كورد فه‌یلى له‌ناوبه‌ين مێژوویگ دیار و چاره‌نويسێگ نادیار

وه‌شێوه‌زار داڵگی.. 2

له‌ ڕوى ئاینیشه‌و‌ فره‌تر كورده‌يل فه‌یلی موسڵمان و شیعه‌مه‌زهه‌بن، وه‌لێ به‌شێگیانيش غه‌یره‌ شیعه‌ن و سه‌ر وه‌ ئاین و ئاینزايه‌يل ترن. سه‌ره‌ڕای هویروباوه‌ڕه‌ جیاوازه‌ ئاینیه‌گانیان، كورده‌يل فه‌یلی وه ‌دريژایی مێژوو پێكهاته‌يگ میانڕه‌و و ئاشتیخواز بوينه‌ و هه‌رگز كرده‌وه‌یل تیرۆریستی ئه‌نجام نه‌يانه‌‌ و چ له‌ ئيران و چ له‌ عێراقیش هه‌میشه‌ خوه‌یان له‌ توندوتیژیى سیاسى وه‌دوير گردنه‌.


له‌ ئه‌نجام جه‌نگ و ململانيه‌يل گه‌ورا‌ و دريژخایه‌ن هه‌ردوو ده‌وڵه‌ت عوسمانى و سه‌فه‌وى و هه‌ميش وه‌خاتر ڕه‌تكردنه‌وه‌ى شه‌ڕ و سروشت ئاشتیخوازییانه‌و‌، كورده‌يل فه‌یلی وه‌ وه‌رده‌وامی تويش ڕه‌نج و مه‌ینه‌تیه‌يل فراوانێگ هاتنه‌، وه‌و خاتره‌ ك له‌و ناوچه‌يله‌ ژیانیان برديانه‌ سه‌ر ك له‌ به‌ش يه‌كه‌م ئی وتاره‌ ئاماژه‌ وه‌پێيان كريا و به‌ش فره‌ێگ ئه‌و ناوچه‌يليشه‌ (ناوچه‌يل باشوور ڕووژهه‌ڵات كوردستان) وه‌ وه‌رده‌وامی مه‌یدان ململانی ناوبه‌ين سه‌فه‌وییه‌يل و عوسمانییه‌يل بويه‌.


هه‌ر وه‌ خاتر ئه‌و بارودۆخه‌‌، كورده‌يل فه‌یلی و ته‌نانه‌ت به‌شێگ له‌ عه‌ره‌به‌يل ناوچه‌گه‌يش ئه‌ڕا ڕزگاركردن خوه‌يان له‌ خزمه‌ت سه‌ربازى له‌ چوارچێوه‌ى سوپاى عوسمانی، ك له‌ سه‌رده‌م جه‌نگ یه‌كه‌م جه‌هانی پرۆسه‌ى سه‌ربازگرى وه‌ زوور و ئجبارى بوى، وه ‌ناچارى ڕه‌گه‌زنامه‌ى ئيرانى وه‌رگردن ئه‌ڕا ئه‌وه‌گ نه‌چنه‌ ڕزى سوپاى عوسمانی‌. دوياخریش هه‌ر ئى ڕه‌گه‌زنامه‌ وه‌رگردنه‌ بوى ك‌ ئه‌ڕا كورده‌يل فه‌یلی بويه‌ مايه‌ی دروسبوين كێشه‌یگ گه‌ورا‌ له‌ ڕوى یاساییه‌و‌ له‌لایه‌ن ڕژيمه‌يل عه‌ره‌بى شۆڤێنى و ڕه‌گه‌زپه‌رست. هه‌ر له‌ هه‌مان وه‌خت و له‌ سه‌رده‌م جه‌نگ جه‌هانى یه‌كه‌م، به‌شێگ تر كورده‌يل فه‌یلی و به‌شێگ له‌ عه‌ره‌به‌يل ناوچه‌گه‌يش وه‌ناچارى خوه‌یان كردنه‌ پاشكوو یا (ته‌به‌عییه‌ى) عوسمانى و شماره‌ی فره‌ێگیان بوينه‌ سه‌رباز و چينه‌ ڕز سوپاى عوسمانی‌. ئه‌و پاشكووبوينيشه‌ بويه‌ مايه‌ی ئه‌وه‌گ به‌شێگیان ڕه‌گه‌زنامه‌ى عێراقی بدريه‌ێده‌ پێيان و جوور نیشتمانپه‌روه‌ر عێراقى هساو بكريه‌ن! وه‌و جووره‌گ بويشيد ته‌به‌عیه‌ت ده‌وڵه‌ت عوسمانى شه‌ره‌ف گه‌وراێگه‌ ك بويه‌سه‌ نسيويان‌!!.


