چراخان و شه‌وه‌زه‌نگ

5

مه‌حمود ئه‌حمه‌د عوسمان
و. له‌ عه‌ره‌بییه‌وه‌: ئیسماعیل به‌رزنجی
 

هه‌ولێر
له‌ ساڵانی چل و په‌نجاكاندا، هاوینمان له‌ هاوینه‌هه‌واری پیرمام به‌سه‌ر ده‌برد، دوو خانوومان له‌ خانووه‌كانی گه‌شتوگوزاری به‌كرێ ده‌گرت، كه‌ هه‌ندێك جار پێیان ده‌گوت خانووه‌كانی سكه‌ك، وه‌بیرم دێ دیواری یه‌كێك له‌ ژووره‌كانی دانیشتن له‌ شووشه‌ دروست كرابوو، له‌وێوه‌ دیمه‌نه‌ سروشتییه‌ دڵڕفێنه‌كان جوان وه‌دیار ده‌كه‌وتن، به‌زۆری پیاسه‌مان ده‌كرد و هه‌ندێك جاریش له‌بن كه‌پر داده‌نیشتین و نوكته‌مان بۆ یه‌كتر ده‌گێڕایه‌وه‌، له‌گه‌ڵ دراوسێكاندا، كه‌ زۆربه‌یان خزم و ناسیاو بوون، سه‌ردانی یه‌كترمان ده‌كرد، به‌ڕاستی رۆژگارێكی پڕ شادی و به‌خته‌وه‌ری بوو.


بۆ خواردنه‌وه‌ی چا و سارده‌مه‌نی ده‌چووینه‌ هۆتێل سه‌ڵاحه‌دین و له ‌بانێژه‌كه‌ داده‌نیشتین، رۆژانه‌ له‌ مه‌له‌وانگه‌ی هۆتێله‌كه‌ مه‌له‌مان ده‌كرد، فوئادی برا گچكه‌م وه‌رزشوان و مه‌له‌وان بوو، له‌ خۆهاویشتن زۆر لێزان بوو، به‌ جووڵانه‌وه‌ی پاڵه‌وانانه‌ ده‌چووه‌ سه‌ر هه‌ڵده‌ره‌كه‌، پێش ئه‌وه‌ی بكه‌وێته‌ ناو ئاوه‌كه‌وه‌، دانیشتوان چه‌پڵه‌یان بۆ لێ ده‌دا و داوایان ده‌كرد دووباره‌ی بكاته‌وه‌.


له‌ پیرمامه‌وه‌ ده‌چووینه‌ شه‌قڵاوه‌ و گه‌لیی عه‌لی به‌گ و حاجی ئۆمه‌ران و چێژمان له‌ دیمه‌نه‌ نازداره‌كانی كوردستان وه‌رده‌گرت، ئه‌گه‌ر زه‌یدی برا گه‌وره‌مان له‌گه‌ڵ بوایه‌، له‌ شه‌قڵاوه‌ راده‌وه‌ستاین و ده‌چووینه‌ دیوه‌خانی سدیق به‌گی میران، كه‌ كه‌وتبووه‌ سه‌ر حه‌وزی ئاو و داری وای تێدابوو، كه‌ ته‌مه‌نی له‌ سه‌دان ساڵ زیاتر بوو، دوای مردنی فه‌یسه‌ڵی برا گه‌وره‌م و باوكم، زه‌یدی برام كاروباری خانه‌واده‌ی گرته‌ ئه‌ستۆ، زه‌ید كه‌سایه‌تییه‌كی به‌هێزی هه‌بوو و له‌ خۆڕسكه‌وه‌ زیره‌ك و بوێر بوو، دوو رووداو له‌ ژیانی زه‌یددا، كه‌ هێشتا گه‌نج بوو كه‌سایه‌تیی ئه‌و ده‌سه‌لمێنن، یه‌كه‌میان: كه‌ له‌ ساڵانی چله‌كان وه‌زیری ناوه‌خۆ سه‌ردانی هه‌ولێری كرد و له‌ یانه‌ی فه‌رمانبه‌ران كۆبوونه‌وه‌یه‌كی ساز دا و تێیدا به‌رنامه‌ی حكوومه‌تی بۆ لێواری هه‌ولێر شرۆڤه‌ كرد و له‌ كاتی وتار خوێندنه‌وه‌دا، زه‌ید قسه‌ی به‌ وه‌زیر بڕی و گوتی: "چه‌ند داواكارییه‌كی گه‌لی كورد هه‌یه‌ ده‌مه‌وێت بیده‌م به‌ وه‌زیر". پۆلیس به ‌زه‌بری هێز له‌ هۆڵه‌كه‌ بردیانه‌ ده‌ره‌وه‌ و ده‌ستگیریان كرد، دوای ئه‌وه‌ باوكم توانی بیهێنێته‌ ده‌ره‌وه‌. دووه‌میان: زه‌ید له‌ گرتیگه‌ سه‌ردانی عه‌ونی یوسفی كرد، دوای ته‌واوبوونی كاتی سه‌ردانه‌كه‌ پۆلیس داوای لێ كرد كه‌ بڕواته‌ ده‌ره‌وه‌، به‌ڵام زه‌ید گوتی:
تا عه‌ونی یوسف ئازاد نه‌كه‌ن، هه‌ر له‌ گرتیگه‌ ده‌مێنمه‌وه‌.


