ئه‌رێ به‌ڕاست ئێمه‌ عێراقین؟!

هاوته‌ریب له‌گه‌ڵ ره‌فتاری داگیركاریدا، هانی ره‌وتێكی عێراقچیش دراوه‌

ئه‌گه‌ر له‌وه‌ گه‌ڕێین، كه‌ به‌قووڵایی مێژوودا بچینه‌ خوارێ و له‌ زوڵم و سته‌می ئه‌مه‌وی و عه‌باسییه‌كان سه‌باره‌ت به‌ داگیركاری و چه‌وساندنه‌وه‌ی گه‌لانی غه‌یره‌ عه‌ره‌ب و به‌تایبه‌تیش گه‌لی كورد و ته‌عریبی كوردستان، ته‌نیا باس له‌م سه‌ت ساڵه‌ی دوایی ده‌وڵه‌تی به‌ناو عێراق بكه‌ین، كه‌ چی ده‌رهه‌ق به‌ كورد و كوردستانه‌كه‌ی كردووه‌. عێراقێك نه‌ قووڵایی مێژوویی و جوگرافیایی هه‌یه‌ و نه‌ هیچ وه‌ختێك یه‌ك گه‌ل و نه‌ته‌وه‌ بووه‌. لای هه‌مووان ئاشكرایه‌، عێراق بۆ دروست كرا و چۆن له‌ شه‌وێك یان چه‌ند شه‌وێكدا به‌ نووكی قه‌ڵه‌می ئیمپریالیزمی به‌ریتانی و بۆ خواستی ئه‌وان قووت كرایه‌وه‌ و دواتریش شه‌رعییه‌تێكی منشولی نێوده‌وڵه‌تیشیان بۆ ساز دا.

كورد نه‌ له‌ سه‌ره‌تای لكاندنی خوارووی كوردستان به‌م عێراقه‌وه‌ رازی بووه‌ و ئێستاشی له‌گه‌ڵدا بێت خۆی به‌ عێراقی نازانێت، چونكه‌ نه‌ عه‌قڵیه‌تی حوكمڕانیی عێراقی به‌ سوننه‌ و شیعه‌یه‌وه‌، كورد به‌ هاووڵاتی ده‌زانێت، خاكه‌كه‌شی به‌ به‌شێك له‌ نیشتمانی عه‌ره‌ب ده‌زانێت. ئه‌گه‌رچی له‌گه‌ڵ هاتنی داگیركاریی هەزار و ئەوەندە ساڵ پێش ئێستادا كورد به‌ زه‌بری شمشێر زۆر شتی به‌سه‌ردا سه‌پا، به‌ڵام هیچ وه‌ختێك ده‌ستبه‌رداری خه‌سڵه‌تی نه‌ته‌وه‌یی خۆی نه‌بوو. ئه‌وه‌ش یه‌كێكه‌ له‌و رقه‌ ئه‌ستووره‌ی عه‌ره‌ب له‌ كورد، كه‌ نه‌یتوانیوه‌ له‌نێو بۆته‌ی عه‌ره‌بیدا بیتوێنێته‌وه‌. له‌ سه‌ت ساڵی رابردوودا و به‌ هاندانی ئینگلیز و له‌سه‌ر ده‌ستی مه‌لیك فه‌یسه‌ڵی یه‌كه‌م، ده‌ست كرا به‌ ته‌عریبێكی نه‌خشه‌ بۆداڕێژراو، وه‌ك ئاگر له‌ پووشی خاكی كوردستان به‌ربوو، به‌ڵام ئه‌وه‌ی جێی سه‌رنجه‌، كورد هه‌ر له‌ سه‌ره‌تای دروستكردنی ده‌وڵه‌تی عێراقه‌وه‌ ده‌ستبه‌رداری خه‌باتی خه‌ونی سه‌ربه‌خۆیی نه‌بووه‌. بۆیه‌ هه‌ر له‌ شێخ مه‌حمودی نه‌مره‌وه‌ بۆ شۆڕشه‌كانی بارزانیی نه‌مر و شۆڕشی ئه‌یلوول و دواتریش شۆڕشی نوێ تا راپه‌ڕین، كورد ده‌ستبه‌رداری سه‌ربه‌خۆیی و دامه‌زراندنی ده‌وڵه‌تی سه‌ربه‌خۆیی خۆی نه‌بووه‌. هه‌ڵبه‌ته‌ هه‌م به‌ریتانیا و هه‌م ده‌وڵه‌تی عێراق هه‌ر به‌ سه‌ركوتی شۆڕش و به‌رخودانه‌كانی كوردستانه‌وه‌ نه‌وه‌ستاون و ته‌عریب و وێرانكردن و شێواندنی كولتوور و مێژوو و بواره‌كانی تریشی گرتووەته‌وه‌. هاوته‌ریب له‌گه‌ڵ ره‌فتاری داگیركاریدا، هانی ره‌وتێكی عێراقچیش دراوه‌، تا وا له‌ گه‌لی كورد بكه‌ن ده‌ستبه‌رداری خه‌بات ببێت و خۆی به‌ عێراقی بزانێت.

