كورده‌ ده‌ردى و دیموكراسى - 1​​

عه‌بدولڕه‌حمان كاكل

 

به‌ر له‌ هه‌شت ساڵ، له‌ رۆژنامه‌ى (خه‌بات)دا بابه‌تێكم بڵاو كرده‌وه‌، ناوه‌ڕۆكه‌كه‌ى ئه‌وه‌ بوو كه‌ هێشتا بۆ ئۆپۆزسیۆن بوون له‌ كوردستان زووه‌. له‌به‌ر نه‌بوونى پێشینه‌ى دیموكراسی، كولتوورى ئۆپۆزسیۆن له‌م ناوچه‌یه‌دا كولتوورێكى توندوتیژه‌ و واى كردووه‌ ئۆپۆزسیۆن ته‌نیا به‌ رێگه‌ى شۆڕشى چه‌كدارى و كاركردن بۆ رووخاندنى ده‌سه‌ڵات، خۆى بسه‌لمێنێ. له‌ شوێنێكى وه‌ك كوردستانیشدا ئه‌م مه‌سه‌له‌یه‌ زۆرتر له‌ هه‌موو شوێنێك زه‌ق بووه‌ته‌وه‌، له‌به‌ر ئه‌وه‌ى وڵاتى ئێمه‌ داگیر كراوه‌ و ده‌سه‌ڵاته‌كانیشى به‌داخه‌وه‌ هه‌موویان دیكتاتۆر بوون و به‌ هیچ شێوه‌یه‌ك رێگه‌یان نه‌داوه‌ حزبی سیاسى له‌ چوارچێوه‌ى ده‌وڵه‌تدا كارى خۆى بكات و له‌ده‌ره‌وه‌ى ده‌سه‌ڵات موماره‌سه‌ى ئۆپۆزسیۆنبوونى خۆى به‌ رێگه‌ى مه‌ده‌نیدا بكات، ئه‌مه‌ش واى كردووه‌ كه‌ حزبه‌ كوردستانى و عێراقییه‌كانیش رێگه‌ى شۆڕش و به‌ره‌نگاریى چه‌كداری بگرنه‌ به‌ر و كار بۆ سڕینه‌وه‌ و رووخاندنى یه‌كتر بكه‌ن. له‌ وڵاتێكدا كه‌ ساڵه‌هایه‌ ئه‌مه‌ كولتووره‌كه‌ى بێت، ئێستا ئاسان نییه‌ به‌ بڕیارێك، یاخود به‌ پێنج و دوو رۆژێك ئه‌و كه‌شوهه‌وا سیاسییه‌ بڕه‌خسێنرێت كه‌ له‌ رۆژاوادا هه‌یه‌، یان تا ئه‌وه‌ى له‌ هه‌ندێك وڵاتى ناوچه‌كه‌شدا هه‌یه‌، ئێمه‌ كه‌ مێژووێكى دوورودرێژى سیاسییمان له‌گه‌ڵ رووبه‌ڕووبوونه‌وه‌ى گه‌رم و شۆڕشى چه‌كدارى و یه‌كتر سڕینه‌وه‌دا هه‌یه‌، كه‌ كولتوورێكى دێرینمان له‌ یه‌كتر قبووڵنه‌كردن و دابه‌شبوون و په‌رته‌وازه‌ییدا هه‌یه‌، كه‌ سایه‌یه‌كمان بۆ پاراستن له‌ داگیركردنه‌وه‌ و له‌ده‌ستنه‌دانى ئه‌و ئازادییه‌ (كاتی)یه‌دا نییه‌، جارێ چ هه‌ڵپه‌ی ئۆپۆزسیۆن و ململانێی نێوان ده‌سه‌ڵات و ده‌ره‌وه‌ى ده‌سه‌ڵاتمانه‌؟ راستییه‌كه‌ ئه‌وه‌یه‌ كه‌ ده‌بێت هه‌موومان ده‌سه‌ڵات بین، ده‌سه‌ڵاته‌كه‌ خۆى هێشتا پێویستى به‌ ده‌سه‌ڵاتێك هه‌یه‌ تا له‌ناو نه‌چێت، خۆى به‌هۆى شه‌ڕى ناوخۆوه‌ دووله‌ت بووه‌ و به‌ پینه‌وپه‌ڕۆ لێك دراوه‌ته‌وه‌، له‌م سه‌رده‌مه‌دا ئه‌م ده‌سه‌ڵاته‌ى كوردستان پێویستى به‌ هه‌ر شتێك هه‌بێت به‌ ئۆپۆزسیۆن نییه‌. چه‌ندین ساڵ بوو كار بۆ سڕینه‌وه‌ى له‌تبوونه‌كانى شه‌ڕى ناوخۆ كرا، ئه‌م پرۆسه‌یه‌ هێشتا به‌باشى به‌ ئامانجى خۆى نه‌گه‌یشتووه‌، له‌ژێر ناوى ئۆپۆزسیۆنه‌وه‌ دیسان دابه‌شبوونه‌وه‌ ده‌ستى پێكرد، به‌داخه‌وه‌ له‌ماوه‌ى ئه‌م چه‌ند ساڵه‌ى رابردوودا هه‌موومان به‌رهه‌مى ئه‌م جۆره‌ ئۆپۆزسیۆنه‌مان بینى، له‌ دروستكردنى درز و كه‌له‌به‌ر و پاشخستنى پرسه‌ نیشتمانى و نه‌ته‌وه‌ییه‌كان و لاوازكردنى پێگه‌ى كورد له‌به‌رامبه‌ر جیهان و به‌غدا و گرووپه‌ تیرۆریستییه‌كان و دروستكردنى ترس و دڵه‌ڕاوكێی كۆمه‌ڵایه‌تى و په‌رته‌وازه‌بوونى هێزى سیاسى و دپلۆماتى و به‌گژیه‌كداچوونى جه‌ماوه‌ری و قه‌یرانى جۆراوجۆر و لاوازكردنى ئیداره‌ى حكوومه‌ت و په‌كخستنى په‌رله‌مان و كۆمه‌ڵێك پرسى دیكه‌ى نه‌رێنیى لێ كه‌وته‌وه‌.


هیچ كه‌س نییه‌ داواى سیستمێكى دیموكراسی بكات و ره‌فزى بوونى ئۆپۆزسیۆن بكات، ئه‌وه‌ زنجیره‌یه‌كه‌ و نابێت هیچ ئه‌ڵقه‌یه‌كى تێدا پچرابێت، هیوادارم كه‌س هه‌وڵ نه‌دات ئه‌م بابه‌ته‌ وه‌ها لێكبداته‌وه‌، به‌ڵام دۆخى ئێمه‌ى كوردستانیش وه‌ك هى كه‌س نییه‌، كاتێك ده‌وڵه‌ت و سیاده‌ نه‌بوو، چۆن ده‌كرێ باس له‌و دیموكراسیه‌ته‌ بكرێت كه‌ له‌ وڵاتێكى خاوه‌ن سیاده‌دا هه‌یه‌، كوا ئه‌و بنه‌ما كۆنكرێتییه‌ى كه‌ دیموكراسییه‌ت پێویستیه‌تى؟ له‌ چ كایه‌یه‌كى ژیانى ئێمه‌دا دیموكراسی بووه‌ به‌ كولتوور و نه‌ریت؟ چه‌ندمان وه‌ك خۆى له‌ دیموكراسییه‌ت گه‌یشتووین؟ ده‌نگدان خۆى پرۆسه‌یه‌كى دیموكراسییه‌، به‌ڵام كێ له‌ ئێمه‌ دیموكراسییانه‌ ده‌نگ ده‌دات؟ كێشه‌ هه‌ره‌ سه‌ره‌تاكانى ئێمه‌ له‌ كرداره‌ هه‌ره‌ سه‌رتاییه‌كانمانه‌وه‌ ده‌ست پێده‌كه‌ن، ئێمه‌ چونكه‌ كراوین به‌ كۆمه‌ڵگه‌یه‌كى مشه‌خۆر، دیموكراسیه‌تیشمان وه‌ك زۆر له‌ شته‌كانى دیكه‌ى كه‌ له‌ رۆژاواوه‌ بۆمان دێن هه‌ر به‌ مشه‌خۆرى وه‌رگرتووه‌، زۆربه‌ى ئه‌و شتانه‌ى كه‌ له‌ رۆژاواوه‌ بۆمان دێن نازانین وه‌ك خۆیان به‌كاریان بێنین، تا ئێستا ئه‌و ته‌كنۆلۆژیایه‌ى له‌به‌رده‌ستمانه‌، ئه‌وه‌نده‌ى زیانى لێ ده‌كه‌ین سوودى لێ وه‌رناگرین، دیموكراسییه‌ته‌كه‌شمان به‌ وه‌ها شێوازێك پێگه‌یشتووه‌، كه‌ به‌داخه‌وه‌ وه‌ك پێویست سوودمان لێى نه‌بینیوه‌ و هه‌ندێ جار زیانیشى پێ گه‌یاندووین. كام حزب له‌نێو خودى حزبه‌كه‌یدا ئه‌م دیموكراسییه‌ میسالییه‌یه‌ كه‌ بۆ هه‌رێمى داوا ده‌كات؟ كه‌چى هه‌ر ئه‌وانه‌ به‌رده‌وام له‌ كه‌ناڵه‌كانى راگه‌یاندنه‌وه‌ بانگه‌شه‌ بۆ دیكتاتۆرییه‌تى ئه‌م و ئه‌و ده‌كه‌ن. به‌داخه‌وه‌ هه‌ندێك له‌ سیاسى و رۆشنبیر و نووسه‌رانیشمان دیموكراسییه‌تیان ئه‌وه‌نده‌ ئاسان كردووه‌ و وایان لێ كردووه‌ لاى زۆربه‌ى خه‌ڵك له‌ هه‌ندێك شتى رواڵه‌تى زیاتر شتێكى دیكه‌ نییه‌، لاى هه‌ندێكیش ته‌نیا چه‌ند ده‌قێكى نووسراوه‌ و ته‌واو، راستییه‌كه‌ى له‌م كورته‌ بابه‌ته‌دا نه‌ جێگه‌ى باسكردنى دیموكراسى ده‌بێته‌وه‌، كه‌ هه‌زاران كتێبى له‌باره‌وه‌ نووسراوه‌، نه‌ منیش ده‌ره‌قه‌تى وه‌ها بابه‌تێك دێم، ته‌نیا ده‌ڵێم دیموكراسییه‌ت چه‌ند ده‌قێكى نووسراوى بێ زیاد و كه‌م نییه‌ و جۆر و شێواز و نماییش و جێبه‌جێكردنى جیاوازیشى هه‌یه‌ و هه‌ر وڵات و رژێمێكیش به‌و شێوازه‌ى له‌ به‌رژه‌وه‌ندیى خۆى ده‌زانێت، جێبه‌جێی ده‌كات. بۆ نموونه‌: توركیا ده‌ڵێت ئێمه‌ وڵاتێكى دیموكراسین، له‌ته‌نیشتیه‌وه‌ ئێران و سووریا و ئیسرائیلیش هه‌مان شت ده‌ڵێن، له‌مبه‌ریشه‌وه‌ فه‌ره‌نسا و ئه‌مه‌ریكا و به‌ریتانیا و ئه‌ڵمانیاش، به‌ڵام ئایه‌ ئه‌م وڵاتانه‌ وه‌كو یه‌كن؟ كه‌ هه‌مووشیان ده‌ڵێن دیموكراسین له‌م سۆنگه‌یه‌وه‌ ئایه‌ بۆمان هه‌یه‌ بڵێین دیموكراسى بووه‌ به‌ له‌یستۆك و هه‌ر كه‌س بیه‌وێت یاریى خۆى پێ ده‌كات؟


