گوڵی شار

دختۆر شایی بۆ نووسیبوو

(کۆڵان کۆڵان گێڕانەوە)

تۆ چاوده‌ ئه‌و كه‌ژاوه‌یه‌، ئه‌وه‌ی له‌بن مافووره‌وه‌ دێ، دیار نییه‌ چییه‌ و لەسەر چی ده‌ڕوا، له‌ هه‌موو لایه‌كه‌وه‌ مافوور شۆڕ بۆته‌وه‌، بستێك كه‌متری ماوه‌ له‌ جاده‌ بخشێ، نازانم شوفێر له‌ چ كونێكه‌وه‌ پێشه‌ خۆی ده‌بینێ. له‌و كه‌ژاوه‌یه‌، به‌رێ خۆ دێ، چ جۆڵایی و ته‌ونكارییه‌كه‌، كه‌س ده‌ستیان نابینێ، جۆڵاكه‌ی سه‌یداوه‌ش وا ته‌ڕده‌ست نییه‌، كه‌سێك له‌به‌ر ته‌ونی دانیشتووه‌، له‌ چاوان ده‌ڵێی ئایشه‌ شانه‌، له‌ بسكان سوێند بخۆی لێت ناكه‌وێ ئه‌وه‌ زولێخا به‌ندبێژه‌كه‌ی ناو ته‌له‌ڤزیۆنێیه‌، مافووره‌كه‌ی له‌ته‌واوبوونه‌، چ مافوورێك له‌ كاشانیش شتی وات به‌رچاو ناكه‌وێ، له‌ ته‌نیشته‌ وی كچێ ته‌شی ده‌ڕێسێ، وای، چه‌ند له‌ شیرنه‌كه‌ی وه‌فایی ده‌چێ، لێره‌ و له‌وێش چه‌ند مافوورێك به‌ لوودراوی داندراون، هه‌ندێكیان لەسەر قیتی به‌ده‌ستانه‌وه‌، مافوورێك له‌وانه‌ به‌ لای شۆسته‌دا غلۆر ده‌بێته‌وه‌، كوڕێك ده‌یگرێته‌وه‌، ده‌یخاته‌ سه‌ر شانی، دیتم به‌ كۆڵانه‌ ته‌سكه‌كه‌ی ته‌نیشت قوتابخانه‌دا هه‌ڵات، پۆلیسێك ده‌كه‌وێته‌ دوای، ئه‌گه‌ر زوو خۆی به‌ ماڵه‌ ته‌عجیلیه‌كدا نه‌كات، مسۆگه‌ر ده‌گیرێ، چونكێ باره‌كه‌ی گرانه‌ و پۆلیسه‌كه‌ش زۆر له‌شسووك دیاره‌، پیرێژنێ ده‌ڵێ:
پۆلیس له‌ هه‌ر جێیه‌ك بێت، گووی تێده‌كات.


مافوور، كوتاڵی به‌دواوه‌یه‌، كه‌ژاوه‌ی كووتاڵان ده‌ڵێی به‌هاره‌، هه‌ر ره‌نگێكت ده‌وێ تێیدا دیاره‌، كوتاڵ تۆپ تۆپ، ره‌نگ ره‌نگ، جۆر جۆر هی ژنان، هی پیاوان، منداڵان، ریز ریز، چین چین داندراون، جێ جێش كه‌سێك راوه‌ستاوه‌ و پارچه‌ كوتاڵێكی به‌ ده‌سته‌وه‌، ده‌ڵێی ئاڵایه‌ ده‌شه‌كێته‌وه‌، نا، ده‌ڵێی ده‌سماڵی سه‌رچۆپیه‌ و سه‌رچۆپیكێش ده‌یشه‌كێنێته‌وه‌، له‌ بنه‌بنانێ، شتێكی گه‌وره‌ هه‌یه‌، نازانم چییه‌، تۆ بڵێی هی كوتاڵ دروستكردن بێ؟


