بازاڕی رەش بۆ ئاودیوكردنی پارەی كاش

تەنیا لەنێوان ساڵانی 2001 تا 2013 زیاتر لە 1 ترلیۆن و 14 ملیۆن دۆلار چووەتە دەرەوە

چیرۆكی قومارخانە سوورەكانی قوبرس، كە بە (لاس ڤێگاسی بچكۆلە) ناسراوە و ڤێلا و شوقە گرانبەهاكانی توركيا و وڵاتانی ئەوروپی و كڕینیان لە لایەن بەرپرسانی عێراقی و هەندێك بەرپرس و بازرگانی كورد و كەسوكارە نزیكەكانیانەوە، لە دەنگۆوە بوونەتە دیاردە.


بەشێكی قەبەی پارەی ئەم هەرێمە، لە رێگەی مافیا و قومارچیی ئینتەرناشناڵ و دەڵاڵی كڕین و فرۆشتنی خانووبەرە و شوقەوە دەڕژێنرێنە ناو بازاڕی ڕەش و سپیی وڵاتی توركیا و وڵاتانی ترەوە، ئەمە بێجگە لە هێنان و ساخكردنەوەی كاڵا و شمەكی ئیكسپایەر و كوالێت نزم و ئاودیوكردنی پارەی كاشی دۆلار، لە كونجی لقە بانكییەكانی سەر بە لاینە سیاسییە شیعەكانەوە. لە وڵاتێكی بێ خاوەنی وەکوو عێراقەوە ئەم پارانە هەر هەڵدەقوڵێن و تەواو نابن و دەڕژێنرێنە ناو ئەستێڵك و خانەی دارایی وڵاتانی ترەوە، تەنانەت كار گەیشتووەتە سەر هێنانی بازرگانیكردن بە ئافرەتانی لوبنانی و ئێرانی و كرێكارانی ئەسیوبی و نیپاڵی و فریودانی گەنجان بە ماددەی هۆشبەر و دۆزینەوەی بازاڕی نوێ بۆ مافیاكانی بە قاچاخ ناردنی ماددەی هۆشبەر و بەكارهێنانیان لەناو گەنجەكانماندا، وێڕای ژنهێنانی نهێنیی دووەم و سێیەمی زۆر لە بازرگان و بیزنسمانەكانی هەرێم و عێراقەوە لە وڵاتانی جورجیا و ئۆكرانیا و ئازربێجان و توركیا و ئێران. گەرچی ئێمە لە چوارچێوەی وڵاتێكی گەندەڵی عەلی بابەیی وەكوو عێراقداین، كە تەنیا لەنێوان ساڵانی 2001 تا 2013 زیاتر لە 1 ترلیۆن و 14 ملیۆن دۆلار چووەتە دەرەوە، تەنیا لەسەردەمی فەرمانڕەوایی نووری مالیكیدا بە بەڵگەوە زیاتر لە 400 ملیار دۆلار لە رێگەی حزبێکی سیاسیی ئیسلامیی شیعەوە بۆ پاڵپشتی و هەڵسانەوەی ئابووریی ئێران ئاودیو كراوە، لە ماوەی ئەم 5 ساڵەی رابردووشدا 220 ملیار دۆلار مەزەندە كراوە، كە بە ڕێگەی نامەشرووع بەرەو دەرەوەی عێراق براوە، بەڵام لێرە باس لە بەهەدەردانی پارە و پوولی میللەتێك دەكەین، كە گەنجەكانی بێكارن و خەون بە دەوڵەتەوە دەبینن، ئینجا با لەناو ئەو هەموو گەندەڵی و مافیا و تاوانەدا، دەستەی دەستپاكی هەر بەڵێننامە بە فەرمانبەران پڕ بكاتەوە! ئەم بەزمی ئاودیوكردنەی پارەی كوردستان، لەلایەن دەستەی دەستپاكی و چاودێریی دارایی و داواكاری گشتییەوە پشتڕاست كراونەتەوە، بەڵام دەڵێن ئێمە بەڵگەی سەلمێنراوی حسابیمان دەوێت، نەك تەنیا دەنگۆی راگەیاندن. ئێ كاری ئێوەیە بەدوای بەڵگەكاندا بگەڕێن، نەك ئێمە! گەرچی بەگومانم لە هەرێمێكدا كە سیستەمی بانكی وجودی