کێ (خەلیفە)ی کوشت؟!

كوژرانى به‌غدادى له‌ژێر حوكمى جۆلانیدا

ئه‌گه‌ر و سیناریۆكان
سه‌رله‌ئێواره‌ى رۆژى دووشه‌ممه‌، سه‌رۆك ترامپ، ئه‌و ده‌نگۆیه‌ى یه‌كلا كرده‌وه‌، كه‌ گۆڤارى (نیوزویك)ى ئه‌مه‌ریكى له‌مه‌ڕ كوژرانى ئه‌بووبه‌كر به‌غدادى بڵاوی كردبووه‌وه‌، له‌ ئۆپه‌راسیونێكى سه‌ربازیى هێزه‌ تایبه‌ته‌كانى ئه‌مەریكا له‌ شاری ئیدلب له‌ باكوورى رۆژئاواى سووریا، ئه‌ویش به‌ پشتڕاستكردنه‌وه‌ى هه‌واڵى كوژرانی به‌غدادى. دیاره‌ قسه‌كه‌ى تۆڕى هه‌واڵى (سى ئێن ئێن)ى ئه‌مەریكییش ڕاست ده‌رچوو، به‌وه‌ى كه‌ به‌غدادى به‌ كرده‌وه‌یه‌كى خۆكوژی كوتایى به‌ ژیانى خۆى هینابوو، وه‌لێ ئه‌فسووس دوای ئه‌وه‌ى ئه‌م‌ تاوانكاره‌ بووه‌ هۆى كوژرانی سه‌دان هه‌زار هاووڵاتیی عێراقی و سووریى به‌دبه‌خت.


سه‌رۆك ترامپ، له‌ كاتى کۆنگره‌ رۆژنامه‌وانییه‌كه‌دا، له‌ ترۆپكى سه‌ركه‌وتندا بوو، وه‌ك پاڵه‌وانێكى زۆرانباز خۆى نماییش ده‌كرد، به‌ڵام جیا له‌ جاران، قسه‌ى هه‌له‌ق و مه‌له‌قى نه‌كرد، به‌پێچه‌وانه‌وه‌ هه‌رچه‌ند وتاره‌كه‌ى درێژ بوو، به‌ڵام نهێنی پارێز و دانگر به‌خۆ بوو، له‌باره‌ى ئاشكرانه‌كردنى ته‌واوى ورده‌كارییه‌ نهێنییه‌كانی ئۆپه‌راسیونه‌كه‌. ”ئه‌و نهێنییانه‌ى، كه‌ به‌ ئاشكراكردنیان، مه‌ترسیی بۆ سه‌ر گیان و ژیانی ئه‌و تیمه‌ هه‌واڵگرییه‌ ئه‌مەریكییه‌ دروست ئه‌كات، كه‌ شوێنهه‌ڵگرى به‌غدادى بوون“ به‌ وته‌ى ترامپ.


سوپاسگوزاریى پێشكه‌ش به‌ وڵاتانی (رووسیا و توركیا و سووریا و عێراق) کرد، هه‌روه‌ها باسى ئه‌وه‌ى كرد، كه‌ كورده‌كان (مه‌به‌ستى هێزه‌كانى سووریاى دیموكرات)ه‌، كۆمه‌ڵیك زانیاریى به‌سوودیان پێشكه‌ش كردووه‌، به‌ڵام "به‌بێ ئه‌وه‌ى هیچ رۆڵێكی سه‌ربازییان هه‌بووبێ" ئه‌مه‌ به‌ گوته‌ى ترامپ خۆى له‌میانى كۆنگره‌كه‌دا.


