چۆن بوومە نوێنەرێ یەکێتی؟

من و كەركووك - 29

شانازم به‌ هه‌موو وێستگه‌كانی ژیانمەوە، چونكه‌ له‌سه‌ر ئه‌رك و ماندووبونی خۆم سه‌ركه‌وتنه‌كانم بەدەست ھێناوە و بەوە گەیشتووم کە مەبەستم بووە، جیا لەوانە دەبێ بشڵێم‌ ‌ شكستی زۆریشم هاتووەتە ‌ڕێ له‌ هه‌ندێك شوێن و بواردا. بێ گومان شكسته‌كانیش بۆ من بوونەتە فێرگە، چونكه‌ له‌ شكسته‌وه‌ فێری هه‌نگاونان به‌ره‌و سه‌ركه‌وتنه‌كان بووم. ئەوسا و تا ئێستاش زۆر باوەڕم بەم وتەیەیە: "نەنگی ئەوە نییە بکەویت، بەڵکوو لەوەدایە کە نەتوانیت هەڵبستیتەوە".


ساڵی ٢٠١١ مەکتەبی پەیوەندییەکانی دەرەوەی یەکێتیی نیشتمانیی کوردستان، لە ئەمستەردامی پایتەختی هۆڵەندا، کۆنفرانسێكی بۆ نوێنەرایەتییەکانی ساز کرد، ئەودەم دکتۆر نەجمەدین کەریم بەرپرسی پەیوەندییە گشتییەکان و عەبدولڕەزاق فەیلی (خوا لێی خۆشبێ) بەرپرسی پەیوەندییەکانی دەرەوەی یەکێتیی نیشتمانیی کوردستان بوو، لەو کۆنفرانسەدا مەلا بەختیاریش وەک لێپرسراوی دەستەی کارگێڕیی مەکتەبی سیاسی بەشدار بوو.


کۆنفرانسەکە دوو رۆژی خایاند و سەرجەم نوێنەرایەتییەکانی یەکێتی تێیدا بەشدار بوون، هەر لەو کۆنفرانسەدا پاش پێشنیار و گفتوگۆی ورد، من وەك نوێنەری یەکێتیی نیشتمانیی کوردستان لە برۆکسل، هەڵبژێردرام. ئیدی بڕیار درا لە ماوەیەکی گونجاودا لە برۆکسلی پایتەختی بەلجیکا ئوفیسێك بۆ نوێنەرایەتی دابمەزرێنم و وەک نوێنەرایەتییەکانی تری یەکێتی لە وڵاتان، بودجەی تایبەتی بۆ دابین بکرێت.


زۆر بەخێرایی کەوتمە راپەڕاندنی کاروبارەکان، لێ سەیر لەوەدا بوو لە سەروبەندی سەرقاڵبوونم بە ئامادەکاری و گەڕان بە دوای شوێنێكدا بۆ ئۆفیس، لەناکاو بڕیارێکی تر لە پەیوەندییەکانەوە دەرکرا بەوەی زانا هەورامییش وەک نوێنەری یەکێتی لە برۆکسل دەستنیشان کراوە!


