سێکس وه‌ک حه‌ز و خه‌مباری

له خودی ئه‌وروپاشدا بەوریاییه‌وە قسه له‌سه‌ر سێکس ده‌کرێت

بیهێنه به‌رچاوی خۆت، گوڵه ئۆرشیدییه‌ک له باخه‌که‌تدا بڕوێنیت، چاوه‌ڕێش بکه‌یت، که به‌رگه‌ی سه‌رما و سه‌هۆڵبه‌ندانی زستان و گه‌رمای جه‌هه‌ننه‌میی هاویینیش بگرێت. بیهێنه به‌رچاوی خۆت، ماسی له قه‌فه‌زدا ڕابگریت و بولبولیش له حه‌‌وزی ماسییدا ...هتد. بوونه‌وه‌ری مرۆڤ بۆیه هه‌میشه چ ناخۆش ده‌ژی و چ ژیانیش له سروشتدا ناخۆش ده‌کات، چونکه هه‌وڵی به کولتووریزه‌کردنی هه‌موو شت ده‌دات، هه‌ر بۆیه له به‌رهه‌مهێنانی بیرکردنه‌وه‌ی ئایینی و کولتووری ناکه‌وێت، له به‌رهه‌مهێنانی ته‌کنه‌لۆژیای نوێ ناکه‌وێت، ئه‌مه‌ش بۆ کردنی مرۆڤ به‌و بوونه‌وه‌ره‌ی، که ئه‌و نییه، که دواجار به‌ده‌ر له له‌ناوچوونی هیچی تری لێ ناکه‌وێته‌وه.


له ته‌واوی سروشتدا سێکسوالیتێت چاوگه‌ی ئه‌نه‌رگییه، ته‌نها له مرۆڤدا نه‌بێت، که پێناسێکی تری پێ دراوه، وه‌ک خۆشی، دیارده‌یه‌‌کی نهێنی، دیارده‌یه‌کی تایبه‌ت، دیارده‌یه‌کی بێ نرخ ...هتد. بێ گومان له هه‌ر کولتوورێکدا و به‌پێی یاساکانی نۆرم و ئێتیکیان هه‌ڵگری پێناسێکی تر ده‌بێت، که بۆ کولتوورێکی تر جێگای چ سه‌رسوڕمانه و چ نامۆشه.


بیهێنه پێش چاوی خۆت، که مرۆڤ بگه‌ڕێنیته‌وه بۆ مێژوو، بۆ سه‌رده‌مانێک، که مرۆڤ له ڕێگای ئێڤۆلوسیۆنه‌وه، به موتاسیۆنێک ده‌بێته خاوه‌نی کۆرتێکسێکی نوێ له مێشکیدا، که توانای بیرکردنه‌وه و به‌رهه‌مهێنانی ئه‌قڵی پێ ده‌به‌خشێت، له مێژوویه‌کدا، که ژماره‌ی مرۆڤ زۆر نین، له مێژوویه‌کدا کولتوور بوونی نییه، ده‌بینین، که مرۆڤ وه‌ک هه‌ر بوونه‌وه‌رێکی تری ئه‌م پلانێته، ئێڤۆلوسیۆنانه سێکسوالیتێت بۆ خستنه‌وه‌ی نه‌وه‌ی زیاتر هه‌ڵیده‌سووڕێنێت. له‌م پرۆسه‌ ئێڤۆلوسیۆنییه‌دا ماتۆڕی هه‌ڵسوڕاندنی پیاوان له پراکتیزه‌کردنی سێکسدا له‌گه‌ڵ ژماره‌ی زۆری ژناندا، خستنه‌وه‌ی زۆرترین نه‌وه‌یه، ماتۆڕی هه‌ڵسوڕاندنی ژنان له پراکتیزه‌کردنی سێکسدا له‌گه‌ڵ ژماره‌ی زۆری پیاواندا، خستنه‌وه‌ی جوانتریین نه‌وه‌یه. ئه‌م فێنۆمێنه له ژیانی مۆدێرندا به‌یه‌کجاری نه‌ک شێوێنراوه، به‌ڵکوو ونیش بووه.


