یه‌كڕیزی پێویسته‌

 

له‌ سه‌ره‌تاوه‌ ده‌بێ بڵێین، كاتێك ده‌مانه‌وێ وتارێك له‌باره‌ی (یه‌كڕیزیی كورد)ه‌وه‌ بنووسین، هه‌وڵ ده‌ده‌ین وشه‌ و ده‌سته‌واژه‌ی وا به‌كار بهێنین، كه‌ خوێنه‌ر پێیان ئاشنا نییه‌، چونكه‌ باسكردنی ئه‌م لایه‌نه‌ ئیدی مرۆڤ بێزار ده‌كات، بێ سوودیشه‌، له‌به‌رئه‌وه‌ی پارت و لایه‌نانی سیاسی بایه‌خی ئه‌م بابه‌ته‌یان به‌ته‌واوی فه‌رامۆش كردووه‌، ته‌نانه‌ت به‌ لای هه‌ندێك خه‌ڵكه‌وه‌ بووه‌ته‌ بابه‌تێكی قێزه‌ون.

له‌ لای كه‌س شاراوه‌ نییه‌، كه‌ دووباره‌كردنه‌وه‌ی بابه‌تێك، هه‌ر بابه‌تێك، جۆرێك له‌ (دیزه‌به‌ده‌رخۆنه‌)ی بابه‌ته‌كه‌ی لێ ده‌كه‌وێته‌وه‌، ته‌نانه‌ت ئه‌گه‌ر ئه‌و بابه‌ته‌ دروست و ره‌واش بوو.

داوای یه‌كڕیزیی كورد بكه‌یت، ئیدی سوودێكی نییه‌، وه‌ك ئه‌وه‌ی (بانگ به‌ كوولەکەی به‌تاڵدا بكه‌یت)، هه‌رچه‌ندی داوا له‌ هێز و لایه‌نانی سیاسی بكه‌ین، كه‌ یه‌ك هه‌ڵوێست بن، وه‌ك ئه‌وه‌یه‌ قسه‌ بۆ كه‌سانی نەبیست و نەدوو بكه‌ین، یاخود باسی (مریشكه‌ ره‌شه‌) بكه‌ین، هۆیه‌كه‌شی ئه‌وه‌یه‌ كه‌ لایه‌نانی كورد به‌ڵێنیان به‌ خۆیان داوه‌، كه‌ بیر له‌ هه‌موو شتێك بكه‌نه‌وه‌، ته‌نیا یه‌كڕیزی نه‌بێت، هه‌روه‌ها بیر له‌و ئاسته‌نگانه‌ش نه‌كه‌نه‌وه‌، كه‌ به‌ره‌و رووی پرسه‌كه‌یان ده‌بێته‌وه‌. بۆیه‌ هه‌ندێك جار ناچار ده‌بین وشه‌ی (گونجان) له‌بری (یه‌كڕیزی) یان (یه‌كبوون) به‌كار بهێنین.

ره‌وشی سیاسیی كورد پتر له‌ هه‌ر كاتێكی پێشتر په‌رته‌وازه‌یه‌، ئه‌م په‌رته‌وازه‌ییه‌ش نه‌ك هه‌ر چاره‌سه‌ركردنی پرسی كورد دوا ده‌خات، به‌ڵكوو هه‌ڕه‌شه‌ له‌ قه‌واره‌ی كورد و ئاماده‌بوونی سیاسییانه‌شی ده‌كات، ئه‌مه‌ش نه‌ك هه‌ر له‌ لای شه‌قامی كورد زۆر ئاشكرا و دیاره‌، به‌ڵكوو له‌ لای دۆستانیش، كه‌ په‌یوه‌ندییان به‌ پرسی كورده‌وه‌ هه‌یه‌، روون و ئاشكرایه‌.

چه‌ندین هه‌وڵ به‌ ئاراسته‌ی كۆكردنه‌وه‌ی لایه‌نانی سیاسی و پارته‌كانی كوردی رۆژئاوا به‌ ده‌وری یه‌ك مێزدا له‌ئارادان، دواترینیان ده‌ستپێشخه‌رییه‌كه‌ی فه‌ره‌نسایه‌، به‌ر له‌ ئه‌ویش ئه‌مەریكا هه‌وڵی دا، له‌نێوان هه‌ردوو ده‌ستپێشخه‌رییه‌كه‌ی دۆستانیش، چه‌ندین ده‌ستپێشخه‌ری له‌ لایه‌ن كۆمه‌ڵگه‌ی مه‌ده‌نی و لیژنه‌كانی نیازپاكییه‌وه‌ خراونه‌ته‌ روو، ئه‌مانه‌ ده‌سته‌ و گرووپ و لیژنه‌ی ناوخۆ و ده‌سته‌بژێری خۆماڵین.

