ھین نەشێن رێرەوا تێکۆشینا نەتەوی ژ بۆ سەربخۆیێ بگرن

لیوا عەزیز وەیسی

 

ل دیروکا مرۆڤاتیێدا ب گشتی و دیروکا مللەتێ کورد ب تایبەتی ئایا ھیچ شۆڕش، بزاڤ، سەرھلدان، بۆ ئارمانجا نان و ئاڤێ پلان و ستراتیجیەتێن وان ھاتینە دارشتن؟ یان درۆشمێ مووچە ھاتیە بلندکرن؟ ھەڵبەت نەخێر. یان شۆڕش ل پێناڤا راکرنا زۆرداری و ستەمێ و نەھێلانا داگیرکەریێ بووینە، دیارکرنا ئارمانجاژی یان ئازادی و رزگاری بوویە، یانژی مافێ نەتەوی و سەربخۆیێ بوویە.


ل دەمەکی کو مللەتێ کورد ل ئەنجامێ تێکوشین و خەبات و قوربانیدانەکا یەکجار مەزن گەھشتیە وێ باوەرێ و تێگەھێ؛ ئێدی بڕەنگەکێ ئاشتییانە ریفراندۆم بھێتە کرن و مللەتێ کورد بڕیارا خۆ بدەت، ئایا گرێدانا خۆ ل گەل عیراقێ بھێلیت، یانژی سەربخۆییا خۆ رابگەھینیت؟ دیارەژی ھیچ کوردەکێ رەسەن و بشەڕەف مانا خۆ ب عیراقێڤە ناپەژڕینیت.


لێ مخابن دیروک جارەکا دی خۆ دووبارە دکەتەڤە، بەشێ خائین و بیرتەنگ و بەرژەوەندپەڕست دخازن رێ ل پێشیا ڤێ پێشکەفتنێ بگرن و بۆ ڤێ ئارمانجا دیارکری، دەستێ خۆ ل گەل سەرسەختترین دۆژمنێ نەتەوا کورد و مافێ کوردان تێکەل بکەن. دخازن ئەو لاوازیێن ل ڕێڤەبەریا ھەرێمێدا ھەنە و سەختیا ژیانێ بکەنە بەھانەیەک و ھێنجەتەک، ئێدی قەدەرامە بدەولەتا عیراقێ را بکەنە یەک. ئەڤا سروە عه‌بدولواحید دھۆڵێ بۆ لێ ددەت و وەک نوینەرەکا کوردان ل بەغدا خۆ ددەتە نیاسین کۆ بەغدا نە بتنێ ل سەر پێویستە سەربخۆیا کوردستانێ قەبیل نەکەت، بەلکو پێویستە حکوومەتا کوردستانێ و سەروک و کاربدەستێن کوردانژی محاسبە بکەت ( كان مفروچ ان یكون محاسبه‌ لزعما‌و ان یصدر مپل هژا الاوامر) سروە عبدالواحد، ھەر کەس دزانیت بێی ھێز و پێشمەرگە نە گەنگازە رۆژەک ژ رۆژان کوردستان ببیتە دەولەتەکا سەربخۆ لێ ئەوا سروە دخازیت ھەمان داخازیە یاکو دۆژمن و ناحەز و نەیارێن کوردان دڤێت ئەوژی ئەوە پێشمەرگەی کوردستانێ ب حکوومەتا بەغداڤە گرێ بدەت و ھەوار دکەت دبێژیت ھەرێم دێ پارێ پێشمەرگا خۆت، لەوما پێویستە تەک تەک پێشمەرگە بچنە بەغدا و مووچەێ خۆ وەربگرن (المفروچ ان الحكومه‌ الاتحادیه‌ ان تسوا حساب خاص لعدد معین لقوات البیشمركه‌ كى یأتی فرد الى بغداد ویستلمها ) سروە عبدالواحد. لڤێ چەندێژی نەراوەستا دەف ھاڤێتە پیرۆزترین بھا و نرخێن مللەتێ کورد. ئەگەر شەھید پیرۆز نەبیت؟ ئایا ل وڵاتێ مەدا چ تشتێ دی ھەیە بقەدەر شەھیدی پیرۆز بیت؟ ب چ جەسارەت و وێرەکیێ، ب پشتەڤانیا کێ و رێنمایێن کێ و ب گوتن و فەرمانێن کێ ب ڤی شێوازێ کرێت باسێ شکومەندترین و پیرۆزترین بھایێن گەلێ مە دکەت، (هناك نسا‌و یبیعون أنفسهم لكی یصرفون على اولادهم بعد استشهاد ازواجهم) ؟!.