زه‌ید بۆ خوێندنی یاسا له‌ زانكۆی فوئاد، چووه‌ قاهیره‌، ئه‌و كاته‌ باوكم له‌ ژیاندا مابوو، به‌ ناوی خوازراوه‌ی (محه‌مه‌د شێرزاد) كتێبێكی به‌ ناونیشانی (نضال الاكراد) بڵاو كرده‌وه‌، بڵاوكردنه‌وه‌ی كتێبێكی سیاسی له‌باره‌ی مافه‌كانی كورده‌وه‌ له‌ نیوه‌ی یه‌كه‌می ساڵانی چله‌كاندا، به‌ڕاستی هه‌نگاوێكی بوێرانه‌ بوو. هه‌ر له‌ گه‌نجییه‌وه‌، كێشه‌ی كورد زه‌یدی سه‌رقاڵ كردبوو، له‌ هه‌مان كاتدا به‌ كێشه‌ی دیموكراسیشه‌وه‌ سه‌رقاڵ بوو، له‌و بڕوایه‌دا بوو كه‌ هه‌ردووكیان به‌یه‌كه‌وه‌ به‌ستروان. چه‌ندان سه‌عات گفتوگۆی له‌باره‌ی چه‌مکی دیموكراسییه‌ت و فراوانكردنی پێناسه‌كه‌ی كه‌ گرێبه‌ستی كۆمه‌ڵایه‌تی و ئازادیی بیروڕا و پاراستنی كه‌مینه‌كان بگرێته‌وه‌، ئه‌مانه‌ به‌ته‌واوی سه‌رقاڵیان كردبوو.
نووسه‌ر و ئه‌دیب (زیوه‌ر خه‌تاب) له‌باره‌ی زه‌یده‌وه‌ له‌ رۆژنامه‌ی (خه‌بات) وتارێكی بڵاو كرده‌وه‌ و پاشان له‌ كتێبه‌كه‌شیدا (رحلة‌ فی عالم الفكر)دا بڵاوی كرده‌وه‌ و نووسیویه‌تی: ”زه‌ید ئه‌حمه‌د عوسمان پیاوێكی لیبرالی و باوه‌ڕی به‌ دیموكراسییه‌ت بوو، حه‌زی له‌وه‌ بوو له‌ژێر سیسته‌مێكی دیموكراسیی په‌رله‌مانیدا بژی و تێیدا هاووڵاتی له‌ بیروڕادا ئازاد بێت و مافی هاووڵاتیبوونی پارێزراو بێت، زه‌ید ئاره‌زووی بوو ببێته‌ كۆڵه‌گه‌یه‌ك له‌ كۆڵه‌گه‌كانی ئه‌و سیسته‌مه‌، له‌ هه‌مووی گرنگتریش، كه‌سێكی زمان خاوێن و سه‌رزه‌نشتی كه‌سی نه‌ده‌كرد، قه‌تیش دانه‌ده‌به‌زییه‌ ئاستی ڕكابه‌ره‌كانی، جگه‌ له‌ چه‌ندان سیفاتی تر، كه‌ پایه‌ی مرۆڤ به‌رز ده‌كه‌نه‌وه‌".