هه‌ندێک جار له نائاگایی ژنان و پیاواندا، له ژیانی مۆدێرندا، کاتێک ده‌بینرێت، که بۆ نموونه پیاوێکی ساده و ساکار، پیاوێکی ده‌وڵه‌مه‌ند، پیاوێکی ناودار، پیاوێکی ده‌سته‌ڵاتدار به‌ده‌ر له‌و منداڵانه‌ی که هه‌یه‌تی له‌گه‌ڵ ژنه‌که‌یدا، چه‌ند منداڵێکی تریشی له‌گه‌ڵ چه‌ند ژنێکی تردا بهنهێنی هه‌یه. له ئه‌وروپادا له ڕێگای میدیاوه زۆرینه‌ی جار ئه‌م نهێنییانه ئاشکرا ده‌کرێن، ئامانج تێیدا یه‌که‌م، زیاتر فرۆشتنی ڕۆژنامه‌ی ئه‌و ڕۆژه‌یه، هه‌مان کاتیش زانین له‌سه‌ر ژیانی خه‌ڵکی، به‌شێکی گه‌وره‌ی ژیانی مرۆڤه، هه‌ر بۆیه هێنده‌ی ئه‌و ڕۆژنامانه ده‌خوێنرێنه‌وه، که زانیاری له‌سه‌ر ژیانی خه‌ڵکی بڵاو ده‌که‌نه‌وه، هێنده ڕۆژنامه‌یه‌کی تر نافرۆشرێت، که ئامانجێکی تری هه‌یه له بڵاوکردنه‌وه‌دا.


هه‌ندێک له‌و ژنانه‌ی خاوه‌نی چه‌ندین منداڵن، یاخود منداڵێک یان دووان، که منداڵێکیان یان دووانیان هی پیاوه‌که‌ی خۆی نییه، به‌ڵکوو پیاوێکی تر، نائاگایانه ئامانج تێیدا ئامانجێکی ئێڤۆلوسیۆنێرانه‌یه، که ژن ویستی خستنه‌وه‌ی جوانترین نه‌وه‌ی هه‌یه، هه‌ر بۆیه له‌گه‌ڵ چه‌ندین پیاودا ئه‌کتیڤه. له ژیانی مۆدێرندا به‌هۆی ناوبانگییه‌وه ڕوو ده‌دات، که ژنێک ویستیێتی منداڵێکی له پیاوێکی ناودار هه‌بێت، له پیاوێکی پاڵه‌وان، سیاسی، هونه‌رمه‌ند ....هتد. هه‌بێت. له لای هه‌ندێک ژنانی تر، ناو ده‌نرێت خۆشه‌ویستی، که ژنه‌که پیاوێکی تری له‌ته‌نیشت پیاوه‌که‌ی خۆیه‌وه خۆش ده‌وێت.

 

گرنگ نییه کێ باوکمانه!
ژیانی باڵنده‌کان پڕه له به‌خته‌وه‌ری، ئه‌مه وێڕای ئه‌وه‌ی که زۆر جار تێڕوانینی مرۆڤ بۆ ژیانی ئاژه‌ڵان، تێڕوانینێکی کولتوورییانه‌یه، نه‌ک سروشتی، هه‌ر بۆیه به‌و شێوه‌یه له‌سه‌ر ژیانیان ده‌دوێین، که ئێمه وه‌ک مرۆڤ ده‌مانه‌وێت. مرۆڤ به‌رده‌وام قسه‌ له‌سه‌ر مۆنۆگامی ده‌کات، ژیانێکی پێکه‌وه‌یی هه‌تاهه‌تایی دوو باڵنده یان دوو ئاژه‌ڵ، له‌مانه جۆره‌کانی وه‌ک کۆتر و بولبولی خۆشه‌ویستی، نموونه‌ی خۆشه‌ویست و ئیدیاڵی مرۆڤن.


