له‌ به‌غدا چ باسه‌؟

عێراقییەکان بێزارن له‌و لایه‌ن و سه‌ركرده‌ سیاسییانه‌ی ئه‌مڕۆ له‌ به‌غدا ده‌سه‌ڵاتدارن و به‌ هۆكاری كاولبوونی عێراقیان ده‌زانن

له‌به‌ر ئه‌وه‌ی نیشته‌جێی شاری به‌غدام و له به‌غدا ده‌ژیم، زۆر جار كه‌ سه‌ردانی كوردستان ده‌كه‌م، یاخود كه‌سێك په‌یوه‌ندیی ته‌له‌فۆنیم پێوه‌ ده‌كات، یان له‌ڕێی نامه‌ و ئیمێل و سۆشیال میدیاوه‌ له‌گه‌ڵ كه‌سێك په‌یوه‌ندیم ده‌بێت، یه‌كه‌م پرسیارێك كه‌ لێم ده‌كرێت ئه‌وه‌یه‌، كه‌ له‌ به‌غدا چ باسه‌؟! هه‌ر جاره‌ و به‌پێی بارودۆخی سیاسی و ئه‌منی باسی دوایین پێشهاته‌كان و ڕای گشتیی عێراقیان بۆ ده‌كه‌م. به‌ڵام ئه‌گه‌ر ئێستا ئه‌و پرسیاره‌م لێ بكرێت، دوور له‌ بانگه‌شه‌ی میدیایی و ئینتیمای سیاسی و هه‌ست و سۆزی نه‌ته‌وایه‌تی، به‌وپه‌ڕی ڕاستگۆییه‌وه‌ ده‌ڵێم كه‌ ئه‌مڕۆ له‌ به‌غدا و شه‌قامی عه‌ره‌بی عێراقی، كه‌ باسی سه‌ربه‌خۆیی كوردستان ده‌كرێ، نه باسی پارتی ده‌كرێ و نه باسی یه‌كێتی ده‌كرێ و نه باسی هیچ حزب و لایه‌نێكی سیاسی تر!


ته‌نانه‌ت له‌نێو سه‌ركرده‌ دیاره‌كانی نێو گۆڕه‌پانی سیاسیی كوردستانیشدا، نه‌ به‌ چاك و نه‌ به‌ خراپ باسی هیچ سه‌ركرده‌یه‌ك ناكرێ كه بووبێته‌ پرسی گه‌رمی ڕۆژ له‌ شه‌قامی عێراقیدا.


به‌درێژایی ڕۆژ و له‌ كاتی ته‌عامولی ڕۆژانه‌مدا له‌گه‌ڵ نیشته‌جێیانی ئه‌م شاره‌ (به‌غدا)، ته‌نیا گوێبیستی ناوی كه‌سێك ده‌بم كه‌ به‌ (دوژمنى یه‌كپارچه‌یی و ئه‌ندازیاری دابه‌شكردنی عێراق) وه‌سفى ده‌كه‌ن. ئه‌وان كوردستانی باشوور به‌ (شمال العراق) ده‌زانن، بێ گومان هەموو ئەمانە بە کاریگەریی میدیایەکی شۆڤینی کە خراوەتە گەڕ.


ئەمڕۆ هەمووان باسی كه‌سێك ده‌كه‌ن، كه‌ هه‌وڵی (دابه‌شكردنی عێراق) ده‌دات. له‌نێو ئه‌ندام و لایه‌نگرانی پارت و لایه‌نه‌ سیاسییه‌كانی عێراقیش، به‌ چه‌پڕه‌و و ڕاستڕه‌و و ئیسلامی و لیبرال و سه‌رجه‌م ئایدیاكانی تریشه‌وه‌، باس هه‌ر باسی ئه‌وه‌.


