ڕه‌شۆى ته‌یراوه‌ى

ته‌یراوه‌... هه‌ر به‌ پیاسه‌ - 46

 

هه‌نووكه‌ش نازانم ناوى ته‌واوى چییه‌، له‌ ته‌یراوه‌ى، به‌ته‌نێ یه‌ك ڕه‌شۆ هه‌بوو، ڕه‌شۆیه‌كى بێوه‌ی، ڕه‌شۆیه‌كى جوامێر، ڕه‌شۆیه‌كى به‌ئه‌ده‌ب و به‌ئه‌خلاق و سه‌ر ئازاى ته‌یراوه‌ییانه‌، كوڕیژگه‌كى به‌ژن تۆلاز، ئه‌سمه‌ر، ته‌نكه‌ ڕیشێكى ڕه‌شى قه‌ترانى، كورته‌ك و شه‌ڕواڵێكى ده‌ستى دوو، كه‌چى دڵ و ده‌روونێكى پاك و ساف و بێگه‌رد، ئه‌وها هه‌ڵده‌سووڕا و مه‌یل و مه‌رحه‌باى خه‌ڵكى ده‌كرد، كه‌ هه‌ر له‌ كوڕه‌ دڵساف و به‌هیمه‌ت و ڕه‌شیده‌كانى ته‌یراوه‌ییان ده‌وه‌شایەوه‌.


ئێمه‌ ڕه‌شۆمان به‌ كوڕى حه‌سارێ ده‌ناسى، به‌ خۆ و به‌ دایكێكى ڕه‌قى درێژى ڕوو به‌ خه‌نده‌ى جوان، له‌ حه‌سارێ ده‌ژیان، تا ئه‌و ساته‌ش ڕوخسارى باوكى ڕه‌شۆم له‌به‌رچاو بزره‌، هه‌نده‌ى بیر ده‌كه‌مه‌وه‌، وێنه‌ و ڕوخسار و هه‌یبه‌تى پیاوێك له‌ زه‌ینمدا نه‌چه‌سپاوه‌، بڵێی ئه‌وه‌ مێردى داده‌ شوكریه‌ و باوكى ڕه‌شۆى حه‌سارێیه‌.


له‌و حه‌ساره‌ى ته‌یراوه‌ى، شوكریه‌ى دایكى ڕه‌شۆى خه‌ریكى ته‌داره‌كى حه‌مامى ژنان و هه‌ڵسووڕاندنى ویست و ئاره‌زووى ژنانى ته‌یراوه‌ى بوو. به‌ هیمه‌ته‌وه‌ به‌ هه‌مووان ڕاده‌گه‌یشت، ڕه‌شۆش هه‌ر له‌ ته‌مه‌نێكى زووه‌وه‌، زۆر به‌خراپى ئالووده‌ى مه‌ى بووبوو، بێ كه‌س و بێ سه‌رپه‌رشت، به‌ شه‌و و به‌ ڕۆژ گه‌ر فشه‌ ئیشێكى كۆڵهه‌ڵگریى كردبا، ده‌نا ئه‌وه‌ مه‌ست و حه‌یران له‌ جاده‌ى ته‌جنیدیڕا به‌سه‌ر ده‌كه‌وت و له‌ جۆتسایدى به‌حركه‌ى بۆ كۆڵانى نه‌جاڕان و حه‌مام سیروانى شۆڕ ده‌بۆوه‌، قسه‌ك له‌گه‌ڵ وى، سوعبه‌ته‌ك له‌گه‌ڵ ئه‌وى دى، جوێنێك به‌ ئه‌و، جڕتێك بۆ یه‌كێكى دى، كاتى به‌سه‌ر ده‌برد و نیوه‌ شه‌ویش یاعز یاعز ده‌چۆوه‌ حه‌سارێ و له‌گه‌ڵ دایه‌ شوكرییه‌ ماندوو و شه‌كه‌ته‌كه‌ى، له‌ ژوورێكدا سه‌ریان پێكه‌وه‌ ده‌نا و ده‌خه‌وتن.