هه‌ر ئه‌و باوه‌تيشه‌ بويه‌ پێوه‌ر سه‌ره‌كى ئه‌ڕا وه‌پێداين ماف هاووڵاتیبوين عێراقى له‌ ده‌وڵه‌ت ده‌سكرد عێراق و كورد فه‌یلی له‌ ناوبه‌ێن عێراقیبوين و ئيرانیبوين كرده‌ قوربانی و سه‌دان تاوان دژه ‌مرۆڤایه‌تی ده‌رهه‌قى ئه‌نجام دريا، ك‌ گرنگترینیان تاوان جینۆساید و كۆمه‌ڵكوژی و كووچ زووره‌ملى بوى. يه‌يش وه‌و ماناسه‌‌ ك‌ گشت ئه‌و كاره‌ساته‌يله‌ ك وه‌سه‌ر كورد فه‌یلی هاتيه و گشت ئه‌و تاوانه‌يله‌ ك دژێ ئه‌نجامدريانه‌‌، وه‌خاتر بنده‌سی نه‌ته‌وه‌گه‌ی و دابه‌شكردن و داگیركردن وڵات و نیشتمانه‌گه‌ى‌ بويه‌.


ئى پێكهاته‌ى زوڵملێكريای ملله‌ت كورده‌ تا ئيسه‌يش هه‌ر وه‌ده‌س ئه‌و زوڵم و سته‌م و ئاواره‌ییه‌وه‌ ‌ناڵنێ ك‌ له‌ ئاكام بنده‌سی و داگیركاریه‌و‌ وه‌سه‌رێ هاتيه‌، ته‌نانه‌ت تا ئيسه‌يش چاره‌نويس نادیارێگ دێرێ‌. ئه‌و ناوچه‌يل فه‌یلینشینيشه‌ له باشوور و ڕووژهه‌ڵات كوردستان ك‌ زێد و ميلكان باوگ و باپیره‌يليانه‌، ‌تا ئيسه‌ ها ‌ژێر داگیركاری ده‌وڵه‌ت عێراق و چاره‌نويسیان نادیاره‌ و وه‌ هه‌ڵپه‌سردريايی‌ مه‌نيه‌سه‌و‌ و یه‌كلایيه‌و نه‌كرياسه‌‌و‌. ‌ته‌نانه‌ت داگيركه‌ره‌يل كوردستان وه‌ ئامانج زياتر به‌شبه‌شه‌وكردن ملله‌ت كورد‌ و دژايه‌تيكردنێ، كار ئه‌را ئه‌وه‌ كه‌ن تا لێوا‌ باوه‌ڕێگ له‌ناو هوير به‌شێگ له‌ پێكهاته‌يل ڕه‌سه‌ن ملله‌ت كورد په‌روه‌رده‌ بكه‌ن كه‌ ئه‌وان پێكهاته‌ێگ سه‌روه‌خوه‌يانن و كورد نين و وه‌يجووره‌ توان ناسنامه‌ی نه‌ته‌وه‌ييان بسڕنه‌و. له‌لايگتريشه‌و وه‌وخاتره‌گ ساڵه‌يل دويرودريژيگه‌ كورده‌يل فه‌يلی‌ له‌ناو عه‌ره‌ب و فارس ژيانه‌ و سياسه‌ت ئاسميله‌كردن له‌بانيان په‌يڕه‌و كرياس، به‌شێگ له‌ليان له‌ناو ئه‌و ملله‌ته‌يله‌ تاويانه‌سه‌و و ناسنامه‌ی نه‌ته‌وه‌يی خوه‌يان گوم كردنه‌. وه‌لێ خوه‌شبه‌ختانه‌ ئى پێكهاته‌ سه‌ره‌ڕای گشت ئه‌و مه‌مه‌ره‌يله‌ ك باسيان كرديم و سه‌ره‌ڕای ئه‌و هه‌ڵكه‌فته‌ی جيۆگرافی و جيۆسياسيه‌ ك هانه‌تێ، تا ئيسه‌يش مقه‌يه‌تی و پارێزگاری له‌ ناسنامه‌ی نه‌ته‌وه‌يی و ڕه‌سه‌نايه‌تی خوه‌يان كردنه‌ و ئه‌و به‌شه‌ ك بوينه‌سه‌ قوربانی سياسه‌ته‌يل دوشمنكارانه‌ی داگيركه‌ره‌يل كوردستان، به‌ش فره‌ كه‌مێگن و ئه‌گه‌ر له‌ڕێ پرۆژه‌يل نه‌ته‌وه‌يی كار ئه‌ڕا سڕينه‌وه‌ی ئاسه‌وار سياسه‌ته‌يل ته‌عريب و ئاسميله‌كردنيان بكريه‌ێد، تويه‌نريه‌ێد سه‌رله‌نوو ناسنامه‌ی نه‌ته‌وه‌ييان زينگه‌و بكريه‌ێد.