ئه‌وه‌ى له‌باره‌ى ئۆپه‌راسێونه‌كه‌وه‌ باس ده‌كرێت ئه‌وه‌یه‌، كه‌ پرۆسه‌كه‌ له‌ لایه‌ن 70 سه‌ربازى سه‌ر به‌ دوو یه‌كه‌ى تایبه‌تى ئەمەریکییەوه‌ ئه‌نجام دراوه‌ و پرۆسه‌كه‌ش له‌ 100% ئه‌مەریكى بووه‌. به‌م قسه‌یه‌ش ترامپ هه‌موو ده‌ستكه‌وته‌كه‌ى به‌ مۆرى (made in usa) نه‌خشاند و هیچ بوارێكى بۆ هیچ لایه‌ن و وڵاتێك نه‌هێشته‌وه‌، كه‌ خۆى هه‌ڵقورتێنى و خۆى بكاته‌ شه‌ریكه‌به‌ش، كرده‌كه‌ش به‌پێى ئه‌و هه‌واڵانه‌ى، كه‌ له‌ سووریاوه‌ باسی لێ ده‌كه‌ن، سه‌ره‌تا به‌ پێكانى كۆمه‌ڵێك یه‌كه‌ى چه‌كداریى جوولا و به‌ ئۆتۆمبیلى دۆشكه‌هه‌ڵگر و چه‌كدارى پڕ چه‌ك له‌ ڕێى فڕۆكه‌وه‌ و پاشان به‌ دابه‌زاندنى سه‌رباز له‌ ده‌ورى مۆڵگه‌ى به‌غدادى له‌ شاره‌دێى (باریشا)، كه‌ سه‌ر به‌ پارێزگاى ئیدلبه‌، كه‌ له‌ژێر كونترۆڵی ده‌سته‌ى ڕزگاریى شامدایه‌ ( به‌ره‌ى نوسڕه‌)ى كۆن، پاشان سه‌ربازه‌ ئەمەریکییەكان توانیویانه‌ له‌و تونێله‌ى خۆى تێدا حه‌شار داوه‌، گه‌مارۆیه‌كى مه‌حكه‌مى مۆڵگه‌كه‌ى به‌غدادی بده‌ن. به‌ گوته‌ى سه‌رۆك ترامپ، تونێله‌كه‌ له‌ کۆتاییدا ده‌روازه‌ى تیادا نه‌بووه‌ و به‌غدادییش خۆی به‌ده‌سته‌وه‌ نه‌داوه‌ و خۆى به‌ ته‌قاندنه‌وه‌ى پشتوێنى مینڕێژكراوەوە كوشتووه‌ و له‌و كاته‌شدا ژن و منداڵه‌كانى له‌گه‌ڵدا بوون.