دوای بڵاوبوونه‌وه‌ی وتاره‌كه‌ی زیوه‌ر خه‌تاب، له‌ رۆژی 19/8/1998 قاره‌مان ئیبراهیم نووری له‌ رۆژنامه‌ی (خه‌بات) به‌دواداچوونێكی بڵاو كرده‌وه‌، تێیدا هاتووه‌: "دڵخۆش بووم به‌و وتاره‌ی، كه‌ به‌ڕێز زیوه‌ر خه‌تاب له‌باره‌ی خواڵێخۆشبوو زه‌ید ئه‌حمه‌د عوسمانه‌وه‌ له‌ ژماره‌ (874)ی رۆژی 15/5/1995ی رۆژنامه‌ی (خه‌بات)دا بڵاوی كرده‌وه‌، لێره‌دا چه‌ند شتێك، كه‌ له‌باره‌ی زه‌ید ئه‌حمه‌ده‌وه‌ نووسراوه‌، یان باسیان كردووه‌، باس ده‌كه‌م:


1ـ ئه‌دیب و شاعیری گه‌وره‌ی عه‌ره‌ب جه‌برا ئیبراهیم جه‌برا، له‌ لاپه‌ڕه‌ 67ی كتێبی ( شارع الامیرات ـ السیرة‌ الذاتية لجیرا ابراهیم جبرا)، كه‌ له‌ ساڵی 1995 به‌ر له‌ كۆچی دوایی به‌ چه‌ند مانگێك له‌باره‌ی زه‌یده‌وه‌ نووسیویه‌تی: "تا ئێستا مێژووی یه‌كه‌م سه‌ردانی نه‌مروودم به‌ته‌واوی بیر دێته‌وه‌، چونكه‌ رۆژی دوایی سه‌ره‌تای به‌هار بوو، ئه‌و رۆژه‌ له‌بیره‌وه‌ریی مندا ئه‌زموونێكی قووڵه‌ و كاری له‌ ده‌روونم كرد، به‌تایبه‌تی، كه‌ ئاسه‌واری مێژووی كۆنم له‌ رووی هونه‌ری و بیناسازییه‌وه‌ بینی، هاوڕێ و رێنیشانده‌رم له‌و ناوچه‌ جوانه‌ی عێراقدا خوالێخۆشبوو زه‌ید ئه‌حمه‌د عوسمان بوو، كه‌ ساڵی 1950 به‌ رێگه‌ی مه‌حمودی برا گچكه‌یه‌وه‌ ناسیم، زه‌ید وای كرد كه‌ باكوور ببینم، شاره‌زای هه‌موو سووچێك و عاشقی نیشتمانه‌كه‌ی بوو، یه‌ك له‌ نوێنه‌ره‌ لاوه‌كانی ئه‌نجومه‌نی نیشتمانی بوو، باوكیشی كه‌سایه‌تییه‌كی كوردی دیار بوو، موته‌سه‌ریفی هه‌ولێر و ئه‌ندامی ئه‌نجومه‌نی پیاوماقووڵان بوو، هه‌ستم كرد له‌ رووی زانیاری و هاوچه‌رخییه‌وه‌ شوێنپێی باوكی هه‌ڵگرتووه‌.


