به‌ره‌و یاده‌ ڕه‌شه‌كه‌!

 

برووسكه‌ى یه‌كه‌م:
برووسكه‌ى دووه‌م:
برووسكه‌ى سێیه‌م و .....
له‌ قه‌ڵاى مه‌ردانه‌وه‌ بۆ پردێ و سحێلا:
شه‌وى دوژمن نۆته‌ك و تار بێ، ئاگر و بڵێسه‌تان هه‌زار به‌ هه‌زار بێ.
له‌ به‌ره‌ى ئه‌م لاوه‌
برووسكه‌ى یه‌كه‌م (ته‌نیا برووسكه‌)یه‌:
باز و به‌وره‌كانتان قۆڵبه‌ست بكه‌ن، ئۆردووى بیگانه‌ فه‌راهه‌م بكه‌ن
بێ ته‌قه‌ زۆر به‌ خشكه‌یى شار چۆڵ بكه‌ن!
له‌ملاشه‌وه‌ له‌ سه‌رگردێكه‌وه‌ مێژووى كورده‌وارى به‌ ده‌م سه‌رله‌قاندن و ئه‌فسووسه‌وه‌، رووداوه‌كان و چركه‌ساته‌كانى كسپه‌ى خه‌نجه‌رى خیانه‌ت تۆمار ده‌كات، تۆماره‌كه‌ سیخناخه‌ و قه‌ترانى لێ ده‌چۆڕێ!
كۆتایی.
له‌ پێشوازیى یادى ڕه‌شى 16 ئۆكتۆبه‌ردا، من زیاتر له‌م دێڕانه‌ى سه‌روه‌م نییه‌ بۆ نووسین، به‌ بڕواى من ئه‌و سه‌دان وتار و هه‌واڵانه‌ى، كه‌ له‌مه‌ڕ ڕاده‌ستكردنى كه‌ركووكه‌وه‌ نووسران، له‌گه‌ڵ ته‌واوى ڕێزمدا بۆ نووسه‌ر و میدیاكاران، هیچیان ناگه‌نه‌ چركه‌ساتێكى ئه‌و بێكه‌سى و زه‌لیلی و مه‌زه‌له‌ته‌ى، كه‌ كوردێكى كه‌ركووكیى مه‌رد هه‌ستى پێ كردووه‌، له‌ كاتى هاتنه‌ ناوه‌وه‌ى قه‌له‌ڕه‌شه‌كانى حه‌شدی شه‌عبی بۆ ناو كه‌ركووك، بێ ته‌قه‌ و بێ ره‌قه‌ و ته‌نانه‌ت بێ نقه‌!
بۆ ڕاوه‌ستان له‌سه‌ر لێكه‌وته‌كانى ڕاده‌ستكردن، باشترین شایه‌دحاڵ خودى كه‌ركووكییه‌كانن، كه‌ دوو ساڵه‌ میلیشیاكان تاڵاویان پێ ده‌ڕێژن، بڕۆن بیاندوێنن، بزانن تا ئێستاش چ زووخاوێك هه‌ڵئه‌ڕێژن، ئایه‌ كه‌س ئاگاى له‌ كه‌ركووكییه‌كان ماوه؟‌ كه‌س لێیان ده‌پرسێ؟
به‌داخه‌وه‌ داگیركردنى كه‌ركووك له‌ لایه‌ن (حه‌شدى شه‌عبی)یه‌وه‌، په‌رژین بێت له‌ رووتان، بۆ حه‌شد له‌ چوونه‌ سه‌رئاو ئاسانتر بوو!
