شێخ ئەلئیدریسی نابینا مه‌رجه‌ع و نموونه‌ى باڵا بوو بۆ من!

من لە رەقە بووم - 30

18
ئاخیری ئیقامه‌ى سه‌فه‌ره‌كه‌یان پێ دامه‌وه‌. به‌ڵام ئێستا ئیتر شتێك بۆ من گۆڕابوو. ئێستاكه‌ لانیكه‌م تا ماوه‌یه‌ك حه‌زم به‌ كۆچكردن به‌ره‌و ئه‌ڵمانیا نه‌بوو. ڕاستە له‌و كاتانه‌دا هێشتاكه‌ هه‌ر بیرم بۆ كۆچكردن ده‌كرده‌وه‌، به‌ڵام ئه‌و ژیانه‌ تازه‌ى كه‌ له‌ نابیل و ئه‌و ئاسووده‌ییه‌ى كه‌ هه‌مبوو و ئه‌و ئازادییه‌ى كه‌ له‌گه‌ڵ براده‌ران له‌وێ پێى گه‌یشتبووم، ئه‌م بیره‌ى له‌ مێشكمدا وه‌خت بوو جێگیر ده‌كرد، كه‌ جێگاى ڕاسته‌قینه‌ و سروشتى بۆ من ئیدى ئێره‌یه‌، هه‌ر له‌م وڵاته‌یه‌.


له‌و كاته‌دا زۆر هاتوچۆم بەنێو شاره‌كاندا ده‌كرد و هه‌ر جاره‌و دایكم له‌باره‌ى ئه‌م سه‌فه‌رانەم پرسیاری لێ ده‌كردم، به ‌هه‌رحاڵ قه‌ناعه‌تم پێ ده‌كرد كه‌ له‌گه‌ڵ كاروانه‌ خێرخوازانه‌كان بۆ یارمه‌تیدانى ئاواره‌كان و هه‌ژاران ده‌چم.


له‌ هه‌مان ڕۆژانى یه‌كه‌مى دوای سه‌ركه‌وتنى شۆڕش، ئیتر ڕیشم كورت نه‌كرده‌وه‌ تا درێژتر ببێت. قژم، كه‌ جێگاى شانازیم بوو، درێژ كرده‌وه‌. ئه‌مڕۆ ئیتر ئازاد بووم و هه‌ر ئیشێكم ده‌ویست ئه‌نجامم ده‌دا. من زۆر حەزم به‌ قژى درێژ ده‌كرد. ئه‌م حه‌زه‌م تا ئه‌و كاتانه‌ى چوومه‌ ڕه‌قه‌وه‌ هه‌ر هه‌بوو. له‌ (شام)یش قژم ڕه‌نگ كرد و وه‌كوو هه‌موو شه‌ڕكه‌رانی تر، درێژم كرده‌وه‌. ئه‌مه‌ جگه‌ له‌وه‌ى له‌ سوننه‌ته‌كانى پێغه‌مبه‌ر (د.خ) بوو، یه‌كێك له‌ نیشانه‌كانى شه‌ڕكه‌رانى ده‌وڵه‌تى خه‌لافه‌تیش به‌ئه‌ژمار ده‌هات.


هێدى هێدى ئه‌و كه‌سانه‌ى كه‌ رەفیق ئەلغۆل ئه‌وانى ناسیبوو، چالاكییه‌كانى خۆیان ڕاگه‌یاند و ئاشكرایان كرد. هه‌ر له‌و كاته‌دا (ئەیمەن مشماش)ه‌م ناسی، كه‌ به‌ (ئەیمەن بوشتبیه) ده‌ناسرا و په‌یوه‌ندییه‌كى به‌هێزمان له‌گه‌ڵ یه‌كدیدا په‌یدا كرد، زۆر كاریگه‌ریم له‌و وه‌رگرت، كه‌سێكى هێمن و رۆشنبیر بوو، له‌ یه‌كێك له‌ قوتابخانه‌ به‌رزه‌كان له‌ به‌شێكى پسپۆڕیدا قوتابیی زانكۆ بوو. من ئه‌وم خۆشده‌ویست و بووبووه‌ نموونه‌یه‌كی باڵا بۆم. پێده‌چوو له‌ هه‌موو ئه‌و كه‌سانه‌ى تا ئه‌و كاتانه‌ ناسیبووم، ئه‌وه‌نده‌ی ئه‌و پێیان دڵخۆش نه‌بووم.