2ـ له‌ كاتی له‌ دادگه‌دانی ئه‌حمه‌د موختار بابان، دوا سه‌رۆك وه‌زیرانی سه‌رده‌می مه‌لیك، له‌به‌رده‌م دادگه‌ی باڵای سه‌ربازیی تایبه‌ت، كه‌ به‌ دادگه‌ی گه‌ل به‌ سه‌رۆكایه‌تیی مه‌هدوای ناسراوه‌، داواكاری گشتی له‌ دادگه‌ی ناوبراودا نامه‌یه‌كی به‌ ئیمزای مه‌لیك فه‌یسه‌لی دووه‌م خسته‌ روو، كه‌ تێیدا ئاماژه‌ به‌وه‌ ده‌كات، كه‌ پاڵپشتیی له‌ پاڵاوتنی زه‌ید ئه‌حمه‌د عوسمان ده‌كات، وه‌ك نوێنه‌ری هه‌ولێر، سه‌رۆكی دادگه‌ ئه‌حمه‌د موختار بابان به‌وه‌ تاوانبار ده‌كات، كه‌ ئه‌مه‌ به‌ڵگه‌ی ده‌ستتێوه‌ردان و پاڵه‌په‌ستۆیە له‌سه‌ر هه‌ڵبژاردن، وه‌رامی ئه‌حمه‌د موختار بابان وه‌ك له‌ لاپه‌ڕه‌ 220ی به‌شی چواره‌می له‌ دادگه‌دانه‌كاندا هاتووه‌، گوتوویه‌تی: "زه‌ید ئه‌حمه‌د عوسمان لاوێكی دیاری هه‌ولێره‌ و بێ هیچ ده‌ستتێوه‌ردانێك له‌ هه‌ڵبژاردن ده‌رده‌چێت".


هه‌ر ماڵێك له‌ ماڵه‌كانی هه‌ولێر، رۆژێكی دیاریكراویان بۆ پێشوازیی مێوانان ته‌رخان كردبوو، ئه‌و رۆژه‌ دیاریكراوه‌ ده‌بووه‌ كۆڕی بیروڕا گۆڕینه‌وه‌ و باسكردنی رووداوه‌كان.


موحسین ئاغای مێردی خوشكی گه‌وره‌م، كه‌ بۆ ماوه‌ی 30 ساڵ تا ته‌مووزی ساڵی 1958 سه‌رۆكی شاره‌وانیی هه‌ولێر بوو، رۆژانی هه‌ینی دانی سبه‌ینان پێشوازیی له‌ میوانان ده‌كرد، به‌ڵام زه‌یدی برام دوای نیوه‌ڕۆی رۆژێك له‌ هه‌فته‌دا پێشوازیی له‌ میوانه‌كانی ده‌كرد، ئه‌و رۆژانه‌ ده‌بوونه‌ كۆڕی سیاسی و فیكری و ئه‌ده‌بی.


یانه‌ی فه‌رمانبه‌ران، مه‌ڵبه‌ندی چالاكیی كۆمه‌ڵایه‌تی بوو له‌ هه‌ولێر، جگه‌ له‌ پیاوه‌ دیاره‌كانی شار، سه‌رجه‌م فه‌رمانبه‌ران ئه‌ندامی ئه‌و یانه‌یه‌ بوون، زۆربه‌ی ئه‌ندامان یاریی تاوڵی و كۆنكانیان ده‌كرد و پاشان له‌وێ چێشتیان ده‌خوارد، كه‌ زیاتر كه‌بابی به‌تامی هه‌ولێر بوو.


هوتێلی سكه‌ك، به‌ باخچه‌ جوانه‌كانی و خزمه‌تگوزارییه‌ باشه‌كه‌ی، شوێنێكی په‌سه‌ندكراو بوو، له‌وێ چێشتی ئینگلیزی لێ ده‌نرا، ئه‌و هوتێله‌ وه‌ك هوتێلی سكه‌ك له‌ مووسڵ و كه‌ركووك ساڵانێكی زۆر له‌ ئاستێكی به‌رزدا مایه‌وه‌.


سه‌ردانی كتێبخانه‌ی شێخ محه‌مه‌دم ده‌كرد، به‌ڵام زۆربه‌ی كاتم له‌ چاپخانه‌ و وێنه‌گرییه‌كه‌ی گیوی موكریانی به‌سه‌ر ده‌برد، گیو شاعیر و شاره‌زای مێژوو و ئه‌ده‌بی كوردی بوو، قسه‌كردن له‌گه‌ڵ ئه‌و زاته‌ زۆر چێژی تێدابوو، رۆژانه‌ بۆ گوێگرتن له‌ قسه‌كانی سه‌ردانیم ده‌كرد.


