چیتر با حكوومەت پلە گۆشت نەگرێتە گورپە پشیلەكان

 

یەكێك لە ئەركە هەنووكەییەكانی بەردەم كابینەی نۆیەمی حكوومەتی هەرێمی كوردستان، رووبەڕووبوونەوەی ئەو كەسایەتی و گرووپ و باڵ و لایەنانەیە، كە مشەخۆرن و لە ئاوی لێڵدا مەلە دەكەن، یان دەجالن و ڕەوشی كوردستان لەسەر زەوی دوور دەخەنەوە و خەریكی بە ئاسمانیی كردنین، ئەم دوو تەرزە بوونەتە پشیلەی گورپە و بە بەردەوامی تێركردنیان هەروا ئاسان نییە. كوردستان هێندە سەرمایەی مرۆیی و سروشتیی زۆری هەیە، لانی كەم توانای تێركردن و دابینكردنی خواستە سەرەتاییەكانی هاووڵاتیی تێدایە. كەمیی ژمارەی دانیشتوان لەبەرامبەر هەموو ئەو خێر و بێرەدا لە بواری ئابووریدا خاڵێكی پۆزەتیڤ و ئومێدبەخشە، لەبەرئەوە پێویستە هەردەم پارە و بودجە وەكوو چەكێكی ئابووری بۆ گەڕانەوەی سەقامگیری و راستكردنەوەی پرۆسەی سیاسی بەكار بهێنرێت، تاوەكوو كابینەی نوێ بتوانێت دامەزراوەكانی لە خزمەتی خەڵكی كوردستاندا بخاتە گەڕ و لەنێوان هاووڵاتییان و حكوومەتدا متمانە بگەڕێنێتەوە. پارە و داهات دوو ئامرازی هێزن، هەروەكوو چۆن دوو ئامرازی بەهێزیشن بۆ بڵاوبوونەوەی گەندەڵی و نادادپەروەری و دەركەوتنی چینایەتی و گەورەبوونی دەلاقە و كەلێنی نێوان توێژەكانی ناو كۆمەڵگە. لەگەڵ كەمبوونەوەی شوێنەواری تەحەدداكانی بەردەم حوكمڕانی و دەركەوتنی ترووسكایی پێشبینی و پێشهاتەكانی باشبوونی دۆخەكە، ئەوەتا بۆ جارێكی تریش مشەخۆرەكان بەناوی بیزنس و بازرگان و سەرمایەدار و وەبەرهێن و راوێژكارانی بیانی و چاودێرانی سیاسی و ئابووریی ئەم حزب و ئەو گرووپ و لایەن و دەیان ناو و ناسناوەی جۆراوجۆری دیكە سەر هەڵدەدەنەوە و بە فیكەی حەرامزادە دەفەی كەشتییەكە بەو ئاڕاستەیە وەردەچەرخێنن، كە خۆیان سوودمەندی سەرەكین تێیدا، بێ ئەوەی هیچ گوێ بە خەڵكی هەژار و كەمدەرامەت و قوربانیدەر بدەن.


ئەمڕۆ هەمووان چاوەڕوانی چاكسازی و گۆڕانكاریین؟ چاكسازییەكی نموونەیی نەك پرۆژە چاكسازییەكەی كابینەی پێشوو، كە مەرج نییە ئەو پرۆژە چاكسازییە وەكوو خۆی و هەمووی بە یەك پاكێچ و لە یەك قۆناغدا جێبەجێ بكرێت، تەرشیقكردنی حكوومەتیش تەنیا بە یەك دوو وەزیر و یەكگرتنی دوو سێ وەزارەت نابێت، بەڵكوو بە زیادكردنی داهات و كەمكردنەوەی خەرجی و بەرزكردنەوەی توانا و ئەدای وەزارەتەكە دەبێت. هەمووان چاوەڕوانی سەركردەیەكی لۆكاڵیی نوێن، كە ئەزموونێكی دەوڵەمەندی لە شەڕی تیرۆر و دژہ توندڕەۆیی و تانوكەوكردنی تیرۆرستاندا هەبووە، بەڵام شەڕی ئەم جارە لەگەڵ گەندەڵی و گەڕانەوەی شكۆ و هەیبەتی پرۆسە سیاسی و ئابوورییە و بڕیاری بوێریی وای دەوێت، كە لە كاری ئەو هەڵۆیانەی ئاسایش قورستریشە، كە دڵسۆزانە و بە ڕۆح و ژیانی خۆیانەوە لەبەر دەرگای ئاسایشی هەولێر باوەشیان دەكرد بە تیرۆریستە بۆمبڕێژكراوە خۆكوژەكاندا، تا رێگەیان لێ بگرن و پێيان نەخەنە ناو ئەو دامەزراوەیەوە، ئەی ئەمجارە كێن ئەوانەی پەلاماری سەقەتی گرێبەستە گەورەكان و مافیاكانی ناوچەگەرێتی و باڵباڵێن و ئەم گرووپ و ئەو گرووپ دەبنەوە.


