لەدوای ترەمپ، پەنابردن بۆ خودا، لەپێناو سەربەخۆییدا

ئێمه‌ی کورد به‌س خۆمان هه‌یه، تەنیا شاخه‌کانمان هه‌یه

خۆپیشاندانه خوێناوییه‌کانی عێراق له سه‌ره‌تای ئۆکتۆبه‌ری ئیمساڵدا، نموونه‌یه‌کی نوێی تری عێراقه، که وڵاتێکه هه‌میشه به کوشتن و توندوتیژی وه‌ڵامی ناڕه‌زایی هاووڵاتییانی ده‌داته‌وه. ئه‌م ناڕه‌زایه‌تییه ئه‌گه‌ر له که‌رکووک و خانه‌قین و ناوچه داگیرکراوه‌ کوردییه‌کانی تریشدا دژ به ڕژێمی به‌غداد بکرێت، ئه‌وا به ده‌یان جار ژماره‌ی کوژراوان و برینداربووان زیاتر ده‌بێت له هی عێراق، چونکه ڕژێمی عێراق هه‌رگیز ده‌ستی له کورد نه‌پاراستووه و نایشیپارێزێ. ئه‌وه‌ی جێگای نیگه‌رانیی منه، که به‌شێک له تاکی کورد داوای ئه‌وه ده‌که‌ن، که ئه‌م جۆره خۆپیشاندانانه کوردستانیش بگرێته‌وه، چونکه حکوومه‌تی هه‌رێم به ڕژێمی عێراق ده‌چوێنن. ئه‌م جۆره لێدوان و نووسینانه وێڕای ئازادیی ڕاده‌ربڕین، لێ هێنده‌ی له قازانجی عێراق و دوژمنانی کورددایه، ئه‌وه‌نده له قازانجی کورددا نییه. تاکی هۆشیار و ڕاسیۆناڵ، تاکی ئه‌قڵانیی له بارودۆخێکی وه‌هادا به‌ته‌نگ نیشتمانه‌که‌ی خۆیه‌وه ده‌چێت، هه‌تاوه‌کوو ڕێگری له‌وه‌ بکات، که ئاگری ئاشووبێکی ئاوها به‌‌ هیچ شێوه‌یه‌ک نه‌که‌وێته سنووره‌کانی کوردستانه‌وه. ئه‌م ئاشووبه ده‌ستکرده، ئاشووبێکی سیاسی و پلان بۆ کراوه، که ده‌توانێت دووکه‌ڵه‌که‌ی بگاته کوردستان و زیانمان پێ بگه‌یه‌نێت. هه‌وڵی ئێمه نابێت هیچ بێت له هه‌وڵی سه‌ربه‌خۆیی زیاتر، بۆ ئه‌م مه‌به‌سته‌ش په‌نا بردراوه‌ته‌ به‌ر چه‌نده‌ها ڕێگا.


ژیانێک له ئازادی و سه‌ربه‌خۆییدا، لەسایه‌ی ده‌وڵه‌تێکی کوردییدا، یه‌کێکه له ئێلێمێنته‌کانی سروشتی تاک و کۆی کورد، له ئاگایی و نائاگاییدا. ئه‌وه‌ی تاک و کۆی کورد له کۆمه‌ڵگای کوردییدا ده‌کاته خاوه‌نی شانازیی و شکۆ و نرخ، بریتییه له هه‌ستێک، هه‌ستێک که لەسایه‌یدا، تاک ده‌کاته خاوه‌نی مامه‌ڵه‌یه‌ک، خاوه‌نی کرده‌یه‌ک، که شانازیی بەخۆیه‌وه‌ بکات. ئه‌م هه‌سته فێنۆمێنێکی (ده‌رکه‌وته‌یه‌ک)ی ده‌روونییه، که به پرۆسه‌یه‌کی کۆگنێتیڤانه‌دا (بیرکردنه‌وه‌)دا تێده‌په‌ڕێت. ئه‌م پرۆسه‌یه له ده‌روونناسییدا ناو ده‌نرێت بە کۆگنێتیڤه دیامێنت (ئه‌ڵماس). واته تاک خاوه‌نی بیرکردنه‌وه‌یه‌که، که له ڕێگایه‌وه هه‌ستێکی پێ ده‌دات، ئه‌م هه‌سته گۆڕانێکی فیزیۆلۆگییانه به‌سه‌ر جه‌سته‌ی تاکدا ده‌هێنێت، بۆ نموونه، سووڕی خوێن خێراتر ده‌ڕوات، دڵ خێراتر لێده‌دات، گرژی ده‌خاته ماسولکه‌کانه‌وه، ترس ده‌خاته‌وه ...هتد، پاشان مرۆڤ ده‌بێته خاوه‌نی کردارێک، یان مامه‌ڵه‌یه‌ک.


