ بدرێت“.


فەرهاد مەلاساڵح راشی گەیاند: ”بۆ بەشداریكردنی هەڵبژاردنەكانی عێراق، یەكگرتوو خواستی ئەوە بوو هەموو لایەنە سیاسییەكان پێكەوە یەك لیستی كوردستانی دروست بكەین، بەڵام بەداخەوەی ئەوە دروست نەبووە“.


ئەو بەرپرسەی یەككرتوو روونی دەكاتەوە، لە هەوڵدان بۆ ئەوەی لیستێكی حزب و كەسایەتییە ئیسلامییەكان بۆ هەڵبژاردنی پەرلەمانی كوردستان دروست بكەن.


سەبارەت بەوەی بۆچی كۆمەڵی ئیسلامی لەنێو ئەو لیستە ئیسلامییەدا نییە، ئەو گوتی: ”ئێمە رێز لە بۆچوونی برایانی كۆمەڵی ئیسلامی دەگرین و گفتوگۆ لەگەڵیاندا بەردەوامە و هیوامان وایە ئەوانیش بێنە پاڵ ئەو لیستە ئیسلامییە، لەگەڵ بزووتنەوەی ئیسلامی بڕاندوومانەتەوە و لەگەڵ رێكخراو و كەسایەتییە ئیسلامییەكانیش رێك كەوتووین، تەنیا كۆمەڵی ئیسلامیی تێدا نییە، هیوادارین ئەوانیش یەكلا ببنەوە بۆ بەشداریكردن لەو لیستە ئیسلامییە“.


فەرهاد مەلا ساڵح دژی هێرشەكانی توركیایە بۆ سەر عەفرین و پێی وایە شەڕ چارەسەری كێشەكان ناكات.


جەخت دەكاتەوە، هەموو ئەو هێرشانەی دەكرێتە سەر كورد لە ناوچەكە و مافەكانی خەڵكی كوردستان پێشێل دەكرێت، هۆكارەكەی نەبوونی قەوارە و دەوڵەتی كوردستانە: "لەدوای سایكس بیكۆ تا بە ئەمڕۆ دەگات و بۆ داهاتووش، بێبەشكردنی خەڵكی كوردستان لە دەوڵەت و قەوارەیەكی سەربەخۆ ئەو لێكەوتانەی لێ كەوتووەتەوە لە رۆژهەڵاتی ناوەڕاست لە خوێن و كوشت و كوشتار و ناسەقامگیری، بەڵام دواجار بەرژەوەندیی وڵاتانی زلهێز لەوەدایە دان بە مافەكانی كورد و دەوڵەتی كوردستاندا بنێن“.

ئەلبوومی وێنەکان