له‌و بیره‌وه‌رییانه‌ی هه‌ولێر له‌ ساڵانی چل و په‌نجاكاندا، كه‌ تا ئێستاش له‌بیرم ماون، دیمه‌نی ده‌روێشێكی بوو بەناوی عه‌لی، رۆژی به‌ كۆكردنه‌وه‌ی پاشماوه‌ی خواردن له‌ ماڵان و چێشتخانه‌كاندا به‌سه‌ر ده‌برد و خواردنه‌كانی ده‌دا به‌ سه‌گه‌ به‌ڕه‌ڵاكان، رۆژانه‌ به‌ ده‌وروبه‌ری هه‌ولێردا ده‌سووڕایه‌وه‌ و ده‌یان سه‌گی به‌دواوه‌ بوو، ئه‌میش وه‌ك شوانێك چاودێریی ده‌كردن، كه‌س خۆی تێ نه‌ده‌گه‌یاند و بێزاری نه‌ده‌كرد.


زۆربه‌ی خانه‌واده‌ ده‌ستڕۆیشتووه‌كانی هه‌ولێر له‌و ماوه‌یه‌دا هاوسۆز و لایه‌نگری بیروباوه‌ڕی چه‌پ بوون، ته‌نانه‌ت كوڕی هه‌ندێك له‌ ده‌ربه‌گه‌كانیش پاڵپشتیی جوولانه‌وه‌ی جووتیارانیان ده‌كرد.


پێوه‌ندیی پته‌ومان له‌گه‌ڵ خزمان له‌لای باوكم و دایكمه‌وه‌ هه‌بوو، دایكم كچی شێخ مارفی به‌رزنجی بوو، ماڵی خاڵۆكانم له‌ گونده‌كانی ده‌وروبه‌ری هه‌ولێر بوو، زۆر جار سه‌ردانمان ده‌كردن و چاومان به‌ خاڵۆزاكانمان ده‌كه‌وت، سه‌ردانی دووگرتكانم له‌بیره‌، كه‌ ماڵی كوڕه‌ پووره‌كانم له‌وێ بوون، گه‌وره‌كه‌یان كاك ئه‌حمه‌د پیاوێكی كۆك و زیره‌ك بوو، كاریزما و ئاماده‌گییه‌كی تێدا بوو، گچكه‌كه‌شیان عومه‌ر، هه‌ر له‌ منداڵییه‌وه‌ شه‌یدای ده‌نگه‌ خۆشه‌كه‌ی بووین و سه‌رسامی ده‌كردین.


براده‌ره‌كانی زه‌یدی برام، له‌ سلێمانی و كه‌ركووك و كۆیه‌ و به‌غدا ده‌هاتن بۆ لای، له‌ سلێمانی حامید به‌گی جاف و جه‌لالی كوڕی و ته‌ها محێدین مه‌عرووف، له‌ كه‌ركووك شێخ حوسێنی خانه‌قا و كاكه‌ حه‌مه‌ی برای، له‌ كۆیه‌ زیاد ئاغا و مه‌سعوود محه‌مه‌د و له‌ به‌غداش مسته‌فا قه‌له‌مچی و عیماد ئه‌رشه‌د عومه‌ری ده‌هاتن.