وه‌كوو ئه‌وان ده‌ڵێن: (ئه‌و دەیه‌وێت كه‌ركووك و خانه‌قین و مه‌نده‌لی و شه‌نگال و ناوچه‌ كوردستانییه‌كانی تر كه‌ ئه‌وان به‌ خاكی عێراق و موڵكی عێراقییان ده‌زانن، له‌ عێراق داببڕێت و بیلكێنێته‌ نه‌خشه‌ی كوردستانی باشووره‌وه‌. ئه‌وان ده‌ڵێن عێراق وڵاتێكی یه‌كپارچه‌یه‌ و كوردستان باكوورى عێراقه‌، به‌ڵام ئه‌و كه‌سه‌ دژی یه‌كگرتوویی خاكی عێراقه‌ و ده‌یه‌وێت (شیمال)ى وڵاته‌كه‌یان له عێراق جودا بكاته‌وه‌ و بیكاته ده‌وڵه‌تێكی سه‌ربه‌خۆ). ته‌نانه‌ت ئه‌وه‌نده‌ ناوی ئه‌و ئه‌هێنین، ناوی سه‌ركرده‌ سیاسییه‌كانی عێراق ناهێنن، كه‌ به‌ دوژمنی سه‌رسه‌ختی گه‌لی عێراقیان ده‌زانن و به‌رده‌وام ڕه‌خنه‌بارانیان ده‌كه‌ن. خه‌ڵكی عێراق، به‌هۆی ئه‌و بارودۆخه‌ خراپ و ناله‌باره‌ی كه‌ له‌ 14 ساڵی ڕابردوودا و به‌ ئێستاشه‌وه‌ پێیدا تێپه‌ڕ ده‌بێت، زۆر بێزارن له‌و پارت و لایه‌ن و سه‌ركرده‌ سیاسییانه‌ی كه‌ ئه‌مڕۆ له‌ به‌غدا ده‌سه‌ڵاتدارن و به‌ هۆكاری كاولبوونی عێراقیان ده‌زانن، به‌ڵام له‌پاش پرۆسه‌ی ڕیفراندۆمه‌وه‌، ئه‌وه‌نده‌ باسی ئه‌و كه‌سه‌ ده‌كه‌ن، باسی ئه‌و سه‌ركرده‌ سیاسییانه‌ی خۆشیان ناكه‌ن كه‌ هه‌میشه‌ و به‌رده‌وام جێی ڕه‌خنه‌لێگرتنی عێراقییه‌كان بوونه.


ته‌نانه‌ت له‌سه‌ر شاشه‌ی سه‌رجه‌م كه‌ناڵه‌ ئاسمانییه‌ عێراقییه‌كان، ڕادیۆكان، له‌ ڕووپه‌ڕی سه‌ره‌كیی ماڵپه‌ڕه‌ ئه‌لیكترۆنی و ئاژانسه‌ هه‌واڵده‌ره‌كان، له‌ لاپه‌ڕه‌ی یه‌كه‌می ڕۆژنامه‌ و گۆڤاره‌كان، له‌ سوشیال میدیا و ئامرازه‌كانی تری ڕاگه‌یاندیش باس هه‌ر باسی ئه‌و كه‌سه‌یه‌، كه‌ ده‌یه‌وێت كوردستان و عێراق بكاته‌ دوو دراوسێی له‌ یه‌ك جودا.


ئه‌مڕۆ له‌ به‌غدا و ناوه‌ڕاست و باشووری عێراق، ته‌نیا و ته‌نیا باس باسی (بارزانی)یه‌.


(مسعود البرزانی)، (التقسیم)، (دوله‌ كوردستان)، (العراق)، (بَرزانی)، (كردستان)، (انفصال)، (عراق موحد).. له‌گه‌ڵ ناوهێنانی بارزانی له‌ هه‌ر جێگه‌ و كۆڕ و كۆبوونه‌وه‌ و مه‌جلیسێكدا، یه‌كسه‌ر گوێت له‌م وشانه‌ ده‌بێت كه‌ به‌ له‌هجه‌یه‌كی عه‌ره‌بی قووڵ و پڕ له‌ ڕق و قینی ئاوێته‌ به‌ شۆڤێنیزمی عروبی له‌سه‌ر زاره‌كان دێنه‌ ده‌ره‌وه‌.


ئه‌و هێرشانه‌ی كه‌ ڕۆژانه‌ له‌لایه‌ن عه‌ره‌به‌ شۆڤێنییه‌كانی عێراقه‌وه‌ ده‌كرێنه‌ سه‌ر سه‌رۆكی وڵاته‌كه‌م، ئازارم ده‌ده‌ن و پێی تووڕه‌ ده‌بم. خۆ هه‌ر هیچ نه‌بێت من ناسیۆنالیستێكی كوردم. به‌ڵام كاتێك بیری لێ ده‌كه‌مه‌وه‌ و هه‌ڵوه‌سته‌ی له‌ سه‌ر ده‌كه‌م، ئه‌و پرسیاره‌م لا دروست ده‌بێت: "كه‌ بۆ چی، ته‌نیا و ته‌نیها كاك مه‌سعود ؟".


لێره‌دایه‌ كه‌ خۆشحاڵ ده‌بمه‌وه‌ و غروریش ده‌مگرێت!