له‌و كاته‌دا ڕووبه‌ڕووى كۆمه‌ڵێكى به‌ربڵاو له‌ شێخه‌ سه‌له‌فییه‌كان بووبوومه‌وه‌، ده‌یان كه‌س له‌وان بۆ وتاردان و وانه‌گوتنه‌وه‌ له‌ مزگه‌وته‌كان، كه‌ ئیدى ده‌رگاكانیان بۆ هه‌میشه‌ بۆ هه‌موان كراوه‌ بوو، بۆ توونس هاتبوون.


یه‌كه‌م وانه‌، كه‌ له‌ مزگه‌وتانه‌دا به‌شدارییم تیادا كرد، وانه‌كانى (شێخ ئەلبەشیر بن حەسەن) بوو. ئه‌و ڕۆژه‌ كۆمه‌ڵێكى زۆر له‌ مزگه‌وتى ئەلكەبیر له‌ شاری دار شەعبان ئەلفهری ئاماده‌ بوون، ئه‌و كاتانه‌ شێخم نه‌ده‌ناسی، به‌ڵام له‌دواییدا تێگه‌یشتم له‌ شێخه‌كانى مه‌دخه‌لی بووه‌. ئه‌م زاراوه‌یه‌ بۆ وه‌سفكردنى سه‌له‌فییه‌ زانستییه‌كان به‌كار ده‌هێنرا، كه‌ من له‌گه‌ڵ لایه‌نگرانى ئه‌م بیركردنه‌وه‌یه‌ له‌ نابیل چیرۆك و به‌سه‌رهات و مشتومڕكردنم هه‌بوو.


دوای ئه‌وه‌ به‌رده‌وام منداڵه‌كانى گه‌ڕه‌كم دژى مه‌دخه‌لییه‌كان ده‌بزواند و هان ده‌دا. زۆر له‌وان واتاى مه‌دخه‌لی تێنه‌ده‌گه‌یشتن، به‌ڵام به‌ قسه‌كانى من له‌وان تێگه‌یشتن، كه‌ مه‌دخه‌لییه‌كان پابه‌ندى حه‌قیقه‌ت و ڕاستیى شه‌رعه‌وه‌ نین. بابه‌ته‌كه‌ بۆ منداڵانى گه‌ڕه‌ك به‌س بێزاربوون له‌ مه‌دخه‌لی نه‌بوو، به‌ڵكوو حه‌ز و خۆشه‌ویستى و ڕێزگرتن له‌ من بوو! له‌ هه‌موو مزگه‌وته‌كان به‌دواچوونى وانه‌كانم به‌ لانی كه‌مه‌وه‌ كرد. له‌و كاتانه‌دا بوو، كه‌ شێخ (خەتیب ئیدریس)م ناسی. ئه‌و هه‌ر زوو وه‌ك شێخێكى جێى متمانه‌ى لێ هاتبوو. بۆ هه‌ر كوێیه‌ك ده‌چوو له‌ دووى ده‌چووم و هه‌ر وانه‌یه‌كى ده‌گوته‌وه‌ تیایدا به‌شداریم ده‌كرد. یه‌كه‌م وانه‌ى خەتیب ئیدریسى، كه‌ له‌ودا به‌شداریم كرد، له‌ مزگه‌وتى (الكبری)ی شارى سووسه‌ بوو. دوای ئه‌مه‌ش له‌ وانه‌كانى تری ئه‌و، له‌ مزگه‌وتى (سیدى عاشوور)ى شاری نابل به‌شداریم كرد. له‌و كاته‌وه‌ وه‌ك كه‌سێكى له‌دووگه‌ڕ و وه‌فادار به‌ وانه‌كانى ئیدریسم لێ هاتبوو. زۆر جار له‌ ماڵه‌وه‌یدا، كه‌ لە ناوچه‌ى (سیدى عەلی بن عون)ى پارێزگاى (سیدى بوز‌ید) له ‌ناوه‌ندى وڵاتدا بوو، ده‌چوومه‌ بینینى. هه‌زاران كێلۆمه‌ترم بۆ به‌شداریكردن له‌ وانه‌كانى ئه‌و ده‌بڕی. كه‌م كه‌م په‌یوه‌ندییه‌كانم له‌گه‌ڵ ئه‌ودا زیاتر بوون و گۆڕان به‌ په‌یوه‌ندیى شه‌خسی. ئه‌مه‌ش به‌هۆی هاوڕێكه‌م (ایمن مشامش)ه‌وه‌ بوو، كه‌ هه‌میشه‌ هاتوچۆی ئه‌وى ده‌كرد.