له سروشتدا باڵنده‌کان ئازادن، هیچ باڵنده‌یه‌ک ژنه‌که‌ی یان مێرده‌که‌ی به زنجیر به‌خۆیه‌وه نابه‌ستێته‌وه، باڵنده‌کان سۆسیالن، له‌گه‌ڵ یه‌کدا ئه‌کتیڤن، له وه‌رزی خستنه‌وه‌ی نه‌‌وه‌دا جووته‌کان ده‌گه‌ڕێنه‌وه لای یه‌ک، ئامانجی سێکسیان خستنه‌وه‌ی نه‌وه‌یه، هیچ باڵنده‌یه‌ک هه‌ژده ساڵ به‌دیار بێچووه‌کانییه‌وه دانانیشێت هه‌تاوه‌کوو بتوانن ژیانی خۆیان بژین. خۆشبه‌ختیی باڵنده ئه‌وه‌یه، که چ زوو هێلکه ده‌که‌ن، زوو هێلکه‌کان هه‌ڵدێن، زوو بێچووه‌کان گه‌وره‌ ده‌بن. پاشان یان ئه‌وه‌تا نه‌وه‌ی تر ده‌خه‌نه‌وه، یان ئه‌وه‌تا ماوه‌یه‌ک پشوو ده‌ده‌ن، به‌ڵام پشووه‌که درێژخایه‌ن نییه، چونکه وه‌رزی خستنه‌وه‌ی نه‌وه کورته، هه‌مان کات که‌وتووەته سه‌ر ئه‌و ده‌ڤه‌ره‌ی، ئه‌و کۆنتینێنته‌ی، که باڵنده‌کانی لێ ده‌ژین، بۆ نموونه له ئه‌وروپا، باڵنده‌کان زۆر په‌له‌یانه، چونکه به‌هار و هاوینێکی کورتیان هه‌یه.


له مرۆڤی مۆدێرندا ئامانجی سێکسوالیتێت ته‌نیا خستنه‌وه‌ی نه‌وه نییه، به‌ڵکوو به‌خته‌وه‌رییه، وه‌رگرتنی ئه‌نه‌رگییه له به‌رامبه‌ره‌وه، ژن له پیاو، پیاو له ژن، ئه‌کتیڤیتێتێکی ڕۆحییه. ژیانی هه‌‌موو بوونه‌وه‌ره‌کان خاوه‌نی سیستێمن، که مۆدولار له مێشکدا کار ده‌که‌ن، مۆدولار به واتای به‌ردی بناغه‌ی فێنۆمێنێک، بوونێک له فونکسیۆنێکدا یاخوود له کارکردنێکدا. ژیانی مرۆڤ له‌م بوونه‌وه‌رانه‌ی زه‌وییدا تایبه‌تتره، ئه‌ویش به‌هۆی هه‌بوونی کۆرتێکسێکی نوێوه له مێشکیدا، که به‌رهه‌می ئێڤولوسیۆنه.


مرۆڤ خاوه‌نی دوو ڕۆحه، ڕۆحێکی ڕاسیۆناڵ و ڕۆحێکی ئێمۆسیۆناڵ، ڕۆحی ئه‌قڵ به قسه ده‌دوێت، خۆراکی ئه‌قڵ وشه و فێربوونه. ڕۆحی هه‌ست به جه‌سته ده‌دوێت، واته خاوه‌نی زمانی جه‌سته‌یه، خۆراکی ڕۆحی هه‌ست، به‌خته‌وه‌رییه، ئینجا بیهێنه به‌رچاوی خۆت، که چی به‌خته‌وه‌رمان ده‌کات وه‌ک مرۆڤ، به‌م شێوه‌یه لیستی به‌خته‌وه‌ری لیستێکی درێژه، بۆ نموونه، ئازادی، ده‌ڤه‌رێکی ئاسووده بۆ ژیان، ئاسووده‌یی له ژیاندا، سێکس، هه‌بوونی خۆراکی باش و پێویست...هتد.


به‌ڵام مرۆڤ چۆن بتوانێت سێکس بکات، له ژیانێکدا که به ئایین و کولتوور ته‌نراوه؟ چلۆن بتوانێت ئه‌نه‌رگی له که‌سێکی تره‌وه وه‌ربگرێت، بێ ئه‌وه‌ی پێویست بکات به زه‌بری ئایین و کولتوور شوو بکات، بێ ئه‌وه‌ی پێویست بکات نه‌وه بخاته‌وه؟


