ستراتیجەكانی سیاسەتی كولتووری

نامەكەم بۆ سەرۆك وەزیرانی كابینەی حەوتەم

بەشی دووەم

 

ڕۆشنبیری بۆ سەرجەمی كۆمەڵ، نەك تەنیا بۆ ڕۆشنبیران.
وەزارەت دەبێ كولتوور بكات بە خۆراكی هەموو چین و توێژەكانی كۆمەڵ، نەك تەنیا بایەخ بە رۆشنبیران و هونەرمەندان بدات، هاوكات بەشی هەرە گەورەی توانای خۆی بۆ لاوان و نەوەی ئەمڕۆ تەرخان بكات.
بەپێی ستراتیجێك كار بكات كە كولتوور تەنیا ڕۆشنبیران ناگرێتەوە، بگرە هەموو كۆمەڵ دەگرێتەوە. ئەم ستراتیجە لە ئێستای وەزارەتدا بزرە، لاوان دوورەپەرێز كراون لە داڕشتنی سیاسەتی ڕۆشنبیریی كوردستان، ئەمەیش زەنگێكی باش نییە بۆ ئایندە، چونكە ڕۆژ لە دوای ڕۆژ دەبێتە هۆی ناڕەزایی و دووركەوتنەوەی لاوان لە بزاڤی ڕۆشنبیری و چالاكیی داهێنەرانە.
بۆچی كۆمەڵ پێویستی بە رۆشنبیرییە؟
- بۆ ئەوەی تاكەكانی  تەندروست و بەهێز بن.
-  بۆ ئەوەی لە مانای ژیان بگەن و بزانن بۆچی دەژین.
- كولتوور تەنیا بۆ ڕۆشنبیران نییە، بگرە بۆ هەموو توێژەكانی كۆمەڵە.
- كۆمەڵگەی كوردستانی پێویستی بە خوێنێكی تازە و ڕیتمێكی خێراترە لە ژیانی ڕۆشنبیرییدا، نەك تەنیا دابونەریتی كۆن و كەلەپووری كەونین.
- لەسەر ئاستی دەرەوە و پێوندیمان بە جیهانەوە
كار و ئەركی وەزارەتی ڕۆشنبیری لەسەر ئاستی جیهانی و نێونەتەوەیی دەبێ پشتگوێ نەخرێت،  ئەزموونی سیاسیی كوردستان و كەسایەتی و شوناسی گەلی كورد و وپێوەندیی كولتووریمان بە جیهانەوە دەبێ بەرنامەی رژدی بۆ ساز بكرێت.
ڕاستە كوردستان لەم ساڵانەی دواییدا زیاتر خۆی بە جیهان ناساند، بەڵام ئەم خۆناساندنە هێشتاكە هەر لەسەر ئاستی ڕۆڵی سیاسیی هەرێمە، نەك ڕۆڵی كولتووری، بەڵێ ڕۆڵی سیاسیش گەڵێك گرینگە و بە هیچ شێویەك نكۆڵیی لێ ناكرێت، بەڵام لایەنی كولتووری و پێوەندیی ڕۆشنبیریمان بە جیهانەوە مەودای درێژخایەنتر بێت لە مێژوودا، ناساندنی كولتووری كوردستانیمان و ڕووی شارستانی و پێشكەوتوویی ئەزموونی هەرێمی كوردستان پاڵپشتێكی گەورەیە بۆ ئەزموونی سیاسی و بوونمان. وەزارەتی رۆشنبیری ولاوان دەبێ لەوە بگات كە ئەم لایەنە گرینگە تەنیا بە چەند فیستیڤاڵێكی سەرپێیانە و بانگهێشتكردن و میوانداری وشاند و سەفەر چارەسەر ناكرێت.
 
