له‌ منداڵیمدا، ترسێكی توند له‌ ئاگری جه‌هه‌ننه‌م و عه‌زابی ئیلاهى له‌ زه‌ینمدا بوو

من لە رەقە بووم - 25

به‌شی 16

هاندانى جیهاد له‌ لایه‌ن پێشنوێژخوێنى شاری نابله‌وه‌
به‌و پێیه‌ى، كه‌ له‌ شارى نابلدا نیشته‌جێ بووین. هێشتاكه‌ هاتوچۆی شارى دۆرتمۆندمان هه‌ر ده‌كرد. ئه‌مجاره‌ ڕه‌وتى كاره‌كه‌مان گۆڕابوو، ئه‌مجاره‌ بۆ هه‌میشه‌یی له‌ تونس و شارى نابلدا بووین و هاوێنه‌كانیشی سه‌رێكمان له‌ شارى دۆرتمۆند ده‌دایه‌وه‌. له‌ نه‌وه‌ده‌كاندا، كه‌ بۆ نابل ده‌گه‌ڕامه‌وه‌، گرژى و پێكدادانى بزووتنه‌وه‌ی ئیسلامی و نوێنه‌رى ئه‌و (واته‌ بزووتنه‌وه‌ى نه‌هزه‌) له‌گه‌ڵ حكوومه‌تى بن عه‌لیدا تازه‌ ته‌واو بووبوو، كه‌ ئه‌وكات شه‌ڕه‌كه‌ له‌ به‌رژه‌وه‌ندیى حكوومه‌تدا كۆتایی پێهات و سه‌دان كه‌س له‌ لایه‌نگرانى كه‌وتنه‌ به‌ندینخانه‌ و هه‌ندێكى تریان به‌ره‌و ده‌ره‌وه‌ هه‌ڵهاتن. له‌م داڵانه‌ دوو جه‌مسه‌رییه‌دا ده‌یانویست خۆیان بدۆزنه‌وه‌، هه‌ر له‌و كاته‌وه‌ ئه‌وه‌ له‌ زه‌ینى خه‌ڵكدا په‌یدابوو، كه‌ له‌ توونس جه‌نگێك به‌ناوى دژایه‌تیكردنی ئیسلام هه‌یه‌ و ئاوا هه‌لومه‌رجێك له‌ژێر چاودێری و زه‌ڕه‌بیندایه‌. ئیتر بڕیار بوو هه‌رزه‌كاریم له‌ ئاوا هه‌لومه‌ج و دۆخێكدا بگوزه‌رێنم.


له‌ شه‌ش ساڵیمدا هاتمه‌ ناو قوتابخانه‌یه‌كى خوێندن به‌ناوى (حبیب الكرم)، ناسراو به‌ (مكتب البحر) بوو، كه‌ له‌ سه‌نته‌رى شاردا بوو. ئه‌مه‌ ئیتر ئه‌و كاتانه‌ بوو، كه‌ نه‌مده‌توانى به‌م هۆیه‌وه‌ هاتوچۆمان بۆ ئه‌ڵمانیا هه‌بێت. دوو خوشكه‌كه‌شم بۆ هه‌میشه‌ له‌ ئه‌ڵمانیاوه‌ گه‌ڕانه‌وه‌. ئیدی هه‌موو خێزانه‌كه‌مان له‌ توونس پێكه‌وه‌ ده‌ژیاین.