دوو سێ كه‌سیش لەسەر مه‌كینه‌ی دروومانێ، له‌ گژ دروومانن، مشكی به‌سه‌رێ، لەسەر ده‌گه‌ڕێ، ناوه‌ ناوه‌، گه‌زه‌ كوتاڵێ، به‌روانكه‌ی منداڵێ، ده‌سماڵێ، په‌رده‌یه‌كی سه‌ر ته‌له‌ڤزیۆن، تا هێزی تێدابوو هه‌ڵی ده‌دایه‌ ئاسمانێ، گرتنه‌وه‌ی كوتاڵی ئاسمانێ، گه‌مه‌یه‌كی ناسك و خۆشه‌، من جارێك به‌روانكه‌یه‌كم گرته‌وه‌، چاوبه‌خاڵ گه‌زه‌ چیتێكی جوانی گرته‌وه‌، به‌دیاری دابوویه‌ قیتێ.


جار هه‌بوو له‌ ئاسمانێ نه‌ده‌هاته‌وه‌، به‌سه‌ر ته‌لی دارتێلێ ده‌مایه‌وه‌ و لەسەره‌وه‌ی ئاڵای كابرا ده‌له‌رایه‌وه‌، كابرا هه‌ر ئه‌وه‌یه‌ كه‌ پیاوه‌كه‌ گوتی:
كوتك بۆ سه‌ری وی باشه‌.


دێ دێ، كه‌ر و باریان به‌خێر بێ، كه‌ژاوه‌ی دارتاشان دێ، به‌ ده‌نگی مشكۆوه‌ كه‌ژاوه‌ دێ، ئه‌وه‌ش هه‌ر كۆڵانه‌كه‌ی ناو قه‌یسه‌رییه‌، یه‌كێك له‌نێوان هه‌وجاڕ و شه‌غره‌ دانیشتووه‌، مژانه‌یه‌كی به‌ده‌سته‌وه‌یە، ئه‌و چه‌فیه‌ سپیه‌ له‌ گژ لووسكردنی كلكه‌ پێمه‌ڕه‌یه‌، ئه‌وێهێ ره‌وڕه‌وه‌ی منداڵانی له‌پێشه‌ و تایه‌ی تێده‌خات، ئه‌دی ئه‌و پیره‌! ره‌نگبێ ته‌مه‌نی قه‌یسه‌ریی هه‌بێ، به‌ده‌ستی له‌رزۆكه‌وه‌ قه‌فه‌زی كه‌وان چێ ده‌كات، ئه‌ها، كتێبخانه‌یه‌كی قشت و گچكه‌ له‌ولایه‌، سێ چوار كتێبی به‌رگ ئه‌ستووری تێدایه‌، خۆزی هی من ده‌بوو، بۆ كتێبخانه‌یه‌كی له‌و ته‌رزه‌ به‌ ئاسماندا ده‌چووم، هی من با، مه‌م و زین و تاریك و روون و ئه‌وانه‌م ده‌خسته‌ ناویه‌وه‌. له‌ولاتر چه‌كوچ به‌ده‌ستێ كوت كوت بزمار له‌ ده‌سته‌به‌ره‌یه‌ك ده‌كوتێ، له‌ دڵی خۆم گوتم، له‌ده‌ستم بێ ئه‌و بزمارانه‌ له‌ ده‌موچاوی كابرا ده‌كوتم، كابرا هه‌ر كابرایه‌!


