واقیعی كۆمەڵگەی توركی بەدوورە لە زنجیرە دراماكانی

 

لە توركیا مافی ئافرەت رۆژانە پێشێل دەكرێت، تۆ دەزانیت رۆژانە ٣ ئافرەت لە توركیا بە دەستی پیاو دەكوژرێن. كۆمەڵگەی توركی بەرامبەر بە ئافرەت ئەوپەڕی توندوتیژە، ئەوە بۆیە رۆژ نییە رێكخراوەكانی ئافرەتان لە توركیا، بۆ داواكردنی مافەكانیان نەڕژێنە سەر شەقام.


بە سەدان پیاو بە تۆمەتی ئەوەی ژنكوژن لە زیندانەكاندان، یاخود دەستدرێژیان كردووەتە سەر ئافرەتی خوار تەمەن ١٨ ساڵان، نیگەرانییەكە ئەوەیە، ئەو ژنكوژ و دەستدرێژیكارانە ئازاد دەكرێن، واتە دوای چەند مانگێك زیندانی، بە كەفالەت ئازاد دەكرێن.


بەداخەوە تاكی كورد لە چاوی زنجیرەدراما توركییەكانەوە سەیری كۆمەڵگەی توركی دەكات، ئاخر درۆم نەكردبێت، زۆر ئافرەتی كورد خەون بە مێردێكی توركەوە دەبینیێت، چونكە لە دراماكاندا دەبینێت چی جێنتڵمانێكن بەرامبەر بە ئافرەت، لە راستیشدا وا نییە و توندوتیژن.


با نموونەی ئەكتەرێكی پیاوی توركتان بۆ بهێنمەوە، كە لە دراماكاندا رۆڵی سەرەكی دەبینێت و بەردەوام خۆشەویستیی بۆ ئافرەت دەردەبڕێت، ئەویش ناوی (ئەحمەد كوڕال)ە. ئەو ئەكتەرە بە شەق و زللە كەوتە گیانی گۆرانیبێژی ئافرەت (سڵا)، تەنیا لەبەرئەوەی لەسەر بابەتێك دژی وەستابووەوە.


ئەو ئیبراهیم تاتڵیساسە، جگە لەوەی بە کوشتنی ئافرەتێك تۆمەتبارە لە توركیا، هولیا ئەفشار، كە لە زۆربەی فیلمەكانی تاتڵیساسدا رۆڵی بینیوە، دەڵێت، بەردەوام سووكایەتیی پێ كردووم و لێشی دەدام. هاوسەری پێشووشی ئاشكرای كرد كە چەندین جار لە ماڵەوە زیندانیی كردووە.


موستەفا جەجەلیی گۆرانیبێژ، كە زۆربەی ئافرەتە كوردەكانی باشوور خۆشیان دەوێت و كۆنسێرتیشی لە هەولێر ئەنجام دا، خیانەتی لە هاوسەرەكەی كردووە و چەند مانگێك بەر لە ئێستا بە سەرخۆشی لەناو ئوتومبێڵەكەیدا لەگەڵ لەشفرۆشێك گیرا.


لە زۆربەی دراما توركییەكاندا، پیاوی كوردی باكوور وەكوو چەتە و جەلاد و ژنكوژ نیشان دەدەن، تا پێت بڵێن ئەوە پیاوی كوردە ژنكوژ و دزە نەك تورك، پیاوی توركیش وەكوو میهرەبان بەرامبەر بە ئافرەت و ژینگە نیشان دەدات.


بەو زنجیرە دراما توركییانە هەڵمەخەڵەتێ، چونكە ئەوان بە (هێزی نەرم) دەیانەوێت كولتوور و زمانت بسڕنەوە، ئاخر پێشتر بە هێزی رەق (بە چەك و شەڕ) هەوڵی سڕینەوەی كولتووری كوردیان دەدا، ئێستا بە هێزی نەرم كە زنجیرە دراماكان نموونەیەكی زیندوون.


بەداخەوە بۆ وەزارەتی رۆشنبیری، كە هیچ سانسۆرێك لەسەر دراماتوركییەكان دانانێت و هەر كۆمپانیا و تەلەڤزیۆنێك بە ئارەزووی خۆی دۆبلاژیان دەكات، لەكاتێكدا ٩٠٪ی ئەو دراما توركییە دۆبلاژكراوانە، دژی كوردن و بۆ سڕینەوەی كولتووری كورد بەرهەم هاتوون.


زیاتر لە هەزار رۆشنبیری تورك داوای یاساییان لەسەر ئەو زنجیرەدراما توركییانە تۆمار كردووە و داوای راگرتنی دەكەن، چونكە لە رووی دەق و سیناریۆوە ئەوەندە لاوازن، هەموو لە یەكتری دەچن.


تاریق ئاكن، كە ئەكتەرێكی ناوداری توركیا بوو، دوو ساڵ پێشتر كۆچی دوایی كرد، لە دیمانەیەكدا دەڵێت: لە زۆربەی فیلمەكانمدا ژیانی باكووری كوردستانم نیشانی رای گشتیی توركیا و حكوومەت دەدا، تا پێیان بڵێم بە هانایانەوە بچن و خزمەتگوزارییان بۆ ببەن، بەڵام بەداخەوە گوێیان لێ نەگرتم، بەڵام ئێستا دراماكانی تورك بەپێچەوانەی تاریق ئاكن، ژیانی باكوور پیشان دەدەن، وەكوو ئەوەی باكوورییەكان ئافرەتكوژ و چەتە و رێگر بن. ئەی ئەوە نییە ئەوەی خەڵكی ئورفا، ئامەد، مێردین بێت رۆڵی چەتەی پێ دەدەن.


بۆیە واقیعی كۆمەڵگای توركی وەكوو خۆی ببینە، نەك لە زنجیرە دراماكاندا. من ٣ ساڵ لە توركیا ژیاوم، بە چاوی خۆم بینیومە بەرامبەر بە ژن و منداڵ كۆمەڵگەیەكی چەند توندوتیژن، بۆیە بە ئێوەشی دەڵێم، تا هەڵنەخەڵتێن بەو درۆیانەی لە رێگەی هێزی نەرمەوە بۆتان دەكەن.