ڕه‌شۆ به‌دمه‌ست بوو، هه‌ركه‌ مه‌ستیش ده‌بوو، به‌ هه‌ر كه‌سێكى گرتبا قسه‌ى چاكى له‌ ده‌م به‌رنه‌ده‌بۆوه‌ و خراپ داده‌ڕسا، له‌ گه‌رمه‌ى شه‌ڕى قادسییه‌ى (ئێران و عێراق)، ڕه‌شۆ زۆرتر و خراپتر ده‌یخوارده‌وه‌ و مه‌ستتر ده‌بوو، شڕه‌كاغه‌زێكى كه‌چه‌ سه‌رۆك جاشێكى له‌ گیرفان بوو، ئه‌وه‌نده‌ى له‌ گیرفان ده‌رهێنابوو تا پێشانى دۆست و دوژمنى بدا، كاغه‌ز هه‌لا هه‌لا بووبوو، له‌ گه‌ره‌وه‌ش هه‌ر كه‌ ئێواران پاش تاریكى و پاش مه‌ستبوون به‌سه‌ر قاڵدرمه‌كانى باڕى (سه‌نابل)ى ته‌یراوه‌ى ده‌كه‌وت، ئه‌وه‌له‌ن بۆیه‌كان، ئینجا سه‌رخۆشه‌كان ده‌یانگوت:
- یاستار .. ڕه‌شۆ گه‌یشت، داخوه‌ ئه‌وشۆ شه‌ره‌فى كێ ده‌شكێنێ و عه‌له‌مى كێ ده‌هێنێته‌ خوارێ.


شه‌وێك له‌و شه‌وانه‌، باڕى (سه‌نابل) جمه‌ی دێ و جێى یه‌ك سه‌رخۆشى دى لێ نابته‌وه‌، ڕه‌شۆ به‌سه‌رخۆشى به‌سه‌ر ده‌كه‌وێ، هه‌ر كه‌ ده‌بینێ یه‌ك كورسى و مێزى به‌تاڵ نییه‌ و كه‌سیش زاتى ئه‌وه‌ ناكات داوه‌تى سه‌رمێزى خۆى بكات، به‌ناچارى ڕه‌شۆ ورد ورد هه‌نگاو ده‌نێ و له‌ بنه‌بانێ و له‌ژێر ئه‌و ته‌لەڤزیۆنه‌ى له‌سه‌ر په‌خشى كه‌ناڵى به‌غداى عه‌ره‌بى بوو و به‌سه‌ر شان و باڵى سه‌دام و عرووبه‌ى هه‌ڵده‌دا، داده‌نیشێ. بۆیه‌كان به‌ترسه‌وه‌ مه‌شرووب و مه‌زه‌ و ته‌داره‌كى بۆ له‌سه‌ر فه‌رشه‌كه‌ داده‌نێن، ئه‌ویش ده‌خواته‌وه‌ و پتر نه‌شئه‌ وه‌رده‌گرێ.. ته‌له‌ڤزیۆنیش نه‌ڕه‌ى دێ و باسى سه‌دام و قادسییه‌یه‌. رەشۆش نه‌ بیره‌یەك و نه‌ دوو و نه‌ سێ و ده‌ڕوا بۆ چوار و پێنج و شه‌ش.. ڕیزێك شووشه‌ى به‌تاڵى مل باریك و درێژى بیره‌ى (فه‌ریده‌) قیت ده‌كاته‌وه‌، له‌هیكڕا بانگى بۆیه‌ك ده‌كات و هه‌ڵده‌ستێته‌ سه‌ر پێ و ده‌ڵێ: حسابى من عایدى ئه‌بو شواربیه‌ (به‌ ده‌ستیش ئاماژه‌ بۆ وێنه‌یه‌كى گه‌وره‌ى دیكتاتۆر ده‌كات) ته‌له‌فۆنه‌كى لۆ بكه‌ن و پاره‌كه‌ له‌وى وه‌رگرن! ئیدى ده‌بته‌ هه‌را، پیاوانى ئه‌من و سیخووڕ ده‌ورى ده‌ده‌ن و لوولى ده‌ده‌ن و ده‌یبه‌نه‌ دایه‌ره‌ى ئه‌من و زرم و هوڕ و لێدان ده‌ست پێده‌كات، پاشتر به‌ بیانووى به‌دمه‌ستى نه‌جاتى ده‌بێت و به‌ له‌شێكى زامدار و به‌ ده‌روونێكى داهێزراو به‌ڕه‌ڵاى ده‌كه‌ن. كه‌چى ڕه‌شۆ وازى له‌ یاره‌ مه‌یه‌كه‌ى نه‌هێنا و هه‌ر عاشقى بوو و شه‌و و ڕۆژ نۆشى ده‌كرد.