هاتن هاتن، گوڵی شار هاتن، ئه‌و گوڵانه‌ سه‌رده‌مانه‌كی ژنانی زار پڕ بنێشت و وه‌ی شێره‌ی شاری، گووڕێژیان ده‌گۆتنێ، به‌ڵام هه‌وكه‌ گوڵی شارن، ئه‌و گوڵانه‌ نه‌بن، شار بن زبڵ و قوڕه‌شین و گوو ده‌كه‌وێ، شار بن په‌ڕۆ و په‌ڕه‌ كاخه‌ز و چنگه‌ موو ده‌كه‌وێ، كه‌ژاوه‌ی گوڵی شاری له‌ خڕ كه‌ژاوان پاكژتره‌، په‌ڵه‌یه‌ك، له‌كه‌یه‌ك، پته‌ تۆزێكی پێوه‌ نابینی، چه‌ند جوانیش خۆ ده‌له‌نگێنێ، دوو گوڵ گه‌سكی درێژیان له‌ ده‌سته‌، یه‌كیان له‌ زه‌له‌، ئه‌ویدی له‌ كرتی، چه‌ند به‌ ناز گه‌سك ده‌ده‌ن، به‌ ده‌وری عاره‌بانه‌ی سێ تایه‌ ده‌سووڕێنه‌وه‌، گوڵێكی تریش له‌و سه‌ری خاكه‌ناسێكی به‌ده‌سته‌وه‌، له‌ هه‌ردوو به‌ره‌وه‌ چه‌پڵه‌ڕێزانه‌، كه‌ژاوه‌، به‌ناو چه‌پڵه‌دا نه‌رم نه‌رم تێپه‌ڕی، شار هێنده‌ی له‌ دڵه‌وه‌ چه‌پڵه‌ی بۆ گوڵی شاری لێ داوه‌، له‌ ناچارییش بۆ كابرای لێ نه‌داوه‌.


كه‌ژاوه‌ی ئایاری كرێكاری بنی نایه‌، به‌رایی له‌ قه‌ڵاتێ ئاودیو بوو، بنی هێشتا هه‌ر له‌ ئاوی كه‌سكوسۆردایه‌، من چه‌ندم دیت، ده‌ هێنده‌ مایه‌، زۆر زۆر، په‌ڕه‌چی و خمچی و كاشیچی و خشتبڕ و بلۆكبڕ و كووره‌خانه‌ و سه‌رتاشخانه‌ و باخچه‌وان و كارگه‌ی پاقڵاوه‌ و لوقم و گه‌له‌ك (چی) و (خانه‌) و (بڕ) و (وان) و كارگه‌یدی ماون، بێن و تێپه‌ڕن، وێنه‌ی كابرا گووی تێكردبوو، ده‌نا كه‌س له‌ ته‌ماشاكردنی كه‌ژاوه‌ی كرێكاران بێزار نه‌ده‌بوو، نا، دوو وێنه‌، یه‌كیان سه‌ر رووتاوه‌یه‌ك بوو، ئه‌ویدی سه‌رو برۆ پڕ، سه‌رۆك و جێگره‌كه‌ی، له‌ قسان: جگه‌ له‌ هه‌ندێ ناكه‌س و جڕوجامشت و دوژمندار و هه‌ڵپه‌رست، كه‌س حه‌زی له‌ چاره‌ی ئه‌و دووه‌ نه‌ده‌كرد.


ماندووم، شنگ و تینم تێدا نه‌ما، به‌ره‌و ماڵ ده‌بمه‌وه‌، له‌ رێیێ له‌نزیك ئه‌و جێیه‌ی كاتی خۆی (مه‌م و زین)ی خانیم هه‌ڵگرته‌وه‌، دۆڵ و زوڕنا رایگرتم، ئه‌وه‌تا، دۆڵكوت و زوڕناژه‌نێكی سه‌یداوه‌، له‌ پشتی ترومبێلێكی كچكه‌ ئه‌و ناوه‌یان هێناوه‌ته‌ جۆش، پیاوێكی ره‌قه‌ڵه‌ی كورتیله‌ له‌ به‌ری ئه‌و باخچه‌یه‌ی بابم لێی باخچه‌وان بوو، به‌ تاقی ته‌نێ، خۆی گاوانی و سه‌رچۆپیی گرتووه‌، چاو ده‌نێ چتۆ شایی ده‌كات، زوو ناسیمه‌وه‌ پیاوه‌ سیلداره‌كه‌ی خۆمانه‌، ئه‌و پیاوه‌ی دكتۆر ده‌هۆڵ و زوڕنای بۆ نووسیبوو، گوێم لێیه‌ ده‌ڵێن:
هه‌ر له‌ تۆمان كه‌م بوو، شار به‌سه‌ر شێتدا كاول ده‌بێت، ئه‌وه‌شی هاته‌ سه‌ر.


