ئایا مه‌لا به‌ختیار ده‌بێته‌ چۆله‌كه‌برژێنی سه‌ر ماڵه‌ سووتاوه‌كانی خانه‌قین؟

 

دوای خیانەتەکەی گرووپی 16ی ئۆکتۆبەری نێو یەکێتی، ئەو حزبە ترسی لەدەستدانی دەنگەکانی هەیە و هه‌ر به‌و هۆیه‌شه‌وه‌ لە سنووری خانەقین و پارێزگای دیالە، (مەلا بەختیار) لێپرسراوی دەستەی کارگێڕیی مەکتەبی سیاسیی حزبەکەی بۆ هەڵبژاردنی داهاتووى پەرلەمانی عێراق کاندید کردووە.


بەپێی هه‌واڵێكی ئاژانسی هه‌واڵده‌ری (باسنیوز) كه‌ له‌ 8/2/2018 بڵاوی كردووه‌ته‌وه‌، مەلا بەختیار لەلایەن یەکێتیی نیشتمانیی کوردستانەوە بۆ هەڵبژاردنەکانی پەرلەمانی عێراق لە سنووری شاری خانەقین و پارێزگای دیالە کاندید کراوە و لەو بارەیەشه‌وە چاودێرێکی سیاسی بە ئاژانسه‌كه‌ی ڕاگەیاندووه‌، کە کاندیدکردنەکەی مەلا بەختیار بۆ ئاشتکردنەوەی خەڵکی خانەقینە، بەهۆی ئەوەی لەدوای ڕووداوەکانی 16ی ئۆکتۆبەر و خیانه‌تی گرووپێكی نێو یه‌كێتییه‌وه‌، خانەقین کەوتووەتە دەست میلیشیاکانی حەشدی شەعبی و هێزەکانی عێراق، بەو هۆیەشەوە شارەکە دووبارە ڕووبەڕووی تەعریبکردن بووەتەوە.


جەزا سەید ماجید، ئەندامی ئەنجومەنی ناوەندیی یەکێتیی نیشتمانیی کوردستان، ڕاشی گەیاندووه‌ كه‌ یەکێتی بە گوڕ و تینێکی بەھێزەوە خۆی بۆ ھەڵبژاردنەکانی پەرلەمانی عێراق و پەرلەمانی کوردستان ئامادە کردووە. لەبارەی کاندیدکردنی مەلا بەختیار بۆ پەرلەمانی عێراق، جەزا سەید ماجید، ئاماژەشى بەوە کردووه، کە مەلا بەختیار خەڵکی خانەقینە و لە پرۆسەی ئازادکردنی عێراق و لە نەھێشتنی شوێنەوارەکانی تەعریبدا (ڕۆڵ)ی بینیوە. گوتوویه‌شی: ”ئەگەر مەلا بەختیار کاندیدی پەرلەمانی عێراق بێت، بێ گومان دەنگێکی بێشوماری خانەقین بۆ خۆی مسۆگەر دەکات، چونکە کەسێکی شۆڕشگێڕە و خەڵکی ناوچەکە خۆشیان دەوێت". ئەمە لە کاتێکدایە لە چەند ڕۆژی رابردوودا، مەلا بەختیار گەشتێکی بۆ سنووری خانەقین ئەنجام داوه‌ و ژمارەیەک کۆڕ و سمیناری پێشکەش کردووه‌ و سەردانی ژمارەیەکی زۆر لە کەسایەتییەکانی دەڤەرەکەشی کردووه‌.