له‌و كاتانه‌دا ئه‌بوزه‌ڕ هۆیه‌ك بوو، تا ببمه‌ داروده‌سته‌ و په‌یڕەوکارى شێخ ئەلئیدریسی. له‌ هه‌ر بابه‌تێكى ورد و درشت، داواى فتوامان له‌و ده‌كرد. ئه‌م كه‌سه‌ نابینایه‌، له‌و كاتانه‌دا مه‌رجه‌ع و شوێنى گه‌ڕانه‌وه‌ى فیكریی من و نموونه‌ى باڵاش بوو بۆ من.


ئێستاكه‌ ئیتر تاقمى ئێمه‌ په‌یڕه‌وكه‌رى هێڵی خه‌تیب ئیدریسی به‌ئه‌ژمار ده‌هات و له‌ هه‌موو بڕیاڕ و ڕوانگه‌كانى بۆ وڵات، پشتمان به‌و ده‌به‌ست و له‌و په‌یڕه‌ویمان ده‌كرد. ئه‌و له‌ ئه‌نجامى كونفڕانسی (سكره‌) له‌ مانگى ئه‌پڕیڵى 2011، كه‌ له‌ باكوورى پایته‌ختدا به‌ڕێوه‌ چوو، تاقمى (سیف الله‌ بن حسین) ناوى (انصار الشریعه‌)ى بۆ ڕه‌وتى سه‌له‌فی جیهادیى توونسی هه‌ڵبژارد و خەتیب ئیدریسی ئاماده‌ نه‌بوو ئه‌م ناوه‌ قبووڵ بكات. ئێمه‌ش له‌م بابه‌ته‌دا پشتیوانییمان له‌و كرد. ئیدریسی له‌و كاته‌دا ئه‌م شێوه‌ ناولێنانه‌ى به‌ دابه‌شكردنى موسڵمانان ده‌زانى.


ئه‌گه‌رچی ئێمه‌ وه‌ك تاقمێك په‌یوه‌ست به‌ ئەنساڕ شه‌ریعه‌وه‌ نه‌بووین، به‌ڵام به‌شێوه‌یه‌كى گشتى له‌گه‌ڵ برایانمان به‌گشتى له‌ ڕه‌وتى سه‌له‌فیى جیهادیدا په‌یوه‌ندییه‌كى پته‌ومان هه‌بوو، هه‌روه‌ها وه‌ك هاوڕێیان و هاوده‌مانى جیهادییه‌كان له‌ هه‌موو ئه‌و خۆپیشاندانه‌ى كه‌ ڕه‌وتى سه‌له‌فیی جیهادى چ له‌ پایته‌خت و چ له‌ شاره‌كانی تر به‌ڕێوه‌یان ده‌برد، ئاماده‌ ده‌بووین و به‌شدارییمان ده‌كرد.


جیاواز له‌ په‌یوه‌ندیى پته‌و و به‌هێزمان له‌گه‌ڵ (ایمن مشامش = ئه‌بوزه‌ڕ) له‌گه‌ڵ (محمد الزین-ئه‌بوده‌جانه‌) و (رفیق الغول- ئه‌بوشه‌هید)یشدا هه‌میشه‌ پێكه‌وه‌ بووین. ئێمه‌ چوار كه‌سى هیچكات له‌ یه‌كدى جیا نه‌ده‌بووینه‌وه‌. هه‌ركات ده‌گه‌شتینه‌ هێزه‌ ئه‌منییه‌كان تا ئاستى ڕووبه‌ڕووبوونه‌وه‌ له‌گه‌ڵیاندا ئاژاوه‌مان ده‌نایه‌وه‌. هه‌ركات له‌ وێستگه‌یه‌كى پشكنین تێپه‌ڕ ده‌بووین، ئه‌وانی به‌ ناشرینترین سیفات بانگ ده‌كرد. ئه‌وانیش بێده‌نگ ده‌بوون و هیچ كاردانه‌وەیه‌كیان نه‌بوو. له‌و كاتانه‌دا هه‌ر كات و ساتێك له‌باره‌ى ده‌وڵه‌ت و حكوومه‌ت و ناوه‌ندێكى حكوومییه‌وه‌ قسه‌ ده‌هاته‌ نێوه‌وه‌، ئێمه‌ زاراوه‌ى (تاغووت)مان بۆ به‌كار ده‌هێنان.