به‌ڵام با بزانین به‌غدادى چۆن توانیویه‌تى له‌ باغۆزه‌وه‌ له‌نزیك رۆژهه‌ڵاته‌وه‌ خۆى بگه‌یه‌نێتە ناوچه‌ گوندنشینه‌كانى ئیدلب له‌ باكوورى رۆژئاوا له‌سه‌ر سنوورى توركیا، كه‌ له‌نێوانیاندا سه‌دان بازگه‌ و ده‌یان جێگاى ژێر ده‌سته‌ڵاتى گرووپی توندى جیاواز جیاواز و دژ به‌یەكی بڕیوه‌، به‌ یه‌په‌گه‌وه‌ تا ده‌گاته‌ رووسیا و رژێمی سووریا و گرووپه‌ تیرۆریسته‌كان و سوپای به‌ناو ئازادى سووریا و ئه‌و گرووپانه‌ى كه‌ سه‌ر به‌ توركیان! ئه‌مه‌ش په‌نهانییه‌كى گه‌وره‌یه‌ و ده‌بێت به‌دواداچوونی بۆ بكرێت، به‌ڵام ده‌بێ ئه‌وه‌ش بزانین، كه‌ پاره‌ كارى سه‌رسوڕهێنه‌ر ده‌كات، پاشان ئایا ڕاسته‌ كه‌ ویستوویه‌تى خۆى بگه‌یه‌نێته‌ توركیا؟ پاشان چۆن توانیویه‌تى ئه‌م چه‌ند وه‌خته‌ له‌ ئیدلب جێگاى خۆى بكاته‌وه‌، له‌كاتێكدا كه‌ ئه‌و پارێزگایه‌ له‌ژێر ده‌سه‌ڵاتى ده‌سته‌ى ڕزگاریى شامدایه‌ (به‌ره‌ى نوسڕه‌) به‌ ئیماره‌تى (ئه‌بوو محمه‌د جۆلانى)، كه‌ دوژمنى سه‌رسه‌ختى داعش و خه‌لیفه‌كه‌یه‌تى؟ له‌ڕاستیدا داعش پێش ئه‌وه‌ى باغۆز دوایین مۆڵگەى سه‌ربازیى داعش هه‌ره‌س بێنێ، سه‌ركردایه‌تیى داعش سه‌رگه‌رمى دۆزینه‌وه‌ى جێپێیه‌كى تر بوون له‌ جێگایه‌ك، كه‌ هیچ كه‌س به‌ خه‌یاڵیدا نه‌یه‌ت له ‌بنده‌ستى به‌ره‌ى نوسڕه‌، ئه‌ویش به‌وه‌ى كه‌ داعش هه‌لى ئینشقاقی هه‌ردوو گرووپی توندڕه‌وى (احرار الشام و صقور الشام) له‌ به‌ره‌ى نوسڕه‌ی قۆسته‌وه‌ و توانى كۆمه‌ڵێ ناوچه‌ی گوندنشینه‌كانى ئیدلب بخاته‌ ژێر ده‌سته‌ڵاتى خۆیه‌وه‌ و ورده‌ ورده‌ش له‌وێوه‌ هاتنى به‌غدادى، كه‌ له‌ژێر ناوی (أبو محمد الحلبی) و منداڵ و ژنه‌كانى و كۆمه‌ڵێك هاوه‌ڵى بۆ (باریشا) فه‌راهه‌م بكات، به‌ڵام دیاره‌ خۆقوتاركردن و چوونه‌ ناو خاكى توركیا كارێكى ئه‌سته‌م بووه‌، بۆیه‌ تا كوژرانى نه‌یتوانیوه‌ خۆی و خێزانه‌كه‌ى قوتار بكات.

 

