لە یادی ٧١ ساڵەی دامەزراندنی پارتی دیموکراتی کوردستان، خوێندنەوەیەک بۆ ئەمرۆ و داهاتوو..

 

 

 

لە ١٦ ئابی ١٩٤٦ و بە فەرمانی مصطفی بارزانی نەمر، بریاری دامەزراندنی پارتێکی سیاسی بۆ ڕێکخستن و ئاراستە و سەرپەرشتی کردنی خەباتی ڕزگاری خوازی کوردستان دامەزرا. پارتی دیموکراتی کورد کە دواتر بە پارتی دموکراتی کوردستان ناسرا، لە سەرەتای دامەزراندنیەوە تا ئەمڕۆ ڕۆڵێکی گەورە و کاری گەری لە سەرکردایەتی کردنی شۆرشەکانی کوردستان هەبوەو دوو شوڕشی گەورەی ئەیلول و گوڵان و ڕاپەڕین و دامەزراندی پەرلەمان و حکومەتی هەرێم و پارێزگاری کردن لە خاک و نیشتیمان لە سەروەریەکانی ئەو پارتە سیاسیە دان، ئەمە جگە لە دەریایەک قوربانی و خوێنی هەزاران شەهید کە لەم ڕێبازەدا گیانی خۆیان بەخشیوەتە گەل و نیشتیمان. نوسین لەسەر مێژووی پارتی لە چەند دێرێک و لە بابەتێکدا ناتواندڕێت حقی تەواوی خۆی پێ بدات، هەر بۆیە من دەمەوێت باسی ئەو گۆڕانکاریە گەورەیە بکەم  کە بەسەر پارتی داهاتوا لە سالانی رابردوو و ئەوەش هۆکاری گەورەی بە هێزی و ئامادەی پارتیە بۆ داهاتوو و بونیات نانی دەوڵەتی کوردستان.

لە شۆڕشی مەزنی ئەیلول پارتی داواکاریەکانی بۆ ئەو سەردەمەی خەبات دیار بوون و لە ڕێکەوتن نامەی ١١ی ئازار بەرجەستە بوون. لەگەڵ نسکۆ، پارتی ئامادەی شۆڕش بوو وە بۆ خەباتی چەکداری  لە شوڕشی گولانی پێشکەوتوخواز دەرکەوت. لەگەڵ گۆڕانکاری سیاسی ناوچەکە لە سالانی سەرەتای ٩٠تەکان بۆ راپەڕین و ڕزگار کردنی خاکی کوردستان رۆلی گەورەی بینی. بۆ قۆنا‌غی شار و دوای ڕاپەڕین لە هەلبژاردنی پەرلەمان و دامەزراندنی حکومەتی هەرێم و ڕاگەیاندنی فیدرالیەت پارتی وەک پارتی پێشەوا ڕۆڵی سەرەکی بینی. لە پرۆسەی ئازادی عێراق و نوسینەوەی دەستوری نۆی عێراق، پارتی و سەرۆک مسعود بارزانی ڕۆڵی سەرەکیان هەبوو.  واتا پارتی دیموکراتی کوردستان لەسەرجەم قۆناغەکان وەکو پارتێکی سیاسی و لەسەر ئەو بنەمایانەی کە پێی دامازرابوو هەمیشە ئامادە بوە بە بینینی ڕۆڵی خۆی و ئامرازێکی سەرکەوتووی بەدی هاتنی دەستکەوتەکانی گەلەلی کوردستان بوە.

پارتی دیموکراتی کوردستان توانی لەگەل سەرجەم قۆناغەکان و پێشهاتەکان سیاسەتی خۆی لە چوارچێوەی ستراتیجیەتی دەوڵەتی کوردستان بگونجێنێت و بگرە بە شێوازی سەردەمیانە ئاراستەی بکات. پرسیاری گرنگ لێرەدا ئەوەیە هۆکاری سەرکەوتنەکانی پارتی چی بووە؟ ئەم پرسیارە زۆر وڵام هەڵدەگرێت، بەڵام بە دیدی من گرینگترین هۆکار ئەوەیە کە پارتی سەرەتا توانی سەربەخۆی بۆ خۆی دەستەبەر بکات و لە پارتێکی سیاسیەوە بگۆڕێت بۆ دەوڵەتێک، پارتی لە ئێستا و چەند ساڵیکە  دەوڵەتێکی سەربەخۆیە و کار بۆ دامەزراندنی دەوڵەتی کوردستان دەکات.

سەربەخۆیی پارتی لە سەرەتاوە لەوەدا دەرکەوت، کە سیاسەتی پارتی و سەرۆک بارزانی ژێر دەستەی سیاسەت و بەرژەوەندی هیچ دەوڵەتێکی ئیقلیمی و ناوچەکە نیە، بگرە پەیوەندیەکانی لەسەر بنەمای بەرژەوەندی هاوبەشی گەلی کوردستان و وڵاتانی دراوسیە. سیاسەتی دیموکراسیانە و پێکەوە ژیانی برایانە سەرنجی جیهانی بەڕوی پارتی و لە ڕێگای پارتیەوە بۆ کوردستان کردەوە، پەیوەندیە دیپلوماسیەکان بە شێوەیەکی فراوان گەشەی کرد و دواجار جیهان ئاشنای سەرۆک بارزانی و کوردستان بوون و بە مرۆڤ دۆست و دیموکرات خواز ماماڵەیان لەگەڵ کردین.