تاکی کورد له هه‌ر سه‌رده‌مێکدا ژیابێت و بژی، به هه‌مان پرۆسێسدا تێده‌په‌ڕێت، که دواجار تووڕه‌ی ده‌کات، خه‌مباری ده‌کات، بێده‌سته‌ڵاتی ده‌کات، هه‌ست به که‌میی خۆی ده‌کات ...هتد. ئه‌م پرۆسه‌یه له‌ناوخۆی وڵاتدا شێوازێکی جیاتری هه‌یه، وه‌ک لەده‌ره‌وه‌ی وڵاتدا. له‌ناوخۆی وڵاتیشدا، پابه‌نده به‌وەی، که تاک و کۆ له‌ چ شوێنێکی نیشتماندا ده‌ژیین. بۆ نموونه تاکێک له هه‌ولێردا خاوه‌نی مامه‌ڵه‌یه‌کی تره، وه‌ک تاکێک له که‌رکووک یان له یه‌کێک له زاڵگه‌کانی تورکیا، ئێران یان عێراق و سووریادا. له هه‌ولێردا دڵنیایه و خاوه‌نی شانازی و شکۆیه‌کی بڵندتره وه‌ک له که‌رکووک. له زاڵگه‌کانی تورکیا، ئێران، عێراق و سووریادا بێده‌سته‌ڵاته و هه‌ست به که‌میی خۆی ده‌کات، تووڕه‌‌یه و هیچیشی پێ ناکرێت.


هه‌بوونی ده‌وڵه‌تێکی کوردی له قووڵایی نائاگایی هه‌موو تاکێکی کورددا هه‌یه، چونکه ده‌زانێت، که ئازادیی تاکە ڕێگایه بۆ گه‌یشتن به هه‌ستێکی دڵنیا، خاوه‌ن شانازی و شکۆ، نه‌ترس و ئازاد. له ده‌یان سه‌ده‌ی پێشووه‌وه هه‌تاوه‌کوو ئێستا، کورد له‌پێناوی ئازادییدا په‌نای بردووەته‌ به‌ر چه‌ندین وڵات و گرۆ و لایه‌ن. کورد په‌نای بردووەته ته‌نانه‌ت لای خوداش بۆ گه‌یشتن به ئازادی. ئه‌و کورده‌ موسڵمانه‌ی په‌نا ده‌باته لای خودا بۆ ئازادی، تاکێکی ئازادییخوازه، به‌پێچه‌وانه‌ی ئیسلامییه‌کانه‌وه، که ئیسلام و خودا له‌پێناو کۆنترۆڵکردنی کورد و زاڵبوونیان به‌سه‌ریاندا به‌کار ده‌هێنن. شێرکۆ بێکه‌سیش په‌نای بردووەته لای خودا، وه‌ک کوردێکی گله‌ییکه‌ر، که زۆرداریی به‌رامبه‌ر به کورد هێنده زۆره، که ته‌نیا خودا ماوه غه‌در له کورد بکات.


کورد په‌نا ده‌باته به‌ر خودا، وه‌ک دوایین هه‌وڵ و چاره، که هیچ چاره‌یه‌کی تری نه‌ماوه، له‌به‌رئه‌وه‌ی هه‌موو شتی تاقی کردووەته‌وه، هه‌ر بۆیه له نوێتریین ڤیدیۆی حاجییه‌کانی کوردستاندا، پیاوێکی کورد له‌ناو جه‌‌رگه‌ی ماڵی خودادا، به‌پێچه‌وانه‌ی هه‌موو حاجییه‌کانی تری کورد و نه‌ته‌وه‌کانی تره‌وه، سکاڵای کورد ده‌گه‌یه‌نێته گوێی خودا و ده‌ڵێ: ”خه‌مێکی گه‌وره‌ی له‌ناو دڵدایه، میلله‌تی کورد غه‌دری لێ کرایه، خاک و وڵاتی داگیر کرایه، سه‌د و نه‌وه‌ت و چوار وڵات ئاڵای هه‌ڵدایه، خاوه‌ن ده‌وڵه‌ته، خاوه‌ن ئاڵایه، میلله‌تی کوردم بێبه‌ش کرایه، میلله‌تی کوردم ده‌ربه‌ده‌ر کرایه، له چوار ڕێکاردا غه‌درم لێ کرایه، خاک و وڵاتم به‌ش به‌ش کرایه، میلله‌تی کوردم ئه‌نفال کرایه، دایکی شه‌هیدان جه‌رگیان سووتایه، میلله‌تی کوردیش هه‌ر هی خودایه، کوردیش موسڵمانه و غه‌دری لێ کرایه“.