سه‌ردانه‌كه‌ى مایك پنس بۆ توركیا
بێ شك پرۆسه‌كه‌ ئه‌وه‌نده‌ى له‌باره‌وه‌ زانراوه‌ و هه‌رچییه‌كیش له‌باره‌ى پرۆسه‌یه‌كى هه‌واڵگریى له‌م جۆره‌ بگوترێ، دوور له‌ خیتابى فه‌رمیى لایه‌نى ئه‌نجامده‌ر، ڕه‌نگه‌ تووشی سه‌رئێشه‌ و لێپرسینه‌وه‌مان بكات، به‌ڵام من هه‌رچه‌ند سه‌ر دێنم و ده‌بەم، ناتوانم سه‌ردانه‌كه‌ى چه‌ند رۆژ له‌مه‌وبه‌رى (مایك پنس) جێگرى سه‌رۆكى ئه‌مەریكا بۆ توركیا و كۆبوونه‌وه‌ى له‌گه‌ڵ سه‌رۆكى توركیا ئه‌ردۆغان، به‌دوور بگرم له‌م كه‌ینوبه‌ینه‌ى كه‌ ڕووی داوه‌. له‌ڕاستیدا گومانى ئه‌وه‌ ده‌كه‌م، كه‌ پنس، سه‌رۆكى توركیاى ئاگادار كردبێته‌وه‌ له‌وه‌ى كه‌ به‌غدادى له‌و زۆنى ئاگربه‌سته‌دا ده‌ژى، كه‌ توركیا به‌درێژایی سنوورى له‌گه‌ڵ سووریادا ڕای گه‌یاندووه‌ و شه‌ڕى بۆ ده‌كات و‌ ده‌شبێ ئه‌وه‌ بزانین، كه‌ سه‌ره‌ڕاى ناكۆكییه‌كان له‌مه‌ڕ پشتیوانیی ئه‌مەریكا بۆ هێزه‌كانى سووریاى دیموكرات و هێرشی توركیا بۆ سه‌ر ناوچه‌ كوردییه‌كانى سووریا، هه‌ردوولای ئه‌مەریكا و توركیا له‌ 7ی مانگى ئابى ڕابردوودا ژوورێكى هاوبه‌شی پرۆسه‌ى سه‌ربازییان پێكهێنا، بۆ سه‌رپه‌رشتیكردنى ناوچه‌ی ئارام له‌نێوان توركیا و سووریا، توركیاش بۆ نواندنى ئه‌ستۆپاكیى خۆى له‌باره‌ى داڵده‌نه‌دانى به‌غدادى، چی له‌به‌رده‌ستدا بووبێ خستوویه‌تییه‌ خزمه‌تى (پنس). له‌ڕاستیشدا توركیا پشتگیریى ئه‌و گرووپانه‌ ده‌كات، كه‌ وابه‌ستەن به‌ به‌رنامه‌ى ده‌وڵه‌تى توركیاوه‌، وه‌ك سوپاى سووریاى به‌ ناو ئازاد و (جیش الرحمن و احرار الشرقیه‌)، كه‌ ئه‌مانه‌ش به‌ رووكار دوژمنایه‌تییه‌كى سه‌ختیان له‌گه‌ڵ داعشدا هه‌یه‌، بگره‌ له‌ناوبردنى به‌غدادى پەرشوبڵاوبوونه‌وه‌ى داعش ده‌گه‌یه‌نێ، ئه‌مه‌ش ته‌واو له‌ به‌رژه‌وه‌ندیى ئه‌و گرووپانه‌دایه‌، كه‌ توركیا پشتگیرییان ده‌كات، توركیاش له‌پێناو ئه‌وه‌ى ئه‌مەریكا رۆڵى هێزه‌كانى سووریاى دیموكرات فه‌رامۆش بكات، ئه‌م كاره‌ى كردووه‌ و هه‌روه‌ها ئابوورییه‌كه‌شی له‌ هه‌ڕه‌شه‌ى هه‌ره‌سپێهینان له‌ لایه‌ن ترامپه‌وه‌ ڕزگار كردووه‌، نه‌ك ته‌نیا له‌به‌ر خاترى چاوى كاڵى كوردانى ڕۆژئاوا و هەسەدە.

 

سووریاى دیموكرات و كوژرانی به‌غدادى
هاوكات له‌گه‌ڵ كۆنگره‌كه‌ى ترامپدا، هێزه‌كانى سووریاى دیموكرات له‌ پارێزگاى حه‌سه‌كه‌، کۆنگره‌یه‌كى رۆژنامه‌وانیى به‌ست و تیایدا قسه‌كه‌ر به‌ ناوى (هەسەدە) ڕای گه‌یاند، كه‌ به‌غدادى له‌ پرۆسه‌یه‌كى سه‌ربازیى هاوبه‌شدا كوژراوه‌ و پرۆسه‌كه‌ش چه‌ند مانگێكه‌ ئیشی بۆ ده‌كرێ و به‌هۆى هێرشه‌كانى توركیاوه‌ مانگێك دواكه‌وتووه‌. من وای تێده‌گه‌م كه‌ (هەسەدە) بیه‌وێت وامان لێ بگه‌یه‌نێت، كه‌ هێشتا ئه‌و له‌ گه‌مه‌ سیاسی و موخابه‌راتییه‌كانى سووریادا رۆڵ ده‌گێڕێت، ده‌نا ترامپ ڕای گه‌یاند، كه‌ هەسەدە هیچ رۆڵێكى سه‌ربازییان نه‌بووه‌ له‌ كوشتنى به‌غدادیدا، هه‌ر چه‌ند رۆژێك له‌مه‌وبه‌ریش ترامپ له‌ توویتێكیدا نووسیبووى كه‌ "پەكەكە له‌ داعش خراپتره‌". ئه‌مه‌ش له‌ڕاستیدا به‌یانى كوتاییهاتنى رۆڵی (هەسەدە) ده‌كات. ناڵێم ئەمەریکا چیدى هه‌ڵسوكه‌وتیان له‌گه‌ڵدا ناكات، به‌ڵكوو ئەمەریکا بۆ زامنكردنى به‌رژه‌وه‌ندییه‌كانى خۆى وه‌ك هێزێكى (به‌كرێگرته‌) به‌كاریان دێنێت، بۆ پاراستنى زۆنى ئه‌و ناوچانه‌ى نه‌وتیان تێدایه‌، نه‌ك وه‌ك شه‌ریكێكى ستراتیژى له‌ شه‌ڕى داعش و هه‌ر شه‌ڕێكى تردا، ترامپیش ڕاشكاوانه‌ له‌ کۆنگره‌كه‌دا داواى پشكى ئەمەریکاى كرد له‌ نه‌وتى سووریا، كه‌واته‌ مه‌سه‌له‌كه‌ ته‌واو به‌رژه‌وه‌ندیى ئابوورییه‌ و هیچ بوارى عاتیفه‌ و سۆز له‌ هزرى ئیداره‌ى ئه‌مەریكیدا نییه‌!

