پێشوازیکردن لە سەرۆکی کوردستان

من و كه‌ركووك - 28

بەدرێژایی ماوه‌ی ژیانم لە تاراوگە، چاوی فێربوون و تێگه‌یشتن و گه‌شه‌كردنی بەردەوامم نه‌تروكاندووه،‌ هه‌میشه‌ خولیای فێربوونی شتی تازە بووم، ئه‌و باوەڕییەم له‌ لا دروست بووبوو كه‌ ئیدی كوردستان ده‌بێته‌ جێ سه‌رنجی وڵاتانی رۆژئاوا و ئه‌مریكییه‌كان، به‌تایبه‌ت له‌ دوای رووخاندنی رژێمی سه‌دامی دیكتاتۆر. من یه‌كێكم له‌و كوردانەی تاراوگە کە به‌رده‌وام خه‌یاڵ و هه‌ست و بیركردنه‌وه‌م له‌ كوردستان بووه،‌ خۆم له‌نێو دوو ژیاندا قه‌تیس كردبوو، به‌شێكی هەوڵ و هەنگاوەکانی ژیانم بۆ تێكه‌ڵبوون بوو لەنێو كۆمه‌ڵی ئه‌ورووپییدا، به‌شەکەی دیکەش مانه‌وه‌م بوو وه‌ك كوردێك كه‌ بەردەوام هۆشی له‌لای كه‌سوكار و نیشتمانه‌كه‌یه‌تی، بەلای منەوە ژیانی تاراوگە چەندە خۆش و ئارام بێت بەلاتەوە، هەرگیز ناتوانێ نیشتمانی رەسەنی خۆت بە هەموو کێشەکانیشیەوە لەبیر بباتەوە، بەپێچەوانەوە چەندە لە غوربەت و دوورەوڵاتیدا بژیت، زیاتر تامەزرۆی باوەشی نیشتمان دەبیت، زیاتر لە بەهای بوونی نیشتمانت لا بەرزتر دەبێت. ڕەنگە کەسانێک کە غەرق و مەستی جوانییەکانی ژیانی وڵاتانی رۆژئاوا بوون، گاڵتەیان بەم قسانەم بێت، ڕەنگە کەسانێکیش بە موزایەدە و خۆهەڵکێشان لێکی بدەنەوە، لێ من نە ئیشم بە موزایەدە و خۆهەڵکێشانە و نە هەرگیز گوێم بە قسەی ئەوانە داوە کە گاڵتەیان بەم جۆرە بیرکردنەوانە دێت، پێتان سەیر نەبێت، ئێستاش گەلێ کوردی ئەوروپا دەناسم، هەر کاتێ من بەدڵخۆشییەوە بەنیازی گەڕانەوەم بۆ کوردستان، بەتوانجەوە پێم دەڵێن: "ئەوە تۆ ئیشت بە کوردستان چییە؟ ئەرێ کوردستان چی تێدایە تا بیری بکەیت؟"، دوو پرسیاری توانجئامێزی زۆر بێ مانان، کە من هەمیشە وەڵامم بۆیان تەنیا زەردەخەنەیەک و بێدەنگبوونە، هەر بەڕاستییش دەبێ وا بکەم، چونکە ناتوانم و ناشزانم چۆن لە یارۆی بەرامبەرمی بگەیەنم، کە نابێ نیشتمان بەو چاوە سەیر بکرێت، ئاخر بۆ کوردێک، ڕەنگە هەر وڵاتێکی ئەوروپی ببێتە شوێنێکی باش بۆ ژیانی خۆی و ماڵباتی، بەڵام هەرگیز نابێتە نیشتمانی دایک.


دڵنیام لێرەدا کەسانێکیش دەپرسن: ئەگەر کوردستانت هێندە خۆش دەوێ، بۆچی ناگەڕێیتەوە بۆی و لەوێ بژیت؟ ئەمەیان پرسیارێکی رەوایە، بۆیە وەڵامێکی پوختی دەدەمەوە و دەڵێم: "دوو منداڵەکەم و خێزانە بچووکەکەی خۆم، هۆکاری سەرەکیی نەگەڕانەوەی یەکجاریمە، بەڵام ئەگەر نەتوانم بەیەکجاری بگەڕێمەوە، خۆ دەتوانم زوو زوو بەپێی توانای دارایی خۆم، سەردانی نیشتمانەکەم و کەسوکار و زێدی بیرەوەرییەکانی منداڵیم بکەم، ئەگەر نەشگەڕێمەوە بۆ نیشتمان، دەتوانم رقم لێی نەبێت و بە چاوێکی کەم سەیری نیشتمان نەکەم، بە زمانێکی زبر و ناشرین لای بێگانان باسی نەکەم، تۆ دەتوانیت بەردەوام بەربەرەکانێی حزبە دەسەڵاتدارەکانی کوردستان و تەنانەت حکوومەتەکەشی بکەیت، ئاساییە رقت لێیان بێت و تەنانەت ببیتە دوژمنیشیان، بەڵام رقەکەت هێندە ناشرین مەکە کە بگاتە ئاستی ئەوەی رقت لە نیشتمانی رەسەنی خۆت بێت و رۆژانە بە وشەی سووک و پووچ ئازاری نیشتمان بدەیت، کوردستان خاکی هەموو کوردستانییانە جا لە هەر کوێ بن، وڵاتی هەموومانە ئیدی سەر بە هەر حزب و لایەن و ئایدۆلۆژیایەک بین".