نیشتنەوەی تەپوتۆزی شەڕی داعش و قەیران بەس نییە بۆ چاكسازی، مەرج نییە بە توانای دارایی گەورەوە كێشە گەورەكان چارەسەر بكرێن، كێشە ناوخۆییەكان كێشەی ناوخۆیین و پێویستی بە عەقڵی دەوڵەتمەدارێكی لۆكاڵیی خانەدان هەیە، ڕاستە هیچ كەسایەتییەكی خانەدان خاوەنی ئەو گۆچانە ئەفسووناوییە نییە بۆ دەستبەجێ راستكردنەوەی بارە لارەكان، بەڵام هەر ئەو دەوڵەتمەدارە لۆكاڵەش بە فكر و ئایدیا و كرداری دڵسۆزانەوە و بە ئیرادەوە دەتوانێت سەركەوتنەكان تۆمار بكات، لەپشت هەموو سەركەوتنێكی دەرەكییشەوە سەركەوتنێكی ناوخۆیی هەیە، كەواتە دەبێت لە كابینەی نۆیەمدا شێوازی كاركردن لە شێوازی كاری تەقلیدییانەی كابینەكانی تر جیاوازتر بێت، پێویستە بگەڕێینەوە بۆ سەر ئەو كۆدەی، كە حوكمڕانیی ڕەشیدی پێ دەكرێتەوە، كە ئەویش كۆدی ئەخلاقە ئەم قاعیدە ئەخلاقییەی لێی دەدوێم، تەنیا بە ئیرادەی خێر و راستگۆیی و بارگاویبوونی توانای دەوڵەتمەدارێك مەیسەر دەكرێت، بە مەرجێ ئیرادەكەی هەڵقوڵاوی خواست و ویستەكانی خەڵكی بێ، بە جۆرێك خەڵكی وای لێ بێت، پێكەوە ببنە پارێزەری دەسكەوتەكان و پابەندی بڕیارەكانی حكوومەت بن، نەك بەو شێوەیەی ئێستا هەر كاتێك حكوومەت بڕیارێك دەربچوێنێ، ئاكام بڕیارەكەی بكەوێتە بەر تانە و تەشەری هەمووان و ڕەتكردنەوەی خەڵكیش چاولێكەرانە، تەنیا لەپێناوی ڕەتكردنەوە و هیچی تر نا. زۆر لەگەڵ ئەو وتەزایەدام، كە دەڵێت دامەزراوەكان تەنیا بە پارە بەگەڕ ناخرێن، بەڵكوو بە دۆزینەوەی ڕێگەی عەقڵانییەوە سەر دەخرێن، پارە تەنیا یەك ئامرازە لە ناو ئامرازەكاندا لەپێناوی وەدیهاتنی ئامانجی گشتی، بەر لە پارە، دامەزراوەكان خۆیان بە ڕێز و نیەتپاكی و راستگۆییەوە بەگەڕ دەخرێن، زۆربەی جار پارەی زۆریش بۆ دامەزراوەیەك هەڵڕژێنراوە، كەچی لەبری ئەوەی دامەزراوەكەی پێ بەگەڕ بخرێت، ئامانجی دامەزراوەكەش، كە لەپێناویدا بۆ خزمەتی خەڵك دامەزراوە بەلاڕێدا براوە و پارە و بودجەكەی كراوەتە هۆكارێك بۆ بەفیڕۆدانی داهاتی گشتیی خەڵك و بووەتە سەرچاوەیەك بۆ گەندەڵی و كەڵەكەكردنی سامانی چەند كەسێك، كە دامەزراوەكە خراوەتەوە ژێر ڕكێفیانەوە، ئەم کارانە ئاسان نییە و هاوكات مەحاڵیش نییە، تەنیا پێویستی بە هونەری بەگەڕخستنەوەی دامەزراوەكانە، نەك پارە بەخشینەوە بەسەر حزبەكان و رازیكردنی دڵی ئەم لایەن و ئەو لایەن و چەوركردنی دەمی پشیلە گورپەكان.