ڕه‌وه‌ندێكی مووسڵاویی بچووك له‌ هه‌ولێر بوون، كه‌ زۆره‌به‌یان پزیشكی ناسراو بوون له‌ مووسڵ، وه‌ك ره‌شید زه‌كه‌ریا و عه‌بدولئه‌حه‌د نوور و روفائیل ته‌بوونی، ئه‌وانه‌ پێوه‌ندییه‌كی پته‌ویان له‌گه‌ڵ عیزه‌دینی مه‌لافه‌ندی و زه‌یدی برامدا هه‌بوو.
له‌و ماوه‌یه‌دا، عیسمه‌ت كه‌تانی، به‌رله‌وه‌ی له‌ وه‌زاره‌تی ده‌ره‌وه‌ دابمه‌زرێت، ساڵێك له‌ هه‌ولێردا مایه‌وه‌، كه‌تانی براده‌ری زه‌یدی برام بوو، له‌گه‌ڵ موحسین ئاغا و یه‌كێك له‌ پزیشكه‌ مووسڵاوییه‌كان یاریی (بردج)یان ده‌كرد، كه‌تانی دوایی بوو به‌ دیپلۆماتكارێكی دیار و پایه‌ی باڵای له‌ نه‌ته‌وه‌یه‌كگرتووه‌كان وه‌رگرت، نوێنه‌ری تایبه‌تی ئه‌مینداری گشتی بوو له‌ سۆماڵ، هه‌روه‌ها سه‌رۆكایه‌تیی كۆنگره‌ی ئافره‌تانی جیهانی له‌ چیندا كرد و كاتێكیش له‌ ساڵی 1982، كه‌ عێراق سه‌رۆكایه‌تیی خوله‌كه‌ی وه‌رگرت، كه‌تانی بووه‌ سه‌رۆكی ده‌سته‌ی گشتیی نه‌ته‌وه‌یه‌كگرتووه‌كان، ساڵی 2001 كۆچی دوایی كرد، ئه‌مینداری گشتیی ئه‌و كاته‌ (كۆفی ئه‌نان) به‌ دیپلۆماتكارێكی شاره‌زا وه‌سفی كرد و گوتی: "ژیانی كه‌تانی بۆ هه‌موومان نموونه‌یه‌ك بوو، كۆچی دوایی هه‌ر بۆ كه‌سوكار و منداڵی زه‌ره‌ر نه‌بوو، بگره‌ بۆ نه‌ته‌وه‌یه‌كگرتووه‌كانیش خه‌ساره‌ت بوو". كه‌تانی دوای ئه‌وه‌ی له‌لایه‌ن حكوومه‌ته‌وه‌ خانه‌نشین كرا، كۆفی ئه‌نان داوای لێ كرد وه‌ك راوێژكار بۆ نه‌ته‌وه‌یه‌كگرتووه‌كان بگه‌ڕێته‌وه‌، كه‌تانی رازی بوو، به‌ڵام به‌ مه‌رجێك مووچه‌كه‌ی (1) دۆلار بێت، دوای كۆچی دوایی، ئه‌م هه‌ڵوێسته‌ی وه‌ك نووسراوێك له‌به‌رده‌م نووسینگه‌كه‌ی له‌ نه‌ته‌وه‌یه‌كگرتووه‌كان هه‌ڵواسرا.


كه‌تانی و زه‌یدی برام براده‌ری ته‌مه‌ن بوون، ساڵی 1978 كاتێك له‌ باڵه‌فڕگه‌ی به‌غدا چاوه‌ڕێی گه‌یشتنی جه‌نازه‌ی زه‌ید بووین، تا له‌ فەره‌نساوه‌ بگات، كه‌تانییش به‌وپه‌ڕی خه‌مه‌وه‌ له‌گه‌ڵ ئێمه‌ راوه‌ستابوو، بۆی هه‌یه‌ ساڵانی په‌نجاكانی له‌ هه‌ولێر وه‌بیر هاتبێته‌وه‌، پێش ئه‌وه‌ی بچێته‌ وه‌زاره‌تی ده‌ره‌وه‌، یان ئه‌و گفتوگۆیانه‌ی هاتبێیته‌وه‌ بیر، كه‌ له‌گه‌ڵ زه‌یددا له‌باره‌ی دیموكراسیه‌ت و ئازادی و عێراقی پاشه‌ڕۆژه‌وه‌ ده‌یانكرد.