لە ڕاستیدا ئەو هەواڵە بۆ من شتێکی چاوەڕواننەکراو بوو، تێنەگەیشتم بۆچی و لەسەر چ بنەمایەك ئەم بڕیارە دراوە؟ھەر زوو ناڕەزایی خۆم گەیاندە عەبدولڕەزاق فەیلی وەک بەرپرسی راستەوخۆی خۆم، لێ فەیلی دڵنیایی دامێ کە هیچ شتێك لە رەوش و کاری من ناگۆڕێ و زانا هەورامی تەنیا بە ناو دەبێتە نوێنەر، بەڵام ھەردووکمان ھەمان پلە و دەسەڵات و ئیمتیازاتمان دەبێت. لەم سۆنگەیەوە ئیدی منیش پابەند بووم بەو ڕێککەوتنەی نێوان من و پەیوەندییەکانی دەرەوەی یەکێتی و وەك خۆم مامەوە و ئۆفیسمان دامەزراند، پاش ماوەیەکی کورت لەو بڕیارە، ناکۆکییەك لەنێوان زانا هەورامی و عەبدولڕەزاق فەیلی دروست بوو، هەر بەهۆی ئەو دەمەقاڵێیەوە زانا هەورامی سڕ کرا، بەدوایدا سەرلەنوێ بڕیار درا کە من ببمبەوە بە تاکە نوێنەری یەکێتی لە برۆکسلی پایتەختی بەلجیکا، له‌ ماوەی كاركردنی تەنیا و هاوبەشیشم وه‌ك نوێنه‌ر توانیم كۆمه‌ڵێك ڕێكخراو و ئۆرگان و كه‌سایه‌تی وه‌ك شاند ببه‌مه‌وه‌ بۆ كوردستان، لێ دوای تەوابوونی ماوەی سڕکردنەکەی، دیسان زانا هەورامی هاتەوە سەر کار و جارێکی تر هاوشانی یەکتر کارمان کرد، بەو شێوەیەش ئێمە تاکە نوێنەرایەتیی یەکێتی بووین و تاکە شوێنی ئەو حزبە بووین کە بە سیستەمی (هاوسەرۆکی!) کارمان کردبێت. ماوەیەك بەو شێوەیە ماینەوە، بەڵام وردە وردە ئیدی هەستم دەکرد لەگەڵ شێوازی ئیدارە و مامەڵەی کارگێڕیی زانا هەورامی ناتوانم هەڵبکەم، زۆر کێشەی ئیداریمان هەبوو، رۆژێکیان ناکۆکییەکەمان گەیشتە ئەوەی ئیدی ئۆفیسم بەجێ هێشت و چوومە ماڵەوە، هەر دەستبەجێ سکاڵای خۆمم گەیاندە بەڕێزان (نەجمەدین کەریم و عەبدولڕەزاق فەیلی)، تا کار گەیشتە ئەوەی کە ئیتر پێویستە رێگەچارەیەك بدۆزنەوە یان من لە نوێنەرایەتی بمێنمەوە یان زانا هەورامی. دواجار بە بڕیاری مەلا بەختیار و عەبدولڕەزاق فەیلی، زانا هەورامی لە نوێنەرایەتیی برۆکسل مایەوە، هەروەها بڕیاریش درا من وەك نوێنەری یەکێتی لە سلۆڤینیا و بۆسنە و هەروەها کاروباری بازرگانی لە وڵاتی بەلجیکا دەستبەکار بم.


هەڵبەتە ئەو بڕیارە بۆ ماوەی ساڵێك بوو، چونکە هەستم کرد تەنیا بۆ رازیکردنی دڵی من و ئارامکردنەوەم بوو، دەنا هیچ بودجەیەکیان بۆ ئەو نوێنەرایەتییە تەرخان نەکردبوو تا بتوانم لە سلۆڤینیا نیشتەجێ بم، گەر ئەوەش نەبێ هاتوچۆکردنیش ئاسان نییە هەموو کات لەسەر ئەرکی خۆم بچم و بێمەوە. لەو نێوەندەدا ئیدی رزگار عەلی بۆ جێگەکەی دکتۆر نەجمەدین کەریم دەستنیشان کرا. بۆ ئەو بەڕێزەش چەند جارێك ئەو داوایەم بەرز کردەوە کە دەبێ چارەیەك بۆ سلۆڤینیا بدۆزنەوە، بەڵام ئەوەی کە زۆر سەرسوڕھێنەر بوو، ئەوە بوو کە لەبری ئەوەی خەمێکی لە پشینشیارەکەم بخۆن، بەپێچەوانەوە بڕیارێکی لەناکاو دەرکرا کە ئیدی من لەوێش نەمێنم و ئازادم لە کارکردن لە هەر جێیەک و ئەو پلە و ئیمتیازەی ھەشمبوو لێیان وەرگرتمەوە.
دوای ئەو بڕیارە، هیچ هەڵوێستێکم نەنواند، وازم لە کاری حزبی هێنا و وەك چالاکوانێکی سەربەخۆ مامەوە.


