بكارئینانا مادێن هوشبه‌ر ل دهۆكێ ب رێژا 3% زێده‌ بوویه‌

د ساله‌كێدا 94 كه‌س هاتینه‌ ده‌سته‌سه‌ركرن

رێڤه‌به‌رێ نه‌هێلانا مادێن هۆشبه‌ر ل پارێزگه‌ها دهۆكێ راگه‌هاند، د ئه‌ڤ ساله‌ ب رێژا 3% بكارئینانا مادێن هوشبه‌ر ژ ئالیێ دانیشتووێن پارێزگه‌هێ ڤه‌ زێده‌تر لێ هاتیه‌ و ئه‌ڤه‌ژى بوویه‌ ئه‌گه‌ر كو ب تنێ د ئه‌ڤ ساله‌دا 94 كه‌س بهێنه‌ ده‌سته‌سه‌ركرن.


عه‌قید فه‌ره‌ج كۆچه‌ر، رێڤه‌به‌رێ نه‌هێلانا مادێن هۆشبه‌ر ل پارێزگه‌ها دهۆكێ، بۆ (باس) دیار كر، بكارئینان و بازرگانیكرن ب مادێن هۆشبه‌ر د سالا 2017دا ل پارێزگه‌ها دهۆكێ به‌ره‌ب زێده‌بوونێ یه‌، چونكو خه‌لكێ دهۆكێ ژى ئه‌ڤه‌ چه‌ند ساله‌كه‌ پشتى هاتنا ئاواره‌یان زێده‌تر لێ هاتیه‌ و نها رێژا خه‌لكى نێزیكى ملیۆنه‌ك و 800 هزار كه‌سانه‌.


گۆتیشى: قه‌یرانا دارایى و زێده‌بوونا رێژا بێكاریێ، كارتێكرنه‌كا مه‌زن ل ژیانا گه‌نجان كریه‌ و بوویه‌ ئه‌گه‌ر گه‌نج به‌ر ب كارێن نه‌ره‌وا بچن، هه‌روه‌سا گرێدانا سنوورێ دهۆكێ ب هه‌ردوو وه‌لاتێن سووریا و توركیاڤه‌ ئه‌گه‌رن، مادێن هۆشبه‌ر ته‌ڤلى هه‌رێمێ ببن.


رێڤه‌به‌رێ نه‌هێلانا مادێن هۆشبه‌ر ئاشكرا كر: ئه‌ڤ 94 كه‌سێن هاتینه‌ ده‌سته‌سه‌ركرن، هه‌مى ژ ره‌گه‌زێ نێرن و پتریا وان گه‌نجێن دهۆك و زاخۆنه‌ و چار گه‌نجێن رۆژئاڤاژى دناڤدا هه‌نه‌ و ل دویڤ مادێ ژماره‌ (18) ژ قانوونا سزایێن عیراقێ، سه‌ره‌ده‌رى ل گه‌ل دهێته‌ كرن.


نه‌ ڤه‌شارت ژى كو ئه‌و مادێ د ئه‌ڤ ساله‌دا هاتیه‌ ده‌سته‌سه‌ركرن نێزیكى 711 گۆرامێن مادێ هیرۆیینییه‌ و 266 حه‌بكێن جۆره‌جۆر و 77 گۆرامێن مادێ تریاكى و هژماره‌كا مادێن دى یێن هۆشبه‌ر.


عه‌قید فه‌ره‌ج ئاماژه‌ ب وێ یه‌كێ د سالا بۆرى یا 2016 ژى دا 88 كه‌س ب ئه‌گه‌رێ بكارئینانا مادێن هۆشبه‌ر هاتبوونه‌ ده‌سته‌سه‌ركرن و ئه‌ڤه‌ژى وێ دگه‌هینیت كو بكارئینانا ڤى ماده‌ى ب رێژا 3% زێده‌تر لێ هاتیه‌ ژ سالا به‌رى وێ و گۆت: پێدڤیه‌ سمینارێن به‌رفره‌ه بۆ نه‌مانا ڤێ دیاردێ دناڤ گه‌نجان دا بهێنه‌ گۆتن و رێژا بێكاریێ دناڤ گه‌نجان ژى دا به‌ر ب كێمبوونێ بچیت.