مرۆڤی مۆدێرن هێنده بووه به (ئه‌نه‌رگیی ڤامپییه‌ر)یه‌ک، که هه‌رچیی ئاره‌زوو و وزه هه‌بێت تێتدا هه‌ڵی ده‌مژێت، هێنده ئه‌نه‌رگی به‌خش نییه، ته‌نانه‌ت له پراکتیزه‌کردنی سێکسیشدا تاک هه‌ست به خاڵییبوونی خۆی له ئه‌نه‌رگی ده‌کات، نه‌ک پڕبوونه‌وه. هه‌ر بۆیه زۆرجار مرۆڤ سێکس ده‌کڕێت، ئامانج تێیدا وه‌رگرتنی ئه‌نه‌رگییه، بۆ پڕکردنه‌وه‌ی ئه‌و بۆشاییه‌یه که ڕۆحی ئێمۆسیۆناڵ هه‌یه‌تی، به‌ڵام هه‌موو سێکسفرۆشێک چاوگه‌ی ئه‌نه‌رگی نییه، بۆ ئه‌و فرۆشتنی سێکس ته‌نیا پیشه‌سازیی به‌رهه‌مهێنانی پاره‌یه، به‌ڵام سێکس زۆر له‌وه‌ زیاتره، که ئێمه وه‌ک مرۆڤ تێی ده‌گه‌ین. به‌ڵام چی ده‌که‌یت کاتێک هاوڕێیه‌کت نه‌بێت که بتوانیت له ژیانێکی مۆدێرندا تێلێفۆنی بۆ بکه‌یت و ئه‌نه‌رگی ببه‌خشن به‌ یه‌کتر؟ ده‌یڤید گارێت وه‌ک نموونه.


زۆر جار ڕوو ده‌دات که کچێکی جوان ته‌نیایه و هیچ کوڕێک ناوێرێت لێی نزیک بێته‌وه، نه‌وێرانه‌که پابه‌نده به که‌سایه‌تیی کچه‌که‌وه، پیشه و پۆستی. زۆر جار کوڕێک به هه‌مان ڕێگادا ده‌ڕوات. له ژیانی مۆدێرندا کچ و کوڕه جوانه‌کان، خاوه‌ن به‌هره و پیشه‌‌یه‌کی باڵا و ته‌نیان. ته‌نیان چونکه کاتیان هێنده‌ی بۆ پیشه‌که‌یانه بۆ ژیانی تایبه‌تیان نییه، ئه‌مه وه‌ها ده‌‌کات که که‌س نه‌توانێت له‌گه‌ڵیان بێت. ته‌نیان چونکه نایانه‌وێت پابه‌ند بن به که‌سێکه‌وه و ئه‌رکی به‌رپرسیارێتیی په‌‌یوه‌ندییه‌کی دووانه‌یی بگرنه ئه‌ستۆی خۆیان. ته‌نیان چونکه کچان و کوڕانی تر ژیانێکی تریان لێ داوا ده‌که‌ن، که ئه‌وان توانای پێدانیان نییه، ئه‌ویش په‌یوه‌ندییه‌کی دووانه‌یی و شووکردن و هه‌بوونی منداڵه.


ئه‌م جۆره مرۆڤانه وێڕای هه‌بوونی پاره‌یه‌کی خه‌یاڵی له ژیانیاندا، ناسینی خه‌ڵکێکی زۆر، که‌چی ته‌نیاییان تووشی دێپرێسیۆنێکی (خه‌مباریی) گه‌وره‌ی کردوون، که دواجار زیانێکی گه‌وره‌یان لێ ده‌دات، هه‌روه‌کوو چۆن به‌شێکی زۆر له‌م جۆره خه‌ڵکانه، تووشی پابه‌ندبوون به نارکۆ و ئه‌لکهۆله‌وه ده‌بن و دواجار به خۆکوشتن کۆتایی به ژیانیان دێنن. ئه‌م مرۆڤانه هه‌موو شتیان هه‌یه ته‌نیا به‌خته‌وه‌ری نه‌بێت، ئه‌م مرۆڤانه خه‌ڵکانێکی زۆر ده‌یانناسن و خه‌ڵکانێکی زۆر ده‌ناسن، به‌ڵام وه‌ک هاوڕێ به ده‌گمه‌ن هاوڕێی ڕاسته‌قینه‌یان هه‌یه.