ئەم مشتومڕە دەبڕێنمەوە و دێمەوە سەر ژیانی خۆم لە تاراوگە، من لەوێ توانیم خۆم له‌نێو ئه‌م ژیان دابه‌شبوونەی نێوان کوردستان و بەلجیکادا،‌ بدۆزمه‌وه‌ و سوود له‌ نیشته‌جێبوونم لە ئه‌وروپا وەربگرم بۆ خزمه‌تی وڵاتەکەی خۆم (كوردستان)، چونكه‌ (به‌لجیكا -  برۆكسل) له‌ ڕووی سیاسییه‌وه،‌ یه‌كێكه‌ له‌ ناوه‌نده‌ گرنگه‌كانی بڕیاردان له‌مه‌ڕ پرسه ‌سیاسییه‌ ناوخۆییەکانی ئه‌وروپا و جیهان، بۆیه‌ چالاكانه‌ ده‌مویست تواناكانی خۆم گه‌شه‌ ‌پێ بده‌م تا‌ خزمه‌ت به‌ نیشتمان و نەتەوەکەم بگه‌یەنم،‌ له‌ خۆم راده‌بینی کە بتوانم له‌ چه‌ند بوارێكی جودادا كار بكه‌م، لێ ده‌ستپێك و بناغه‌ی كاركردنی فه‌رمیم بۆ كوردستان، سەرەتا ئەوە بوو کە وه‌ك میدیاكارێك ده‌ست پێ بكەم، ئه‌مه‌ جگه‌ له‌وه‌ی له‌ چالاکیی ڕێكخراوەییدا‌ به‌رده‌وام بووم، سه‌ره‌تا له‌ بواری میدیا و رۆژنامه‌گه‌رییدا له‌گه‌ڵ كه‌ناڵی (نه‌ورۆز تی ڤی) وەک پەیامنێری برۆکسل دەستم بە کار کرد، ئەو کەناڵە سه‌ر به‌ وه‌زاره‌تی رۆشنبیریی حکوومەتی هه‌رێمی كوردستان بوو. ئه‌و ده‌مه‌ خولیایه‌كی زۆرم هه‌بوو بۆ كاری راگه‌یاندن و زۆر به‌ په‌رۆشه‌وه‌ هه‌وڵم ده‌دا تێیدا سه‌ركه‌وتوو بم. لەبیرمە ئه‌وكات له‌سه‌ر ئه‌ركی وه‌زاره‌تی رۆشنبیریی به‌لجیكا سمینارێك بۆ زمانی كوردی ساز كرا و‌ هه‌شت نووسه‌ر و ئه‌كادیمی له‌سه‌ر زاراوه‌ و دیالێكته‌كانی كوردستان خه‌ڵاتیان پێ به‌خشرا، ئێمه‌ش وه‌ك ستافی (نه‌ورۆز تی ڤی) له‌وێ بووین، هه‌ستێكی خۆشم هه‌بوو كه‌ ده‌مبینی ئه‌و كوردانه‌ی كه‌ هه‌ریه‌كه‌یان سه‌ر به‌ ناوچه‌یەکی كوردستانی گه‌وره بوو‌ن، له‌ هۆڵێكدا كۆبوونه‌ته‌وه‌ بۆ گفتوگۆكردن لەبارەی زمانی كوردی، دڵخۆش بووم به‌م گۆانكاڕییانه‌، هەستم دەکر گواستنەوەی‌ خەباتی شاخ بۆ شار قۆناغی باشی بڕیوە، ئەوەتا لێرە لەنێو جەرگەی ئەوروپادا پسپۆڕانی زمانی کوردی باس لە بەستانداركردنی زمان و یەکخستنی ڕێنووسی كوردی دەکەن.