چونكه‌ وه‌ڵامی ئه‌و پرسیاره‌ ئه‌وه‌یه‌ كه‌ ئیدی كورد و عه‌ره‌ب، دۆست و دوژمن، به‌غدا و تاران، ئانكارا و دیمه‌شق، ڕۆژئاوا و خۆرهه‌ڵاتی جیهان، هه‌موو ده‌زانن كه‌ ئه‌مڕۆ‌ (بارزانی) ئومێدی نه‌ته‌وه‌یه‌كه‌.


ئیدی دوژمن و نه‌یارانی گه‌لی كوردستانیش ئه‌و ڕاستیه‌ ده‌زانن، كه‌ هه‌روه‌ك چۆن (جۆرج واشنگتۆن) باوكى سه‌ربه‌خۆیی ئه‌مه‌ریكا بوو، ئه‌مڕۆ (بارزانی) باوكی سه‌ربه‌خۆیی كوردستانه‌ و خەلکی کوردستانیش بە زۆرینەی حزب و لایەنە سیاسییەکانەوە، لەم هەنگاوەدا پشتیوانی سەرۆک بوون. هه‌رچه‌ند من پێم وایه‌ كه‌ (بارزانی) له‌ (جۆرج واشنگتۆن)یش زیاتر له‌پێناو سه‌ربه‌خۆیی وڵاته‌كه‌یدا ماندوو بووه‌ و تێكۆشاوه‌، چونكه‌ (واشنگتۆن) بۆ سه‌ربه‌خۆیی ئه‌مه‌ریكا ته‌نیا كێشه‌ی ناوخۆیی هه‌بوو، به‌ڵام بارزانی كێشه‌یه‌كی گه‌وره‌ی جوگرافی و سه‌لماندنی ناسنامه‌ی كوردستانی و گه‌ڕاندنه‌وه‌ی كه‌ركووك و ناوچه‌ كوردستانییەكانی تری ده‌ره‌وه‌ی ئیداره‌ی هه‌رێمیشی هه‌بوو. ئه‌و ئه‌ركێكی قورسی تریشی له‌سه‌ر شان بوو. ئه‌وه‌ش به‌دیهێنانی یه‌كڕیزی و یه‌كگرتوویی نێو ماڵی كوردی و پارت و لایه‌نه‌ سیاسییه‌كانی كوردستان بوو له‌پێناو سه‌رخستنی پرۆسه‌ی ڕیفراندۆم. له‌لایه‌كی تریشه‌وه‌، وه‌ستان و كۆڵنه‌دان له‌به‌رامبه‌ر هه‌ڕه‌شه‌كانی داگیركه‌ران و فشاره‌ نێوده‌وڵه‌تییه‌كان. سه‌ره‌ڕای هه‌موو ئه‌وانه‌ش ئه‌ركی سه‌رۆكایه‌تیی كوردستانی له‌م قۆناغه‌ سه‌خت و دژواره‌دا له‌ ئه‌ستۆدا بوو. به‌تایبه‌تیش فه‌رمانده‌ییكردنی جه‌نگی دژی داعش و په‌نادانی زیاتر له‌ دوو ملیۆن ئاواره‌ و پاراستنی ئه‌زموونی پێكه‌وه‌ژیانی ئاشتییانه‌ی نێوان سه‌رجه‌م پێكهاته‌كانی كوردستان له‌ ناوچه‌یه‌كدا، كه‌ به‌ خوێن و ئاگر و شه‌ڕ و ئاژاوه‌ ده‌وره‌ دراوه‌. بارزانی سه‌ره‌ڕای هه‌موو ئه‌وانه‌ش، له‌ سه‌ختترین و هه‌ستیارترین قۆناغدا، كوردستانی به‌ره‌و سه‌ربه‌خۆیی و كه‌ناری ئارامی سه‌ركردایه‌تیی كرد و به‌ردی بناغه‌ی سه‌ربه‌خۆیی كوردستانی دانا. هه‌ر بۆیه‌شه‌ ئه‌مڕۆ نه‌ك ته‌نیا له‌ به‌غدا، به‌ڵكوو له‌ ناوچه‌كه‌ و هه‌موو جیهانیش باس باسی بارزانی و ده‌وڵه‌تی سه‌ربه‌خۆی كوردستانه‌. هه‌ڵبه‌ته‌ لێره‌دا مه‌به‌ست ته‌نیا خودی شه‌خسی بارزانی نییه‌، به‌ڵكوو بارزانی وه‌كوو ڕابه‌رێكی كاریزمی و سیمبولی ئازادی و سه‌ربه‌خۆییخوازی گه‌لی كوردستانه‌.