له‌ سه‌یر و سه‌مه‌ره‌كانی قه‌ده‌ریش، له‌ به‌ڵگه‌نامه‌ی نهێنییه‌كانی وه‌زاره‌تی ده‌ره‌وه‌ی ئه‌مه‌ریكا، له‌نێوان ساڵانی 1970 ـ 1973دا، كه‌ دوای تێپه‌ڕبوونی ماوه‌ی یاسایی بڵاو كرانه‌وه‌، له‌وێدا رۆڵی كه‌تانی و زه‌ید له‌ كێشه‌ی كورد دیار خراوه‌، ئه‌مه‌ش دوو برووسكه‌ی ئالوگۆڕكراوی نێوان ئه‌وسای ئه‌مه‌ریكا (جۆرج بۆش)ی باوك و (هینری كیسنجه‌ر)ی وه‌زیری ده‌ره‌وه‌:
بالوێزی ئه‌مه‌ریكا ـ نه‌ته‌وه‌یه‌كگرتووه‌كان
بۆ وه‌زاره‌تی ده‌ره‌وه‌ ـ واشنتۆن
مێژووی: 28/3/1972
عیسمه‌ت كه‌تانی، یاریده‌ده‌ری ئه‌مینداری گشتیی نه‌ته‌وه‌یه‌كگرتوو‌ه‌كان پێوه‌ندیی پێوه‌ كردم و گوتی: مسته‌فا بارزانی، سه‌ركرده‌ی كوردانی عێراق، نامه‌یه‌كی بۆ حكوومه‌تی ئه‌مه‌ریكا هه‌یه‌ و زه‌ید ئه‌حمه‌د عوسمان، براده‌ر و راوێژكاری بارزانی، ده‌یگه‌یه‌نێت و ده‌یه‌وێت چاوی به‌ وه‌زیر كیسنجه‌ر و من بكه‌وێت. كه‌تانی گوتی: ئه‌و پێوه‌ندییه‌كان ئه‌نجام ده‌دات، نه‌ك له‌به‌رئه‌وه‌ی لێپرسراوێكی نه‌ته‌وه‌یه‌كگرتوو‌ه‌كانە، بگره‌ له‌به‌رئه‌وه‌ی كورده‌ و پێوه‌ندیی كه‌سێتیی له‌گه‌ڵ زۆربه‌ی سه‌رانی كورددا هه‌یه‌، كه‌تانی داوای لێ كردم ئه‌و پێوه‌ندییانه‌ به‌نهێنی بمێننه‌وه‌.

لێدوان
كه‌تانی له‌ نه‌ته‌وه‌یه‌كگرتوه‌كان خۆشه‌ویست و ناسراوه‌، بێ گومان ده‌توانێت راستگۆیی زه‌ید ئه‌حمه‌د عوسمانی نوێنه‌ری بارزانی بسه‌لمێنێت، ئێمه‌ لێره‌وه‌ به‌گوێره‌ی رێنوێنییه‌كانی وه‌زاره‌تی ده‌ره‌وه‌ جارجار پێوه‌ندی به‌ كه‌تانییه‌وه‌ ده‌كه‌ین، تا بزانین رای له‌باره‌ی كێشه‌ی كورده‌وه‌ چییه‌.
تكایه‌ وه‌رامم بده‌نه‌وه‌ ئه‌گه‌ر ناڕازین چاوم به‌ نێردراوی بارزانی بكه‌وێت..

له‌ وه‌زاره‌تی ده‌ره‌وه‌
بۆ بالوێزی ئه‌مه‌ریكا ـ نه‌ته‌وه‌ یه‌كگرتوو‌ه‌كان
مێژووی: 29/3/1972
ئه‌مه‌ دووپاتكردنه‌وه‌ی پێوه‌ندیی ته‌له‌فۆنیی ئه‌مڕۆیه‌ له‌باره‌ی چاوپێكه‌وتنی باڵوێز بوش، له‌گه‌ڵ زه‌ید ئه‌حمه‌د عوسمان، نێردراوی سه‌ركرده‌ی كورد مسته‌فا بارزانی.
وه‌زاره‌تی ده‌ره‌وه‌ لاریی نییه‌، دووباره‌ی ده‌كه‌مه‌وه‌، لاریی له‌وه‌دا نییه‌ باڵوێز بوش چاوی به‌ نوێنه‌ری سه‌ركرده‌ی كورد مسته‌فا بارزانی بكه‌وێت، ئێمه‌ له‌ واشنتۆن هه‌مان سیاسه‌ت جێبه‌جێ ده‌كه‌ین، ده‌شبێت دووپاتی سیاسه‌تی درێژخایه‌ن بكه‌ینه‌وه‌، ئه‌مه‌ش ئاماده‌ییمانه‌ بۆ كۆبوونه‌وه‌ی له‌گه‌ڵ سه‌رانی كورد به‌شێوه‌یه‌كی نافه‌رمی، تا گوێیان لێ بگرین و بزانین چ ده‌ڵێن.