زیاتر له‌ پیشاندانى هێزمان له‌به‌رامبه‌ر هێزه‌ ئه‌منییه‌كان، ده‌سه‌ڵات و هه‌یبه‌تێكیشمان بۆ خۆمان له‌ نابیل په‌یدا كردبوو. ژماره‌مان زۆر بووبوو. هه‌ندێك جار بۆ هاوكاریى كه‌سێكى تایبه‌ت، كه‌ سته‌مى لێ كرابوو، یان ڕێنماییكردنى خه‌ڵك بۆ دووركه‌وتنه‌وه‌ له‌ شتى حه‌رام، هه‌مووان پێكه‌وه‌ ده‌چووین. ئه‌گه‌ر یه‌كێك له‌ ئێمه‌ كوفر و ناشوكرییه‌كى سەباره‌ت به‌ خودا ده‌بیست، به‌ئاسان تێپه‌ڕین له‌ ئاوا قسه‌گه‌لێك ئه‌گه‌رى نه‌بوو و وازمان له‌ كه‌سه‌كه‌ نه‌ده‌هێنا. ئیتر به‌هۆی ئه‌وه‌ى كه‌ ده‌وڵه‌ت و حكوومه‌ت چیدى ئه‌و وزه‌ و توانایه‌ى جارانى نه‌مابوو، له‌و مانگانه‌ى سه‌ره‌تاى دواى شۆڕش، هه‌ندێك کەس بۆ وه‌رگرتنى حه‌ق و مافیان په‌نایان بۆ ئێمه‌ دەهێنا. له‌و كاتانه‌دا وامان له‌ هه‌ندێك پێشنوێژی سه‌ر به‌ حكوومه‌تى بن عه‌لییش كرد، كه‌ واز بێنن. نموونه‌ى ئه‌م كاره‌شمان له‌ مزگه‌وتى نابیل ڕووی دا و خه‌تیبێكى نوێژى هه‌ینیمان له‌سه‌ر مینبه‌ر هێنایه‌ خواره‌وه‌.


هه‌ندێك له‌ نوێژخوێنان، كه‌ سه‌ر به‌ بزووتنه‌وه‌ى نه‌هزه‌ بوون، بۆڵه‌ بۆڵیان ده‌كرد و له‌لایه‌كى تریشه‌وه‌ هاوڕێیانى منیان هان ده‌دا كه‌ ئیمامى فڵانه‌ مزگه‌وت لابده‌ین و له‌لایه‌كى تریشه‌وه‌ كاتێك پێكدادان و گرژى له‌مبارانه‌وه‌ ڕووی ده‌دا، له‌ ڕاگه‌یاندنه‌كان ئه‌م ڕووداوانه‌یان ئیدانه‌ ده‌كرد!


هه‌ر له‌ مانگه‌كانى یه‌كه‌مى شۆڕش، بڕیارم دا لە خوێندنه‌كه‌م به‌رده‌وام بم. له‌ یه‌كێك له‌ زانكۆ ئه‌هلییه‌كان له‌ قۆناغی به‌كالۆریۆس ناوم تۆمار كرد. هاوپۆلییه‌كانى پێشووم له‌ ڕیشى درێژم سه‌ریان سوڕ ده‌ما. ئه‌م ڕووخساره‌ نوێیه‌م عاده‌ته‌كانى كۆن و سوعبه‌ت و شه‌ڕه‌نگێزبوونى منى نه‌گۆڕیبوو. به‌م جیاوازییه‌وه‌، كه‌ ئێستا به‌ شه‌رعه‌وه‌ زیاتر پابه‌ند بووم، به‌تایبه‌ت له‌ هه‌ڵسوكه‌وتكردنم له‌گه‌ڵ كچاندا.


