لە دووگردکانەوە بۆ بنی دونیا - 173

بیرەوەری و تێڕامان

تا مام جەلال نەخۆش کەوت و بۆ چارەسەری گواسترایەوە بۆ بەرلین، ئەمن هەر راوێژکاری سیاسی بووم، کە دەردەکە لێی تیر کرد و ئومێد نەما جارێکی تر بگەڕێتەوە بۆ دۆخی جارانی، پێویست بە منیش نەما لە پۆستەکەمدا بەردەوام بم و هەر واشی لێ هات. ئەو پۆستەی من، وەک پێشتر بەوردی باسم لێ کردبوو، بە کۆنتراکت (گرێبەست) بوو. 


راستییەکەی دەکرا تەبای زۆرێک لە ستافی مام جەلال، منیش هەر بە گرێبەستەکەم بەردەوام بم و وەک راوێژکاری سیاسیی سەرۆکۆماری دوای مام جەلالیش هەر بمێنمەوە. بەڵێ، بە دڵنیاییەکی زۆرەوە دەمزانی جەنابی دکتۆر فوئاد مەعسووم، ئەویش لاریی نەدەبوو و حەزیشی دەکرد لەگەڵ جەنابیا بەردەوام بم، بەڵام، وەک پێشتریش باسم کردووە، خۆی مانەوەی من لە بەغدا وەک راوێژکاری مام جەلال، هەر لە بنەڕەتدا لە ناچاریم بوو، چونکە من بە ئومێدی باڵیۆزیی دەستم لە کارەکەی خۆم لە دەنگی ئەمەریکا هەڵگرتبوو و گەڕابوومەوە بۆ بەغدا. جا کە ئەوە نەبوو، نەمویست دڵی مام جەلال بشکێنم، کە داوای لێ کردم وەک راوێژکاری سیاسی لەگەڵیدا بمێنمەوە. ئەوە بوو.   


هەرچۆنێکی بێ، پابەند بە ئەخلاقییاتی کار work ethics بە ئەرکی دەزانم، باز بەسەر ئەو بابەتە هەستیارانەدا بدەم، کە لە ماوەی ئەو چەند ساڵەی راوێژکاریمدا پێیدا تێپەڕیبووم و هەروەها بەسەر ئەو نووسینە پێشنیازئامێزانە و رادەربڕینانەش، کە دەمخستنە سەر مێزی بیرۆی جەنابی سەرکۆمار و دواتریش لێی دەدواین. ئێستاش کە ئەو پیاوە گەورەیە ئەم دنیایەی بەجێ هێشتووە، تازە هەر نامۆڕاڵە باسی بابەتی هەستیار بکەم، چونکە خۆی نەماوە پشتڕاستی بکاتەوە، یان بەرگری لە خۆی بکات. 


بەدەر لەوە، لەو چەند ساڵەدا ژیان و هاتوچۆی ناوشارم لە بەغدا زۆر سنووردار بوو، ئێمە ستافی سەرۆکایەتیی کۆمار لە زۆنی سەوز و لە گەڕەکی جادریە نیشتەجێ بووین و چوونە ناو شارمان زۆر کەم بوو. لەو چەند ساڵەدا هەڤاڵ و هۆگری نوێی زۆر خۆشەویستم دەسکەوتن، وەک دکتۆر موەفەق دەرگەڵە و کاک خدری ژمێریار و کاک وریا رواندزی و ئی تریش. ناوە ناوەش دۆست و برادەرانی کوردمان لە کوردستانەوە بە سەردان دەهاتن و چەند ئێوارەیەکی خۆشمان لەگەڵیاندا رادەبوارد. 