ئێمه‌ ئه‌گه‌ر له‌ تابلۆیه‌كى وه‌ها بچووكدا دیموكراسیمان قه‌تیس كرد له‌ (سیاسه‌ت و به‌ڕێوه‌بردن)، ئه‌وه‌ زوڵمێكى گه‌وره‌ له‌م هه‌موو بیرمه‌نده‌ گه‌ورانه‌ ده‌كه‌ین كه‌ ساڵانى ته‌مه‌نیان بۆ بیردۆزه‌كردن و پراكتیزه‌كردنى ئه‌م جه‌نابه‌ خه‌رج كردووه‌، ئه‌وان وه‌ك ئه‌م باوكه‌یان لێ هات كه‌ ته‌مه‌نى خۆى بۆ منداڵه‌كانى كۆ ده‌كاته‌وه‌ و دواى خۆى ئه‌وان هه‌ریه‌كه‌و به‌ شێوازێك میراته‌كه‌ى ته‌سه‌روف پێ ده‌كه‌ن، هه‌یه‌ خێر و چاكه‌ى پێ ده‌كات و هه‌یشه‌ خراپه‌ و هه‌یشه‌ هه‌ردووكیان... دیموكراسییه‌ت پرۆسه‌یه‌كه‌ په‌یوه‌سته‌ به‌ ژیانه‌وه‌، په‌یوه‌سته‌ به‌ زیندوێتییه‌وه‌، ئامانجه‌كه‌ كۆكردنه‌وه‌ى (ماف)ه‌، ئه‌و مافانه‌ چۆن و به‌ چ شێوازێك ده‌سته‌به‌ر ده‌بن؟ لێره‌وه‌ كێشه‌كه‌، یاخود راستتر بڵێین جۆر و شێوازه‌كه‌ى ده‌گۆڕێت و هه‌مه‌ته‌رز ده‌بێت، چونكه‌ له‌ هه‌ر وڵاتێك و هه‌ر كۆمه‌ڵگه‌یه‌كدا ده‌سته‌به‌ركردنى مافه‌كان جیاوازن، برسی داواى نان ده‌كات، نه‌ك كه‌ره‌سته‌ى جوانكاری، كاتێك ئه‌منییه‌تت نییه‌ و ژیانت له‌ مه‌ترسیدایه‌، باس له‌ خانوو و ئۆتۆمبێل ناكه‌یت، داواى پاراستنى ژیانت ده‌كه‌یت، كه‌ نه‌خۆشى، داواى پزیشك و ده‌رمان ده‌كه‌یت نه‌ك ته‌له‌ڤزیۆن و كۆمپیوته‌ر، كه‌ ئه‌وله‌وییه‌ت دابین بوو، دواتر داواكاریی دیكه‌ت ده‌ست پێده‌كات. له‌ هه‌ر كۆمه‌ڵگه‌یه‌كدا، جۆره‌ها كێشه‌ و پێداویستى هه‌ن، مرۆڤه‌كان له‌ سۆنگه‌ى ئه‌و كێشه‌ و پێداویستییانه‌وه‌ داواكانیان ده‌خه‌نه‌ روو، ده‌سه‌ڵاته‌كانیش هه‌وڵ ده‌ده‌ن سیستمى به‌ڕێوه‌بردنى سیاسى و ئیداریى وڵاته‌كه‌یان له‌سه‌ر چاره‌سه‌ركردن و به‌ده‌نگه‌وه‌هاتنى ئه‌م كێشه‌ و پێداویستییانه‌ وێنا بكه‌ن، كه‌واته‌ دیموكراسییه‌ت هه‌ر قسه‌ى پڕ به‌ده‌م نییه‌، دیموكراسییه‌ت له‌یستۆك و چه‌له‌حانێ نییه‌، په‌یڕه‌وكردنى دیموكراسیی كارى بێ هێز و بێ ده‌سه‌ڵات و نه‌بووه‌كان