له‌گه‌ڵ زیره‌كبوونم له‌ فێربوون و قوتابخانه‌دا، شتێك هه‌ر له‌و ده‌ستپێكى ساڵانى خوێندنه‌وه‌ واى له‌ من كرد ڕقم له‌ قوتابخانه‌ ببێته‌وه‌. پێده‌چێت په‌یوه‌ندیى به‌وه‌ بووبێت، كه‌ نه‌مده‌توانى له‌ شوێنێكدا به‌ ڕیكوپێكى ئۆقره‌ بگرم و وه‌كوو به‌شه‌ر دابنیشم. به‌ ڕاى من چوون بۆ مه‌كته‌ب شتێكى گاڵته‌ئامێزانه‌ بوو. زۆر گوێم نه‌ده‌دایه‌ وانه‌كانم. ئه‌و سه‌رنج و حه‌ز و خولیایه‌ى كه‌ قوتابییه‌كانى تر هه‌یانبوو، من نه‌مبوو. جگه‌ له‌ وانه‌ی بیركارى، كه‌ حه‌زم لێی بوو. له‌ ته‌واوى ڕه‌وتى خوێندنم له‌ قوتابخانه‌دا، چ له‌ قۆناغی سه‌ره‌تایی و چ له‌ ناوه‌ندی و چ له‌ ئاماده‌ییدا، هه‌ر شتێك كه‌ په‌یوه‌ندیى به‌ بیركارییه‌وه‌ بوو، من تیایدا زیره‌ك و لێهاتوو بووم.


ڕقبوونەوەم له‌ قوتابخانه‌ ده‌گه‌ڕایه‌وه‌ بۆ ئه‌و بیره‌وه‌رییانه‌ى، كه‌ هه‌ر له‌ ساڵى دووه‌مى سه‌ره‌تاییه‌وه‌ هه‌مبوو. مامۆستاى ئێمه‌ له‌و ساڵانه‌دا خانمێك به‌ناوى (مادام جلیله‌) بوو و به‌هۆیه‌ك، كه‌ نازانم چییه‌، زۆر ڕقی له‌ من ده‌بووه‌وه‌. ئه‌م خانمه‌ به‌رده‌وام له‌ منى ده‌دا و ده‌یگوت له‌ مێز و كورسیی كۆتایی پۆلدا دابنیشه‌ و هه‌ڵسوكه‌وتێكى له‌گه‌ڵ مندا ده‌كرد، كه‌ له‌گه‌ڵ ئاوا ته‌مه‌نێك گونجاو نه‌بوو. نمره‌كانم له‌و ساڵه‌دا به‌ته‌واوى دابه‌زین و هه‌ر ئه‌مه‌ش تا كۆتایی ساڵ به‌رده‌وام بوو. ساڵى سێیه‌مى خوێندنم ئه‌م دۆخى دابه‌زینى ئاستەم گۆڕا و توانیم به‌ جۆرێك قه‌ره‌بووى بكه‌مه‌وه‌، به‌ڵام كاریگه‌ریى ئه‌م خراپ هه‌ڵسوكه‌تكردنه‌ى ساڵانى پێشوو هه‌ر له‌ زه‌ینمدا له‌ ساڵانى دواتریش مایه‌وه‌ و به‌ جۆرێك له‌ خوێندن بێزارى كردم.


خه‌سڵه‌تێكى تر له‌و ساڵانه‌دا، كه‌ له‌ زه‌ینم ماوه‌، ئه‌وه‌ بوو كه‌ حه‌زم به‌ شه‌ڕ و ئاژاوه‌ بوو. زۆر بزۆز بووم و هه‌میشه‌ له‌به‌رچاوان بووم. زۆر جاریش هاوپۆل و خزمانم، كه‌ هاوته‌مه‌نم بوون (چ كچ یان كوڕ) لێدانیان به‌ ده‌ستم ده‌خوارد.


هه‌ر ئه‌م ڕۆحیه‌ شه‌ڕه‌نگێزیه‌م وای له‌ دایكم كردبوو، هه‌میشه‌ له‌ شه‌ڕه‌كانمدا پشتى لایه‌نى به‌رامبه‌رم بگرێت. له‌م شەڕانه‌دا هه‌میشه‌ داپیره‌م پشتى ده‌گرتم و زۆر په‌نام بۆ ئه‌و ده‌برد! ئه‌م هه‌ڵسوكه‌ته‌ى دایكم وای كردبوو هه‌ندێك جاریش، كه‌ من هیچ هه‌ڵه‌یه‌كم نه‌بووبێت، شته‌كانى لێ بشارمه‌وه‌. من له‌ ڕیزى ئه‌م منداڵانه‌دا بووم، كه‌ خۆیان تۆڵه‌ى خۆیان ده‌كرده‌وه‌ و چاوه‌ڕوانى كه‌س نه‌ده‌بوون تۆڵه‌یان بۆ بكاته‌وه‌.