ویستم بڵێم، ئه‌وه‌ شێت نییه‌، ئه‌وه‌ دكتۆر بۆی نووسیوه‌، نه‌مگۆت، پشتم تێكرد و هاتمه‌وه‌، هه‌رچه‌نده‌ زۆر شه‌كه‌ت و ماندووم، به‌ڵام شتێك له‌و پیاوه‌ی به‌لاشاوه‌ ده‌گێڕمه‌وه‌:
ماڵی له‌ ریزی ماڵی فازیل رێحانه‌ و ماڵی نه‌نه‌خانه‌، تۆ بڵێ له‌ كۆڵانی كه‌ویاره‌، ئه‌ویش كۆنه‌ لێره‌، به‌ڵام له‌ سێزده‌ ماڵه‌كه‌ی به‌لاشاوه‌ نییه‌، دره‌نگتره‌، وا تێبگه‌م هی شتێك پێش حه‌فتا و چواره‌، كوڕه‌كه‌ی شتێك له‌ من گچكه‌تر بوو، زوو له‌ كۆڵانێ زۆر پێكه‌وه‌ ده‌بووین، به‌ڵام كاتێ زانیم بابی سیلی هه‌یه‌، خۆم لێی ده‌دزییه‌وه‌، هه‌ر من نا، منداڵی گه‌ڕه‌كێ زار و لووتی خۆیان ده‌گرت و له‌ به‌ری هه‌ڵده‌هاتن، ده‌یانگۆت:
نه‌خۆشییه‌كه‌ی باب، له‌ كوڕ ده‌گرینه‌وه‌.


كوڕه‌ چاوشینه‌كه‌ی مام سلێمانی نه‌فتفرۆش، ئێوه‌ بڵێن كامه‌ران، له‌ هه‌مووان پتر لێی ده‌ترسا، هه‌تره‌شی لێ چووبوو، له‌ ده‌ركه‌ی حه‌وشه‌وه‌ سه‌ری ده‌رده‌هێنا، چاوی ده‌گێڕا، دیتبای كوڕی سیلداره‌كه‌ له‌ كۆڵانێیه‌، وه‌ك بڵێی دارلاستیقی تێبگرن، توند ده‌رگای لەسەر خۆی داده‌خست، ده‌چووه‌ سه‌ربانی، له‌وێوه‌ ته‌ماشای گه‌مه‌ی منداڵانی ده‌كرد، ئه‌منیش وه‌ك منداڵی گه‌ڕه‌كێ، به‌ڵام كه‌مۆكه‌ك به‌ رێزه‌وه‌، هه‌ڵنه‌ده‌هاتم و خۆم ده‌دزییه‌وه‌، هه‌وڵم ده‌دا هه‌ست پێنه‌كا له‌ ترسی سیلی بابی لێی هه‌ڵدێم، به‌ڵام تۆ بڵێی هێنده‌ گێل بێ نه‌زانێ!


ئه‌و پیاوه‌ به‌ سیله‌وه‌ هاته‌ گه‌ڕه‌ك، یه‌كه‌م جاره‌ كه‌سی سیلدار ببینم، به‌ڵام چه‌ندی له‌دووره‌وه‌ لێی ورد ده‌بوومه‌وه‌ نیشانه‌ی سیلم له‌ سیمای نه‌ده‌دیته‌وه‌، باشه‌ من نیشانه‌كانی سیلم ده‌ناسییه‌وه‌؟ پێشترێ له‌باره‌ی سیله‌وه‌ هه‌ر هێنده‌م ده‌زانی له‌وسه‌ری شار، خه‌سته‌خانه‌ك هه‌یه‌، ناوی خه‌سته‌خانه‌ی سیله‌، ئه‌گه‌ر كه‌سێكیش له‌ڕولاواز با، ژنان پێیان ده‌گۆت: ده‌ڵێی سیلداری.