نەبێت، ئەو دەزگایانە بتوانن بەدوای تاوانی سپیكردنەوەی پارە و ئاودیوكردنی پارەی كاشدا بگەڕێن، بەڵام با بەڵێنامە بەو مافیا و قاچاخچییانە پڕ بكەنەوە، نەك فەرمانبەرێكی داماو، كە 4 ساڵە پارەكەی پاشەكەوت دەكرێت. باشە وەزارەتی تەندروستی، پرسیاری هێنانی ئەو هەموو تیمە پزیشكییە بیانییانەیان نەكردووە، كە دوای هەفتەیەك چەند پارەی ئەم وڵاتە بۆ دەرەوە لووش دەدەن، لەكاتێكدا تێچووی یەك نەشتەرگەری لە مانگی رابردوودا لە یەكێك لە نەخۆشخانەکانی هەولێر گەیشتە 80.000 دۆلار و یەك دۆلار باجیشی بۆ حكوومەت نەبوو! بۆچی مەرجی تەندروستی و نرخ بۆ ئەوان دیاری ناكرێ؟ باشە وەزارەتی خوێندنی باڵا پرسیاری ئەوەی كردووە، هێنانی مامۆستا و دكتۆری بیانی مانای چییە، لە وڵاتێكدا كە پڕیەتی لە خاوەن بڕوانامەی بەرزی دانەمەزراو؟ ئایا ئەمە هەمووی بەهەدەردانی پارەی گشتی نییە؟ دەستەی وەبەرهێنان ئەو جورئەتەی هەیە پێمان بڵێ، قەبارەی هاتنی سەرمایەی بیانی لە بەگەڕخستنی سەرمایەكانیان چەندە و چەندیش پارە لێرەوە بۆ دەرەوە ئاودیو دەكرێت، چ لە رێگەی بانك و حەواڵە، یان لە ڕێی بازاڕی ڕەشەوە؟ باشە لەگەڵ یەكەم دەنگۆی بڵاوبوونەوەی رێكلامەكەی توركیا بۆ وەرگرتنی رەگەزنامەی توركی 5000 عێراقی و كوردستانی ناوی خۆیان بۆ كڕینی شوقە تۆمار كرد و 10 ملیۆن دۆلاریان بردە دەرەوە، ئەبێ ئێستاكە ئەو بڕە پارەیە بۆ چەند هەڵكشابێت. وڵاتێكی وەكوو ئێران، نرخی ڤیزای رۆیشتنە دەرەوەی هاووڵاتییانی ئێرانی بۆ هەرێمی كوردستان گران كرد، كەچی لەملاوەش مافیاكانی ئێمە كارئاسانی بۆ سیخە و چارەسەری تەندروستی و ئاودیوكردنی پارە و شتی تر دەكەن، بۆیە پێویستە بڕوبیانووی چوونە دەرەوەی پارەی هەرێم بەرەو ئەو وڵاتانە لە ڕەگەوە بنبڕ بکرێت، بۆ نموونە، پێویستە نرخی نۆرینگە و تاقیگە و نەخۆشخانەی تایبەتی بەرپرسان كۆنترۆڵ بكرێت، بۆ ئەوەی چوونەدەرەوەی نەخۆش كەم بێتەوە، كەواتە بۆ هەموو كێشەیەك چارەسەرێك هەیە، مەرج نییە ئێمە تەنیا لە رێگەی چارەسەری پۆلیسیانە و سزاوە ئەو دیاردەیە بنبڕ بكەین. با ئابوورییانە باسی پەیوەندییەكانی بازرگانیی نێوان كوردستان و كۆماری ئیسلامیی ئێران و توركیا بكەین و چیتر بەو خەڕەكە سوواوەوە هەڵمان نەخەڵەتێنن، گوایە لە قازانجی كوردستاندایە و لە كاتی تەنگانەدا ئەو وڵاتانە حسابی دۆستایەتیمان بۆ دەكەن، كەچی بینیمان، دوای 16ی ئۆكتۆبەر، چ حسابێكی دوژمندارانە و قورسیان لەسەر كردین و چۆن سنووری سەر زەمین و ئاسمانیان لێ قەپات كردین! بۆچی حكوومەتی كوردستان وەكوو مانگایەكی شیردەر نماییشی جیهانمان دەكات؛ سوودی بۆ هەمووانە، تەنیا بۆ خاوەنەكەی نەبێت؟