دوای ئاگربه‌ست.. خراپترین بژاره‌

 

ره‌نگه‌ یه‌كێك بڵێ، باشه‌ هیچ بژاره‌یه‌كی له‌وه‌ خراپتر هه‌یه‌، به‌تایبه‌تی دوای له‌ده‌ستدانی گرێ سپی و سه‌رێ كانی؟ ئه‌وه‌ی بیر له‌ قووڵیی په‌یوه‌ندیی نێوان رووسیا و توركیا، هه‌روه‌ها نێوانی ترامپ و رووسیا بكاته‌وه‌، هه‌روه‌ها ئه‌وه‌ی به‌م دواییه‌ له‌نێوان ئه‌ردۆغان و ترامپ رووی دا، به‌ دووری نازانێت كه‌ بژاره‌ی هێشتا خراپتریش هه‌بێت.


جێی ئاماژه‌یه‌، كه‌ هه‌بوونی هێزی رژێم (حكوومه‌تی سووریا) له‌ كۆبانێ و منبج، خراپترین بژاره‌ نییه‌، به‌ به‌راورد له‌گه‌ڵ ئه‌وه‌ی كه‌ له‌ویش خراپتر هه‌یه‌.


- ئاخۆ ده‌بێ خراپترین بژاره‌ چی بێت؟


ده‌زانین كه‌ هێشتا توركیا كارتی ئیدلبی به‌ده‌سته‌وه‌یه‌، به‌شێكی زۆری رێی نێوده‌وڵه‌تیی نێوان حه‌له‌ب و دیمه‌شقیش به‌ ده‌ست ئه‌و هێزانه‌یه‌وه‌، كه‌ توركیا پاڵپشتییان ده‌كات، پێشتر چ رووسیا و چ رژێم، كات و داراییه‌كی زۆریان خه‌رج كرد و شان به‌ شانی یه‌ك شه‌ڕیان كرد، بۆ ئه‌وه‌ی ئه‌و رێیه‌ كۆنترۆڵ بكه‌ن، كه‌ سه‌باره‌ت به‌ دیمه‌شقی پایته‌ختی و حه‌له‌بی پایته‌ختی ئابووری، هه‌ستیاره‌.


با ئه‌وه‌شمان له‌بیر نه‌چێت، كه‌ داگیركردنی عه‌فرین (كوردداغ) هۆی راسته‌وخۆی گۆڕینه‌وه‌ی عه‌فرین بوو به‌ غووته‌ی رۆژهه‌ڵات، توركیا عه‌فرین (كوردداغ)ی برد و رژێمیش غووته‌، له‌نێوان هه‌ردوو لاش، كورد به‌ خۆیان و خه‌ونی گه‌وره‌یانه‌وه‌ دۆڕان.


شتی مه‌ترسیدار ئه‌وه‌یه‌، كه‌ سێشه‌ممه‌ روو ده‌دات، واته‌ له‌دوای دیداره‌كه‌ی پوتین و ئه‌ردۆغان، ره‌نگه‌ ئاكامی ئه‌و دیداره‌ زۆر له‌ ئاكامی دیداره‌كه‌ی مایك بنس و ئه‌ردۆغان خراپتر بێت.


له‌ دوایین دیداری بنس و ئه‌ردۆغاندا، رێ به‌ ئه‌ردۆغان درا ده‌ست بخاته‌ نێو رووبه‌رێكه‌وه‌، كه‌ زگی كوردستانی سووریایه‌، ته‌نانه‌ت ئه‌گه‌ر له‌و رووبه‌ره‌دا عه‌ره‌بیش زۆرینه‌ بن، به‌ڵام تێكه‌ڵبوونی به‌رژه‌وه‌ندیی عه‌ره‌ب و كورد له‌و ناوچه‌یه‌، ناسنامه‌یه‌كی تێكه‌ڵ و ئاڵۆزی به‌و جوگرافیایه‌ دا، ناكرێ بڵێین، كه‌ پیلانه‌كه‌ ته‌نیا ئه‌و ناوچه‌یه‌ی گرتووه‌ته‌وه‌، به‌ڵكوو ئه‌ردۆغان له‌ خۆشییان خه‌نی بوو كاتێك بیستی، كه‌ هێزی رژێمی سووریا ده‌چێته‌ منبج و كۆبانێ، چونكه‌ ئیدی قووتدانی تیكه‌كه‌ ئاسان ده‌بێت، لێك تێگه‌یشتن له‌گه‌ڵ رووسیا له‌سایه‌ی بێ ئومێدییه‌كی زۆری كورد، ئاسانتر ده‌بێت.


با ئه‌وه‌ش بخه‌ینه‌ به‌ر زه‌ینی خۆمان، كه‌ دێره‌زوور و ره‌ققه‌ بۆ رژێم و بۆ رووسیاش گرنگن، ئه‌گه‌ر بكه‌ونه‌وه‌ ده‌ستی رژێم، ئه‌وا سوودی زۆری بۆ ئێران ده‌بێت، سه‌رباری ئه‌وه‌ی هه‌ردوو پارێزگاكه‌ نه‌وتێكی زۆریان تێدایه‌.


ماوه‌ته‌وه‌ بڵێین، بژاره‌ی هه‌ره‌ خراپ ئه‌وه‌یه‌، منبج و كۆبانێ به‌ ئیدلب بگۆڕدرێته‌وه‌، چونكه‌ له‌و حاڵه‌ته‌دا رژێم هه‌لومه‌رجی گونجاو بۆ حه‌له‌ب ده‌ڕه‌خسێنێ، رێی حه‌له‌ب به‌ره‌و هه‌ردوو شاری لازقیه‌ و دیمه‌شقی ده‌كه‌وێته‌ ده‌ست، ته‌نانه‌ت به‌دتر ئه‌وه‌یه‌، كه‌ پاشماوه‌ی (هاوپه‌یمانی)، یان با بڵێین پاشماوه‌ی ئه‌مەریكا له‌نێوان توركیا و رووسیا دابه‌ش بكرێت، توركیا هه‌موو پارێزگای حه‌سه‌كه‌ و نیوه‌ی هه‌ردوو پارێزی حه‌له‌ب و ره‌ققه‌ بۆ خۆی ببات، رژێمیش دێره‌زوور و ئه‌وه‌ی له‌ ره‌ققه‌ ده‌مێنێته‌وه‌ ببات، ئه‌وه‌ی له‌ ره‌ققه‌ش ده‌مێنێته‌وه‌ گرنگه‌، چونكه‌ به‌نداو به‌ سه‌رچاوه‌ی كاره‌باوه‌ و چاوگی نه‌وتی خاوی لێیه‌.


په‌ندی وتاره‌كه‌ش ده‌ڵێ: "كاتێك تۆ له‌بن كێردی قه‌سابدا ده‌بیت، كه‌س به‌ لایه‌وه‌ گرنگ نییه‌ تۆ به‌ ئازاره‌وه‌ ده‌ژیت، یان مه‌رگ ده‌تباته‌وه‌".