حكوومه‌ت، گه‌ل..

 

گه‌لان ناتوانن گوزارشت له‌ حكوومه‌ته‌كانیان بكه‌ن، حكوومه‌تیش هه‌رچه‌ندی دیموكرات و نزیك له‌ گه‌لیش بێت، ناتوانێت گوزارشت له‌ گه‌لانی بكات. له ‌باری لۆژیكه‌وه‌، حكوومه‌ت نه‌ رۆحی هه‌یه‌ و نه‌ سۆز، وه‌ك ئامێر وایه‌، ئامێری ته‌كنیكیی جێبه‌جێكاره‌. هه‌رچی گه‌له‌، ئه‌وا وه‌ك جه‌سته‌ وایه‌، رۆح و ویژدانی هه‌یه‌.


راسته‌ گه‌لان حكوومه‌ت دروست ده‌كه‌ن، به‌ڵام مه‌رج نییه‌ هه‌موو كات ئه‌وه‌ی گه‌لان ده‌یانه‌وێت، حكوومه‌ت وا بكات. حكوومه‌ت بۆ هه‌موو كار و شتێك به‌پێی به‌رژه‌وه‌ندیی هه‌ڵسوكه‌وت ده‌كات، گه‌لانیش به‌ رۆحی هاوكاریی ده‌رهه‌ق به‌ گه‌لانی دیكه‌ و ته‌نانه‌ت ده‌رهه‌ق به‌ خۆیشیان، ره‌فتار ده‌كه‌ن، هێنده‌ ده‌ربه‌ستی به‌رژه‌وه‌ندی نین. ئه‌و گه‌لانه‌ی له‌گه‌ڵ گه‌لانی دیكه‌دا هاوكار ده‌بن، هه‌ر ده‌بێ هۆیه‌كی له‌پشت بێت، ره‌نگه‌ به‌های هاوبه‌ش كۆیان بكاته‌وه‌، یان ره‌نگه‌ پرسی مرۆیی هه‌بێت و كۆیان ده‌كاته‌وه‌، حكوومه‌ته‌كان هێنده‌ خۆیان به‌ پرسی به‌هاوه‌ په‌یوه‌ست ناكه‌ن.


له‌ دوایین گه‌شتی خۆمان بۆ برۆكسل، چاومان به‌ ژماره‌یه‌ك له‌ به‌رپرسانی وه‌زاره‌تی ده‌ره‌وه‌ی فه‌ره‌نسا و هۆڵه‌ند و چه‌ندین فه‌رمانبه‌ری یه‌كێتیی ئه‌وروپا كه‌وت، پێت سه‌یر نه‌بێت، كه‌ زۆر جار به‌رپرسانی ئه‌وروپا كپ و بێ ده‌نگ ده‌بن، ئه‌م بێده‌نگییه‌ واتای ئه‌وه‌ نییه‌، كه‌ له‌گه‌ڵ تۆدا هاوڕایه‌، هه‌روه‌ها هه‌رگیز واتای ئه‌وه‌ش نییه‌ كه‌ له‌گه‌ڵ تۆدا ناته‌بایه‌. ئه‌و فه‌رمانبه‌رانه‌ ئه‌و شته‌ی دركی پێ ده‌كه‌ن ئه‌وه‌یه‌، كه‌ بێده‌نگی په‌یوه‌سته‌ به‌ كاره‌كه‌یانه‌وه‌، به‌ واتای ئه‌وه‌ی نایانه‌وێ قسه‌یه‌ك بكه‌ن، كه‌ مه‌به‌ستیان نییه‌ بیكه‌ن، یان رێی كردنیان پێ نه‌دراوه‌، به‌پێچه‌وانه‌ی ئه‌وه‌ی كاتێك تووشی خه‌ڵكی ئاسایی ئه‌وروپا ده‌بین، یان با بڵێین رۆشنبیرانیان، كه‌ ده‌موده‌ست زۆر ئاشكرا قسه‌ ده‌كه‌ن.