پارتی و سەرۆک بارزانی باش دەیان زانی دڵداری کردن لەگەڵ سۆزی نێودەوڵەتی جیاوازە لە سیاسەتی وڵاتان و بەرژەوەندیەکان، هەربۆیە گەورەترین هەنگاوی پارتی لە ڕیگای حکومەتی هەرێمە چونە نێو بازاری نەوت و وزەی نێودەوڵەتی بوو وە ئەوە وای کرد جارێکی تر وڵاتانی جیهان لە چوارچیوەی بەرژەوەندی خۆیان و هاوبەش مامەڵە لەگەڵ کوردستان و حکومەتەکەی بکەن.

سەربەخۆیی پارتی ئەو زەمینەی بۆ رەخساند ، کە لە پێناو بەرژەوەندی کوردستان بتوانێت خۆی پەیوەستی هیچ دەوڵەت و گروپ و لایەنێک نەکات و نەچێتە ناو کایە سیاسیەکانی شیعەو سونە لە عێراق و ناوچەکەدا. سەرۆک بارزانی و پارتی ئەمڕۆ بە شیوەیەک شارەزای دیپلۆماسیەتی دەولی بوون، کە دەتوانن لەگەڵ زل هێزاکانی جیهان دانوستاندن بکەن و کە پێویستیش بێت داواکاریەکانیان رەت بکەنەوە. لەوانەیە کەس باوەڕی ئەوەی نەبوبێت کە هیچ پارتێکی کوردستان بتوانێت داواکاری ئەمریکا رەت بکاتەوە، بەڵام بارزانی و پارتی هەرداواکاریەکی لە بەرژەوەند گەلی کوردستان نەبوبێت بە شێوەیەکی دیپلۆماسیانەی دروست و بە ڕێگای دروست کردنی قەناعەت وڵامی داواکاریەکەیان داوەتەوە، و نمونەش لە دامەزراندنی فیدرالیەتی پارێزگاکان لە عێراق و لە ئیستاشدا داواکاری دواخستنی گشت پرسی بۆ سەربەخۆی کوردستان.

سەرکەوتنەکانی پێشمەرگە لە شەڕی دژی داعش بە سەرکردایەتی بارزانی و حەواندنەوەی ئەم ژمارەیە زۆرە لە ئاوارە و چۆک دانەنواندن لە بەرامبەر ئەو ‌غەدرانەی بغداد بەرامبەر کورد دەیکات و پێداگری لەسەر ڕیفراندۆم و سەربەخۆی کوردستان بەرهەمی ئەو بنەمایانەیە کە پارتی دیموکراتی کوردستان لە ساڵی ١٩٤٦ لەسەری دامەزراوە.

ئەمڕۆ کە گەلی کوردستان بەرەو ریفراندۆم  دەڕوات و لە ٢٥ ئەیلول، بریار لە دامەزراندی دەوڵەتی کوردستان دەدرێت، ئەرکی پارتی قورستر و گەورەتر دەبێت لە بەدی هێنانی داواکاری خەڵکی کوردستان و پاراستنی دەستکەوتەکان. لە ئێستادا پارتی دەبێت زەمینەی ئاشتەوایی نیشتیمانی برەخسێنێت و سەرجەم پارت و لایەنەکانی تری کوردستان لە دەوری پرۆژەی نیشتیمانی ڕیفراندۆم کۆ بکاتەوە. دەبێت سەرۆک بارزانی و پارتی کاری زیاتر بکەن بۆ دڵنیا کردنەوەی خەڵکی کوردستان لە داهاتوو و چۆنیەتی دامەزراندنی دەوڵەتی کوردی.

پارتی دیموکراتی کوردستان چۆن لە سەرەتای دامەزراندنیەوە لە سالی ١٩٤٦ وە ئامرازێکی سەرکەوتوی بەدی هاتنی دەستکەوتەکان بوە، بۆ داهاتوش گرینگترین ئامراز دەبێت بۆ بەدی هێنانی ئاواتەکانی گەلەکەمان و دامەزراندی دەوڵەتی کوردستان و پاراستنی دەستکەوتەکان.

لە کۆتایدا یادی ٧١ ساڵەی دامەزراندنی پارتی دیموکراتی کوردستان، لە خانەوادەی سەربەرزی شەهیدان و پێشمەرگە تێکۆشەرەکانی کوردستان و سەرجەم گەلی کوردستان پیرۆز دەکەم و سەری ڕێزو نەوازش بۆ سەرجەم شەهیدانی کوردستان دادەنەوێنم و هیوای خۆشگوزەرانی و ئاسودەیی لە سایەی دەوڵەتی کوردستان بۆ خەڵکی کوردستان دەخوازم.