ئه‌م ره‌وته‌ به‌داخه‌وه‌ سه‌ری كێشایه‌ ناو هه‌ندێك كه‌سایه‌تی و حزب و باڵی ناو حزبه‌كانی كوردستان. ئه‌گه‌رچی هیچ وه‌ختێك ئه‌م ره‌وته‌ 5%ی كوردی تێنه‌ده‌په‌ڕاند. سه‌رده‌مانێك وا بڵاو ده‌كرایه‌وه‌، كه‌ خه‌بات بۆ ئازادیی كوردستان ده‌ستكردی ئیمپریالیزمه‌ و ده‌بێت كورد خه‌بات بۆ عێراق بكات و هه‌ر كاتێك سۆشیالیزمی 24 قیرات دامه‌زرا، ئه‌و كاته‌ كوردیش به‌ مافه‌كانی ده‌گات، بۆیه‌ ئێستا خه‌باتی نه‌ته‌وه‌یی خزمه‌ت به‌ ئه‌جێندای ئیمپریالیزم ده‌كات. دواتر قسه‌ هاته‌ سه‌ر ئه‌وه‌ی، كه‌ ته‌نیا دیموكراسی چاره‌سه‌ری مه‌سه‌له‌ی كورد ده‌كات. ئه‌گه‌ر ئه‌مه‌ بۆ هه‌ندێك وڵاتی راهاتووی دیموكراسی راست بێت، ئه‌وا بۆ عێراق و ته‌واوی وڵاتانی عه‌ره‌بی، جگه‌ له‌ خه‌ونی چۆله‌كه‌ به‌ولاوه‌ شتێكی تر نییه‌، له‌به‌رئه‌وه‌ی ئه‌و جیهانی عه‌ره‌بییه‌ بڕوای به‌ دیموكراسی و مافی گه‌لان، به‌تایبه‌تی مافی گه‌لی كورد نییه‌.

ئه‌وه‌ی سه‌یره‌ ئه‌وه‌یه‌، كه‌ كورد له‌دوای ساڵی 2003ه‌وه‌ به‌شداریی له‌ بنیاتنانه‌وه‌ی عێراقدا كرد! ئه‌و عێراقه‌ی جگه‌ له‌ سه‌ركوت بۆ كورد هیچی تری نه‌بووه‌!. به‌و هیوایه‌ی، كه‌ هیچ نه‌بێت كورد به‌ لایەنی كه‌می مافه‌كانی بگات. مه‌سه‌له‌ی فیدراڵییه‌تیش لای سه‌رانی عێراقی، جگه‌ له‌ گه‌مه‌یه‌كی سیاسی و كاتی به‌ولاوه‌ شتێكی تر نه‌بووه‌ و نییه‌، چونكه‌ شیعه‌ش هه‌مان ئه‌جێندای سوننه‌ی هه‌یه‌ له‌ داگیركردنی كوردستاندا. ئێستاش ده‌توانین به‌ئاشكرا هه‌ماهه‌نگیی شیعه‌ و سوننه‌، چ به‌ ئاشكرا چ به‌ نهێنی ببینین، له‌ ته‌عریب و وێرانكردنی كوردستاندا. ئه‌وه‌ی ئێستا له‌ ره‌فتاری ده‌سه‌ڵاتدارانی عێراقدا ده‌بینرێت، كاردانه‌وه‌ی رق و شۆڤینیزمه‌ به‌رامبه‌ر به‌ كورد، چونكه‌ كورد چه‌كی دیموكراسی و ره‌وایه‌تیی مافی گه‌لانی له‌ دیاریكردنی چاره‌نووسدا به‌ ریفراندۆم نیشانی عه‌ره‌ب و جیهاندا. كه‌ له‌و پرۆسه‌یه‌دا 93% خه‌ڵكی كوردستان نه‌ك هه‌ر كورد، به‌ڵكوو ته‌واوی پێكهاته‌كانی تریش ده‌نگیان بۆ سه‌ربه‌خۆیی و گه‌لی كوردستاندا. بۆیه‌ چه‌ند هه‌وڵیش بدرێت له‌لایه‌ن ده‌سه‌ڵاتی عێراقه‌وه‌ و هه‌م له‌لایه‌ن ره‌وته‌ پڕۆعێراقییه‌كه‌ی كورد، كورد نابێته‌ به‌شێك له‌ گه‌لانی عێراق و كوردستانیش وه‌ك كۆڵۆنییه‌كی عێراقی ده‌بینرێت؟! تا ئه‌و كاته‌ی بارودۆخێكی وا دێته‌ پێشه‌وه‌، به‌ به‌ڵگه‌نامه‌ی ریفراندۆمی سه‌ربه‌خۆیی كوردستانێكی ئازاد دروست ده‌بێت و غه‌دری مێژوویی ده‌سه‌ڵاتدارانی عێراقی له‌سه‌ر نامێنێت. ئه‌وه‌ش ئه‌و راستییه‌ ده‌سه‌لمێنێته‌وه‌، كه‌ نه‌ جاران و نه‌ ئێستا و نه‌ له‌ ئاینده‌شدا كورد عێراقی نییه‌ و كوردستانیش به‌شێك نییه‌ له‌ عێراق.