هه‌ڵبه‌ت هیچ نیشانه‌یه‌ك بۆ ئاشته‌وایی به‌دی ناكه‌ین، یان ئه‌وه‌ی ره‌وشێك له‌ئارادا بێت، به‌وه‌ی دۆخێك گه‌ڵاڵه‌ بكات، كه‌ لاپه‌ڕه‌ی رابردوو بپێچێته‌وه‌، تا به‌ هه‌ماهه‌نگی له‌ بابه‌تی پێشینه‌وه‌ ده‌ست به‌ كاری سیاسی بكه‌ن.

سه‌یریش نییه‌، كه‌ ئه‌مڕۆ بابه‌تی یه‌كڕیزی نه‌ك هه‌ر كارێكی پێویست و هه‌نووكه‌ییه‌، به‌ڵكوو بووه‌ته‌ بابه‌تێك راسته‌وخۆ په‌یوه‌ندیی به‌ ئایینده‌ی شه‌قامه‌وه‌ هه‌یه‌، نه‌ك ته‌نیا هێز و لایه‌نانی سیاسی.

له‌ به‌دبه‌ختیی ئێمه‌، ئه‌م بابه‌ته‌، واته‌ قه‌یران و كێشه‌ی نێوان پارته‌كان، له‌ لای گه‌ل و جڤاكی دیكه‌ ئه‌وه‌ی باجه‌كه‌ی ده‌دات هێز و پارت و لایه‌نانی سیاسی و دواڕۆژی ئه‌وانه‌، كه‌چی له‌ دۆخی كورددا بابه‌ته‌كه‌ جودایه‌، پارته‌كان له‌گه‌ڵ دامه‌زراندنیانه‌وه‌ كاریان به‌و ئاراسته‌یه‌ كردووه‌، كه‌ ئاوێته‌ به‌ شه‌قام ببن، شه‌قام به‌رژه‌وه‌ندییه‌كی تایبه‌ت به‌ خۆی نییه‌، به‌رژه‌وه‌ندیی شه‌قام و پارته‌كان ئاوێزانی یه‌ك بوون، قه‌ده‌ری كورد وایه‌، پارته‌كان پرسی كورد و خه‌ڵكه‌كه‌یان له‌ خۆیاندا قه‌تیس كردووه‌، جا بۆیه‌ هه‌ر شتێك كار له‌ ناوه‌ندی سیاسی و پارته‌كان بكات، ره‌نگدانه‌وه‌ی به‌سه‌ر تێكڕای دۆخی كورده‌وه‌ ده‌بێت.

ئاسته‌نگی راسته‌قینه‌ وا به‌ڕێوه‌یه‌، كه‌ پێویست به‌ یه‌كڕیزیی پارته‌كان ده‌كات، چونكه‌ ئه‌وان پرسی كورد و خه‌ڵكه‌كه‌یان له‌ خۆیاندا قه‌تیس كردووه‌، ئاسته‌نگه‌كانیش هه‌ڕه‌شه‌ له‌ پرسی كورد و چاره‌نووسی ده‌كه‌ن، له‌ نموونه‌ی:

-قۆناغی گه‌ڵاڵه‌كردنی ده‌ستوور هاتووه‌ته‌ پێش، چونكه‌ ته‌نیا هه‌نگاوێك له‌ ده‌ستپێكردنی ئه‌و پرۆسه‌یه‌وه‌ دوورین، هه‌ر كه‌سیش له‌ ده‌ستووردا نه‌بێت، ئایینده‌شی نابێت.

-قسه‌ی ناوچه‌ و نه‌وای ئارام، یان ئاساییكردنه‌وه‌ی ره‌وش له‌گه‌ڵ فاكته‌ری هه‌رێمی، نه‌خاسمه‌ له‌ رێی داڕشتنی رێساكانی گه‌مه‌ تازه‌كه‌ بۆ ئه‌وه‌ی لێڵایی به‌رده‌م توركیا لا بدرێت، لاپه‌ڕه‌یه‌كی نوێش بكرێته‌وه‌، ئه‌مەریكاش ئه‌مه‌ی له‌ تورك و كورد ده‌وێت.

-چه‌سپاندنی ئارامی و ئاسایش بۆ کوردستانی رۆژاڤا و باكووری رۆژهه‌ڵاتی سووریا.

ماوه‌ته‌وه‌ بڵێین، ئاینده‌ی كورد وابه‌سته‌ و بارمته‌ی راده‌ی له‌یه‌ك گه‌یشتنی ناوخۆی ئه‌وانه‌، نه‌بوونی هه‌ماهه‌نگی و گونجانی سیاسی، واته‌ ئاینده‌یه‌كی باش چاوه‌ڕوانی كورد ناكات.

په‌ندی وتاره‌كه‌ش ده‌ڵێ: "سوارچاك به‌ پشتی ئه‌سپێكه‌وه‌ سه‌ركه‌وتن به‌ده‌ست ده‌هێنێت، كه‌ رامی كردووه‌ و به‌ جوامێریی ئه‌و ئاشنایه‌".