یه‌كێ له‌ رۆژنامه‌وانانی گرنگی هاوكارمان، كاتێك له‌ گفتوگۆدا بووین له‌باره‌ی ره‌وشی ناوچه‌كانمان، گوتی رێژه‌یه‌كی زۆر له‌ خه‌ڵكی فه‌ره‌نسا ده‌یانه‌وێ كورد له‌ هه‌ر هێرشێكی توركیا بپارێزرێت، ئه‌و گوتی، زۆربه‌ی فه‌ره‌نسایی ئه‌مه‌یان گه‌ره‌كه‌. هه‌روه‌ها گوتی، كه‌ ماكرۆن ته‌له‌فۆنی بۆ ترامپ كرد و داوای لێ كرد كورد به‌ بێ پشت و په‌نا نه‌هێڵنه‌وه‌، چونكه‌ زۆربه‌ی فه‌ره‌نسایی ئه‌وه‌یان ده‌وێت. ئه‌و هاوكاره‌ ئه‌وه‌شی نه‌شارده‌وه‌، كه‌ ئه‌گه‌ر ئه‌مەریكا له‌ ناوچه‌كانی ئێمه‌ی (كوردی رۆژاڤا) به‌بێ ستراتیژێكی روون بكشێنه‌وه‌، ئه‌وا فه‌ره‌نساییش ده‌كشێنه‌وه‌، خۆ ره‌نگه‌ دوای كشانه‌وه‌ی ئه‌مەریكا ته‌نانه‌ت یه‌ك فیشه‌كیش نه‌ته‌قێنن. هه‌رچه‌نده‌ حكوومه‌تی فه‌ره‌نسا ده‌زانێت، كه‌ فه‌ره‌نسایی تا چه‌ند ئه‌ندازه‌یه‌ك (به‌ گوته‌ی هاوكاره‌كه‌مان) له‌گه‌ڵ كورددا هاوسۆز و هاوكارن. ئا لێره‌دا رووكاری جیاوازی و ناته‌بایی نێوان حكوومه‌ت و گه‌لان ده‌رده‌كه‌وێت. حكوومه‌ت گوزارشت ناكات، هیچ شتێك نییه‌ داوای لێ بكات گوزارشت له‌ شتێك بكات، ئه‌و ته‌نیا كار ده‌كات، به‌ڵام گه‌لان، ئه‌وا گوزارشت له‌ هه‌ست و خرۆشانی خۆیان ده‌كه‌ن، حكوومه‌ت لێكدانه‌وه‌ بۆ قازانج و زه‌ره‌ر ده‌كات، كه‌چی گه‌لان بیر له‌وه‌ ناكه‌نه‌وه‌، كه‌ ئه‌گه‌ر له‌گه‌ڵ گه‌لێكی دیكه‌دا هاوكار بوون، چ زه‌ره‌رێك ده‌كه‌ن.


خۆ ره‌نگه‌ هۆی ئه‌وه‌ی فه‌ره‌نسایی ناتوانن له‌پاش كشانه‌وه‌ی ئه‌مەریكا بمێننه‌وه‌، ئه‌مه‌ واتای ئه‌وه‌ نییه‌ كه‌ حكوومه‌تی فه‌ره‌نسا به‌ كرده‌نی ده‌یه‌وێ كورد له‌به‌رده‌م که‌ڵبه‌ی تیژدا بهێڵێته‌وه‌، هێنده‌ی كه‌ بێ ئه‌مەریكا توانای مانه‌وه‌ی نییه‌. ده‌كرێ بڵێین، ئه‌مه‌ دۆخی زۆربه‌ی حكوومه‌ته‌كانی رۆژاوایه‌.


هیچ حكوومه‌تێكی رۆژاوا به‌بێ ئه‌مەریكا ناتوانێ شتێك بكات.


پوخته‌ی مه‌به‌ستمان، ئه‌گه‌ر پرسی ئێمه‌ و چاره‌سه‌ركردنی به‌ ده‌ستی گه‌لان بووایه‌، ئه‌وا ماوه‌یه‌كی درێژ بوو كه‌ ئێمه‌ مافی خۆمان به‌ده‌ست هێنابوو، به‌ڵام قه‌ده‌ری كورد وایه‌، چاره‌نووسی وابه‌سته‌ به‌ دیدی حكوومه‌ته‌كانه‌ بۆ پرسه‌كه‌ی، ئه‌مه‌ش دیدێكه‌ په‌یوه‌ست به‌ (قازانج و زه‌ره‌ر)، به‌داخه‌وه‌.


په‌ندی وتاره‌كه‌ش ده‌ڵێ: "تۆ به‌هێز ده‌بیت، كاتێك به‌هێزبوونی تۆ به‌رژه‌وه‌ندییه‌كی ئه‌وانی تێدابێت، هێز له‌وه‌دا نییه‌ چ سوپایه‌كت هه‌یه‌، هه‌روه‌ها له‌وه‌شدا نییه‌ كه‌ شه‌ڕوانانت چه‌ند ئازا و چه‌له‌نگن، به‌ڵكوو هێز له‌ راده‌ی ئه‌و كاریگه‌رییه‌ی تۆدایه‌، هه‌روه‌ها ئه‌و ئاسته‌ی پێی ده‌گه‌یت".