نییه‌، دیموكراسییه‌ت پرۆسه‌یه‌كى دوورودرێژه‌ و له‌ پێداویستییه‌كانى ژیاندایه‌. دیموكراسیی به‌ر له‌ هه‌موو شتێك مافه‌، من وه‌ك مرۆڤێك له‌ كۆمه‌ڵگا مافه‌كانى خۆم ده‌وێت، كارى من نییه‌ وه‌ك تاك خول بۆ فێركردنى ده‌وڵه‌ت بكه‌مه‌وه‌، كارى من ئه‌وه‌یه‌ داواى ماف بكه‌م، كاتێك ده‌وڵه‌ت مافه‌كانى پێ دام، ئه‌وه‌ به‌شێكه‌ له‌ دیموكراسی بۆ من، كاتێكیش مافه‌كانى لێ زه‌وت كردم، ئه‌وه‌ نادیموكراسییه‌ته‌كه‌یه‌، جا ناوى چى لێ ده‌نرێت با بنرێت، ئه‌وكات ئه‌ركى منیش ئه‌وه‌یه‌ به‌رامبه‌ر به‌م ناعه‌داله‌تییه‌ بوه‌ستمه‌وه‌ و به‌رده‌وام داواى ماف بكه‌م.


سه‌باره‌ت به‌ دیموكراسییه‌ته‌ كورده‌وارییه‌كه‌ى خۆمان، ئێمه‌ هێشتا نازانین تاریفێك به‌ دروستى بۆ خۆمان بكه‌ین، چونكه‌ لێمان وه‌رناگیرێت، واته‌ له‌ هیچ لیستێكى نێوده‌وڵه‌تیدا تاریفێكى فه‌رمیمان نییه‌، ئێمه‌ شوناسمان دیار نییه‌ و هێشتا به‌دواى شوناسدا ده‌گه‌ڕێین، هێشتا نازانین له‌ چ قۆناغێكى سیاسى و كۆمه‌ڵایه‌تیى ئه‌م جیهانه‌داین، شتێكمان نییه‌ كه‌ باوكى هه‌موو شه‌رعییه‌ته‌ نێوده‌وڵه‌تییه‌كانه‌، ئه‌ویش كیانى سیاسییه‌ (ده‌وڵه‌ت)، له‌ هه‌ر ئان و ساتێكدا بیانه‌وێت خانووه‌كه‌مان به‌سه‌ردا ده‌ڕووخێنن و كه‌سیش نقه‌ ناكات، هه‌روه‌كو چه‌ندین جاریش به‌سه‌رماندا هاتووه‌، واته‌ ئێمه‌ هێشتا له‌ قۆناغێكى راگوزه‌ریى مه‌ترسیدارداین، هێشتا له‌ قۆناغى داننان به‌ شوناسى نه‌ته‌وه‌یی و تاپۆكۆدنى خاكداین، هێشتا له‌ شۆڕشداین بۆ رزگاربوون، كۆمه‌ڵێ هه‌نگاوى زۆر گرنگی پێكه‌وه‌ییمان به‌ هه‌موو ره‌نگ و جۆر و بیركردنه‌وه‌ و ئایدۆلۆژیاوه‌ ماوه‌، بۆ ئه‌وه‌ى له‌ مه‌ترسیی له‌ناوچوون رزگار بین، واته‌ دابینكردنى چه‌ترى ( بوونمان) قۆناغى دواى رزگاربوون له‌ مه‌ترسى له‌ناوچوون، داواكاریى دیكه‌ى به‌دوادا دێت، یه‌كێك له‌وانه‌ مه‌سه‌له‌ى دیموكراسی و ئۆپۆزسیۆن و ئه‌م جۆره‌ بابه‌تانه‌یه‌ كه‌ ئه‌وكات ده‌كرێت