پیاوه‌ سیلداره‌كه‌ به‌و شێوه‌یه‌ له‌ڕ نه‌بوو، سیلداری به‌سه‌ردا ببڕێ، ئێ، ئه‌و پیاوه‌ باوه‌ڕ ناكه‌م كه‌س له‌ گۆڕستان و پرسه‌ و پێش ده‌رگای به‌ندیخانه‌ دیتبێتی، لەسەرت دابا، پێی به‌ جێیه‌ك نه‌ده‌كه‌وت، دڵته‌نگیی پێوه‌ دیار با، مه‌گه‌ر بۆ چاره‌ی خۆی ده‌نا پێی به‌ خه‌سته‌خانه‌ش نه‌كه‌وتووه‌، بیرمه‌ ماوه‌یه‌ك خێزانه‌كه‌ی له‌ خه‌سته‌خانه‌ خه‌وتبوو، سه‌ری لێ نه‌دا، نه‌ده‌چووه‌ مزگه‌فتێش، له‌ ماڵێ نوێژی خۆی داده‌به‌ست، سیلدار ئاسمان ئاگری گرتبا، زه‌وی ئاو بردبای، له‌ به‌زم ره‌زمی خۆی نه‌ده‌كه‌وت، قسه‌ی خوا و پێغه‌مبه‌ری شكاندبا، هی دكتۆری نه‌ده‌شكاند، به‌ دیار كاولبوونی دنیاوه‌ شایی خۆی داده‌به‌ست.


هه‌نده‌ك له‌ شایی و گرته‌كانی ئه‌و پیاوه‌ به‌ ده‌نگ و ره‌نگه‌وه‌ له‌ یادگه‌ی من وه‌ك خۆیان ماون: له‌ نسکۆیەكه‌ی حه‌فتاوپێنجێ، ئه‌و رۆژانه‌ی خه‌ڵكی دڵی هێنده‌ی فستقێكی لێ مابۆوه‌، تۆ بڵێ هێنده‌ی دنكه‌ برنجێ، گه‌ڕه‌ك ده‌ڵێی خۆڵ و دۆی به‌سه‌ردا كراوه‌، كه‌چی له‌ ماڵی وان ده‌نگی حه‌سه‌ن زیره‌ك دێ، وه‌رن له‌گه‌ڵ من لە سەربانه‌وه‌ چاو ده‌نێ، ئه‌وه‌تا پیاوه‌ سیلداره‌كه‌ له‌بن بێرایی ده‌ستی ژنه‌كه‌ی گرتووه‌، ده‌سماڵ باده‌دا، نه‌نه‌خان به‌رۆكی گرتبوو:
دیاره‌، تۆ كورد نیت، شایی بۆ شینی كورد ده‌كه‌یت؟


گوتبووی: كه‌س هێنده‌ی من كورد نییه‌ و له‌گه‌ڵ شۆڕش نییه‌، به‌ڵام قسه‌ی دكتۆر ناشكێنم.


له‌ نه‌ورۆز و سه‌یرانه‌كه‌ی به‌ستۆڕه‌ش دیتم، ئه‌وه‌ی نازانم سه‌دام بوو، كێ له‌وێ دابه‌زی، هه‌رایه‌كیان نایه‌وه‌، ره‌نگه‌ خۆپیشاندان بووبێ، بیرمه‌ هه‌ر كه‌سێ پێی به‌ قوڕ با، ده‌یانگرت، چونكێ ئه‌وانه‌ی ناڕه‌زاییان ده‌ربڕی، به‌ ده‌و رووباره‌كه‌دا هه‌ڵاتبوون و كه‌وتبوونه‌ ناو قوڕ و لیته‌وه‌، ئێ له‌وێش شایی سیلدارم دیت، سه‌رچۆپییه‌كی گرتبوو، چ سنه‌ییه‌ك سه‌رچۆپیی وا جوان ناگرێ، هه‌نده‌ك وا تێگه‌یشتبوون، له‌ پێشوازیی حوكمه‌ت شایی ده‌كات، له‌ وه‌ڵامدا گوتبووی:
من لەسەر گۆڕی حوكمه‌تیش شایی داده‌به‌ستم، دكتۆر لۆی نووسیوم.