له‌گه‌ڵ ئه‌مانه‌شدا، به‌ خۆشه‌ویستییه‌كى دایكانه‌وه‌ من گه‌وره‌ بووم، به ‌شێوازێك كاتێك بۆ ئه‌ڵمانیا سه‌فه‌رمان ده‌كرد، بۆ ئه‌وه‌ى دایكیشم بێت، چەندین سەعات له‌به‌رده‌رگا داده‌نیشتم و ده‌گریام. له‌گه‌ڵ ئاگالێبوونی تایبه‌ت، كه‌ دایكم سەبارەت به‌ من هه‌یبوو، هیچ كه‌س نه‌یده‌توانى جێگاى دایكم له‌ ماڵه‌وه‌ بۆ من بگرێته‌وه‌. ئه‌و خۆشه‌ویستییه‌ى له‌نێوان من و دایكمدا هه‌بوو، وه‌سف نه‌ده‌كرا. ڕاست بوو منى خۆشده‌ویست، به‌ڵام جیاوازییه‌كى زۆریشى له‌نێوان من و خوشكه‌كانمدا نه‌ده‌كرد.


من له‌ ته‌مه‌نه‌دا هه‌میشه‌ له‌ دایكم له‌باره‌ى بوونى خودا و ئه‌مه‌، كه‌ خودا له‌ كوێیه‌ و ئێمه‌ بۆ كوێ ده‌چین؟ پرسیارم ده‌كرد. له‌باره‌ى پێغه‌مبه‌ر و ئیسلام و قورئان پرسیارم له‌و ده‌كرد. ئه‌م پرسیاره‌ بۆ منداڵێك، كه‌ تازه‌ خه‌ریک بوو لە ده‌وربه‌رى تێبگات، سروشتى بوو. دایكم هه‌وڵى ده‌دا تا ئه‌و جێگایه‌ى كه‌ ده‌یتوانى وه‌ڵامم بداته‌وه‌، به‌ڵام چونكه‌ پرسیاره‌كانم زیاد بوون، هه‌ندێك جار به‌ بێتاقه‌تى و بێزارییه‌وه‌ ده‌یگوت، كاتێك خۆت گه‌وره‌ بوویت، ئه‌و شتانه‌ى كه‌ ئه‌مڕۆ نایزانى تێده‌گه‌یت.


گه‌وره‌ بووم و هه‌ستم ده‌كرد وه‌ڵامى پرسیاره‌كانم دۆزیوه‌ته‌وه‌. هه‌زاران كێلومه‌ترم به‌ پیاده‌ بڕی. بیابانى لیبیام تێپه‌ڕاند و ته‌له‌ دڕكاوییه‌كان له‌ سنوورى ته‌لئه‌بیه‌ز ده‌ستمى بریندار كرد و بڕی. بۆ دۆزینه‌وه‌ى واتاكانى ئیسلام و قورئان چووم بۆ شام. وامزانى پێیان گه‌یشتووم، به‌ڵام له‌ كۆتایی سه‌فه‌ره‌كه‌مدا خۆم له‌ سه‌رابی دابقدا بینییه‌وه‌.


خاڵى سه‌رنجڕاكێشی وته‌كانم له‌باره‌ى دایكمه‌وه‌ ئه‌مه‌ بوو، كه‌ كاتێك كارێكم ده‌كرد و ئازارم ده‌دا، یان منداڵی دراوسێكانم ئازار ده‌دا، یان لێم دەدان، هاوارى به‌سه‌رمدا ده‌كرد و هه‌ڕه‌شه‌ى لێ ده‌كردم، كه‌ خودا من ده‌خاته‌ جه‌هه‌ننه‌م و له‌وێدا ده‌مسووتێنێت و ئه‌مه كه‌ خه‌ڵك دواى مردنیان به‌پێى كار و كرده‌وه‌كان و به‌ندایه‌تیكردنیان بۆ به‌هه‌شت یان جه‌هه‌ننه‌م ده‌چن. ئه‌مه‌ له‌ ڕیزى ئه‌و شتانه‌دا بوو، كه‌ هه‌میشه‌ منى ده‌ترساند و ده‌له‌رزاند.