هه‌ر كه‌ گه‌یشتینه‌ سه‌روبه‌ندى ڕاپه‌ڕین، ڕه‌شۆ به‌ خۆ و به‌ دایكى فڕیان به‌سه‌ر ئه‌و به‌زمه‌وه‌ نه‌بوو، ئه‌و به‌رده‌وام مه‌ست و سه‌رخۆش، دایكیشى به‌ هه‌موو ده‌مێ گۆشه‌گیرى كونجى حه‌مام و هه‌ڵسووڕاندنى ویست و ئاره‌زووى ژنه‌ ته‌یراوه‌ییان بوو.


كه‌چى كه‌ ڕاپه‌ڕین به‌رپا بوو، هه‌ر له‌ به‌ره‌به‌یانى (11/3ى به‌هارى 1991) یه‌كه‌مین زه‌بر وه‌به‌ر ڕه‌شۆى ته‌یراوه‌كه‌ى من كه‌وت و له‌ كاتى هاوه‌ن بارین و تۆپبارانى دوژمن، تۆپێك وه‌به‌ر حه‌سار و ڕێك به‌ به‌ر ژووره‌كه‌ى دایه‌ شوكرییه‌ى ڕه‌شۆیه‌كه‌ی ئێمه‌ ده‌كه‌وێت و هه‌لا هه‌لاى ده‌كات.


ئیدى ڕه‌شۆ، سه‌رخۆش و سه‌رگه‌ردانه‌تر به‌ كووچه‌ و كۆڵانه‌كانى ته‌یراوه‌ ده‌سووڕایه‌وه‌، سێ چوار لوقمى سۆر له‌ گیرفان و عه‌ره‌ق به‌ ده‌ست و مه‌ست و حه‌یران، كوڕه‌ به‌وه‌فاكانى ته‌یراوه‌ ده‌یانلاوانده‌وه‌.. هه‌ر كه‌ لێمان ده‌پرسى: ها ڕه‌شۆ جه‌وت كوه‌؟


ده‌یگوت: نازانم ... به‌س لۆ هه‌ر ده‌بى (جه‌وى) قوڕبه‌سه‌رى وه‌كى من بگیرێ!؟


رۆژگارى پاش ڕاپه‌ڕین، ڕه‌شۆى تووشى ژنێك و دوو منداڵ كرد، ئه‌و چوزانێ مه‌سه‌له‌ چییه‌؟ وه‌ری گرتن و له‌ ژوورى داده‌ شوكریه‌ له‌ حه‌ساره‌كه‌ى ته‌یراوه‌ى جێی كردنه‌وه‌ و داڵده‌ى دان، به‌ خۆیشى به‌رده‌وام سه‌رخۆش و بێ ئاگا ... تا: به‌داخه‌وه‌ له‌ زستانێكى تاریك، له‌ ئێواره‌یه‌كى تاریكتر، تفه‌نگ به‌ده‌سته‌كان گه‌یشتنه‌ حه‌سارێ و ژنه‌ و دوو منداڵه‌كه‌یان ڕفاند و له‌ چۆلی خه‌ڵتانى خوێنیان كردن و ڕه‌شۆى هه‌شبه‌سه‌ریان له‌ زستانێكى تووش به‌جێ هێشت.


هه‌نووكه‌ش كه‌س نه‌یزانى كێ بوون و چۆن هاتن و چۆن ئه‌و ڕووحانه‌ى ڕووحى ڕه‌شۆیان له‌ ڕه‌گه‌وه‌ هه‌ڵكێشا.


چه‌ند ڕۆژێك وه‌ڕنه‌سووڕایه‌وه‌، ڕه‌شۆى به‌دبه‌خت، له‌ په‌نا ده‌ڕابه‌یه‌كى دوكانه‌ بێنازه‌كانى ته‌یراوه‌، باڵشكاو، هێزلێبڕاو، ڕووت و ڕه‌جاڵ، به‌یانییه‌ك له‌ هیچ به‌یانییه‌كی دیکە نه‌چوو، ڕه‌شۆ ڕه‌ق ده‌بێته‌وه‌ و ده‌گه‌ڕێته‌وه‌ باوه‌شى دایه‌ شوكرییه‌ و ژن و منداڵه‌كانى.


ئه‌و ڕۆژه‌ى بردمانه‌ سه‌رقه‌بران، هه‌ر هه‌موو ته‌یراوه‌ییه‌ به‌وه‌فاكان به‌ڕێمان كرد، منیش به‌ چاوى پڕ له‌ فرمێسكه‌وه‌ پێم گوت:
- بنوو ڕه‌شۆ ماندووه‌كه‌ى ئه‌م ژیانه‌ هیچه‌، تێر تێر بنوو.