کاندیدکردنەکەی مەلا بەختیار به‌ مه‌به‌ستی كۆكردنه‌وه‌ی ده‌نگ له‌ خانه‌قین بۆ یه‌كێتی، له‌كاتێكدایه‌ كه‌ لە ڕووداوی 16ی ئۆکتۆبەردا خانەقینیش بە هاوکاریی گرووپی خەیانەتی 16ی ئۆکتۆبەر لەلایەن حەشدی شەعبییەوە داگیر کرا و چەندین هاووڵاتییش بە بۆنەی هەڵکردنی ئاڵای کوردستان و خۆپیشاندان لە دژی حەشدی شەعبی شەهید بوون. دوای فرۆشتنی خانه‌قین به‌ هێزه‌ داگیركه‌ره‌كان، ئێستا ئه‌و شاره‌ كوردستانییه‌ له‌ژێر داگیركاریدایه‌ و ڕۆژ له‌دوای ڕۆژیش دۆخی ئه‌منیی شاره‌كه‌ به‌ره‌و خراپتر ده‌چێت، نابێ ئەوەشمان لەبیر بچێ کە مەلابەختیار یەک لەو سەرکردانەی یەکیتی بوو کە سەرکۆنەی خیانەتەکەی 16ی ئۆکتۆبەری گرووپەکەی نێو یەکیتیی کرد.


چه‌ند سەعاتێک له‌دوای بڵاوبوونه‌وه‌ی هه‌واڵی کاندیدکردنەکەی مەلا بەختیار و له‌دوایین ڕووداوی پێشیلكاریی ئه‌منی له‌ خانه‌قین، لە گەڕەکی بەختیاری ئه‌و شاره‌ كه‌ وه‌كوو ده‌گوترێت گه‌ڕه‌كه‌كه‌ به‌ناوی مه‌لا به‌ختیاره‌وه‌ ناو نراوه‌، ژمارەیەک چەکداری نەناسراو ده‌ستڕێژی گولله‌یان له‌ ژماره‌یه‌ك هاووڵاتیی سڤیل كرد و‌ بەو ھۆیەوە حەوت ھاووڵاتی شەھید‌ و سێ ھاووڵاتیی دیکەش بریندار بوون. ئه‌و كۆمه‌ڵه‌ شه‌هید و برینداره‌،‌ دوایین ده‌ستكه‌وتی خیانه‌ته‌ قێزەونەكه‌ی گرووپی 16ی ئۆكتۆبه‌ر بوو بۆ ئه‌و خانه‌قینه‌ی كه‌ مه‌لا به‌ختیار ده‌یه‌وێت بۆ هه‌ڵبژاردنه‌كانی داهاتوو زۆرترین ده‌نگ بۆ حزبه‌كه‌ی تێدا كۆ بكاته‌وه‌. ئه‌مه‌ سه‌ماكردنه‌ له‌سه‌ر برینی خانه‌قینییه‌كان. ئه‌گه‌ر مه‌لا به‌ختیار خۆی به‌ كوڕی خانه‌قین و خۆشه‌ویستی خانه‌قینییه‌كان ده‌زانێت، له‌باتی ئه‌وه‌ی له‌دوای خیانه‌ته‌كه‌ی 16ی ئۆكتۆبه‌ر، هه‌وڵی له‌بیربردنه‌وه‌ی برینی خانه‌قینییه‌كان و كۆكردنه‌وه‌ی ده‌نگه‌كانیان بدات، ده‌بوایه‌ پێش هه‌موو كه‌سێك ئه‌و داوای له‌ خه‌ڵكی شاره‌كه‌ بكردبایه‌ كه‌ ئه‌و خیانه‌ته‌ی لێیان كراوه‌ له‌بیری نه‌كه‌ن و له‌ هه‌ڵبژاردنه‌كانی داهاتوودا سزای ئه‌و خیانه‌تكارانه‌ بده‌ن كه‌ له‌پشته‌وه‌ خه‌نجه‌ریان له‌ خانه‌قینییه‌كان دا.