هه‌ر له‌و ساڵانه‌ى سه‌ره‌تای منداڵیمدا، ترسێكی توند له‌ ئاگری جه‌هه‌ننه‌م و عه‌زابی ئیلاهى هه‌میشه‌ له‌ زه‌ینمدا بوو و وازى لێ نه‌ده‌هێنام. ئه‌م بابه‌ته‌ له‌دواییدا به‌ بیركردنه‌وى هه‌میشه‌یی له‌باره‌ى سزای و عه‌زابی ئیلاهی گۆڕا. هیچ شتێك له‌ زه‌ینمدا له‌گه‌ڵ سزاى ئیلاهى و تووڕه‌بوونى خودادا به‌راورد نه‌ده‌كرا، له‌به‌ر ئه‌وه‌ ڕازیبوونى خودام هه‌میشه‌ به‌ ئه‌ركى خۆم ده‌زانى. پێده‌چێت هه‌ر ئه‌م هه‌ستى چاودێریكردنى كاره‌كان له‌ لایه‌ن خودا و سزاى ئیلاهى و قیامه‌ت بوو، كه‌ له‌ ماوى قۆناغی هه‌رزه‌كارى و گه‌نجێتیدا بوێریی ئه‌وه‌م نه‌ده‌كرد ئه‌و كارانه‌ ئه‌نجام بده‌م، كه‌ له‌ دیندا بە حه‌رام حیساب دەکران.


هه‌ر له‌و ته‌مه‌نى خواره‌وه‌، دایكم له‌سه‌ر نوێژكردنه‌كانم هه‌ستیار بوو. جگه‌ له‌ ماوه‌یه‌كى كه‌م له‌ ته‌مه‌نى 9 ساڵانمدا، كاتێك پۆلی چوار بووم، هیچكات نوێژخوێندنم ته‌رك نه‌كرد. نوێژ شتیك بوو، كه‌ هیچ باسوخواس و بیانوویه‌ك له‌باره‌یه‌وه‌ نه‌بوو.


له‌ ساڵانى هه‌رزه‌كاریم وه‌كوو هه‌موو كوڕه‌كانى تر، هۆش و زه‌ینم تا ڕاده‌یه‌ك به‌دواى كچه‌كانه‌وه‌ بوو و حه‌زم ده‌كرد له‌گه‌ڵیاندا ژوان دابنێم و پێكه‌وه‌ بچینه‌ ده‌ره‌وه‌. به‌ڵام ئه‌مانه‌ش هه‌ر واى لێ نه‌ده‌كردم نوێژه‌كانم واز لێ بێنم. له‌ دوو دونیای جیادا ده‌ژیام. له‌ نموونه‌ى ئه‌و ڕووداوانه‌ى ته‌مه‌نى نۆ ساڵیم، كه‌ پۆلی چوار بووم و له‌ زەینمدا ماوه‌ته‌وه‌، ئه‌وه‌ بوو دایكم پێى زانیم، كه‌ نوێژ ناكه‌م. ئه‌و ڕۆژانه‌ به‌ قسه‌یه‌كى پێی گوتم، كه‌ هه‌میشه‌ له‌ زەینمدا ماوەته‌وه‌، ئه‌ویش ئه‌وه‌ بوو (وامزانى بوویت به‌ پیاو)


ئه‌م ڕسته‌ هۆكارێك بۆ ئه‌وه‌ بوو (یان ئاواش بیر ده‌كه‌مه‌وه‌)، كه‌ له‌ هه‌ر هه‌لومه‌رجێكدا ئاگام له‌ نوێژه‌كانم بێت، ئه‌م ڕسته‌ ئه‌نگێزه‌یه‌كى گرنگى بۆ من له‌ به‌رده‌وامیى ژیانم به‌ئه‌ژمار ده‌هات. ئه‌م قسه‌یه‌ى دایكم هه‌م هیوابه‌خش بوو و هه‌م ژانیشی هه‌بوو.