سیلدار شایی نه‌ده‌بوارد، له‌ هه‌ر كوێ ده‌نگی ده‌هۆڵ هاتبا، به‌دوایدا ده‌چوو، ئه‌و گوێی له‌ گێڕانه‌وه‌ نه‌بوو، شایی هی كێیه‌، كێ نییه‌، بایه‌خی نه‌بوو، هه‌ینێ له‌ گه‌ڕه‌كێ مه‌، لێگێڕانه‌وه‌ ته‌نها بۆ خواردن و شه‌و مانه‌وه‌ بوو، بۆ شاییكردن لێگێڕانه‌وه‌ی نه‌ده‌ویست، هه‌موو ده‌چوونه‌ شایی هه‌موو، كه‌م پیاویشت ده‌دی دۆی له‌ ده‌ست نه‌بێ، ژن و كچی ماڵی زاوا ده‌چوونه‌ ده‌ستی پیاوی نه‌دیت و نه‌ناسی، هه‌ینێ داب وابوو، ئه‌وه‌ نیشانه‌ بوو بۆ رێزگرتن و به‌هه‌ند دانان، نه‌ك به‌ره‌ڵایی گوێپێنه‌دان.


ئه‌من له‌ چ شاییه‌كی به‌لاشاوه‌ سیلدار نابینم بێ دۆ، دووی له‌ ده‌ست نه‌بێ، یه‌كی له‌ ده‌سته‌، ئه‌وجا كچ و ژنی جوان جوان ده‌چوونه‌ ده‌ستی، وا تێبگه‌م له‌ جوانیی شاییه‌كه‌ی نه‌ك خۆی، ئه‌و هه‌موو جوانه‌ی راده‌كێشا، جاروبار شاباشی باشی ده‌دا، هێشتا لووله‌ی زوڕنا نه‌گه‌یشتبووه‌ كن لووتی، ده‌ستی له‌ ده‌ستی دۆی ده‌ستی ده‌رده‌هێنا و چه‌ند گوێشینێكی هه‌ڵده‌دایه‌ هه‌وا..


ئه‌من سه‌رم له‌وه‌ سوڕ مابوو، خه‌ڵك كوو ده‌وێران بچنه‌ ده‌ستی، ئه‌دی ناگرنه‌وه‌، تووشی سیل نابن؟ ده‌مگۆت، تۆ بڵێی ته‌نها منداڵ ئه‌و نه‌خۆشییه‌ بگرنه‌وه‌! ده‌ستم له‌ لچكه‌ وه‌رامێك گیر نه‌بوو.


چیدی، چیدی؟ ئا، نه‌وه‌ك رێم به‌ ئۆرزدی نه‌كه‌وێته‌وه‌، با گرته‌كه‌ی ئه‌وێش نیشان بده‌مه‌وه‌، سیلدار هێنده‌ چووبووه‌ شایی ره‌شبه‌ڵه‌كێ، كۆمه‌ڵه‌ ژن و پیاوێكی له‌ جێیه‌ك دیتبا، به‌ شایی تێده‌گه‌یشت و خۆی ده‌گه‌یانده‌ ناویان، ئه‌وجا له‌بیرم چوو، ئه‌وه‌ بڵێم، ئه‌گه‌ر چه‌ند پێچێك شایی كردبا و ژنێك نه‌هاتبایه‌ته‌ ده‌ستی، ده‌هاته‌ ده‌رێ و ده‌چووه‌ ده‌ستی ژنێكه‌وه‌، دیاره‌ ئه‌وه‌ له‌ داب لادانه‌، شووره‌ییه‌، به‌ڵام دیار بوو ئه‌ویان ده‌ناسی و خه‌ڵك چاوپۆشییان لێ ده‌كرد.


رۆژه‌ك له‌و ئۆرزدییه‌، تۆ بڵێی بازاڕی به‌هه‌شتێ، هه‌بوو به‌و ناوه‌ ناوی ده‌هێنا، سیلدار كۆمه‌ڵێ ژن و پیاو ده‌بینێ ریزیان به‌ستووه‌، ریزبه‌ستن و نۆره‌گرتن له‌ بازاڕی به‌هه‌شتێ هه‌یه‌، من زۆر جار به‌رچاوم كه‌وتووه‌، سه‌رهاته‌كه‌ی سیلداریشم له‌نزیكه‌وه‌ دیت:
له‌هیكڕا بووه‌ هه‌را، ژنێك جوێنی پیس پیس له‌ زاریه‌وه‌ سه‌ری كردووه‌ و نایبڕێته‌وه‌:
كه‌رباب، له‌ ده‌وی بابت ریم، له‌ كونه‌ شاخه‌وه‌ هاتووه‌، ژنی نه‌دیوه‌..