له‌ دوای ئه‌و گۆڕانكارییانه‌ی دەرەنجامی ئەو رووداوانە له‌ بۆچوونی سیاسیی مندا هاتبوونه‌ ئارا، كه‌متر ‌لە چالاکییە حزبییەکاندا ئامادەییم هه‌بوو، بەڵام له‌ كاروباری رێكخراوه‌یی و میدیایی و دیبلۆماسیدا له‌ جاران چالاكتر بووم، ئیدی لەوە بەدواوە خۆم وابەستەی هیچ حزبێک نەکرد و وه‌ك چالاكوانێكی کوردی سه‌ربه‌خۆ كارم ده‌كرد.


وەك باسم کرد، برۆکسل ناوەندێکی گرنگە و قورساییەکی سیاسی گەورەی هەیە، منیش یەکێکم لەو ژنانەی وزە و توانیا کارکردن لە خۆمدا شک دەبەم، بۆیە ناتوانم بێ چالاکی بم، بەردەوام ئارەزووی چالاکی سیاسی و رێکخراوەیی و ڕۆژنامەوانی دەکەم.


بەم هۆیەوە، وێستگەیەکی دیکەم هەڵبژارد بۆ بەردەوامبوون لە چالاکی، لەگەڵ چەند هاوڕێیەکم دوو رێکخراومان دامەزراند، یەکێکیان بە ناوی (کۆمەڵەی نیگا) کە ڕێکخراوێکی کولتووری بوو بۆ رەوندی کورد لە بەلجیکا، ھەروەھا رێکخراوێك لەگەڵ چەند کەسێکی بیانی کە رێکخراوێکی مرۆیی بوو. هەڵبەتە بەهۆی ئەوەی لەناو ناوەندی بەلجیکا خۆم ناساندبوو، هەر کار و چالاکییەك ساز بکرایە ئامادەییم هەبوو.


بە دوای ئەویشدا وه‌ك ئه‌ندامێكی (كۆنگره‌ی نه‌ته‌وه‌یی كوردستان) له ‌زۆربه‌ی ئه‌و كار و چالاكییانه‌ی كه‌ ساز ده‌كران، بەشدارێکی کارا بووم، نەخاسمە له‌مه‌ڕ پرسه‌ نه‌ته‌وایەتییه‌كان و‌ هه‌ر چالاكییه‌ك کە له‌ كۆمسیۆنی ژنان ڕێك ده‌خرا، پێوەند به ‌راوێژكردن یان پێشنیار و پلانسازی و ئاماده‌كردنی سمینار بۆ سه‌رجه‌م ئاریشه‌كانی پرسی ژنان ئاماده‌ییم هه‌بووە‌.


تێکەڵبوونیشم لەگەڵ (کۆنگرەی نەتەوەیی کوردستان) ھەروا بە ڕێکەوت نەبوو، بە حوکمی ئەوەی بارەگای سەرەکیی کۆنگرەی نەتەوەیی لە برۆکسل بوو، منیش پێشتر بەھۆی کار و چالاکییەکانمەوە تێکەڵ بووبووم لەگەڵ ھەندێك لە کەسایەتییەکان و چەندین کار و پرۆژەی ھاوبەشمان پێکەوە ئەنجام دابوو.


ساڵی ٢٠١٢ لەسەر پێشنیاری بەڕێزان تاهیر کەمال زادە کە ئەودەم هاوسەرۆکی کۆنگرەی نەتەوەیی کوردستان (کەنەکە) و زوبێر ئایدر کە ئەوکات ئەندامی کۆنسەی کەنەکە بوو، داوام لێ کرا ببم بە ئەندامی کۆنگرەی نەتەوەیی کوردستان، منیش ئەو داوایام پەسەند کرد و وەك ژنێك کە چەندین ئەزموونی رابردووم ھەبوو لە کاری میدیایی، حزبی و رێکخراوەیی، بوومە ئەندام لەو رێکخراوە.


هۆكاری دانه‌بڕانیشم لەم چالاکییە نەتەوەییانەی کوردانی ئەوروپا، بۆ ئه‌و نادادپه‌روه‌رییه‌ی كۆمه‌ڵگەی نێوده‌وڵه‌تی دەگەڕێتەوە‌ کە به‌رامبه‌ر پرسی كوردان له‌ هه‌ر چوار پارچه‌ی كوردستان هەیەتی.