به‌گشتی تاک و کۆی ئیسلام، کاتێک په‌نا ده‌به‌نه به‌ر خودا و دوعا ده‌که‌ن، به گشتی دوعا بۆ چاکه‌ی خۆیان و خراپه‌ی خه‌ڵکی تر ده‌که‌ن، لێ ئه‌م حاجییه کورده، پاره‌یه‌کی زۆر له سه‌فه‌ره‌که‌یدا خه‌رج ده‌کات، بۆ ئه‌وه‌ی له‌ناو ئه‌و ژاوه‌ژاوه‌ی حاجییاندا، له‌ناو ئه‌و کۆژییه‌دا (قه‌ره‌باڵغی) سکاڵای کورد بگه‌یه‌نێته خودا، به ناوی کورده‌وه قسه بکات، وه‌ک نوێنه‌ری کورد له عه‌رشی خودادا، له خودا بپرسێت و بڵێ، که کوردیش هه‌ر هی تۆن و به‌رهه‌می تۆن، چ باسه گه‌لانی تر هه‌موو ماف و ده‌وڵه‌ت و ئاڵایان هه‌یه و کورد نیه‌تی؟ به‌ر له چه‌ندین مانگ پێش بڵاوبوونه‌وه‌ی ئه‌م ڤیدیۆیه، ڤیدیۆیه‌کی تر له‌ کاتی سه‌ردانی که‌سوکاری ئه‌نفالکراوه‌کاندا بۆ سه‌ماوه، بڵاو بووەوه، که کوڕی یه‌کێک له قوربانییه‌کان، هه‌مان شێوه به سكاڵا و نووزه و گریانه‌وه ده‌یگوت: ”ئێستاش ڕقیان لێمانه دایه گیان، ئێستاش ڕقیان لێمانه باوه گیان ...هتد“. ژیان له‌ ژێرده‌ستی و زۆرداریی به‌رده‌وامییدا وه‌های له تاکی کورد کردووه، که دوایین سکاڵای خۆی به‌رێته لای خودا. وه‌ک دوا شانس و دوا هیوا، که هێزێکی نادیار بتوانێت په‌لیان بگرێت و له ژیانێکی ژێرده‌ست ڕزگاریان بکات. ئه‌وه‌تا له دووه‌م هێرشی تورکیای داگیرکاره‌وه بۆ سه‌ر ڕۆژئاوا، له شه‌وی 09.10.2019دا، دایکان و پیره‌پیاوان ڕوو ده‌که‌نه ئاسمان و ده‌ڵێن، خودایه ئه‌م ناهه‌قییه قبووڵ نه‌که‌یت، خودایه ئاگات لێمان بێت، خودایه بمانپارێزه ...هتد


سکاڵای ئه‌م حاجییه کورده له ماڵی خودادا ئه‌وه‌مان پێ ده‌ڵێت، که ئه‌وه‌ی هه‌تاوه‌کوو ئێستا په‌نامان بۆ نه‌بردبێت، خۆمانین. کورد په‌نای بۆ هه‌موو لایه‌ک و وڵاتێک بردووه، لێ هه‌رگیز بیری له‌وه‌ نه‌کردووەته‌وه، که په‌نا به‌رێته لای خۆی. گه‌شه‌ی ده‌روونیی تاک و کۆی کورد، کۆمه‌ڵایه‌تی،پیشه‌سازی، سیاسی و ئابووری و هه‌نگاو به‌ره‌و ژیانێکی مۆدێرن، ژیانێک، که تاک و کۆ تێیدا پێویستیان به دڵنیایی هه‌یه، پێویستیان به ده‌سته‌ڵات و شانازی و شکۆ و ئازادی هه‌یه، فاکتۆرێکی گه‌وره‌یه له‌سه‌ر به‌‌رهه‌مهێنانی جووڵانه‌وه‌یه‌کی نه‌ته‌وه‌یی، که تاک و کۆی کورد تێیدا پێویستیان به ده‌وڵه‌تێکی کوردی هه‌یه بۆ پاراستنی ئازادی، شانازی و شکۆی تاک و کۆ و به‌رژه‌وه‌ندییه‌کانیان. لێره‌وه هه‌بوونی ده‌وڵه‌تێکی کوردی به‌رژه‌وه‌ندییه‌کی گشتییه، که ته‌واوی چین و توێژه‌کانی کۆمه‌ڵگای کوردی له ‌یه‌کتری نزیک ده‌کاته‌وه.