له‌كاتێكدا خۆیان له‌ خه‌یاڵیشیاندا بیریان له‌و جۆر و شێوه‌ گرتنه‌ نه‌كردبووه‌وه‌، به‌ڵام ته‌نیا شتێك ده‌ڵێم: ئه‌و تانكى ئه‌برامز و هه‌مه‌رانه‌ى، كه‌ سه‌رله‌به‌یانیى خیانه‌ت، كه‌ كه‌ركووكیان بێ ته‌قە ‌گرت، هه‌ر ئه‌وانه‌ بوون، كه‌ سه‌ر له‌ ئێواره‌ى خیانه‌ت، له‌ پردێ و سحێلا، به‌ ئاگرى چەکی پێشمه‌رگه‌ هه‌ڵپرووسكان و دامركانه‌وه‌ و نه‌یانتوانى بستێك زیاتر بێنه‌ پێشه‌وه‌. ئه‌مڕۆش له‌ ترسی هه‌ڵمه‌تى پێشمه‌رگه‌، سوپاى هه‌ڵته‌كیوى عێراقی خه‌نده‌ك و مه‌ته‌رێزه‌كانیان له‌ هه‌مان شوێن له‌ پردێ و سحێلا، توند و به‌رز كردووه‌ته‌وه‌. باس و خواسی ئه‌م یاده‌ ڕه‌شه‌ش رۆژ به‌ڕۆژ تاڵتر ده‌بێت، بووه‌ته‌ ژه‌قنه‌بووت و له‌ گه‌رووى خیانه‌تكاراندا گیرساوه‌ته‌وه‌ و ناچێته‌ خوارێ، ئیلاهی پێى بخنكێن، خودایه‌ ئه‌م ئابڕووچوونه‌ چۆن ئه‌شاردرێته‌وه‌!
به‌ هه‌رحاڵ، ئه‌وه‌ى رووی دا، قه‌وماوه‌ و چاك ناكرێته‌وه‌، وه‌ك چۆن تیر له‌ كه‌وان ده‌رچوو ناگه‌ڕێته‌وه‌، مه‌گه‌ر به‌ گرتنه‌وه‌ى كه‌ركووك و داواى لێبوردن له‌ ته‌واوى كوردان و كه‌ركووكییه‌كان به‌تایبه‌تى بێته‌ دى؟
به‌ڵام به‌ گومان له‌وه‌ى ئه‌م كرده‌یه‌ (خۆزگه‌ من هه‌ڵه‌ بم) له‌ ئاكارى مرۆی خائیندا هه‌بێ، بگره‌ چه‌ند رۆژێكه‌ ورته‌ ورتێك له‌باره‌ى كارێكى ناحه‌زى دى ده‌بیستم، كه‌ ڕه‌نگه‌ له‌گه‌ڵ واده‌ى 16 ئۆكتۆبه‌ردا ڕوو بدات، خۆ ئه‌گه‌ر ڕوو بدات، هێنده‌ى تر كوردان ماڵخراپتر ده‌بن، كورد گوته‌نى "بڕۆ ئاو بێنه‌ و ده‌ستتان بشۆ ". به‌ڕاستى من خۆم چاوه‌ڕوانى هه‌موو شتێك ده‌كه‌م له‌ كه‌سانێك، كه‌ هه‌موو هه‌وڵی هاشوهوشیان گیرفان بێ، وەلێ ئه‌فسووس له‌م وڵاته‌دا ژمارەیان ئێجگار زۆره‌، حاڵى كورد له‌م زه‌مانه‌یه‌دا وه‌ك ئه‌و جووتیاره‌ وایه‌، له‌سه‌ر خه‌رمان له‌برى شه‌نكردن و له‌ بێژنگدان بۆ جیاكردنه‌وه‌ى تۆوى ساغ له‌ دارونجان و پووش و په‌ڵاش، ئێستا خه‌رمانه‌كه‌ى هه‌موو دڕك و چڵ و چیوه‌ و ده‌بێ ده‌سته‌ ڕه‌قه‌ڵه‌كانى به‌ناودا بگێڕیت، بۆ هه‌ڵچنینى به‌شی هێڵه‌كه‌نانێك، هێله‌كه‌نانه‌كه‌ش ئاغایه‌ك لێى زه‌وت بكات، چ بڵێین ئابڕوو كه‌ تكا، به‌ هیچ شتێك ناكڕێته‌وه‌.
ئیتر تا خیانه‌تێكى تر به‌ خواتان ئه‌سپێرم.