له‌ هه‌موو بواره‌كانى په‌یوه‌ست به‌ ئایینه‌وه‌ (له‌ده‌ره‌وه‌ى ماڵه‌وه‌، دایكم منیشی له‌گه‌ڵ خۆیدا ده‌برد، بۆ نموونه‌، نوێژى ته‌روایح و ڕه‌مه‌زان و هه‌ڵبه‌ت وه‌كوو هه‌موو دایكانی تر منى وه‌كوو منداڵانى تر له‌ ڕیزى كۆتایی نوێژخوێنان جێ ده‌كرده‌وه‌. هه‌میشه‌ چاوه‌ڕوانى مانگى ڕه‌مه‌زان بووم، تا له‌گه‌ڵ دایكمدا بۆ مزگه‌وت بچم). له‌ مانگى ڕه‌مه‌زاندا، توونسییه‌كان موسڵمانتر ده‌هاتنه‌ به‌رچاو و هاتوچۆیان بۆ مزگه‌وت زیاتر بوو!


له‌م بابه‌ته‌دا خێزانى ئێمه‌ ڕێك وه‌كوو خێزانێكى نەریتپارێز له‌ ڕوانگه‌ى دینییه‌وه‌ به‌ ئه‌ژمار ده‌هات. خێزانێك هه‌روه‌كوو زۆربه‌ى خێزانه‌كانى توونس، پابه‌ند به‌ دین و دینداری بوو. ڕاستییه‌كه‌ى، به‌پێى قۆناغی دوورودرێژى ئاماده‌بوونى دایك و باوكم له‌ ئه‌ڵمانیا، هێشتنه‌وه‌ى ڕێگایه‌ك بۆ ڕه‌فتاری ئازادانه‌، هه‌ڵبه‌ت له‌ چوارچێوه‌وى ڕێز و پاراستنى سوننه‌ته‌كان، بابه‌تێك بوو، كه‌ له‌ مامەڵەی خێزانیمان له‌ ماڵه‌وه‌دا به‌رچاو ده‌كه‌وت.


هەڵبەتە منیش وه‌كوو منداڵانی تری هاوته‌مه‌نم هه‌ندێك جار بۆ مزگه‌وتى ئەلكەرەمه‌ بۆ نوێژى هه‌ینى ده‌چووم. منداڵه‌كان ماوه‌یه‌ك بۆ مزگه‌وت ده‌چوون و بۆ ماوه‌یه‌كی تر په‌یوه‌ندییان له‌گه‌ڵ مزگه‌وتدا ده‌پچڕا. ئیمامى مزگه‌وته‌كه‌ى ئێمه‌ شێخێك بوو، كه‌ بە (بوساع) ناسرابووو. مزگه‌وتى ئەلكەرەمه‌ بە مزگه‌وتى گه‌وره‌ى بنه‌ماڵه‌ و خانه‌دانى ئێمه‌ حساب دەکرا. بوساعیش وه‌كوو ئیمامانى دیكه‌ له‌ سه‌رده‌مى بن عه‌لیدا له‌باره‌ى هه‌ندێك بابه‌تى وه‌كوو ڕۆژى دره‌خت و ڕۆژى نیشتمانى سروشت و ئه‌م جۆرە بابه‌تانه‌، كه‌ له‌ بابه‌تى سیاسی دوورى ده‌خستیته‌وه‌، قسه‌وباسی جۆراجۆر ده‌كرا.