مام جەلال ، هەزار رەحمەت لە گۆڕی بێ، بەدەر لە کاتەکانی دەوامی رەسمی، وەک هەمیشە کە لە ساڵی 1948ەوە لە کۆیە ببووین بە برادەر، هەر برادەرەکەی جارانم بوو، بەبێ رەسمییات و پرۆتۆکۆل. خۆی مام جەلال بەدرێژایی ژیانی هەر بە سروشت و خوو و رەوشت و رەفتاری خاکی و شەعبی ناسراو بوو و هەر بەوەشەوە شیرین بوو. 


مام جەلال کە بینی ماوەی نزیکەی شەست ساڵ بوو لەدەرەوەی وڵات بووم و کە گەڕاومەتەوە جێ و ڕێیەکی تایبەت بە خۆمم نەماوە - دەڵێم نەماوە - چونکە پێشتر بنەماڵەکەمان خاوەنی پتر لە 30 هەزار دۆنم زەویی کشتوکاڵ، جگە لە مەڕوماڵاتێکی زۆر بوو و مام جەلال باش ئاگادار بوو، کە زۆر لەو موڵک و دەوڵەتەمان لەپێناو کوردایەتی دانابوو، یەکسەر هەستا ئیدارەی گشتیی یەکێتی راسپارد خانووێکیان لە سیتەک بۆ درۆست کردم. پارەی راخستنی تەواوی ناوماڵەکەی بۆ دام، ئۆتۆمۆبیلێکی فۆردی نوێی بۆ کڕیم و شۆفێرێکیشیان بۆ تەرخان کردم. هەروەها دوو پۆلیسیشیان راسپارد لەگەڵمدا بن، کە خۆم ئەمەیانم رەت کردەوە و خولاسە وا رێک کەوتین، کە پۆلیسەکان بە نۆرە پاسەوانیی ماڵەکەی سیتەکم بکەن، لەوە زیاتر نا. تا فەرمانی راوێژکاریی سەرکۆماریشم بۆ دەرنەچووبوو، مام جەلال مووچەیەکی بۆ ئەو سەردەمە باشی بۆ بڕیبوومەوە، کە مانگانە لە لایەن ژمێریاری دەباشانەوە بۆم دادەندرا. سروشتانە، کە بووم بە راوێژکاری خۆی لە بەغدا، ئەو مووچەیەی دەباشانم نەما.


دوای نەخۆشکەوتنی مام جەلال، منیش کارێکی وام وەک راوێژکار لە بەغدا نەما و گەڕامەوە بۆ سلێمانی و بۆ ماوەیەک لە ماڵەکەی سیتەکم بەسەر برد و جاروبار سەردانی ماڵ و منداڵەکانم دەکرد لە ئەمەریکا. راستییەکەی لەو تاریخەوە ئیتر ژیانی منیش بە چ قۆناخی وا تێ نەپەڕی، کە شایەستەی گێڕانەوە بێ. خۆم خەریکی نووسینی گوتار و نووسینی هۆنراوە بۆ گۆرانییەکانم کرد و چەند کۆنسێرتێکم لە هەولێر و لە سلێمانی بە ئەنجام گەیاند، کە دەنگوسەدایەکی بێ وێنەی دایەوە، هەچەندە کە خۆم سیستەمی دەنگی هۆڵەکانی کۆنسێرتەکەم زۆر بەدڵ نەبوو. 


ئەمانەی خوارەوە هەندێک لەو گۆرانییانەن، کە لەو ماوەیەی راوێژکاریم چ لە بەغدا بووبم و چ لە هەر شوێنێکی تر، نووسیبووبم و بڵاویش کراونەتەوە. 