به‌پێى گاڵته‌چی و سیفاتى ترمه‌وه‌ له‌ شوێنى خوێندنه‌كه‌م، بوومه‌ كه‌سێكى كاریگه‌ر. زۆر جار ده‌متوانى ئه‌و وێناكردنانه‌ى له‌باره‌ى سه‌له‌فییه‌كانه‌وه‌ هه‌بوو، بگۆڕم. ته‌نانه‌ت كه‌سانى دژه‌ بۆچوون و ئه‌وانه‌شی په‌یوه‌ندییان به‌ دیندارییه‌وه‌ نه‌بوو، هه‌رچییه‌كم‌ له‌باره‌ى هه‌ر باسێكى دینییه‌وه‌ كه‌ ده‌گوت، په‌سه‌ندیان ده‌كرد. لانیكه‌م زۆرینه‌ى گه‌نجه‌كان لایه‌نگرى ده‌سه‌ڵاتدارێتیى ئایینى و جێبه‌جێكردنى شه‌ریعه‌ت و جیهاده‌وه‌ بوون و له‌و بڕوایه‌دا بوون، كه‌ گوناحێكى نه‌شیاو دووچار ده‌بن، كه‌ له‌گه‌ڵ بانگه‌شه‌كانى ئیسلامدا یه‌ك ناگرێته‌وه‌.!


هیچ جیاوازیىەکم له‌گه‌ڵ گه‌نجانى دژه‌دیندا له‌و تێگه‌شتنه‌ى كه‌ له‌ ئیسلام و دینداری و جیهاده‌وه‌ هه‌یانبوو، نه‌بوو. به‌ڵكوو جیاوازییه‌كه‌ له‌وه‌دا بوو، كه‌ ئه‌وان هێشتاكه‌ بڕیاری ئه‌وه‌یان نه‌دابوو پابه‌ندى ئه‌م بنه‌مایانه‌ بن. (خودا هیدایه‌تمان بكات) ئه‌و ده‌سته‌واژه‌یه‌ بوو، كه‌ كاتێك گه‌نجه‌كانت بۆ خودا و په‌یامه‌كانى پێغه‌مبه‌ر (د.خ) بانگهێشت ده‌كرد، گوته‌ى سه‌ر زاریان بوو.


من به‌س بۆ خوێندن نه‌گه‌ڕابوومه‌وه‌. هۆكارى ئه‌م گه‌ڕانه‌وه‌یه‌م بۆ حه‌زى دایكم ده‌گه‌ڕایه‌وه‌، كه‌ زۆر حه‌زى ده‌كرد لە وانه‌كانم به‌رده‌وام بم، له‌گه‌ڵ دروستكردنى كه‌شێك بۆ بانگه‌شه‌ و ده‌عوه‌تكردن به‌ ئیسلام. ئه‌و ساڵه‌ له‌ تاقیكردنه‌وه‌ى به‌كالۆریۆس ده‌رنه‌چووم و وازم له‌ خوێندن هێنایه‌وه‌. ئه‌م بابه‌ته‌ هیچ كاریگه‌رییه‌كى له‌سه‌ر ژیانم نه‌بوو، به‌ڵكوو بایه‌خى من له‌سه‌ر شتى تر و بابه‌تى تر بوو.


هێشتا بۆ بیستنى وانه‌كانى ئه‌و شێخانه‌ى كه‌ به‌رده‌وام و به‌دواى یه‌كدا بۆ ناوچه‌ى (ولایه‌ وطن القبلی)
و به‌دیاریكراویش شاری نابیل ده‌هاتن، ئه‌م مزگه‌وت بۆ ئه‌و مزگه‌وتم ده‌كرد. دیسانه‌وه‌ به‌ جدییه‌وه‌ بۆ وانه‌كانى له‌به‌ركردنى قورئان گه‌ڕامه‌وه‌. ئه‌و قۆناغه‌ بۆ من ساڵانى فه‌تحى گه‌وره‌ بوو له‌ كه‌سایه‌تیمدا. ڕۆژگار ڕۆژگارى من و گوته‌كانم بوو. ده‌كه‌وتمه‌ پێش خه‌ڵكه‌وه‌ و له‌ مزگه‌وتى ئەلفەلاح له‌ ناوچه‌ى سەیدى عاشوورا له‌ نابیل پێشنوێژیم له‌ نوێژى ته‌راویحدا بۆ نوێژخوێنان ده‌كرد.