ئه‌گه‌رچى خوتبه‌ی بوساع له‌ ڕۆژانى هه‌ینیدا زۆر بێزاركه‌ر بوو، به‌ڵام ئه‌و خوتبانه‌ى، كه‌ له‌باره‌ى جیهاده‌وه‌ قسه‌وباسی ده‌كرد، زیاتر سه‌رنجى منى به‌ خۆیه‌وه‌ ڕاده‌كێشا، ته‌بعه‌ن له‌باره‌ى جیهاد له‌ دژى زاڵمان و دیكتاتۆره‌كانه‌وه‌ قسه‌ى نه‌ده‌كرد، به‌ڵكوو له‌باره‌ى جیهادى پێغه‌مبه‌ر و غه‌زواته‌كانیان له‌ سه‌رده‌مى پەیامبەریدا قسه‌وباسی ده‌كرد. بۆ من زۆر گرنگ بوو، كه‌ گوێ له‌ ڕیوایه‌ت و فه‌رمووده‌كانى جیهاد بگرم، تا قسه‌ جۆراوجۆره‌كانی تری ئه‌و.


بوساع له‌و باوه‌ڕه‌دا بوو، تاقه‌ جیهادى ئێمه‌ كه‌ جایزه‌ و ڕیگه‌پێدراوه‌، هه‌مان ئه‌و جیهاده‌ بووه‌، كه‌ له‌به‌رامبه‌ر داگیركه‌رانى فه‌ڕه‌نسا له‌ توونسدا ئه‌نجاممان داوه‌، له‌پاڵ ئه‌مه‌شدا، پێشنوێژ و ئیمامى مزگه‌وته‌كه‌ى ئێمه‌ هه‌ندێك جه‌ژن و ڕێوڕه‌سمى به‌ هه‌ل ده‌زانى و له‌باره‌ى جیهادێكى تره‌وه‌ قسه‌ى ده‌كرد، كه‌ ئه‌‌ویش بریتی بوو له‌ بنیاتنانى وڵات. به‌ڵام بابه‌تى گرنگ بۆ من جیهاد به‌ واتاى شه‌ڕی سه‌ربازى و مردن له‌پێناوى خوادا (جهاد فی سبیل الله‌) بوو. زۆر حه‌زم له‌ غه‌زووه‌كانى پێغه‌مبه‌ر (د.خ) و ئازایه‌تیى سه‌حابییه‌كان ده‌كرد، كه‌ له‌ مانگى ڕه‌مه‌زان له‌باره‌یانه‌وه‌ شتانێكم ده‌بیست. ئه‌و فه‌رمووده‌ و گێڕانه‌وانه‌ بۆ من جێى ئیلهام بوو و ئه‌وانم له‌ زه‌ینمدا پاراست. ئه‌گه‌رچى ده‌لاله‌ت و مه‌به‌ست له‌وان له‌ دواییدا له‌ ڕوانگه‌مدا گۆڕانى به‌سه‌ردا هات. به‌پێى ئه‌و تێگه‌یشتنه‌ى له‌ جیهاد هه‌مبوو و له‌باره‌ى جیهاده‌وه‌ پێى گه‌یشتبووم، حه‌زم ده‌كرد هه‌لومه‌رجی پێشووی داگیركاری له‌ وڵات دیسانه‌وه‌ سه‌رهه‌ڵبداته‌وه‌ و داگیركه‌رانى فه‌ڕه‌نسا دیسانه‌وه‌ بێنه‌ وڵاته‌كه‌مانه‌وه‌ و به‌ هاتنى ئه‌وان من دیسانه‌وه‌ خه‌ریكى جیهادكردن بم و له‌ ڕێى خودا له‌گه‌ڵیاندا بجه‌نگم. به‌ كه‌سانى پێشووتر، كه‌ له‌و ڕیگه‌یه‌دا كوژران و تیاچوون، خه‌فه‌تم ده‌خوارد و ئیره‌ییم پێیان ده‌برد.


ته‌مه‌نم نزیكه‌ى 10ساڵێك ده‌بوو، كه‌ ده‌ستپێكى ڕاپه‌ڕینی دووه‌مى فه‌له‌ستین ناسراو به‌ (ڕاپه‌ڕینى ئەقسا) ڕووی دا، بیرم له‌ زوڵمى داگیركه‌رانى ئیسڕائیل له‌ ناوچه‌ فه‌له‌ستینییه‌كان ده‌كرده‌وه‌ و له‌ خۆمم پرسی، بۆچی وڵاتانى عه‌ره‌بی هاوكاری فه‌له‌ستینییه‌كان نابن؟ بۆچیی له‌ فه‌له‌ستین جیهاد ڕاناگه‌یه‌ندرێت؟ هه‌ر كاتێك سه‌یری ته‌له‌ڤزیۆنم ده‌كرد و وێنه‌ى گرژى و ئاڵۆزیی فه‌له‌ستین و داگیركه‌رانى ئیسڕائیلم له‌ كه‌ناڵى (جه‌زیره‌) و كه‌ناڵه‌كانى تر ده‌بینى، خه‌مێكى قووڵ منى داده‌گرت.