 

هه‌ڵوێستى رووسیاى فیدراڵ
ترامپ، سوپاسگوزارییه‌كى زۆرى پێشكه‌ش به‌ رووسیا كرد و گوتى: "رووسه‌كان ئاسمانى فڕینى خۆیانیان بو ئێمه‌ واڵا كرد بۆ جێبه‌جىكردنى پرۆسه‌كه‌". بەڵام هه‌ر زوو وه‌زاره‌تى ده‌ره‌وەى رووسیا هاته‌ ده‌نگ و به‌یانێكى ده‌ركرد، تیایدا هاتووه‌ كه‌ "ڕووسیا ئاگادارى جێبه‌جێكردنى پرۆسه‌یه‌كى ئه‌مریكیى له‌و جۆره‌ نییە له‌ سووریا ". هه‌روه‌ها له‌ به‌یانه‌كه‌دا هاتووه‌ كه‌: "ئەمەریکا به‌م راگه‌یاندنه‌ به‌ئه‌نقه‌ست ده‌یه‌وێت گرووپه‌ توندڕه‌وه‌كان رقئه‌ستوور بكات به‌رامبه‌ر سه‌ربازه‌كانى ڕووسیا له‌ سووریا". كه‌واته‌ رووسیا به‌و هه‌موو هێز و توانا و سه‌ردارییه‌ى كه‌ هه‌یه‌تى، خۆى بێبه‌ری ده‌كات له‌ به‌شداریكردن له‌م ڕووداوه‌ گرنگه‌دا، كه‌چی هێزێكى وه‌ك هەسەدە به‌زۆر خۆی ده‌كات به‌ شه‌ریكه‌به‌شی سه‌ره‌كیى، ئه‌مه‌ش به‌ڕاى من ناكامڵیى هزرى هه‌واڵگریى (هەسەدە)ه،‌ ده‌نا بۆ ڕووسیا به‌شدار نه‌بووه‌، ئه‌سڵه‌ن رووسیا كۆنترۆڵى ئاسمانیى ئیدلبى كردووه‌ و له‌ ناوچه‌كه‌شدا ته‌نگى به‌ ئەمەریکاش هه‌ڵچنیوه‌، به‌ڵام ڕووسه‌كان زیره‌كن و ده‌زانن ئه‌م خوێنه‌ (كوژرانى به‌غدادى) ڕووبارێك خوێن به‌دواى خۆیدا دێنێ!