هه‌موو لایه‌ك له‌ كه‌شێكى ئه‌منی و كۆمه‌ڵایه‌تى و سیاسیى له‌باردا وێنا و جێبه‌جێی بكه‌ین. دیموكراسییه‌تێك كه‌ وه‌ك ده‌ڵێن پێوه‌ره‌كه‌ى له‌ كوالێتى كۆنتڕۆڵى ناوخۆیی و ستاندارده‌ جیهانییه‌كه‌ش ئۆكه‌ى پێ بدرێت. له‌وانه‌یه‌ هه‌بێت بڵێت: كه‌واته‌ تا نه‌بین به‌ ده‌وڵه‌ت نابێت داواى هیچ بكه‌ین؟ پرسیارێكى به‌جێیه‌، وه‌ڵامه‌كه‌شى پێشتر هه‌یه‌، مرۆڤ چى نه‌بێت داواى ئه‌وه‌ ده‌كات، ئێمه‌ ده‌وڵه‌تمان نییه‌، داواى ده‌وڵه‌ت ده‌كه‌ین، كه‌ ده‌وڵه‌تیشمان بوو داواى سیستمێكى دیموكراسى بۆ ئه‌و ده‌وڵه‌ته‌ ده‌كه‌ین، ئه‌وه‌نده‌ى بیستوومه‌ و خوێندبێتمه‌وه‌، نه‌مزانیوه‌ كه‌س به‌ دیموكراسییه‌ت ده‌وڵه‌تى دروست كردبێت، نه‌ته‌وه‌یه‌ك به‌ دیموكراسییه‌ت له‌ داگیركه‌ر رزگاری بووبێت. دیموكراسییه‌ت هه‌میشه‌ قۆناغى دواى ئه‌مانه‌ بووه‌.


دواى ئه‌وه‌ى رژێمى به‌عس ئیداره‌ى خۆى له‌ژێر فشارى خه‌ڵكى كوردستان و هێزى هاوپه‌یمانان له‌ به‌شێكى كوردستان كشانده‌وه‌ ئه‌ودیو هێڵى 36 به‌ سلێمانییشه‌وه‌، حزبه‌ سیاسییه‌كانى كوردستان هه‌موویان وه‌هایان پێ باش بوو كه‌ بۆ به‌ڕێوه‌بردنى ئه‌م سێ پارێزگایه‌ى كوردستان ئیداره‌یه‌ك دروست بكه‌ن بۆ ئه‌وه‌ى: بۆشایی ئیداری له‌ به‌ڕێوه‌بردنى ژیانى رۆژنه‌ى خه‌ڵك دروست نه‌بێت، كێشه‌ له‌نێوان حزبه‌كاندا چێ نه‌بێ، ئه‌وكات هه‌ر حزبێك هێزى چه‌كداری خۆى هه‌بوو، بۆ ئه‌وه‌ى به‌جیهانیش بڵێت كه‌ خه‌ڵكى كوردستان حه‌زی له‌ ده‌سه‌ڵاتێكى ئاشتیخوازه‌ و له‌ رێگه‌ى هه‌ڵبژاردنه‌وه‌ ده‌یه‌وێت ئیداره‌یه‌ك بۆ خۆى دروست بكات، رێكخراوه‌ مرۆڤدۆسته‌كان و تا وڵاتانیش دروستتر بتوانن هاوكاریمان بكه‌ن له‌م كێشه‌یه‌ى تێی كه‌وتووین، هه‌وڵه‌كه‌ خۆشبه‌ختانه‌ سه‌ركه‌وتوو بوو، خه‌ڵك و حزبه‌كانیش ئه‌م راستییه‌یان قبووڵ كرد، كه‌ ده‌یانه‌وێت داهاتووى ئه‌م وڵاته‌ به‌ پرۆسه‌یه‌كى دیموكراسى به‌ڕێوه‌ بچێت، ئه‌م ئیداره‌ ناوخۆییه‌ واى كرد خه‌ڵك به‌ هه‌ر