لەیلای کوردان

وه‌ بوونه‌ی ياد (45) ساڵه‌ی شه‌هيد له‌يلا قاسم و هه‌ڤاڵه‌يلێ

وه‌ شێوه‌زار داڵگی...

 

12ى ئایار گشت ساڵێگ، یاد له‌ سێداره‌داين (له‌یلا)ى كوردانه‌. ئه‌و له‌یلا ك‌ وه‌ شه‌هیدبوينێ، بويه‌ سیمبول گیانفیدایى و باوه‌ڕوه‌خوه‌ێداشتن و نیشتمانپه‌روه‌رى ئافره‌ت كورد. دوو ڕووژ وه‌رجله‌ ئيسه‌ و له‌ 12ى ئایار 2019، چل و په‌نج ساڵ له‌بان له‌سێداره‌داين شه‌هید له‌یلا قاسم و هه‌ڤاڵه‌يلێ گوزه‌يشت. ئه‌و (له‌یلا) ك بويه‌ یه‌كه‌مین ئافره‌ت له‌ مێژووى ڕووژهه‌ڵات ناوين، ك وه‌خاتر هۆكار سیاسى له‌سێداره‌ بدريه‌ێد.


شه‌هید له‌یلا قاسم، ئه‌ندام پارت دیموكرات كوردستان بوى و له‌ ناو ڕزه‌يل (یه‌كيه‌تی قووتابیان كوردستان) خه‌بات‌ و تێكۆشان خوه‌ێ ده‌سوه‌پێكرد، وه‌لێ نه‌ك تەنیا پارتى، به‌ڵكم گشت نه‌ته‌وه‌ى كورد و سه‌رجه‌م پارت و لایه‌نه‌يل سیاسى‌ كوردستان‌، شه‌هید له‌يلا وه‌ شه‌هيد خوه‌يان ‌زانن. له‌وه‌ختێگ ك لایه‌نه‌يل سیاسی كوردستان له‌ سه‌ر فره‌ پرس و بابه‌ت جياجيا هاوڕا نین، وه‌لێ یه‌كێگ له‌و خاڵه‌يل هاوبه‌شه‌ ك‌ گشتیان له‌ سه‌رێ كووكن، شه‌هید (له‌یلا قاسم)ـه‌ و گشت لاێگ وه‌ سیمبول گیانفدایى و خه‌بات و تێكۆشان ئافره‌ت كورد ‌زاننه‌ێ.


له‌ێره‌ توام ئه‌وه‌ بويشم ك‌ شه‌هيد له‌یلا قاسم مايه‌ی شانازى گشت كوردێگه‌ و له‌ هه‌ر شوونێگ باس له‌ خه‌بات ژن كورد له‌ بزاڤ سیاسی كوردستان بكرێه‌ێد، ناو و یاد (له‌یلا قاسم)یش ها له‌وره‌. ته‌نانه‌ت له‌ فره‌تر ئه‌و بوونه‌ و یاد و كۆڕ و كۆبوونه‌وه‌ و سمیناره‌يليشه‌ ك‌ له‌لایه‌ن پارت و لایه‌نه‌يل نه‌ته‌وه‌یى گشت به‌شه‌يل كوردستان، سه‌باره‌ت وه‌ خه‌بات و قوربانیداين ئافره‌ته‌يل كوردستان‌ ساز كريه‌ن، وه‌رده‌وام باس له‌ تێكۆشان و ئازايه‌تی و گیانفدایى ئى شه‌هید قاره‌مانيشه‌ ‌كريه‌ێد، وه‌لێ وه‌داخه‌و‌، به‌ش فره‌ێگ له‌ ئه‌و وه‌رپرس و كاروه‌ده‌س و كه‌سایه‌تییه‌يله‌ ك‌ وه‌ وه‌رده‌وامى له‌ بوونه‌ و یاد و وتاره‌يلیان باس له‌ خۆڕاگرى و قوربانیداين شه‌هید له‌یلا قاسم كه‌ن، تا ئيسه‌يش نيه‌زانن مه‌زار ئه‌و شه‌هيد نه‌مره‌ ها كووره‌‌ و له‌ كووره وه‌ خاك سپارياس.


كاره‌سات گه‌ورایگه‌، له‌یلایگ داشتويد ك‌ نه‌ تەنیا كورده‌يل، به‌ڵكم ئازادیخوازه‌يل جه‌هانيش جوور یه‌كه‌م ژن سیاسى له‌سێداره‌درياێ له‌ مێژووی هاوچه‌رخ ڕووژهه‌ڵات ناو‌ڕاس شانازى وه‌ پيه‌و بكه‌ن، وه‌لێ تۆى كورد خاوه‌ن شه‌هید جارێ نه‌زانید مه‌زار شه‌هیده‌گه‌د ها له‌ كووره‌! یا ئه‌گه‌ریش بزانید، تا ئيسه‌ يه‌ك جاریش سه‌ردانێ نه‌كرديده‌.


ئایا له‌یلاى ئيمه‌ شایسته‌ى ئه‌وه‌ نییه‌، وه‌ لاێ كه‌مه‌و‌ گشت ساڵێگ و له‌ یاد شه‌هیدبوينه‌گه‌ی، شاندێگ پایه‌به‌رز سه‌كردایه‌تى سیاسى كورد، سه‌ردان ئارامگا‌گه‌ى بكه‌ن و تاجه‌گوڵێگ له‌سه‌ر مه‌زارە پیرۆزه‌گه‌ى دابنه‌ن؟ ئایا شه‌هيد له‌يلا قاسم شایسته‌ى ئه‌وه‌ نییه‌ ك‌ ئاوڕێگ له‌ مه‌زاره‌ له‌هویره‌وبرياێ و پشتگووشخريايه‌گه‌ى بدريه‌ێده‌و‌ و بكريه‌ێده‌ مۆنۆمێنتێگ، ئه‌ڕا ئه‌وه‌گ جوور سیمبول خه‌بات و خۆڕاگرى و تێكۆشان و گیانفدایى ئافره‌ت كورد نیشان گشت جه‌هان بدريه‌ێد؟ ئایا له‌یلاى وه‌وی (عروس) كوردستان شایسته‌ى ئه‌وه‌ نییه‌ ك ئه‌گه‌ر ته‌نانه‌ت ئه‌ڕا يه‌ك جاریش بوود، زووم كامێراى كه‌ناڵه‌ ئاسمانيه‌گانمان لاێگه‌و بكه‌نه‌ لاێ مه‌زارگه‌گه‌ى‌؟ نيه‌زانم ئى هه‌مگه‌ێ سانسۆركردنه‌ مه‌مه‌ره‌گه‌ێ چه‌س..؟


ئاخ كه چ تاوان گه‌وراێگه‌، له ‌كوردستان پێشنیار دروسكردن قه‌ورسانێگ تایبەت وە تيرۆريسته‌يل داعش كريا، وه‌لێ تا ئيسه‌ تەنیا جارێگیش باس له‌ مه‌زاره‌گه‌ى (له‌یلا) نه‌كريا. ئه‌و مه‌زار پاكه‌ ك له‌ قه‌ورسان وادی السلام نه‌جه‌ف، دوير له‌ خاك پيرۆز كوردستان غه‌ريب كه‌فتيه‌.