حه‌شدا شه‌عبى ده‌ست بجه ئێنانا پیلانا شیعه‌كرنا ناحیا زوممار دكه‌ت

"110 پولیسێن كورد ڤه‌گوهاستن ل جهێ وان عه‌ره‌ب دانان"

ژێده‌ركێ ئێدارى ژ ناڤ سه‌نته‌رێ ناحیا زوممار تایبه‌ت بۆ (باس) دیار كر کو نوكه‌ حه‌شدا شه‌عبى ده‌ست ب گوهورین و لادانا رێڤه‌به‌ریێن كورد كریه‌ ژ پوستێن ئێدارى، ل جهێ وان رێڤه‌به‌ران كه‌سێن عه‌ره‌ب دهێنه‌ دانان، وه‌كو لادانا رێڤه‌به‌رێ چاندنى و پولیسان و داموده‌زگه‌هێن ئه‌منى هه‌موو كه‌سێن عه‌ره‌ب هاتنه‌ دانان.


وێ ژێده‌رى ژ بۆ پاراستنا گیانى خوه‌ نه‌ڤیا ناڤێ خوه‌ ئاشكرا بكه‌ت، دیارژی كر: "به‌رى حه‌شدا شه‌عبى بهێت كه‌سه‌ك كوردى گه‌رگه‌رى ب ناڤێ ماهر ئه‌سود رێڤه‌به‌رێ چاندنێ بوو ل ناحیا زوممار، لێ حه‌شدا شه‌عبى ئه‌و كه‌سى كورد لادا و كه‌سه‌كێ عه‌ره‌ب بناڤێ مه‌حمه‌د سالح عوبید ل جهێ وێ دانان، هه‌روه‌ساژى عه‌قید فالح ئه‌حمه‌د سلۆ گه‌رگه‌رى هاته‌ لادان ژلایێ حه‌شدا شه‌عبى ڤه‌ ژ پوستى رێڤه‌به‌رێ پولیسان و كه‌سه‌كێ عه‌ره‌ب بناڤێ عه‌قید ئه‌سود جبوورى هاته‌ دانان و ئه‌فسه‌رێن ئه‌منیژى هه‌موو گوهارتن ل جهێ وان ئه‌فسه‌رێن عه‌ره‌ب هاتنه‌ دانان".


ژێده‌رى ئێدارى ل ناحیا زوممار ئه‌وژى دیار كر: "حه‌شدا شه‌عبى 110 پولیسێن كورد ژ ناحیا زوممار ڤه‌گوهاستنا مووسل و حه‌مام عه‌لیل و تاخ و گه‌ره‌كێن مووسلێ، ل جهێن پولیسێن كورد پولیسێن عه‌ره‌ب هاتێنه‌ دانان هه‌مووژى شیعه‌ مه‌زهه‌بن".


حه‌سه‌ن خه‌لۆ به‌رپرسێ لیژنا ناوچا پارتى ل زوممار بۆ (باس) دیار كر: "پولیسێن كورد ل زوممار نه‌ماینه‌ هه‌موو پولیسێن نوكه‌ ل زوممار ده‌وامى دكه‌ن عه‌ره‌بن و گه‌له‌ك گوهورێن ئێدارى ژلایێ حه‌شدا شه‌عبى ڤه‌ ل زومممار یێن هاتنیه‌ ئه‌نجامدان، ب شه‌ڤى ژى چه‌كدارێن نه‌ناسیار چنه‌ ناڤ مالێن خه‌لكێ دا پاره‌ و زیرێ دبه‌ن هه‌تا ئه‌ڤرۆكه‌ ژى هیچ كه‌سه‌ك ل زوممار ژبه‌ر تاوانان نه‌هاتینه‌ ده‌سته‌سه‌ركرن".


خه‌لۆ ئاشكرا كر: "شیعه‌كرنا ناحیا زوممار ژلایێ حه‌شدا شه‌عبى ده‌ست پێ كریه‌، حه‌شدا شه‌عبى ل دومیز ده‌ڤه‌را عین زاله‌ژى هه‌تا وینه‌گرتن ژى قه‌ده‌غه‌ كرینه‌ رى ب هیچ كه‌سه‌كێ ژى ناده‌ن وینه‌یان بگرت بۆ وى یه‌كێ ئه‌و دووڤ حه‌ز و مه‌ره‌مێن خوه‌ یێن سیاسى كارى خوه‌ بكه‌ن، چونكو ره‌نگه‌ مه‌ره‌ما وان ئه‌و بیت ل هه‌لبژارتنین داهاتیى یێن عێراقى بۆ په‌رله‌مانێ كه‌سێن شیعه‌ مه‌زهه‌ب ببنه‌ نوونه‌رێن خه‌لكێ زوممار".


زێده‌تر گۆتژى: "ل ناحیا زوممار ئالایێ عێراقى و مه‌رجعێن شیعه‌ هاتینه‌ بلندكرن و بتنى نڤیسینا عه‌ره‌بى دهێته‌ بكارئێنان، ئه‌و تابلویین ب زمانى كوردى ژى هاتینه‌ نڤیسین لاده‌ن ل جهى وان نڤیسین عه‌ره‌بێ دانان، هه‌موو مه‌ره‌مین وان شیعه‌كرنا ده‌ڤه‌رێیه‌ و چه‌ندین زالگه‌ه داناینه‌ ب شه‌ڤى هیچ كه‌سه‌كێ سڤیل نه‌شێت هاتن و چوونێ بكه‌ن ئه‌ڤه‌ژى بۆ وى یه‌كێیه‌ ئه‌و كارێن خوه‌ بكه‌ن، وه‌كو پێشكنینا مالان و برنا ترۆمبیلێن وه‌لاتیان رێ ب هیچ كه‌سه‌كێ ژى ناده‌ن باخڤت".