د دیروکا تێکۆشینا ئازادیخاز و سەربخۆیێدا و پاراستنا مللەت و وڵاتدا گەلەک مللەتێن جیھانێ ژبۆ بگەھنە ئازادی و سەربخۆیاخۆ یانژی ئازادی و سەربخۆییا خۆ ژ دەست نەدەن بۆ کۆ ل سەر خەبات و تێکۆشینا خۆ بەردەوام بن گوشتێ مریێن خۆیێن خارین.


ئەز حێبەتی و مەندەھۆش نەبووم کەسێن وەکی حەنان فەتلاوی چەپکا بۆ سروە لێدەن، لێ یا سەیر ئەوە بزاڤا گۆڕان ھەدار نەکر و ئەو ماسکێ خۆ ل پشت ڤەشارتی راگر و ڕۆیێ خۆیێ راستی نیشا خەلکی دا.


نه‌وشێروان مسته‌فا دناڤا کەرب و کینێدا گۆڕان دامەزراند و خاست تۆڵا خۆ ژ ئیکەتیا نیشتمانی بستینت و بتایبەتژی لدەما دەستپێکێدا کەسایەتیا بەرێز (مام جەلال تالەبانی) کرە ئارمانج، لێ ل گەل بھارا عەرەبی ب دەلیڤە زانی ھەڤپەیمانەکێ ل گەل ئیسلامیێن کورد چێ کەت، ھەر چەندە دھەمی ژیانا خۆیا سیاسیدا خۆ وەک کەسەکێ مارکسیست و ماویست دایە نیاسین و ل ھیچ جهەکی ل گەل ئیسلامەتیێ نەبوویە ب تەواوەتی خودانێ ئایدولۆجیەک دژبەری ئیسلامەتیێ حەتا کۆ ل دژی ھەبوونا دیانەتانژی بوویە، لێ ئەف ھەڤپەیمانی لگەل بزاڤێن ئیسلامی مینا زەواج موتعە بوویە، تەنھا دخاست حزبێن ئیسلامی بکار بینیت بۆ مەرەمێن خۆ تۆڵەستاندن یانژی ئەگەر نەشیا سۆلتا ھەرێمێ بێختە دەستێ خۆ ھەرێمێ ژناڤ ببەت و ل درۆشمێن وان ل دەما ١٧ی شوباتی ٢٠١٢ تەنھا نە بریە ریفۆرما گوتیە (دەگورین و بڕۆخێت)، دەما ئەف پیلان سەرنەگرت و نەگەھشتە ئارمانجا خۆ پەنا بۆ شێوازێن دی برن ژ ئۆپوزسیونێ خۆ خستە دناڤا حکوومەتێدا و سۆز دا ئەگەر رێ بدەنێ بکەڤنە ناڤ حکوومەتێ چوار سالێن بھێت دێ بنە چوار سالێن ئارامیێ. (( لێ بەلێ تەنھا ئەف چەندە فێڵبازیەکا سیاسی بۆ. ئارمانجا ھاتنا گۆڕان بۆ ناف حکوومەتێ و قانعکرنا ھەڤپەیمانێن خۆ بۆ ناف حکوومەتێ: یەکەم/ ژبۆ تێکدانا رێکەفتنا دناڤبەرا پارتی و ئێکەتی بۆ کۆ ل دەمەکی ئەف رێکەفتنە ببوو بنگەھێ گەلەک دەستکەفتێن گرنگ و مێژوویی. دووەم/ مەرەم ئەو بوو ل نیڤا رێ یاریێ ب ھەست و سۆزێن گەل بکەت و سەرنجا گەل بۆ ھندەک خالێن دیارکری راکێشیت و دیار بکەت کۆ دلسۆزێ گەلە، لەوما نەشێت بەردەوام بیت د حکومرانیێدا. لێ ئارمانجاوێ ئیفلیج و پەکخستنا حکوومەتا ھەرێما کوردستانێ بۆ و بەردەوامیا پیلانا وان بوو. د ھەمان دەمدا دخاستن پەرلەمانیژی وەکو گۆپالەکی بكار بینن بۆ لێدانا دژبەر و ھەڤڕکێن خۆ. دەما ئەف مەرەم بجهـ نەھات، پەنا بۆ ھێزێن دەرەکی بر، وەک نەوشێروان مسته‌فا و گۆڕان بخۆ دبێژیت :"ئەم وەسا ناراوەستین و کارتێن دی ھەنە ئەم بکار بینین"، دیار بوو ژی کارتا ھەرە بھێز یا وان نووری مالکی بوویە کۆ یەک ژ دۆژمنێن ھەرە سەرسەختێن ھەرێما کوردستانێ دھێتە ناسین، ھاوکارێ سەرەکیێ چێبوونا داعشە و بڕینا بودجا ھەرێمێیە و ئەگەرێ نەھامەتی و بڕینا قووتێ خەلکییە ل کوردستانێ و نە بەس کورد و نە بەس سوننی و بەشێ ھەرە زۆرێ شیعاژی ڤێ راستیێ دپەژرینن و بەلگە بۆ ڤێ راستیێژی ئەو دژایەتیکرنا خەلکێ بەسرا بۆ مالکی بۆ ل دەما سەرەدانا بەسرا کری ل ڕۆژا ١١ / ١٢ / ٢٠١٦ێ، ھەر مالکی بۆ دگوتە فەرماندێن ترسنوکێن خۆیێن لەشکری ئەوێن میسل رادەستی داعش کری: "بلا سەبرا وە ھەبیت تاکۆ فروکێن F16 دگەھنە دەستێ مە د وى دەمیدا ئەم دێ ھێرشێ کەینە سەر ھەرێما کوردستانێ و دێ گرین".


