يه‌كه‌مين كتاو سياسی وه‌ شێوه‌زار فه‌يلی

وه‌شێوه‌زار داڵگی.. 2

ئه‌وه‌گ مه‌نويد ته‌نیا كتاوێگ سياسی بوى. جارێ كتاوخانه‌ی كوردی له‌ كتاو سياسی وه‌ شێوه‌زار فه‌يلی خالی بوى. دی ئه‌وه‌ بوى ئه‌و بڕياره‌ ك‌ وه‌رجله‌ يه‌ داويمه‌ێ جێوه‌جێى كردم و يه‌كه‌مين كتاو سياسى وه‌ شێوه‌زار كوردی فه‌يلی نويسام. كتاوه‌گه‌ وه‌ ناونيشان (گه‌وهه‌ره‌يل گرانقيمه‌ت، جواهر الكلام- گوهرهای گرانبار)ـه. وه‌ سێ زووان كوردی (شێوه‌زار فه‌يلی)، عه‌ره‌بی و فارسی، له‌ به‌رگێگ (125) لاپه‌ڕه‌يى نويسرياس‌ و كۆڵه‌باسێگ له‌ ژيان و خه‌بات (مسته‌فا بارزانی) نه‌مر و بڕێگ له‌ وته‌يل وه‌نرخێ له‌خوه‌ێ ‌گرێ. تيراژه‌گه‌ی (1000) دانه‌ي‌ و له‌ ساڵ (2711)ی كوردی له‌ به‌غدا چاپ كرياس‌. شايه‌د خوه‌نه‌ر قه‌دردار ئه‌و پرسياره‌ باێده‌ هويرێ ك‌ ئه‌ڕاچه كتاوه‌گه‌ وه‌ شێوه‌زار كوردی فه‌يلی و دوو زووان عه‌ره‌بی و فارسی نويسرياس‌؟ له‌ جوواو ئه‌و پرسياره‌ بايه‌سه‌ بويشم ك‌ وه‌داخه‌و‌ وه‌خاتر ئه‌و سياسه‌ته‌يله‌ ك له‌لايه‌ن داگيركه‌ره‌یل كوردستانه‌و‌ له‌سه‌ر كورده‌یل فه‌يلی باشوور ڕووژهه‌ڵات كوردستان په‌يڕه‌و كرياس‌، فره‌تر كورده‌یل ئى به‌ش كوردستانه‌ ڕويوه‌ڕوی جينۆسايد فه‌رهه‌نگی و سياسه‌ت ئاسيميلاسيۆن بوينه‌سه‌و‌ و تا ئيسه‌يش ئه‌و سياسه‌ته‌يله‌ له‌لايه‌ن هه‌ردوو حكوومه‌ت ئيران و عێراقه‌و‌ وه‌رده‌وامن ‌و ناسنامه‌ی نه‌ته‌وه‌يی و زووان داڵگی و شێوه‌زاره‌گه‌يان ‌كريه‌نه‌ ئامانج. هه‌ر وه‌ى خاتريشه‌‌ فره‌تر كورده‌یل فه‌يلی توانای خوه‌نستن و نويسانن وه‌ زووان داڵگی نه‌ێرن. له‌ ڕووژهه‌ڵات كوردستان فارسی و له‌ ناوچه‌يل كوردستانى ده‌‌یشت ئيداره‌ی هه‌رێم و به‌غدا و ناوچه‌یل تر ناو‌ڕاس و باشوور عێراق خوه‌نه‌وارييان عه‌ره‌بيیه‌. وه‌يخاتره‌ بڕيار دام بێجگه‌ له‌ به‌شه‌ فه‌يليیه‌گه‌ی، هه‌ڵێبگه‌ردنمه‌و سه‌ر هه‌ردوو زووان فارسی و عه‌ره‌بیش. ئه‌ڕا ئه‌وه‌گ له‌ لاێگه‌و ده‌سمه‌يه‌تده‌رێگ بوود ئه‌ڕا ئه‌و خوه‌نه‌ره‌يله‌ ك‌ نيه‌تويه‌نن وه‌ ئاسانی به‌شه‌ كوردييه‌گه‌ی بخوه‌ننه‌و‌، له‌ لاێگ تريشه‌و‌ ئامانجم له‌و كاره‌ ئه‌وه‌ بوى خوه‌نه‌ر فارس و عه‌ره‌بيش بتويه‌نن كتاوه‌گه‌ بخوه‌ننه‌و‌.