من له‌ وه‌چه‌ى ئه‌و گه‌نجانه بووم، كه‌ به‌ به‌دواداچوونى ڕاپه‌ڕین و هه‌ستانه‌وه‌ى دووه‌م، بوونه‌ خاوه‌نى دروشمى ئیسلامى. دروشمى (الله‌ اكبر) ئاشكراترین دروشمى ئه‌م وه‌چه‌یه‌ بوو. ڕۆژنامه‌كانیش وه‌كوو كه‌ناڵه‌كان هه‌واڵى زوڵمكردن له‌ فه‌له‌ستنییه‌كانیان كردبووه‌ مانشێتى ڕۆژانه‌ى ڕۆژنامه‌كانیان و منیش له‌ ڕیزى ئه‌و كه‌سانه‌دا بووم، كه‌ جێم بۆ فه‌له‌ستین له‌ دڵمدا كردبووه‌وه‌. حه‌زێكى زۆرم بۆ هیجره‌تكردن بۆ فه‌له‌ستین و جیهاد له‌گه‌ڵ جووله‌كه‌كاندا په‌یدا كرد، چونكه‌ به‌ڕاستى ڕقم لێیان ده‌بووه‌وه‌.


جووه‌كان ناشیرینترین زاراوه‌ بوو له‌ وه‌چه‌ى مندا. من له‌و بڕوایه‌دا بووم گه‌نجانى گه‌ڕه‌ك و هاوپۆلییه‌كانیشم هه‌مان بیروباوه‌ڕى منیان هه‌یه‌، كه‌ جووه‌كان خه‌ریكن دونیا ئیداره‌ ده‌كه‌ن و خێر و خۆشیی ئیسلام و موسڵمانانیان ناوێت و ئه‌ركى ئێمه‌یه‌ دوابەیەکیان بكوژین. شتێك، كه‌ بۆ من جێى پرسیار بوو، ڕوانگه‌ى نه‌رێنیى حكوومه‌تى توونس له‌ گرژى و ئاڵۆزییه‌كان له‌ فه‌له‌ستیندا بوو. نه‌ دایكم و نه‌ باوكم به ‌دروستى ئاگایان له‌ بابه‌ته‌ سیاسییه‌كانی ڕۆژ نه‌بوو. نه‌ هه‌ڵوێستیان دژى حكوومه‌ت بوو، نه‌ پشتیوانییشیان ده‌كرد.


دوایین ساڵانى منداڵیم و یه‌كه‌مین ساڵانى هه‌رزه‌كاریم پڕ بوو بوو له‌ خۆشه‌ویستیى بۆ فه‌له‌ستین و فه‌له‌ستینییه‌كان و فه‌رمووده‌كانى جیهادى پێغه‌مبه‌ر (د.خ) و سه‌حابه‌كانى ئه‌و. ئیتر هه‌رزه‌كاریم به‌ خۆشه‌ویستیى به‌ جیهاد بۆ فه‌له‌ستین گرێ درابوو. له‌و كاتانه‌دا عه‌قڵ و بوونم به‌پێى پێویست له‌باره‌ى واجب بوونى و لادانى زوڵم له‌سه‌ر فه‌له‌ستینییه‌كان پڕ بووبوو، به‌ڵام ئاوا كه‌ ئه‌م جۆره‌ جیهاده‌ له‌دواییدا بۆ جێگایه‌ك له‌ غه‌یری فه‌له‌ستین گه‌یشت، چیرۆكگه‌لێكى تره‌، كه‌ بۆتانى باس ده‌كه‌م.