پاش ماوەیەک، كاری میدیاییم له‌ (نه‌ورۆز تی ڤی)یه‌وه‌ گواسترایه‌وه‌ بۆ (كوردستان تی ڤی) کە ئەمیان سەر بە پارتی دیموکراتی کوردستان بوو، ئه‌وكات به‌شێوه‌ی گرێبه‌ست و كاتی بوو.


کارکردنم وه‌ك ڕیپۆرته‌رێك له‌ (كوردستان تی ڤی) كه‌ یه‌كه‌مین کەناڵی تەلەڤزیۆنیی سه‌ته‌لایتی ناو عێراق و هەرێمی كوردستان بوو، وای كرد هەگبەی ئه‌زموونی کاری میدیاییم زیاتر بێت، لەمیانی کارکردندا به‌ زۆر كه‌سایه‌تیی سیاسیی كورد و سیاسه‌تمه‌دارانی ئه‌وروپی ئاشنا بووم، بۆ چه‌ند جارێكیش وەک ستافی (کوردستان تی ڤی) هاوەڵی سەرۆک مەسعود بارزانی بووم لە سەردانەکانیدا بۆ به‌لجیكا و نه‌مسا.


به‌هۆی ئەو ئه‌زموونه‌وه،‌ توانیم گه‌شه‌ به‌ بواری دیبلۆماسیی خۆم بده‌م، به‌ تایبه‌تی دوای ئه‌وه‌ی حكوومه‌تی هه‌رێمی كوردستان و حزبه ‌كوردستانییه‌كان، چالاکی و په‌یوه‌ندییه‌كانی ده‌ره‌وه‌یان له‌ برۆكسلی پایته‌ختی به‌لجیكا کاراتر كرد، برۆكسل سه‌نگ و قورسایی خۆی هه‌یه‌، چونكه‌ باره‌گای كۆمیسیۆنی یه‌كێتیی ئه‌وروپا، باره‌گای په‌رله‌مانی ئه‌وروپا كه‌ گه‌وره‌ترین په‌رله‌مانی ئه‌وروپایه‌ لەو شارەدان، ئه‌مه‌ جگه‌ی له‌وه‌ی بنكه‌ی سه‌ره‌كیی (په‌یمانی ئه‌تڵه‌سیی باكور- ناتۆ) هه‌ر له‌ برۆكسله‌، ئه‌مه‌ش وا ده‌كات برۆكسل ناوه‌ندێكی گرنگی بڕیاردان بێت له‌مه‌ڕ سیاسه‌ته‌ نێوده‌وڵه‌تییه‌كان به‌تایبه‌ت جیهانی سێیه‌م و له‌نێویشیاندا ڕۆژهه‌ڵاتی ناوین و (عێراق - هەرێمی كوردستان).


بەهۆی پیشینه‌ی كاركردنی میدیایی و رێکخراوەییمەوە، په‌یوه‌ندی و ئاشنابوونێکی زۆرم په‌یدا كردبوو، په‌رۆش و تامه‌زرۆ بووم له‌ بواری پراكتیزه‌كردندا ئه‌م په‌یوه‌ندییه‌ توندوتۆڵانه‌م بخه‌مه‌ خزمه‌تی کوردستان و هه‌وڵ بده‌م به‌شێك بم له‌ ئاوه‌دانكردنه‌وە و‌ گه‌شه‌كردنی تاك و كۆمه‌ڵگەی كوردی له‌ باشووری كوردستان. لەو دەمەدا ده‌رگایه‌كی گرنگی دیبلۆماسی كرایه‌وه‌ به‌ ڕوومدا، ئەویش به‌ هاوكاریی بەڕێز (بەختیار جاف) بوو کە كوردێكی کەرکووکی بوو و چه‌ندین ساڵ‌ له‌ یەکێتیی سۆڤیه‌تی پێشوودا ده‌ژیا و‌ ئێستاش له سلۆڤینیا ده‌ژی. بەختیار جاف به‌ڕێوەبه‌ری ئنیستیوتی ئیفیمسه بۆ توێژینه‌وه‌ و لێكۆڵینه‌وه‌ له‌سه‌ر ناوچه‌ی باڵكان و ڕۆژهه‌ڵاتی ناوه‌ڕاست، ئه‌م رێكخراوه‌ خزمه‌تێكی زۆری منی كرد كه‌ به‌و جیهانه‌ سیاسی و دیبلۆماسییه فراوانەی ئاشنا كردم.