 ل ١٧ شۆباتێ دەمێ زێرەڤانی گەھشتیە سلێمانیێ ب مەرەما پێشی گرتنا خرابکاریێ و گێرەشێویێنىێ، نه‌وشیروان ل وی جهێ خۆ لێ ڤەشارتی پەیامەک دا، نە تەنێ پشتەڤانی لێ نەکر بخۆژی  گۆت: "ئەڤا دبیت نە بمنە و نە گۆڕاننژی، ئەڤە خەلەکێ ئاژاوەچی و گێرەشێوێنن" وەک ڤێ گوتنا پێشیانە "مومێ ئاگر بەردا کوومێ و ئەو بخۆ چۆ سەرێ زۆمێ". پشتی رەوش ئارام بووی ئەوان بەردەوامی دا پیلان و فتنەکاریا خۆ.


گوتنەک ھەیە دبێژیت: "حەسیدی دل رەشیێ چێ دکەت، دل رەشی ناکۆکیێ چێ دکەت، ناکۆکی دووبەرەکیێ چێ دکەت، دووبەرەکی ململانێ چێ دکەت، ململانێ دبیتە دژایەتی، ئێدی ھەر مللەتەکێ ئەڤە دکەڤیتە دناڤدا ھەمی ژیاناخۆیا مایی ب ڕەزیلی دەرباز دکەت". لێ مللەتێ مە کەتیە سەر رێ و خەتا خۆیا دروست، ئارمانج و پیلان و ڕاستیا حەسیدان تێگەھشتینە، کاروانێ نەتەوی یێ مە د قوناغا خۆیا دوماھیێ دێ بەردەوام بیت  و حەف حەفا صا رێ  ل پێشیا کاروانی ناگریت.