ده‌یڤید گارێت (David Garret) گه‌نجێکی جوان و به‌هره‌مه‌ندی ئه‌ڵمانه، هونه‌ره‌که‌ی کردوویه‌تی به گه‌نجێکی میلیۆنێر. ده‌یڤید که‌مانچه‌ژه‌نێکی سه‌رسوڕهێنه‌ره، که هونه‌ره‌که‌ی ناوبانگێکی نێونه‌ته‌وه‌یی بۆ دروست کردووه. من خۆم یه‌کێکم له‌وانه‌ی که ماوه‌ی یازده ساڵێک ده‌بێت گوێگری موسیکه‌کانیم. بۆ من ده‌یڤید پردێکه که جیهانه جیاوازه‌کانی موسیک پێکه‌وه ده‌به‌ستێته‌وه، بۆ نموونه تێکه‌ڵکردنی ڕۆک و کلاسیک موسیک.


هاوینی ساڵی 2016 هه‌واڵێکی داچڵه‌کێنه‌ر له‌سه‌ر ده‌یڤید، ته‌واوی ڕۆژنامه‌کانی ئه‌ڵمانیای سه‌رقاڵ کرد، هه‌مان کات له ئه‌مەریکاش هه‌مان شێوه. له هه‌واڵه‌که‌دا هاتووه، که ئاشڵی یۆدان (Ashley Youdan)، ناوه هونه‌رییه‌که‌ی (کێنداڵ کارسۆن Kendall Karson)، داوایه‌کی یاسایی دژ به ده‌یڤید به‌رز کردووەته‌وه، که تێیدا ده‌ڵێ، ده‌یڤید ده‌ستدرێژیی سێکسی کردووەته‌ سه‌ر و به لێدان و ئازار پراکتیزه‌ی سێکسی له‌گه‌ڵ کردووه.


ئاشڵی یۆدان، یاخود کێنداڵ کارسۆن، گه‌نجێکی پۆڕنۆستاره و خۆشه‌ویستی ده‌یڤیده Girlfriend. ده‌یڤید ده‌گێڕێته‌وه و ده‌ڵێ، من ئاشڵیم له ئه‌مەریکا ناسیوه، ڕۆژێک زۆر ماندوو بووم و له‌دوای کارێکی زۆر، گه‌ڕامه‌وه هۆتێله‌که‌م و بۆ حه‌وانه‌وه‌ی خۆم، حه‌زم ده‌کرد، که که‌سێک لام بێت، تێلێفۆنم بۆ شوێنێک کرد و داوای خانمێکم کرد، خانمی ئه‌و ڕۆژه ئاشڵی بوو، به‌ڵام من حه‌زم لێ کرد و بووینه خۆشه‌ویستی یه‌کتر، من ئاشڵیم هێناوه‌ته ماڵی باوکم و وه‌ک خۆشه‌ویستم پێم ناساندوون.


ئا لێره‌وه سێکس ده‌بێته چاوگه‌ی خه‌‌م و ناخۆشی. له‌م هه‌رایه‌دا ده‌یڤید قسه‌یه‌ک ده‌کات، که هه‌موومان ده‌ته‌زێنێت. ئه‌و ده‌ڵێ، من بیری هه‌بوونی هاوڕێ ده‌که‌م، هاوڕێیه‌ک، که بتوانم تێلێفۆنی بۆ بکه‌م و بۆ من له‌وێ بێت، به‌ڵام چوارده‌وری من پڕه له‌و خه‌ڵکانه‌ی، که پاره‌یان ده‌ده‌مێ.


ده‌گمه‌نن ئه‌و پیاوانه‌ی که وه‌ک ده‌یڤید ئاماده‌ن پۆڕنۆستارێک بکه‌نه خۆشه‌ویستی خۆیان، له هه‌ندێک کولتووری پریمیتیڤدا، کچێک ماچی کوڕێکی کردووه، له‌گه‌ڵ کوڕێک خه‌وتووه ....هتد. ئیتر شانسی ژیانێکی دووانه‌یی نامێنێت، چونکه بۆ پیاوانی ئه‌و کولتووره ده‌بێته کچێکی بێ نرخ.