كتاوه‌گه‌ وه‌ يه‌كه‌مين كتاو سياسی دا‌نريه‌ێد ك‌ وه‌ شێوه‌زار كوردی فه‌يلی نويسرياس‌، وه‌لێ خوه‌شبه‌ختانه‌ دويا كتاو نه‌وى و له‌شوون (گه‌وهه‌ره‌يل گرانقيمه‌ت) چه‌ن كتاوێگ سياسی تريش له‌ لايه‌ن نويسه‌ره‌یل كورد فه‌يليیه‌و‌، وه‌و شێوه‌زاره‌ نويسريانه‌، يا له‌ زووانه‌یل تره‌و‌ هه‌ڵه‌وگه‌رداننه‌سه‌ سه‌ر شێوه‌زار كوردی فه‌يلی، ك يه‌يش مايه‌ی دڵخوه‌شييه‌.


كاركردن له‌سه‌ر وه‌ نويسرياێ كردن شێوه‌زاره‌گه‌مان و زينگه‌وكردنێ، چه‌نه‌ها ساڵه‌ ده‌سوه‌پێكردێه‌، وه‌لێ له‌و ئاسته‌ نه‌ويه‌ ك بايه‌سه‌ بوياتاد، مه‌مه‌رێگ سه‌ره‌كييش ئه‌ڕا ئی گرفته‌ دۆخ كورده‌يل باشوور ڕووژهه‌ڵات كوردستانه‌ ك وه‌ی شێوه‌زاره‌ قسه‌ كه‌ن. ئی به‌شه‌ له‌ ملله‌ت كورد ك دابه‌ش بوينه‌سه‌ سه‌ر هه‌ردوو به‌ش باشوور و ڕووژهه‌ڵات كوردستان و په‌رته‌وازه‌و په‌رش و بڵاويش بوينه‌ له‌ناوبه‌ێن ناوچه‌يل جياجيای ئيران و عێراق و وڵاته‌يل تر دونيا له‌ دوخێگ سياسی و جيۆگرافی و فه‌رهه‌نگی ژيه‌ن ك مه‌سه‌له‌ی زينگه‌وكردن زووان داڵگييان فره‌ له‌لايان گرنگ نييه‌و ته‌نيا چينێگ نوخبه‌ی ڕووشنهوير و سياسين ك وه‌ ئاراسته‌ی گرنگيداين وه‌ زوان داڵگی و شێوه‌زار فه‌يلی و ناسنامه‌ی نه‌ته‌وه‌يی ئی به‌شه‌ له‌ ملله‌ت كورد خه‌بات كه‌ن ك وه‌داخه‌و شۆماره‌يانيش فره‌ نييه‌. ئمجا وه‌و مه‌مه‌ره‌يله‌ ك ئاماژه‌ وه‌پيان دريا و له‌لاێگ تريشه‌و وه‌خاتر ئه‌و كاره‌ساته‌يله‌ ك له‌ مێژووی هاوچه‌رخ ملله‌ته‌گه‌مان له‌لايه‌ن داگيركه‌ره‌يل كوردستانه‌و وه‌ سه‌ر ناوچه‌يل كرماشان و ئيلام و لوڕستان و خانه‌قين و مه‌نده‌لی و به‌دره‌و جه‌سان هاتيه‌و له‌لاێگ تريشه‌و لاوازی جمشته‌يل نه‌ته‌وه‌يی و ڕزگاريخوازی و حزبه‌يل كوردی له‌ ئه‌و ناوچه‌يله‌، لێوا وه‌ مه‌ردم ئی به‌شه‌ له‌ كوردستان كرديه‌ ك وه‌ به‌راورد وه‌ ناوچه‌يل تر كوردستان و پێكهاته‌يل تر ملله‌ت كورد، بارودوخێگ جياواز داشتوين له‌ ڕوی هوير و هزر نه‌ته‌وه‌يی و گرنگيداين وه‌ پرسه‌يل نه‌ته‌وه‌يی. يه‌يش لێوا وه‌ پێكهاته‌گه‌مان كرديه‌ ك له‌ پێكهاته‌يل تر ملله‌ته‌گه‌مان و ناوچه‌يل تر كوردستان بمێنێده‌ جێيه‌و. ئه‌ڕا چاره‌سه‌ركردنيشێ هه‌وه‌جه‌ وه‌ خه‌سارناسی و خه‌باتێگ بێ وچان دێرێ، نه‌ ته‌نيا له‌لايه‌ن خود ڕووڵه‌يل پێكهاته‌ی كورد فه‌يلی، به‌ڵكم ته‌نانه‌ت ئه‌ركێگه‌ ك كه‌فێده‌ بان شان چين ڕووشنهوير و نوخبه‌ی ملله‌ت كورد و حزبه‌يل كوردستانی و هه‌ر كوردێگ ك هه‌ڵگر هوير و فكر نه‌ته‌وه‌يی و كوردايه‌تييه‌.