له‌و كاتانه‌دا له‌گه‌ڵ هاوڕێكه‌م ڕه‌فیق ئەلغۆل له‌ ده‌وره‌یه‌كى دینیدا به‌شدارییم كرد، كه‌ له‌ شاری ئەلقەیرەوان له‌ ماڵێكدا كرابووه‌وه‌. له‌و ده‌وره‌ دینییه‌دا بوو، كه‌ زۆر گه‌نجانى ڕه‌وتى سه‌له‌فیی جیهادى وه‌كوو (سیف الدین الرایس) كه‌ له‌و قۆناغه‌دا وته‌بێژى فه‌رمیى ئه‌نساڕ ئەلشەریعه‌ بوو، له‌نزیكه‌وه‌ ناسیم. زۆر له‌و گه‌نجانه‌ى له‌وێنده‌ردا ناسینم، له‌ شامی سووریادا بینینمه‌وه‌.


له‌م ده‌وره‌ دینییه‌دا بوو، كه‌ (محمد البختی)م ناسی، ئه‌و ئه‌میری ژووره‌كه‌ى ئێمه‌ بوو، كه‌ پۆله‌كانى ئێمه‌ له‌وێدا به‌ڕێوه‌ ده‌چوو. منیش وه‌ك یاریده‌رى ئه‌و بووم. ئەلبەختى دوای چه‌ند مانگ یه‌كترناسینمان له‌ ڕه‌وتى ڕووداوى باڵوێزخانه‌ى ئه‌مەریكا ده‌ستگیر كرا و پاشان مانگرتنى له‌ خواردن له‌ به‌ندینخانه‌دا ده‌ست پێكرد و له‌ مانگى نۆڤه‌مبێری 2012 له‌ به‌ندینخانه‌ى (المرناقیه‌) كۆچی دوایی كرد. ئه‌و له‌ (القیروان) ئه‌و كاتانه‌ى یه‌كدیمان ده‌بینى، بووبووه‌ یه‌كێك له‌ هاوڕێكانم كه‌ جیابوونه‌وه‌م له‌گه‌ڵیدا ئه‌سته‌م بوو. له‌م ده‌وره‌دا چه‌ند شێخێكی سه‌له‌فییان له‌ سعوودیە و میسڕه‌وه‌ بۆ وانه‌گوتنه‌وه‌ هێنابوو.


نزیكه‌ى دوو مانگێك له‌و ده‌وره‌ دینییه‌دا به‌شدارییم كرد. وانه‌كانى ده‌وره‌كه‌ له‌باره‌ى مه‌رجه‌كانى (لااله‌ الا الله‌) و بنه‌ما سێ لایه‌نه‌كان بوو، كه‌ له‌گه‌ڵ شێوازى سه‌له‌فیگه‌رێتیدا یه‌كی ده‌گرته‌وه‌، بۆ قورئان له‌به‌ر كردنه‌كانم، ده‌وره‌كه‌ كه‌ ته‌واو بوو، خه‌ڵاتێكیشیان پێ دام.


ئه‌و كاتانه‌ زۆر دڵخۆش بووم. له‌م مزگه‌وت بۆ ئه‌و مزگه‌وت ده‌چووم و وانه‌كانم ده‌خوێند و له‌گه‌ڵ برایاندا كاتى خۆشمان به‌سه‌ر ده‌برد. فێركارییه‌ بیروباوه‌ڕییه‌كان (عه‌قیده‌یی) بۆ من له‌م وانانه‌دا گرنگ نه‌بوون، ئه‌وه‌ى به‌لامه‌وه‌ گرنگ بوو بینینى هاوڕێیان له‌ حه‌وشه‌ى مزگه‌وت و ده‌ره‌وه‌ بوو.


ڕۆژان و مانگانى دوای شۆڕش بۆ من ڕۆژی پیرۆز بوون، كه‌ خودا به‌ڵێنى له‌باره‌یه‌وه‌ داوه‌ و له‌ كتێبەكه‌یدا (قورئانی پیرۆز) ده‌مخوێنده‌وه‌، ئاماژه‌ به‌ دوو ئایه‌ته‌كانى [سووڕەتى ابراهیم-ئایه‌تى5] هه‌روه‌ها [ئایه‌تى (14) سووڕه‌تى جاثیة].


ئه‌و ڕۆژانه‌ لە هیچ شتێكم كه‌م نه‌بوو، جگه‌ له‌ شتێك نه‌بێت و ئێستاكه‌ ئیتر كاتى ئه‌وه‌ بوو، بێ هیچ گیروگرفتێك ئه‌وه‌ له‌ ناخ و دڵمدایه‌، به‌ دایكمى بڵێم.