میكانیزمی هاریكاری نێوان رۆشنبیری و خوێندنی باڵا و پەروەدە
 
هاریكاری و هاوئاهەنگیی وەزراەتی ڕۆشنبیری و لاوان لەگەڵ ئەو وەزارەتانەی كە پێوەندیی ڕاستەوخۆیان بە بواری ڕۆشنبیرییەوە هەیە، واتە خوێندنی باڵا و پەروەردە، ئەم پێوەندییە تاكوو ئێستا لاوازە. ئەم سێ وەزارەتە جگە لە كارنامە و نەخشە تایبەتییەكانی خۆیان پێویستە نەخشەی ڕۆشنبیریی هاوبەشیان هەبێت و زیاتر بچنە ناو كۆمەڵەوە، تا دەكرێت كار لەگەڵ گەورەترین ژمارەی توێژی لاوان بكەن. میكانیزمی كاری هاوبەشی ئەم سێ وەزارتە ئێستا بوونی نییە، هەر بۆ نموونە پێوەندیی وەزراەتی خوێندنی باڵا بە كۆمەڵ و بزاڤی ڕۆشنبیرییەوە لە خوارووی سفرەوەیە، هیوادارم لە كابینەی حەوتدا ئەم كەلێنە پڕ بكرێتەوە و كاری رژد بۆ ئەم پرسە بكرێت.

كردار نەك فێستیڤاڵ
ژێرخانی كولتووری

پێشنیاز دەكەم كابینەی حەوت پشكی گەورەی  بودجەكەی بۆ بونیاتنانی ژێرخانی كولتووری تەرخان بكات، كەمتر بۆ سازدانی  فێستیڤاڵ و ئاهەنگ و كاری سەرپێیی و ریكلام و پڕۆپاگەندەئامێز. بەڵێ ساڵانی نەوەتەكان و سەرەتای ساڵانی دوو هەزار بۆ خۆناساندن بە جیهان پێویستیمان بەم میتودە هەبوو، بەڵام ئێستا كات كاتی بینای ژێرخانێكی پتەوە بۆ ڕۆشنبیرییەكی فراوانی هاوچەرخ و مۆدێرن. كاتی ئەوە هاتووە وەزارەتی رۆشنبیری بودجەی خۆی بۆ كردار وبینای ژێرخانی ڕۆشنبیری تەرخان بكات،  كۆمەڵگەی كوردستانی و تاكی ئەم كۆمەڵە پێویستی بە بینای كولتووری و زەینی وجەستەیی و دەروونی هەیە. ئەمەش ئەركی سەرشانی وەزارەتی رۆشنبیری ولاوانە، بە هاریكاریی وەزارەتی پەروەردە و وەزارەتی خوێندنی باڵا و توێژینەوەی زانستی.
 
 
بە میللیكردنی ڕۆشنبیری لەسەرانسەری كوردستاندا
بنكەكانی ڕۆشنبیری وەكوو نموونە

بزاڤی ڕۆشنبیری پێویستە سنووری  شارە گەورەكان ببەزێنێت، شارۆچكەكان و ناوچە دوورەكان بایەخی تەواویان پێ بدرێت، ئەو گەنجانەی لە شەقامەكانی شارە گەورەكاندا ناڕەزایی دەردەبڕن زۆربەیان خەڵكی شارۆچكەكانن. بۆیە پێشنیاز دەكەم كابینەی حەوت ئەم لایەنە لە بەرچاو بگرێت و كار بۆ بینا و ستروكتوری ڕۆشنبیرییەكی فراوان لە شارۆچكەكاندا بكات. دروستكردنی بنكەی ڕۆشنبیریی مۆدێرن و ئەكتیڤ، ڕێگەچارەسەرێكی باشە، ئەزموونی سۆسیال دیموكراتەكانی ئەوروپا و ئەزموونی میسر لە دروستكردنی سەدان كۆشكی ڕۆشنبیری لە سەرانسەری وڵاتدا بەڵگەیە بۆ ئەم بۆچوونە.
پایتەخت دەبێت بایەخی كولتووریی پێ بدرێت
هەولێری پایتەخت لە كابینەی پێنجدا گەشەی كرد وپێشكەوتنێكی بێ ئەندازەی بەخۆە دیت، بەڵام ڕەنگە هەولێر یەكەم پایتەختی بێ شانۆ بێت لە جیهاندا! حكومەتی نوێمان دەتوانێت بەجدی كار بۆ پایتەختێكی ڕۆشنبیریی چالاك بكات، پایتەختێك كە شانۆ و سینەما و بنكەی ڕۆشنبریی جیاجیای تێدا بێت.
ئەمانە چەند خاڵێكن كە بەلای منەوە، وەكوو ڕاوێژكار لە وەزارەتی ڕۆشنبیری و لاوان، پاش ئەزموونی چەند ساڵەم، وەكوو ئەمانەتێكی مێژوویی بە باشم زانی پێشكەشی بەرێزتانی بكەم.
هەمیشە سەركەوتن و كاری داهێنەرانەتان لێ چاوەڕوان دەكەین.