ژنانی ڕۆژهەڵات: ژنانی کورد هەموو کات لە خەباتی سیاسی و مەدەنیدا ڕۆڵی بەرچاویان گێڕاوە

"داواکارین هەڵبژاردنی سەرکۆماریی ئێران بایکۆت بکەن"

15/05/2017 - 09:21 بڵاوکراوەتەوە لە ڕاپۆرت



ناوەندی ژنانی ڕۆژهەڵاتی کوردستان کە لە پێنج ڕێکخراوی ژنانی ڕۆژهەڵات پێک هاتووە، هەڵبژاردنەکانی سه‌رکۆماری و ئه‌نجومه‌نه‌کانی شار و لادێی ئێرانیان بایكۆت كردووە و لە بەیاننامەیەكدا داوایان لە ژنانی رۆژهەڵاتی كوردستان كردووە لە ڕۆژی هەڵبژاردنەژاندا بە مەبەستی ناڕەزایەتی و بەشداری نەکردن لە هەڵبژاردنەکان، شار بەرەو دەشت و سەیرانگەکان چۆڵ بکەن.

 

ئەم بایکۆتە لە چوارچێوەی کەمپەینێکدا بە ناوی (لەپێناو وڵاتەکەم شار چۆڵ دەکەم) کە لە کۆنگرەیەکی ڕۆژنامەنووسیدا لە ڕێکەوتی 2017/5/8 لە پاڕکی (سامی عەبدولڕەحمان) لەبەردەم پەیکەری (مەستوورە ئەردەڵان) وەک هێمای خۆڕاگریی ژنی کورد دەستبەکاربوونی خۆی ڕاگەیاند.

 

ئەو کەسانەی لەم کەمپەینە بەشدارن لەو باوەڕە دان، ئەم هەڵبژاردنانە ئەگەر بۆ بەشێک لە کۆمەڵگەی ئێران کە بیری پیاوسالارانە بەسەریدا زاڵە، مانای هەبێت، بەدڵنیاییەوە ناتوانێ بۆ ژنان مانای ببێت. دەستووری کۆماری ئیسلامیی ئێران، ژنان لە بەڕێوەبەریی وڵاتدا بێبەش دەکات و بەردەوام ژنانی وەک هاووڵاتیانی پلە دوو و سێ هەژمار کردووە".

 

کەمپەینی (لەپێناو وڵاتەکەم شار چۆڵ دەکەم) داوا لە خەڵکی کوردستان و بەتایبەت ژنان دەکەن لە ڕۆژی هەڵبژاردندا، بە نیشانەی ناڕەزایی شارەکان چۆڵ بکەن.


فاتمە عوسمانی، سکرتێری یەکیەتیی ژنانی دیموکراتی کوردستانی ئێران و یەکێک لە ئەندامانی ناوەندی ڕێکخروای ژنانی ڕۆژهەڵات لەم پەیوەندییەدا بە (باسنیوز)ی ڕاگەیاند: "ژنی كورد لە ڕۆژهەڵاتی كوردستان زۆر باش لە دۆخی خۆی ئاگادارە و پێشێلكاریی مافە ئینسانییەكانی كە ماوەی نزیك بە چوار دەیە لە كۆماری ئیسلامی بەڕێوە دەچێت،‌ نەك هەر هەستی پێ كردووە، بەڵكوو پێ وایە كە ئەو پێشێلكارییە بە شێوەی سیستماتیك لە هەموو بوارەكانی سیاسی، ئابووری، كولتووری و... كاری بۆ كراوە، بۆیە لە دوو شێوەی كرداریدا هەڵوێستی هەبووە و خەباتی سیاسی و مەدەنیدا رۆڵی بەرچاوی گێڕاوە. چالاكیی بەرچاوی ژنانی رۆژهەڵاتی كوردستان لە ئەنجومەن و رێكخراو و NGOكان لە بوارە جیاوازەكاندا نیشانەی ئاستی تێگەیشتوویی ژنی كورد لە دۆخی تایبەت بە خۆیەتی لەو بەشەی كوردستان. جگە لەوانەش ژنی كورد بەو رۆڵە كۆمەڵایەتییانەی كە لە كۆمەڵگەدا هەیبووە خاوەنی پێگەیەكی جیاواز و تایبەتە. هەمیشە مەینەتییەكانی كوردی بەتەواوی بوونیەوە هەست پێ كردووە و هەڵوێستی نواندووە".



لەبارەی ئەوەی ئەم کەمپەینە چەندە توانیویەتی دەنگی خۆی بگەیەنێتە خەڵک و بەتایبەت ژنانی ڕۆژهەڵات، دەڵێت: "لە ماوەی هەفتەی پێشوودا چالاكانە لەو كەمپەینەدا كارمان كردووە و لەنێوخۆی رۆژهەڵاتیش بۆ گەیاندنی پەیامی كەمپەینەكە كار كراوە، بۆیە بەو هۆكارانەی كە پێستر باسم كرد پێم وایە خەڵكی رۆژهەڵاتی كوردستان پەیامی كەمپەینیان وەرگرتووە، چونكە ئەو كەمپەینە لەگەڵ ئەوەی كە لەلایەن ناوەندی ژنانی ڕۆژهەڵاتی كوردستانەوە راگەیەندراوە، بەڵام ڕووی داواكاری و پەیامی كەمپەین لە هەموو چین و توێژەكانی كۆمەڵگەی كوردستانە".

 

سکرتێری یەکێتیی ژنانی دیموکراتی کوردستانی ئێران گوتیشی "وەرگرتنی پەیامی كەمپەین لەلایەن خەڵكەوە گرنگە، لەڕاستیدا ئامانجی كەمپەین لەگەڵ بایكۆتی هەڵبژادنەكانی كۆماری ئیسلامی، حەرەكەتێكی مەدەنیی خەڵكە بۆ ناڕەزایەتی دەربڕین لەو دۆخە نالەبارەی نەك هەر ژنان، بەڵكوو كۆی گشتیی كۆمەڵگای رۆژهەڵاتی تێیدا بووە و هەیە، بۆیە كرداریكردنی ئەو ناڕەزایەتییە لە شێوەی مەدەنیدا ئامانجی كەمپەینە. ئێمە ئەگەر مەبەستمان تەنیا بایكۆتی هەڵبژاردنەكانی كۆماری ئیسلامی بایە، لەوانە بوو بە راگەیەندراوێك پەیامی خۆمان بە خەڵك دابایە، بەڵام كاتێك ئێمە بایكۆتی چالاكمان ڕاگەیاندووە، ئامانجی گرنگترمان هەیە كە باسم كرد".

 

ناوەندی ڕێکخراوی ژنانی ڕۆژهەڵات له‌ پێنج رێکخراوی ژنان پێکهاتووە کە بریتین لە: یەکیەتیی ژنانی دیموکراتی کوردستان، ئاسۆی ژنی کورد، یەکیەتیی ژنانی دیموکراتی کوردستانی ئێران، کۆمەڵەی ژنانی ڕۆژهەڵات، ڕێکخراوی ژنانی سازمانی خه‌بات.

ئەلبوومی وێنەکان