                     چاوەڕوانی       
لیریک: هۆمەر دزەیی
ئاواز:  هۆمەر دزەیی
ئەڕانژ: ع . ج .  سەگرمە


من هەتا مابم     هەر چاوەڕێتم
نا ئومێد نابم     هەر چاوەڕێتم
تا دێیتەوە لام    ئەتگرمە باوەش 
تێرتێر هەڵئەمژم  لێوی تەڕی گەش
باوەڕت هەبێ     بە هەستی دڵم 
من هەنگەزەردە   تۆ سوورەگوڵم 
لە هەر کوێیە بی   من بۆنت ئەکەم
خوا وای نووسیوە حەزت لێ ئەکەم
لە قاسەی دڵما   کلیل دراوی
کلیل ون بووە    لەوێیت تا ماوی
کلیل ون بووە    لێی نایەیتە دەر
هەتا پێکەوە      ئەنێینەوە سەر
دەبا تێپەڕن      رۆژگار و شەوگار
مانگ نێنە ئەژمار  ساڵ ببنە هەزار 
خۆ چاوەڕوانی    هەر ئەبڕێتەوە
خۆ رۆژێ هەر دێ  بگەڕێیتەوە
هەنگی ئەبینی     هەر چاوەڕوانم
باسکت وەردێنێ   بە مل و شانم
پەنجەت دادێنی    بە ناوچەوانم
بە ئاخ و ئۆخەی   ناخم ئەدوێنی
تا هەتایەش بێ    هەر چاوەڕێتم
دەس لە چەناگە   چاو هەر لە رێتم
هەتا دێیتەوە      جووت ئەبینەوە
تا دنیا مابێ       لێک نابینەوە
              **


                هەڵاتن
لیریک: هۆمەر دزەیی
ئاواز: گۆرانییەکی کۆنی ئیتاڵی (پۆرتۆفینۆ I found my love in Portofino)
ئەڕانژ: گرووپی سەهەند


            دەستم لە کەمەرت وەرێنم
            بۆ خۆمت راکێشم بە تین
            لێوم لە گەردەنت هەڵسوێنم 
            ون بین لەناو دنیای ئەڤین
            فریشتە و پەریمان بێنە یاری 
            دامان نێن لە تاقی ئاسمان 
            ئەستێرەت بۆ راخەن بە دیاری 
           هەوریش وەکوو جێ و بالینگان
           گەر شەماڵ لێی سەندین ئەو نوێنە
           سینگم بۆت ئەکەم بە سەرین
           گۆنات بە مووی سینگم دابێنە 
           نم نمیش دەس کا بە بارین
           جەستەی تەڕ لە جەستەم بخشێنە 
           ون بین لەپشت ئاسمانی شین.
            ****


                   ئایشیلێ
لیریک: هۆمەر دزەیی
ئاواز: گۆرانیی ئازەری (ئایرلق)
ئاڕانژ: گرووپی سەهەند


              شەوان کە رائەکشێم
              شەو بەسەر ناچێ
              بیری ئەو کیژۆڵەم
              لەسەر دەرناچێ
             نازانم من چۆن ماوم
             گیانم دەرناچێ


      ئایشیلێ ئایشەی نەوجەوان ئایشیلێ 
     شێت بووم بۆ چاو و برۆی کەوان ئایشیلێ


            دژوارە بەبێ تۆ 
            شەوی رەشی من
            روو لە چ لایە بکا 
           بەختی رەشی من
           ئاخۆ کەی لێم هەڵبێ 
           ستارەی گەشی من


    ئایشیلێ ئایشەی نەوجەوان ئایشیلێ
   شێت بووم بۆ چاو و برۆی کەوان ئایشیلێ
                 ***


خۆی لەو ماوەیەی کە وەک راوێژکاری سەرکۆمار لە بەغدا بووم، زۆر لە شەوان ماوەم دەبوو بۆ خۆمی تەرخان بکەم و دوور لە سیاسەت خولیاکانی خۆم بەسەر بکەمەوە. گوێگرتن لە موزیکی کلاسیک و دانانی شیعری گۆرانی و خوێندنەوەی کتێب لەسەر مێژوو و لەبارەی رۆشنبیریی گشتی و دانیشتنی ناو برادەران، ئەمانە هەمووی کاتە تایبەتەکانی منیان پڕ دەکردەوە.