له ‌مێژووه‌وه هه‌تاوه‌کوو ئێستا، به‌رده‌وام به‌شێوه‌یه‌کی ماتماتیکانه و ڕێژه‌ییانه ته‌ماشای ئه‌و کاره‌ساتانه کراوه و ده‌کرێت، که به‌سه‌ر کورددا هاتووه و دێت، واته هه‌میشه گرۆیه‌ک، لایه‌نێک به‌شێوه‌یه‌ک ته‌ماشای زیان و کاره‌ساته‌کانی کردووه، که به‌شێک نه‌بووبێت له خۆی. ئاکتوێلترین نموونه کاره‌ساتی شازده‌ی ئۆکتۆبه‌ره، لێ ئه‌م زیانه، زیانێکه به کۆی گشتیی هه‌موو کورد، نه‌ک ئامرازێک بووبێت بۆ لێدانی به‌شێکی کورد. شێرکۆ بێکه‌س ده‌‌ڵێ، که دارستان گڕی گرت، داری بێلایه‌ن کامه‌یه، هه‌تا نه‌سووتێت؟ ئه‌مه ڕاستییه‌کی ڕه‌وانی ژیانی کاره‌ساته‌کانی کورده، که‌ دواجار پێویسته هه‌موومان لێوه‌ی فێر بین، که هه‌ر زیانێک له کوردستاندا ده‌که‌وێته‌وه، زیانه به هه‌موو کورد و به کوردستان، که پێویسته هه‌موومان لێک نزیک بکاته‌وه و ئازادی بکه‌ین به ڕێگا، وه‌ک تاکه ڕێگایه‌ک بۆ گه‌یشتن به ژیانێکی به‌نرخ له شانازی و شکۆی کورددا. که پێویسته هه‌موومان له‌وه تێبگه‌ین، که له‌دوای خوداوه، پێویسته په‌نا به‌رینه به‌ر خۆمان، وه‌ک تاکه ڕێگاچاره، که ڕێگای ئازادی و سه‌ربه‌خۆییه‌. هه‌روه‌کوو چۆن له شه‌وی 09.10.2019 دا، سوپای داگیرکاری تورکیا هێرشی کرده سه‌ر ڕۆژئاوای کوردستان، دڵی هه‌موومان که‌وته کاردانه‌وه، به‌بێ گوێپێدانه ئه‌وه‌ی که له ڕۆژئاواداین یان له ڕۆژهه‌ڵات، له باکوورین یان له باشوور، له نیشتمانداین یان لە ده‌ره‌وه‌ی نیشتمان، چونکه زانیمان، که له خۆمان زیاتر که‌سی ترمان نییه په‌نای بۆ به‌رین. کاره‌ساتی پارچه‌پارچه‌بوونی کوردستان و داگیرکردنی له‌لایه‌ن داگیرکارانه‌وه به‌رهه‌می ئه‌وروپا و ئه‌مەریکا خۆیه‌تی، لێ له‌گه‌ڵ ئه‌وه‌شدا هه‌تا ئێستا کورد به چاوێکی دوژمنانه‌وه ته‌ماشای ئه‌وروپا و ئه‌مەریکای نەکردووه. هه‌میشه کورد ئاماده بووه بۆ پێکه‌وه کارکردن، لێ ئه‌وانیش هه‌رگیز له ڕووی ماف و مرۆڤایه‌تییه‌وه ته‌ماشای کوردیان نه‌کردووه، نوێترین دیارده، وته بێبایه‌خه‌کانی ترامپه، که هه‌میشه ده‌ڵێ، کورد جه‌نگاوه‌ری باش و ئازان، لێ هه‌رگیز قسه له‌سه‌ر مافه مرۆییه‌کانی کورد ناکات. وه‌ک ئه‌وه‌ی کورد مافی مرۆییان نه‌بێت، وه‌ک خوێنی کورد نرخی نه‌بێت. له‌به‌رامبه‌ر هه‌ر ڕه‌خنه‌یه‌کدا له بۆچوونی ترامپ، ترامپ به دژه ئارگوومێنتێک ده‌ڵێ، ئێمه پاره و چه‌کمان داوه به کورد. ئه‌مه‌ش وه‌ک ئه‌وه وه‌هایه، که جه‌نگاوه‌رانی کورد، کۆمپانیایه‌کی به‌کرێدانی جه‌نگاوه‌ر بن، هه‌رچییه‌ک ویستی بێت له‌وێ به بڕێک پاره سوپایه‌ک بۆ خۆی بەکرێ بگرێت.


ئێمه‌ی کورد به‌س خۆمان هه‌یه، به‌س شاخه‌کانمان هه‌یه، به‌س وره و ئازایه‌تی و نه‌مریی خۆمانمان هه‌یه و به‌س، ڕۆژێکیش دادێت، که سه‌رکه‌وتن به‌س بۆ ئێمه ده‌بێت، له‌و سه‌رکه‌وتنه‌شه‌وه به‌ڵێن ده‌ده‌ین، که هه‌رگیز ڕێگا نه‌ده‌ینه‌وه مێژووی پڕ کاره‌ساتمان دووباره‌ ببێته‌وه. پێویسته یه‌کترییمان خۆش بوێت و کوردستانمان له خۆمان زیاتر خۆش بوێت.