ده‌گوترێت كه‌ زاكیره‌ی ماسی كورته‌ و له‌میانی 3 چركه‌دا هه‌موو شتێكی بیر ده‌چێته‌وه‌، به‌ڵام ئه‌و خه‌نجه‌ره‌ی كه‌ له‌پشته‌وه‌ له‌ خانه‌قین دراوه‌، برینه‌كه‌ی ئه‌وه‌نده‌ قووڵه‌ كه‌ نه‌ك خانه‌قینییه‌كان، به‌ڵكوو ته‌نانه‌ت ماسییه‌كانی نێو ئه‌ڵوه‌نیش هه‌رگیز له‌بیری ناكه‌ن. مه‌لا به‌ختیار ده‌بێت باشتر له‌ هه‌موو كه‌سێك ئه‌و ڕاستییه‌ بزانێت كه‌ خانه‌قینییه‌كان كاڵا نین كڕین و فرۆشتنیان پێ بكرێت، بۆیه‌ نابێت بچێته‌ نێو ئه‌و یارییه‌وه‌ و له‌و سه‌ودایه‌دا ببێته‌ كه‌ره‌سته‌یه‌ك به‌ ده‌ست گرووپی 16ی ئۆكتۆبه‌ره‌وه‌ و وه‌كوو كارتێك به‌كاری بهێنن، ئه‌وان بیفرۆشن و مه‌لا به‌ختیاریش بۆیان بكڕێته‌وه‌.


یه‌كێتی ئه‌وه‌نده‌ نیگه‌رانی تووڕه‌یی خه‌ڵكی خانه‌قینه‌ له‌ گرووپی 16ی ئۆكتۆبه‌ر، كه‌ مه‌لا به‌ختیاری بۆ هه‌ڵبژاردنه‌كانی داهاتووی ئه‌نجومه‌نی نوێنه‌رانی عێراق كاندید كردووه‌، ئه‌مه‌ش له‌كاتێكدایه‌ كه‌ له‌ سه‌ره‌تای دروستبوونی هه‌رێمی كوردستانه‌وه‌ هه‌تا ئێستا، یه‌كێتی مه‌لا به‌ختیاری بۆ هیچ پۆستێكی حكوومی یان په‌رله‌مانی، نه‌ له‌ هه‌رێمی كوردستان و نه‌ له‌ عێراقیش كاندید نه‌كردووه‌.


ئه‌و خانه‌قینییانه‌ی كه‌ له‌ هه‌موو هه‌ڵبژاردنه‌كاندا زۆرترین ده‌نگیان به‌ پارت و لایه‌نه‌ كوردستانییه‌كان داوه‌ و لە ڕیفراندۆمی سەربەخۆیی کوردستاندا 98% دەنگیان بە سەربەخۆیی دا و یه‌كه‌مین كه‌س بوون كه‌ له‌ دژی میلیشیا و هێزه‌ داگیركه‌ره‌كانی عێراق ڕاپه‌ڕین و له‌پێناو ئاڵای كوردستاندا خوێنیان ڕشت و شه‌هیدیان دا، شایسته‌ی ئه‌وه‌ نین له‌ 16ی ئۆكتۆبه‌ردا له‌پشته‌وه‌ خه‌نجه‌ریان لێ بدرێت و بفرۆشرێن، ئه‌وجا له‌ هه‌ڵبژاردنه‌كاندا هه‌وڵی كۆكردنه‌وه‌ی ده‌نگه‌كانیان بدرێت. وه‌كوو خودی خانه‌قینییه‌كان ده‌ڵێن: (یه‌كێگ ماڵێ سزیه‌ێد و یه‌كێگتریش تیه‌ێد مه‌لویچگ له‌بانێ برشنێ)، واته:‌ (یه‌كێك ماڵی ده‌سووتێ و یه‌كێكش چۆله‌كه‌ی له‌سه‌ر ده‌برژێنێ). ئایا مه‌لا به‌ختیار ده‌بێته‌ چۆله‌كه‌برژێنی سه‌ر ماڵه‌ سووتاوه‌كانی خانه‌قین؟!. وه‌ڵامه‌كه‌ی بۆ به‌ڕێزیان به‌جێ ده‌هێڵم.


قەزای خانەقین و شارۆچکەکانی دەوروبەری سەر بە پارێزگای دیالە یەکێک لە ناوچە کوردستانییەکانی دەرەوەی ئیدارەی هەرێمی کوردستانە، کەلە دوای ساڵی 2003ەوە زۆربەی کاروبارەکانی لەلایەن هەرێمی کوردستانەوە بەڕێوە چووە و.