ته‌نانه‌ت ترامپیش ناوى به‌رپرسانى هه‌واڵگرى و ئه‌و عه‌قڵانه‌ى، كه‌ شوێن پێی به‌غدادییان هه‌ڵگرتووه‌، به‌نهێنى هێشته‌وه‌، هه‌رچه‌نده‌ كه‌ ئه‌و عه‌قڵانه‌ له‌ ئەمەریکا ده‌ژین و پارێزراون، چوون ئه‌وان ده‌زانن مامەڵه‌ له‌گه‌ڵ كێ ده‌كه‌ن، ئه‌وان خه‌لیفه‌ى توندڕه‌وكانیان كوشتووه‌، كه‌ هێشتا هه‌زاران چه‌كدار و خانه‌ى نووستووى هه‌یه‌، به‌ڵام كورده‌کەی هەسەدە، كه‌ هیچی له‌به‌رده‌ستدا نییه‌ و به‌ته‌نیا ماوه‌ته‌وه‌ و ناچار بووه‌ په‌نا بۆ ڕژیمى سووریا به‌رێت، دێت خۆى ده‌كاته‌ بكوژى به‌غدادى.

 

ئێران و پرۆسه‌ى كوشتنى به‌غدادی
له‌گه‌ڵ بڵاوبوونه‌وه‌ى ده‌نگۆى كوشتنی به‌غدادى، سه‌رچاوه‌ فه‌رمییه‌كانى ئێران ڕایان گه‌یاند، كه‌ ئەمەریکا پێشوه‌خته‌ ئێرانى له‌ ئه‌نجامدانى پرۆسه‌كه‌ ئاگادار كردووه‌ته‌وه‌، ئه‌مه‌ش به‌ وته‌ى (د. دكتۆر ئەحمەد بان) بۆ كه‌ناڵى (الحدث)، ئه‌وه‌ ده‌گه‌یه‌نیت: "كه‌ په‌یوه‌ندیى ئاڵۆزى نێوان ئەمەریکا و ئێران هه‌ندێك بوارى لێلادانی (استثناء)ی تێدا ماوه‌". بەڵام ئه‌م ڕاگه‌یاندنه‌ په‌لكێشم ده‌كات بۆ كۆمه‌ڵێ گریمان، له‌وانه‌ ئاگاداریى ئێران له‌ ڕه‌وشی گرووپه‌ توندڕه‌وه‌كانى وه‌ك قاعیده‌ و تاڵیبان. ئێمه‌ له‌ زنجیره‌ وتارێكدا كه‌ له‌ سه‌ره‌تاى مانگى سپته‌مبه‌ر له‌ (باس نیوز) به‌ ناوى (داعش... كاروان و گۆڕانكارى) بڵاو كرایه‌وه‌، ئاماژەمان بۆ ئه‌وه‌ كردبوو، كه‌ "داعش ڕه‌نگه‌ به‌ناچارى مل بدات بۆ دروستكردنى په‌یوه‌ندى له‌گه‌ڵ هه‌ندێ ده‌وڵه‌تى ئه‌نتى رۆژئاوا، به‌تایبه‌ت ئەمەریکا، له‌پێناو مانه‌وه‌ى و به‌جێهێنانى هێرشی ئه‌لكترۆنیى له‌ دژى رۆژئاوا". ڕه‌نگه‌ به‌ جۆرێك له‌ جۆره‌كان ئه‌م بۆچوونه‌ هاتبێته‌ دی و له‌م سه‌روبه‌نده‌دا ئاماده‌كاریى بۆ ئه‌م كاره‌ كرابێت و ئێران توانیبێتى شوێنپێى به‌غدادى هه‌ڵبگرێت له‌ سووریا، به‌ڵام بۆ كردنه‌ قوربانى، نه‌ك بۆ داڵده‌دان، وه‌ك چۆن مه‌لا كرێكارى ته‌سلیم كرد، ئاوهاش له‌ به‌غدادى بكات. ئه‌مه‌ش به‌ڕاى ئێمه‌ گریمانەیه‌كى به‌هێزه‌، به‌ تایبه‌ت ئه‌گه‌ر بزانین، كه‌ ئیداره‌ى ئه‌مەریكى ته‌نیا رۆژێك پێش ڕاگه‌یاندنى كوژرانى به‌غدادى، ڕای گه‌یاند كه‌ "ئاسانكارى ده‌كرێت به‌رامبه‌ر به‌ هه‌ندێك پێداویستیى مرۆڤانه‌ له‌و ئابلووقه‌ ئابوورییه‌ى، كه‌ ئەمەریکا سەپاندوویه‌تى به‌سه‌ر ڕژێمى ئێراندا".

