لە‌ تاراوگە‌ ئاڵای نیشتمان مە‌كە‌نە ململانێی ...!

 

نیشتمان و دایك، دوو شتی هەرە گرنگ و مەزنن كە وابەستەن بە رۆحی مرۆڤەوە، لە هەر شوێنێك و لە هەر جێگەیەك مرۆڤ خۆی بدۆزیتەوە، نیشتمان و دایك لێ جیا نابنەوە. شتێكی سەرسامكەر نییە كە مرۆڤێكی كورد ساڵانێكی زۆر دوو لە نیشتمان ژیان بگوزەرێنێت، كەچی خەونەكانی كوردی بن و بەكوردی بیر بكاتەوە، رۆحی نیشتمانیبوونیشی هەمیشە وەك داربەڕوویەكی بەهێز لە ناخیدا ڕەگی داكوتابێت.


پرۆسێسی بەكۆمەڵكردنی خێزان لەناو كوردانی تاراوگەدا كەمێك جیاوازتر دەگوزەرێت، جیاوازترن لەو خێزانانەی كە لە نیشتماندا دەژین، زۆرینەی هەر زۆری كوردانی تاراوگە خۆشیان و خێزانەكانیشیان وا پەروەدە دەكەن كە كوردستانی نیشتمانیان وەك رۆحی خۆیان خۆش بوێت و ئاڵاکەیان لا پیرۆز بێت، بە جۆرێك هەر كات و ساتێك پێویست بكات ئامادەن بۆ بەشداریی کارا لە هەر بۆنە و سیمنار و رێپێوان و ناڕەزایەتییەك كە پەیوەست بێت بە كوردستانی نیشتمانەوە.


لەم رۆژانەی رابردوودا، لە برۆكسلی پایتەختی بەلجیكا ئاڵای كوردستان لەبەردەم ئۆفیسی نوێنەرایەتیی حكوومەتی هەرێم لەلایەن چەند كەسێكەوە داگیرا، بە پاساوی توڕەبوونیان لەمەڕ رووداوەكانی شیلادزێ!


هەڵبەتە ڕووداوەكانی شیلادزێ و كردەوە نامرۆڤایەتییەكانی دەوڵەتی توركیا و بۆردومانكردنی ئەو ناوچە سنوورییانە، زۆرێك لە چالاكوان و مرۆڤدۆستان و كوردستانیانی توڕە كرد. 


بۆ ئەم دیاردەیە دەبوو وزە و قورسایی چالاكییەكان لەبەردەم باڵوێزخانەی توركیا لە بەلجیكا كە تەنیا چەند سەد مەترێك لە نوێنەرایەتیی حكوومەتی هەرێمی كوردستانەوە دوورە، چڕ بكرێتەوە، یاخود چوونە بەردەم پەرلەمانی ئەوروپا بە جۆرێك دەنگی ناڕەزایی بدرێت بە گوێی ئەو بەرپرسانەی ئەوێ، كە خەڵكی بێ گوناه دەكوژرێن. كەچی پێچەوانەی ئەمە رووی دا! ئەم چەند كەسە بە داگرتنی ئاڵای كوردستان لە بەردەم نوێنەرایەتیی حكوومەتی هەرێم و هێلكە بارانكردنی كە لە ئەوروپا وەك هێمایەك بۆ سووكایەتی پێكردن و كەم سەیركردنی بەكار دێت، گوزارشتیان لەوەی لە ناخیاندایە کرد.


ئەوەی سەرنجی راكێشام و زیاتر شەرمندەی کردم وەك كوردێكی دانیشتووی بەلجیكا، پرسیاری پۆلیس بوو. پۆلیسی بەلجیكی كە هاتنە شوێنی رووداوەكە، سەرەتا گوتیان: ”ئەوە لە كاری توركەكان یان عەرەبەكان دەچێت“، بەو پێیەی بە خەیاڵی ئەو بەلجیكییە هیچ كات نەهاتووە، هاونیشتمانییەك بێڕێزی بەرانبەر بە پیرۆزییەكانی نیشتمانەكەی بكات، ئەگەر جیاوازیی بیركردنەوە و رەخنەكانی هەرچەند بن بەرانبەر بە لایەنی دەسەڵاتدار، ئەوان وەها پەروەردە نەكراون لە دژی دەسەڵات و حكوومەت بێڕێزی بە پیرۆزییەكانی وڵاتەكەیان بكەن. لەوەش شەرمم کرد كە بكەری رووداوەكە كەسانێكی كوردن و هاوزمان و هاوخاك و نیشتمانن!