جۆرێك بوو له‌ هه‌ندێك قه‌یران ده‌رباز بكرێت، هه‌رچه‌نده‌ به‌داخه‌وه‌ زۆرى نه‌برد ئه‌وه‌ى لێی ده‌ترساین قه‌وما، شه‌ڕێكى خۆكوژی له‌نێوان لایه‌نه‌كان دروست بوو، خه‌ڵك و دۆزه‌كه‌ش باجى ئه‌م شه‌ڕه‌ى دا، به‌ڵام دیسان به‌ هه‌وڵى چاكه‌خوازانى ناوخۆ و ده‌ره‌وه‌ (شه‌ڕه‌كه‌) تێپه‌ڕێنرا، به‌ڵام ئاسه‌واره‌كه‌ى هه‌ر به‌رده‌وامه‌. حه‌ز ده‌كه‌م هه‌ر له‌باره‌ى ناته‌بایی و شه‌ڕى خۆبه‌خۆى حزبه‌كان بیرهێنانه‌وه‌یه‌ك كه‌ به‌سه‌ر خۆمدا هاتووه‌ باسى بكه‌م، ساڵى 1984 له‌گه‌ڵ دوو براده‌رى دیكه‌ ویستمان ببین به‌ پێشمه‌رگه‌، به‌ڵام ویستمان چالاكییه‌ك بكه‌ین پاشان بڕۆین، به‌هه‌ر حاڵ درێژى ناكه‌مه‌وه‌، تێیدا سه‌ركه‌وتوو نه‌بووین و ده‌ستگیر كراین، ئیتر دواى ماوه‌یه‌ك له‌ ده‌ستبه‌سه‌ربوون و به‌زم و ره‌زمى ئه‌من، به‌ڕێوبه‌رى بنكه‌ى ئه‌منه‌كه‌ پله‌كه‌ى رائید بوو، له‌ كاتى ئازادبووندا، نیو سه‌عاتێك له‌گه‌ڵم دانیشت و یه‌كێك له‌ قسه‌كانى ئه‌وه‌بوو و پێی گوتم ئێستا ئازادت ده‌كه‌ین، تۆ هه‌رزه‌كاى و له‌ سیاسه‌ت تێناگه‌ى، ئه‌وانه‌ى تۆ كاریان بۆ ده‌كه‌ى له‌م شاخه‌ ره‌ق و ته‌قه‌ خه‌ریكى یه‌كتر كوشتنن، بێنه‌ به‌رچاوت، ئه‌وانه‌ بێنه‌ ناو شاره‌كان و ببن به‌ ده‌سه‌ڵاتدار چى ده‌كه‌ن؟ چۆن هه‌مووتان له‌پێناو ده‌سكه‌وتى خۆیان له‌ناو ده‌به‌ن. ئه‌مه‌ بۆ خۆى به‌شێك بوو له‌ غه‌سل ده‌ماغى به‌عسییه‌كان، هه‌ر ئه‌وكاتیش كه‌ ته‌مه‌نم بیست ساڵ بوو، ده‌مگوت ده‌یه‌وێت مێشكم بشواته‌وه‌، به‌ڵام راستییه‌كه‌ ئه‌وه‌بوو كه‌ ئه‌و باسى شتێكى نه‌ده‌كرد نه‌بێت، ئه‌وه‌ى ئه‌و ده‌یگوت راستى بوو، به‌داخه‌وه‌ ئه‌وكاتیش حزبه‌كان له‌ شه‌ڕێكى نه‌گریسى ترسناكدا بوون له‌گه‌ڵ یه‌كتر، مه‌به‌سته‌كه‌م ئه‌وه‌یه‌، خوا ده‌زانێت به‌عسییه‌كان چه‌ندین گه‌نجیان به‌م هۆیه‌وه‌ له‌خشته‌ بردووه‌ و نائومێدیان كردوون، یاخود وایان لێ كردووه‌ له‌گه‌ڵ خۆیان دژ به‌ میلله‌ته‌كه‌ى خۆى بوه‌ستێته‌وه‌.