یه‌كێك له‌و كاره‌ پڕشانازی و تایبەتانەی لە بواری میدیادا جێبەجێم کرد، ئه‌وه‌ بوو كه‌ پەیامنێری هاوەڵی سه‌ردانه‌ فه‌رمییه‌كه‌ی سه‌رۆك بارزانی بووم بۆ برۆكسلی پایته‌ختی به‌لجیكا و ئه‌وروپا، لەوێ بە چاوی خۆم بینیم ئه‌و پێشوازییە گەرم و تایبەتەی كه‌ له‌ سه‌رۆكی هه‌رێمی کوردستان کرا، زۆر مایه‌ی دڵخۆشی و سه‌رسامی بوو، ئه‌و دیمه‌نانه‌م باش له‌پێش چاون کە‌ چۆن كه‌ژاوه‌ی ئۆتۆمبێلەکانی سەرۆک بارزانی وەک میوانی فەرمیی ئەوروپا، یه‌ك به‌دوای یه‌كدا ده‌ڕۆیشتن به‌ پرۆتۆكۆڵێكی تۆكمه‌ و راقی ڕێگاكانیان چۆڵ ده‌كرد تا کەژاوەی ئۆتۆمبێلی سەرۆکی وڵاتەکەی من (کوردستان) پێیدا بڕوات، هەستێکی وەهام لا دروست بووبوو کە ئیتر ته‌واو ئێمەی کوردستانی خەڵکی وڵاتێکی سه‌ربه‌خۆین، سه‌رۆك و ئاڵا و ده‌وڵه‌تمان هه‌یه،‌ چونكه‌ ئه‌و پێشوازییه‌ی كه ‌له‌ سه‌رۆك مه‌سعود بارزانی كرا، پێشوازییه‌كی فەرمیی سه‌رۆكانه‌ بوو، خانەخوێیان وه‌ك هه‌ر پرۆتۆكۆڵێكی تر له‌گه‌ڵ سه‌رۆكانی وڵاتانی دونیادا مامه‌ڵه‌یان له‌گه‌ڵدا كرد.


كاتێك گه‌یشتینه‌ كۆمیسیۆنی ئه‌وروپا له‌لایان (خافێر سۆلانه‌) سه‌رۆكی ئه‌و كاته‌ی یه‌كێتیی ئه‌وروپا، پێشوازییه‌كی گه‌رمی لێ كرا، منیش به‌ كامێرایه‌كه‌وه‌ وێنه‌م ده‌گرت، ئێستاش کە بۆ ئێوەی دەگێڕمەوە شاناز و دڵخۆش ده‌بم، چونکە هەستم بە مەزنیی کوردستان دەکرد.


ئەو سه‌ردانه‌ی سه‌رۆك بارزانی، وەر‌چه‌رخانێكی گەورەی به‌ دوای خۆیدا هێنا، به‌شێوه‌یه‌ك دوای ئه‌م سه‌ردانانه‌ زۆر له‌ كه‌سایه‌تی و دیبلۆماتكار و ڕێكخراوە نێودەوڵەتییەکان، ڕاوپۆچوونیان زیاتر په‌یوه‌ست بوو به‌ داكۆكی لێکردن و هاوكاریكردنی كوردستانه‌وه‌، سه‌ره‌تایه‌كی باش بوو بۆ گواستنه‌وه‌ی مۆدێلی ڕۆژئاوایی بۆ كوردستان، نەخاسمە لە بواری گه‌شه‌ی ئابووری و ئاوه‌دانییدا، له‌ به‌شێكی ئه‌و سه‌ردانانەی سه‌رۆكی هه‌رێمی کوردستان، ئه‌و شه‌ره‌فه‌ مه‌زنه‌ش به ‌من به‌خشرا هاوه‌ڵییان بكه‌م بۆ گواستنه‌وه‌ی هه‌واڵه‌كان.


دوای ئەوە، گۆڕانكارییەکی باش به‌سه‌ر ژیانمدا هات، ئەویش ئەوە بوو کە له‌ میدیاكارەوە بەرەو کاری دیبلۆماسی چووم. به‌هۆی ئه‌وه‌وە كه‌ له‌ ئه‌وروپا ده‌ژیام و به‌تایبه‌تی له‌ به‌لجیكا ‌بووم و خۆشم كه‌سێكی چالاك بووم، دروشمەکەشم (خزمه‌تكردنی كوردستان) بوو،‌ هێنده‌ی هه‌ستی نه‌ته‌وایه‌تیم تێدا ڕوابوو، نیو هێندە گیرۆدەی هەناسەی حزبیی تەسک نەبووم و ئاوهاش کارم نەکرد، تەنانەت‌ به ‌ئێستاشه‌وه دیدی من لەو ڕووەوە نه‌گۆڕاوه‌.