ئەوەی كوردستانیانی لە تاراوگە زۆر هەژاند داگرتنی ئاڵای كوردستان بوو لە لایەن خودی كوردستانیان خۆیانەوە. لە كاتێكدا هەموومان دەزانین پاراستن و بەرز راگرتنی ئاڵای كوردستان بە خوێنی دەیان هەزار شەهید و سەدان هەزار لە قوربانیانی جینۆساید و ئەنفال و کیمیاباران هەڵكراوە و شەكاوەتەوە، هەر ئەمەش وای كردووە كوردانی تاراوگە لە پیرۆزیی ئاڵای كوردستان باش تێ بگەن، چونكە پێم وا نییە خانەوادەیەك یان كەسێك هەبێت لە کوردانی تاراوگە ئاڵای كوردستانی لە ماڵەكەی نەبێت و خێزان و منداڵەكانی جۆش نەدابێت بە بەرز راگرتنی ئەم ئاڵایە و كۆششكردن بۆ بەشەكاوەیی مانەوەی. دایكان مناڵەكانیان لەسەر خۆشویستن و بەرز راگرتنی ئەو ئاڵایە پەروەردە كردووە، ئیدی ئێستا چۆن قبووڵی ئەكەن لە وڵاتێكی مەزنی دیموكراتی و پایتەختی ئەوروپا، ئاڵای كوردستان بەو شێوە ناشرینە بە دەستی كورد دابگیرێت و كاردانەوەی تێ نەكەوێت. بەڵێ كاردانەوەی لێ دەكەوێتەوە، وەلێ چ كاردانەوەیەك؟


كوردستانیانی تاراوگە، بەبێ جیاوازی و ناوچەگەری، (رۆژهەڵات، باكور، روژئاوا و باشوور) تەنانەت زۆرێك لە كوردانی (رووسیا، ئەرمەنستان، جورجیا)، لە ڕێوڕەسمی هەڵکردنەوە و بەرز راگرتنی ئاڵای كوردستاندا لەبەردەم ئۆفیسی نوێنەرایەتیی حكوومەتی هەرێم لە برۆکسل ئامادە بوون.


ئەمە جگە لە پاڵپشتی و پیشتوانیی كوردانی تاراوگە بۆ ئۆفیسی حكوومەتی هەرێمی کوردستان. ئەم رێوڕەسمە کە بۆ بەشكۆوە راگرتنی ئاڵای كوردستان بوو لەبەردەم ئەم بارەگایەدا، هاوکات نوێكردنەوەی رۆحی كوردایەتی و ئینتمای کوردستانیبوون بوو بۆ هەموو ئەوانەی ئامادە بوون.


بە جۆرێك لە جۆرەكان ئەم پەیامەی دەگەیاند لە هەر كوێ بین، هەر كوردستانین و شكۆی ئاڵا و نیشتمان دەپارێزین.


ئەوەی ماوەتەوە بۆ كۆتایی بیڵێم:
- پرسیار مەكە نیشتمان ئەتوانی چی بۆ تۆ بكات، بپرسە كە تۆ ئەتوانی چی بكەی بۆ نیشتمان؟


دەبێت بڵێین: بەداخەوە، ئەوەی ئێستا دەگوزەرێ نیشتمانی زیاتر پارچە پارچە كردووە، لەم نێوەندەدا پرۆسەیەك ون بووە بە ناوی پرۆسەی نیشتمانسازی، رق و كینە و بەرژەوەندیی سیاسی و تاکەکەسییەكان زاڵترە بەسەر بەرژەوەندیی نیشتمانیدا و مرۆڤەكانی دابەش كردووە، هەر كەسێك هەڵدەستێت باس لە ئایدلۆژیا دەكات، كە من پێم وایە خۆشیان بەتەواوی لە واتای ئایدلۆژیا تێنەگەیشتوون، چونكە ئایدۆلۆژیا بە رق گەشە ناكات.


ئێستا كوردستان بە قۆناغێكی هەستیار و تا رادەیەك مەترسیداردا تێدەپەرێ، داگیركەران پیلان و ململانێكانیان لەناو نیشتمانەكەی ئێمەدا چڕ كردووەتەوە، ئەوەی داگیركەران دەیانەوێ بە ئەنجامی بگەیەنن، بەداخەوە زۆر جار ئێمە خۆمان دەبین بەو پردە و كارئاسانییان بۆ دەكەین، ئەم پرۆسەی بنیاتنانە بە ئەتكردن و ملشكاندن و جنێودان و سووكایەتی بە پیرۆزییەكانی نیشتمان ناكرێ، ئەوانەی بە تیۆری دەنووسن و قسە دەكەن، دەڵێن: دەبێ چاكسازی  لە هەموو جومگەكاندا بكرێت و پێویستیمان بە ریفۆرێکی گشتگیر هەیە! لە كاتێكدا خۆیان ئەو ئامادەباشییەیان تێدا نییە، كەواتە لە مانای ئازادی و دیموكراسی و پێشکەوتن تێنەگەیشتوون.