رانیه‌ 5 ساڵه‌ چاوه‌ڕێی ته‌واوبوونی نه‌خۆشخانه‌ 300 قەرەوێڵه‌ییه‌كه‌یەتی

 

نه‌خۆشخانه‌ 300 قەرەوێڵه‌ییه‌كه‌ی رانیه‌، كه‌ له‌ ساڵی 2012 له‌سه‌ر بودجه‌ی وه‌زاره‌تی ئاوه‌دانكردنه‌وه‌ به‌ردی بناغه‌كه‌ی دانراوه‌، له‌لایه‌ن كۆمپانیایه‌كی توركییه‌وه‌ دروست ده‌كرا، تا ئێستا نزیكه‌ی له‌ 60٪ی كاره‌كانی ته‌واو بووه‌ ئێستا کارکردن تییدا وەستاوە.


ته‌ها محەمەد، گوته‌بێژی ته‌ندروستیی گشتیی راپه‌ڕین به‌(باس)ی راگه‌یاند: "به‌ ته‌واوبوونی ئه‌م پرۆژه‌یه‌ زۆربه‌ی گرفته‌كانی شوێن له‌ بواری ته‌ندروستی چاره‌سه‌ر ده‌بوون، چونكه‌ به‌ ته‌واووبوونی ئه‌م نه‌خۆشخانه‌یه‌ ده‌تواندرا چه‌ند به‌شێكی تری پێویست له‌ سنووره‌كه‌ بكرێته‌وه‌، كه‌ تا ئێستا به‌هۆی نه‌بوونی شوێنه‌وه‌ نه‌توانراوه‌ بكرێنه‌وه‌”.


نەخۆشخانەی گشتیی رانیە، كە لە هەشتاکانی سەدەی رابردوو دروست كراوە و تا ئێستاش چه‌ند جارێك نۆژەن كراوەتەوە، بەهۆی كۆنیی بیناكەیەوە توانای لەخۆگرتنی ژمارەیەكی زۆری نەخۆشی ئەو ناوچەیەی نەماوە.


فەرمان ئەحمەد، به‌ڕێوه‌به‌ری كارگێڕیی نەخۆشخانەی گشتیی رانیە، به‌ (باس)ی ڕاگەیاند: "ئەم بینایەی ئێستا توانای لەخۆگرتنی ئەم هەموو ژمارە زۆرەی نەخۆشی نییە، چونكە بیناكەمان هی ساڵانی هەشتاكانە و ئێستاش ژمارەی دانیشتووان زۆر زیاتره‌”.


گوتیشی: “داواكارین لە دەسەڵات هەرچی زووە نەخۆشخانەی 300 قەرەوێڵەی گشتیی ڕانیە تەواو بكات و پێداویستییەكانی نەخۆشخانەكەمان بۆ چارەسەر بكەن، هاووڵاتیانی ده‌ڤه‌ره‌كه‌ش هاوكاریمان بكه‌ن، چونكە ئێستا وەزارەتی تەندروستی ناتوانێت هەموو پێداویستییەكانمان بۆ دابین بكات، له‌به‌رئه‌وه‌ی نه‌خۆشخانه‌كه‌ تا ئێستاش نه‌چووەته‌ سه‌ر ته‌ندروستیی سلێمانی و له‌سه‌ر وه‌به‌رهێنانی شاره‌وانییه‌كانی پارێزگای سلێمانییه‌”.


ڕوونیشی كردەوە: "ئێستا زۆر پێویستیمان بە بەشی چاودێریی ورد و كارمەندی پێویست هه‌یه‌ و سۆنەرێكی باشمان نییە، هەروەها كێشەی كارەبا و ئاومان هەیە”.


به‌ڕێوه‌به‌ری كارگێڕیی نه‌خۆشخانه‌ی گشتیی رانیه‌ ئه‌وه‌شی خسته‌ روو، له‌ نه‌بوونی رێژه‌ی كارمه‌ندی پێویستدا، په‌نامان بردووەته‌ به‌ر وه‌رگرتنی کارمه‌ندی خۆبه‌خش، كه‌ ئێستا نزیكه‌ی 200 كارمه‌ندی میلاك و 25 كارمه‌ندی خۆبه‌خش هه‌یه‌ له‌ نه‌خۆشخانه‌ی 100 قەرەوێڵه‌ی رانیه‌ پیشتر دوو هۆڵی نەشتەرگەری هه‌بوو، ئیستا 5 هۆڵی هه‌یه‌ و وه‌كوو خۆیان باسی ده‌كه‌ن نه‌خۆشخانه‌كه‌یان كێشەی دەرمانیشی هەیە، بەتایبەتی دەرمانی نەخۆشانی تالاسیمیا.


فه‌رمان ئه‌حمه‌د، ڕاشی گەیاند: "رێژەی نەخۆشمان زۆرە و ئەو دەرمانانەی پێشمان دەگەن بەشی ژمارەی ئەم هەموو هاووڵاتییانە ناكات. پێویستیمان بە رێژەێكی زۆری دەرمانی تالاسیمیایە و رێژەێكی زۆر كەمیشمان بۆ دابین ئەكەن، بۆیە داوای كرد، دەرمانی پێویستیمان بۆ دابین بكەن بۆ نەخۆشەكانی تالاسیمیا”. بەشی نەشتەرگەریی نەخۆشخانەكەش لە كەموكوڕی و كێشە بەدەر نییە، بەتایبەت هەندێك دەرمانی پێویست و نه‌بوونی هۆڵی پێویست بۆ نه‌شته‌رگه‌ری، كه‌ ئێستا ته‌نیا 2 هۆڵی نه‌شته‌رگه‌رییان هه‌یه‌.


گوتیشی: "لە ماوەی یەك مانگدا بۆ حاڵەتی ئاسایی، 250 بۆ 300 نەشتەرگەری ئەنجام دەدەین. ئێمەش وەك ژووری نەشتەرگەری هەندێك كەمیی دەرمانمان هەیە".
ئێمە بە هاوكاریی خێرخوازێكی ناوچەكە ژوورێكی مۆدێرنی نەشتەرگەریمان دروست كردووە و خەریكە تەواو دەبێت، بە كردنەوەی ئەم هۆڵە تازەیە لە نەخۆشخانەكەمان خزمەتێكی زۆری هاووڵاتییانی سنوورەكەمان ئەكەین.


قه‌زای رانیه‌، سه‌ر به‌ پارێزگای سلێمانییه‌ له‌ ئیداره‌ی راپه‌ڕین، دانیشتووانه‌كه‌ی له‌ نزیكه‌ی 450 هه‌زار كه‌س پێك هاتووه‌، ئه‌و نه‌خۆشخانه‌ 100 قەرەوێڵه‌ییه‌ی كه‌ ئێستا هه‌یه‌، به‌شی ئه‌م رێژه‌ زۆره‌ی دانیشتووانی قه‌زاكه‌ ناكات، بۆیه‌ داوا له‌ لایه‌نی په‌یوه‌ندیدار ده‌كه‌ن به‌ ته‌واوكردنی نه‌خۆشخانه‌ 300 قه‌ره‌وێڵه‌ییه‌كه‌ بۆ زیاتر به‌ره‌وپێش چوونی ره‌وشی ته‌ندروستی له‌ سنووره‌كه‌دا.