ئه‌وه‌ی پیاوان ده‌یانه‌وێت، لانی که‌م پیاوانی مۆدێرن له ئه‌وروپا و ئه‌مەریکا ژنانێکه، که ئه‌زموونیان له سێکسوالیتێتدا هه‌یه، که ده‌زانن سێکس چییه. ده‌شێت هه‌موو که‌س بڵێ ده‌زانم سێکس چییه، به‌ڵام ئه‌م زانینه زانینێکی ڕووکه‌شه، هه‌ربۆیه خه‌ڵکانی وه‌ک ده‌یڤید ژنانێکیان ده‌وێت که بزانن سێکس چییه، ئه‌وه‌ش له لای پۆرنۆستاره‌کان ده‌ست ده‌که‌وێت.


کێشه و نابه‌خته‌وه‌ری له سێکسدا هێنده زۆر بووه، که فیرماکانی به‌رهه‌مهێنانی (دیلدۆ، پیاوی لاسیک، ژنی لاستیک، ڤاگینای لاسیک)ی پڕ بازاڕ کردووه، بگره ئێستا ڕۆبۆتی ژن و پیاویش هه‌یه، که ته‌نیا ڕۆح ماوه بکرێت به به‌ریاندا، هێنده له مرۆڤی ڕاستی ده‌چن. به‌م شێوه‌یه له خودی ئه‌وروپاشدا به وریاییه‌وه چ سێکس ده‌کرێت و چ قسه له‌سه‌ر سێکس ده‌کرێت، خه‌ڵک به‌ ته‌نیا له‌گه‌ڵ خۆیدا سێکس ده‌کات، چونکه که‌سێک نادۆزێته‌وه که بتوانێت له‌گه‌ڵیدا قسه له‌سه‌ر سێکس بکات، سێکس بکات ...هتد. ئه‌گه‌ر هه‌تا ساڵانی نه‌وه‌ده‌کانیش هه‌موو که‌س بوێریی ئه‌وه‌ی نه‌بووبێت که بچێت فیلمێکی پۆڕنۆ بکڕێت، بچێت فیلمێکی پۆڕنۆ به قه‌رز بهێنێت، ئه‌وا ئیمڕۆ له ڕێگای ئینته‌رنێته‌وه له هه‌موو چرکه‌یه‌کدا به ملیۆن جار کلیک له لینکێکی پۆڕنۆ ده‌کرێت. سێکس چاوگه‌ی ئه‌نه‌رگییه، ئه‌نه‌رگییه‌کی پێویست بۆ ژیان، که‌چی مرۆڤ کردوویه‌تی به هێڵی سوور بۆ ژیانی خۆی، به‌م شێوه‌یه ژیانی مرۆڤ پڕە له نه‌خۆشیی ده‌روونی و سۆماتی. هه‌موو ئه‌و نابه‌خته‌وه‌رییه‌ی که مرۆڤ به‌هۆی سێکسه‌وه‌ ده‌ینێته‌وه، ده‌بنه هۆی لێکه‌وتنه‌وه‌ی کێشه و نه‌خۆشیی ده‌روونی، کێشه‌ و نه‌خۆشییه ده‌روونییه‌کان، بۆ نموونه دێپرێسیۆن ده‌بێته هۆی لێکه‌وتنه‌وه‌ی چه‌نده‌ها کێشه و نه‌خۆشیی تری سۆماتی، که ده‌بێته هۆی لێکه‌وتنه‌وه‌ی سویسید، واته خۆکوشتن.