 

براوه‌كان
ڕاسته‌ كوژرانى به‌غدادى له‌ به‌رژه‌وه‌ندیى ته‌واوى كۆمه‌ڵگاى مرۆڤایه‌تیدایه‌، به‌ڵام ڕۆشندیده‌كان چاك ده‌زانن، كه‌ كۆتایی قۆناغێك و سه‌رهه‌ڵدانى قۆناغێكى نوێیه‌ له‌ گه‌مه‌یه‌كى موخابه‌راتیى ترسناك، كه‌ جیهان و ناوچه‌كه‌ پیایدا ده‌گوزه‌رێت (به‌داخه‌وه‌ لێره‌دا بوارى ئه‌وه‌ نییه‌، كه‌ ورده‌كارییه‌كانى هه‌لومه‌رجى سه‌رهه‌ڵدانى داعش و هاوشێوه‌كانى باس بكه‌ین، ئه‌مه‌ كارێكى زۆرى ده‌وێت).


براوه‌ى یه‌كه‌م و بێ ڕكابه‌ر ترامپه‌، كه‌ زیاتر له‌ دوو هه‌فته‌یه‌ له‌ لایه‌ن دۆست و نه‌یاره‌كانییه‌وە سه‌رزه‌نشت و سه‌ره‌ نێزه‌كى لێ توند ده‌كرێت، به‌هۆى بڕیارى كشانه‌وه‌ى هێزه‌كانى ئەمەریکا له‌ سووریا، دوو دانه‌ هه‌فته‌یه‌ گاڵته‌ى پێده‌كرێ، به‌ڵام ئه‌و به‌ ئه‌نجامدانى ئه‌م پرۆسه‌یه‌، سەلماندی كه‌ له‌ ناوچه‌كه‌دا ئەمەریکا ده‌توانێت له‌ هه‌ر سات و وه‌ختێكدا و‌ به‌ كه‌مترین تێچوون كرده‌وه‌ى وا گرنگ دژى نه‌یارانى ئه‌نجام بدات، ئیدى چ پێویستى به‌م هه‌موو سه‌روه‌ت (به‌فیڕۆدانه‌یه‌) له‌ سووریا، ئه‌م كاره‌ش ته‌واو به‌ دڵى هاووڵاتییانى ئەمەریکایه‌، كه‌ باجێكى ماددیى زۆر ده‌ده‌ن، گه‌وره‌ترین هه‌لیشه‌ بۆ گه‌رمكردنه‌وه‌ى بانگه‌شه‌ى هه‌ڵبژاردنى ترامپ بۆ خولێكى نوێى سه‌رۆكایه‌تى له‌به‌رامبه‌ر (جۆ بایدن)ی نه‌یارى، كه‌ به‌ربژێرى حزبى دیموكراتى ئەمەریکییە. ئا لێره‌وه‌ ده‌بێ سیاسییه‌كانى كورد فێرى ئه‌وه‌ بن، كه‌ ده‌ستكه‌وت و به‌رژه‌وه‌ندیى ئابووریى وڵاتان، پێوەر و لۆژیكه‌ له‌ هاوكێشه‌ سیاسییه‌كانى ناوچه‌كه‌دا، نه‌ك ڕاكێشانى سۆز و عاتیفه‌، سۆز و عاتیفه‌ نه‌ سك تێر ده‌كات و نه‌ گیانیش ده‌پارێزێت.