سیلدارم هه‌رگیز وا كز و داماو نه‌دیتووه‌، وه‌ها ده‌پاڕایه‌وه‌، به‌رد بۆی ده‌توایه‌وه‌:
خوشكم، چاوه‌كه‌م، به‌ خودای به‌ هیچم نه‌بوو، نه‌مزانی، نه‌....


ئای له‌ سیلدار، وا تێگه‌یشتووه‌، شاییه‌، چووه‌ ده‌ستی ژنه‌ی گرتووه‌، ژن هێنده‌ و نیوی وی به‌ژنی هه‌یه‌، كه‌وشێكی له‌ پێیه‌، پانییه‌كه‌ی بستێ ده‌بێ، چ به‌له‌كێكی ئه‌ستوور و سپیی هه‌یه‌، برۆی لەسەر یه‌ك داو هێشتۆته‌وه‌، چاوی مستێ كلی تێكردووه‌، له‌گه‌نه‌ سووراوێكی له‌ خۆی داوه‌، پرچی خاوی درێژی لەسەر قۆڵی رووتی، په‌رته‌، داو داوه‌، قوڕت به‌سه‌ر سیلدار، پیاوێك ده‌ڵێته‌ سیلدار:
قوڕ به‌سه‌ر، خۆت له‌وه‌ داوه‌؟!


پۆلیس ده‌گات و سیلدار ده‌گرێ، ده‌یبات، چاوم لێیه‌، لەسەر ده‌رگا، به‌ رێی ده‌كا، مادام هاتمه‌ ناو بازاڕی به‌هه‌شتێ، با هه‌نده‌ك پێدا بگه‌ڕێم و چاو بگێڕم، له‌و بازاڕه‌، هه‌رچیت ده‌وێ، هه‌یه‌، هه‌رچی ژنی جوانی شاریش هه‌یه‌ دێنه‌ ئێره‌، سه‌ر كۆت، لاق رووت، ته‌ڕوپڕ، بۆنخۆش، بۆنی گوڵاویان رۆژه‌ رێیه‌ك ده‌ڕوات، ئه‌من شه‌رمم ده‌كرد روو بە ڕوو ته‌ماشایان بكه‌م، ده‌هاتم له‌ جام و ئاوێنه‌كانه‌وه‌ ته‌ماشام ده‌كردن، ئه‌و جامانه‌ی ناوه‌ ناوه‌ زرم كه‌سێك خۆی پێدا ده‌دا، نه‌یده‌زانی جامه‌.


كن قادرمه‌كه‌ له‌ هه‌موو جێیه‌ك خۆشتر بوو، هه‌بوو له‌وێ به‌ قه‌ستی خۆی به‌ر ده‌داوه‌، دره‌نگ پێكه‌وتم خۆبه‌ردانه‌وه‌ چ چێژێكی هه‌یه‌، له‌وێوه‌ لاق و شتێك له‌ناو رانی ژنان ده‌رده‌كه‌وت، پۆلیسیش دره‌نگ به‌وه‌ی زانی، وای لێ هات هه‌ر كه‌سێك له‌وێ ئه‌گه‌ر به‌ راستییش به‌ربێته‌وه‌، پۆلیس به‌ زلله‌یه‌ك قیتی ده‌كاته‌وه‌.


دره‌نگه‌، ده‌چمه‌وه‌، واز له‌ شایی و سیلدار و بازاڕی به‌هه‌شت ده‌هێنم، دوایی سه‌رێك له‌ به‌هه‌شته‌كه‌ ده‌ده‌مه‌وه‌، هه‌وكه‌ ده‌چمه‌ گژ شیعر.