به‌ڵام ئه‌م نابه‌خته‌وه‌رییه‌، که نه‌ک سێکس ده‌ینێته‌وه، به‌ڵکوو ئه‌و کولتووره‌ی مامه‌ڵه له‌گه‌ڵ سێکسدا ده‌کات ده‌ینێته‌وه،ژیانی به‌شێکی گه‌وره‌ی کچان و ژنانی کوردی داگیر کردووه. به‌شێکی گه‌وره‌ی کچانی کورد، که له هه‌ڕه‌تی هه‌رزه‌ییانه‌وه پراکتیزه‌ی سێکس ده‌که‌ن بۆ به‌خته‌وه‌ربوون، له ئاینده‌دا ده‌بنه نابه‌خته‌وه‌رتریین مرۆڤی دونیا، ئه‌ویش به‌هۆی مامه‌ڵه‌ی ئه‌و کوڕانه‌وه که په‌یوه‌ندییان له‌گه‌ڵیاندا هه‌یه. له ته‌واوی ئه‌و ڤیدیۆیانه‌ی که له ئینته‌رنێتدا بڵاو کراونه‌ته‌وه و من دیومن، ده‌گمه‌ن به‌خته‌وه‌ری له‌و کچانه‌دا ده‌بینم، که پراکتیزه‌ی سێکس ده‌که‌ن. هه‌ندێک له کچان ئاگاداری ڤیدیۆ گرتنیانن و هه‌ندێکی تریشیان نه‌خێر. له ڤیدیۆیه‌کدا، که چوار کوڕ پراکتیزه‌ی سێکس له‌گه‌ڵ کچێکی جاحێڵدا ده‌که‌ن، وێڕای ئه‌وه‌ی کوڕه‌کان خۆشیان جاحێڵن، به‌ڵام خه‌ڵکانی سادیست و نه‌خۆشن. له‌گه‌ڵ هه‌ر خه‌مبارییه‌کی کچه‌که‌دا، له‌گه‌ڵ هه‌ر گریانێکی کچه‌که‌دا، ئه‌وان زیاتر ئاره‌زوویان ده‌بێت، ئه‌وه‌ی ئه‌کتیڤه له‌گه‌ڵ کچه‌که‌دا زیاتر ئاره‌زووی هه‌یه و زیاتر چ له کچه‌که ده‌دات و چ جنێویشی پێ ده‌دات. بیهێنه به‌رچاوی خۆت، تۆ باوکی ئه‌و کچه‌ بیت و ئه‌و فیلمه ببینیت، تۆ دایکی ئه‌و کچه بیت و ئه‌و فیلمه ببینیت، تۆ که‌سێکی مرۆڤدۆست بیت و ئه‌و فیلمه ببینیت.


کچه‌که هه‌م نایه‌وێت هه‌میش ده‌گری، که ئازاری هه‌یه، به‌ڵام ئه‌م گریان و ئازاره به‌خته‌وه‌رییه‌کی گه‌وره له‌و کوڕانه‌دا به‌رهه‌م دێنێت، به‌تایبه‌ت ئه‌وه‌ی که سه‌ره‌یه‌تی و ئه‌کتیڤه له‌گه‌ڵ کچه‌که‌دا. پرسیار لێره‌دا ئه‌وه‌یه، که بۆچیی هه‌تاوه‌کوو ئێستا ده‌زگایه‌ک هه‌ڵنه‌ستاوه به دۆزینه‌وه‌ی ئه‌م کوڕانه و لێپرسینه‌وه‌یان؟ بۆچی ده‌زگایه‌ک له ڕێگای بڵاوکردنه‌وه‌ی ڕۆشنبیریی سێکسییه‌وه کار بۆ ئه‌وه ناکات، نه‌وه‌ لەدوای نه‌وه‌ی کورد سه‌قه‌ت نه‌بن، وه‌ک نه‌وه‌کانی پێش خۆیان؟ گرنگه ئێستا و ئا لێره‌دا کار له‌و منداڵانه‌دا بکرێت، که هێشتا له باخچه‌ی منداڵاندان، لێره‌وه ده‌توانرێت گۆڕینی ئاینده ده‌ست پێ بکرێت، لێره‌وه ده‌توانین نه‌وه‌یه‌کی نوێ به‌رهه‌م بهێنین که له که‌سمان نه‌چن، نه‌وه‌یه‌ک لێوان لێو له ئه‌قڵ و هه‌ست، لێوان لێو له مرۆڤایه‌تی، خاوه‌نی کولتوورێک بن که مرۆڤایه‌تیی تێیدا خاوه‌نی نرخه و ده‌پارێزرێت. ته‌نیا به‌و شێوه‌یه ده‌توانرێت دیوارێکی گه‌وره له‌نێوان نه‌وه‌ی کۆن و نوێدا دروست بکرێت، به‌م شێوه‌‌یه نه‌ک به ته‌نیا سێکس ده‌بێته مایه‌ی حه‌ز و به‌خته‌وه‌ری، به‌ڵکوو ژیانیش ده‌بێته مایه‌ی حه‌زێکی گه‌وره و به‌خته‌وه‌رییه‌کی هه‌تاهه‌تایی.