بۆچی له‌ ئه‌ڵمانیاوه‌ گه‌ڕامه‌وه‌ بۆ كوردستان؟ 40

هه‌ندێ له‌ پەنابه‌ران له‌ ماركێته‌كان بۆنیان ده‌دزی و به‌ هه‌رزانتر ده‌یانفرۆشته‌وه‌

شه‌وێكیان له‌ كافتریا دانیشتبووین، وه‌كو شه‌وه‌كانی تر كاتمان به‌ڕێ ده‌كرد، هه‌ریه‌كه‌ و خه‌ریكی شتێك بوو، كوڕێك ته‌له‌فۆنی بۆ ئه‌و هاوڕێیه‌م كرد كه‌ نه‌شته‌رگه‌ریی بۆ كرابوو، دیار بوو سه‌رخۆش بوو، گوتی ئه‌وا دێمه‌ شواباغ بۆ لات، كه‌چی به‌ هه‌ڵه‌ له‌ جێگایه‌كی تر دابه‌زیبوو، به‌ ته‌له‌فۆن و زه‌حمه‌تیێكی زۆر تا شوێنی ئێمه‌ی دۆزییه‌وه‌. كه‌ هات دانیشت ناسیاوێكی خۆی له‌گه‌ڵ بوو تازه‌ گه‌یشتبووه‌ ئه‌ڵمانیا، زۆر دڵخۆش دیار بوو به‌ گه‌یشتنه‌كه‌ی، به‌ڵام روخساری ماندوو بوو. ئێمه‌ باسی رۆیشتنه‌وه‌مان ده‌كرد، ئه‌ویش له‌و كاته‌دا گه‌یشته‌ كافتریا، كوڕه‌كه‌ پێی سه‌یر بوو كه‌ ئێمه‌ بڕیارمان دابوو بڕۆینه‌وه‌ بۆ كوردستان.


ئێمه‌ له‌ كوردستان موعاناتمان تا رادده‌یه‌ك له‌ یه‌ك ده‌چوو، واته‌ هۆكاری هاتنه‌ده‌ره‌وه‌مان ته‌قریبه‌ن نزیك بوو له‌ یه‌ك، به‌ڵام هه‌ریه‌كه‌ی به‌ ئامانجێك به‌ره‌و ئه‌وروپا ملی رێگامان گرتبوو و خه‌ونه‌كانیشمان له‌ ئه‌وروپا جیاواز بوون. له‌گه‌ڵ ئه‌و كوڕه‌ له‌سه‌ر یه‌ك مێز دانیشتبووین، گوتم كاكه‌ تۆ خۆت تێك مه‌ده‌ تازه‌ی، به‌ڵام به‌پێی كات ده‌زانی ده‌گونجێی یان نا، تێ ده‌گه‌ی كه‌ ئێمه‌ بۆچی ده‌ڕۆینه‌وه‌. مه‌ترسه‌، پێویسته‌ هه‌ریه‌كه‌مان به‌ چاوی خۆی واقعه‌كه‌ ببینێ و تێیدا بژی، له‌وانه‌یه‌ بۆ تۆ باش بێت، به‌ڵام بۆ ئێمه‌ باش نه‌بوو.


ئه‌و كه‌ ئاگای له‌ قسه‌كانی ئێمه‌ بوو، هه‌ندێ شڵه‌ژابوو، ویستم دڵی بده‌مه‌وه‌، ته‌نیا ئه‌وه‌نده‌ پاره‌یه‌شی هه‌بوو كه‌ پێی هاتبوو بۆ ئه‌ڵمانیا، خێزانه‌كه‌یشی له‌ كوردستان جێهێشتبوو، له‌ دڵی خۆمدا ئه‌وم پێ شێت بوو، كه‌ خێزانداره‌ كه‌مێك پاره‌ی هه‌بووه‌ و له‌و رێگایه‌ خه‌رجی كردووه‌.


هاوڕێكه‌ی هه‌ندێك سه‌ره‌ڕۆ بوو، ده‌یگوت نێره‌مووكێك بووه‌ته‌ هاوڕێم و وازم لێ ناهێنێت، شه‌وانیش له‌گه‌ڵ خۆی ده‌مباته‌وه‌ لای خۆی، به‌ زۆر پێمه‌وه‌ نووساوه‌ و نازانم چی لێ بكه‌م، پاره‌شم پێ ده‌دات به‌س تا شه‌وان له‌گه‌ڵی بچمه‌ ماڵه‌وه‌. ئه‌و كوڕه‌ زیاتر له‌ دیكۆمێنتێكی هه‌بوو، چه‌ند جارێك له‌ زیرندۆرف خۆی ته‌سلیم كردووه‌، هه‌ر جاره‌ و به‌ ناوێك دیكۆمێنتی دروست كردبوو، به‌ ستایلێكی تازه‌ چووبوو. له‌ زیرندۆرف ئه‌گه‌ر تازه‌ بوای په‌نجه‌مۆر نه‌ده‌كرای، بۆیه‌ ئه‌وه‌ی مه‌جال هه‌بووه‌ كردوویه‌تی بۆ خۆ ته‌سلیمكردن، هه‌ر كه‌مپه‌ و له‌ لایه‌ك بووه‌ بۆ ئه‌وه‌ی خۆی له‌ غه‌رامه‌ی شه‌مه‌نده‌فه‌ر بپارێزێت، یان ئه‌گه‌ر كه‌تنێكی كرد له‌جیاتی دیكۆمێنته‌ ئه‌سڵه‌كه‌ی دیكۆمێنته‌ ساخته‌كه‌یان پێ بدات.


هه‌ندێك له‌ پانابه‌ره‌كانی وڵاته‌كانی دیكه‌، له‌ ماركێته‌كان بۆنیان ده‌دزی و له‌ شواباغ به‌ هه‌رزانتر ده‌یانفرۆشته‌وه‌، به‌ڵام ئه‌وانه‌ی ئه‌و كاره‌یان ده‌كرد نه‌ سووری بوون و نه‌ عێراقی، هاوڕێیه‌كم بۆنێكی كڕیبوو به‌ كه‌متر له‌ 40 یۆرۆ، به‌ڵام گوتیان ئه‌وه‌ له‌ ماركێته‌كان و جێگای بۆن فرۆشتن بایی زیاتر له‌ 100 یۆرۆیه‌.


ده‌مه‌و ئێواره‌یه‌ك له‌ كافتریا بووین، گوتمان با بچینه‌وه‌ له‌ كه‌مپ شتێك بخۆین. ماسیی قوتوو و جۆره‌ په‌نیرێك بووبووه‌ خواردنی هه‌میشه‌ییمان، به‌ تایبه‌ت من، وامان لێ هاتبوو ده‌مانگوت به‌س سكمان پڕ بێت به‌سمانه‌، ئاخر خواردنی كه‌مپه‌كه‌ به‌ جۆرێك خراپ و ناخۆش بوو نه‌بێته‌وه‌، یه‌ك دوو ئێواره‌ له‌ كاتی نانخواردن، به‌ مۆبایله‌كه‌م وێنه‌ی نانخواردن و جێگاكه‌م ده‌گرت، كه‌ چی ده‌خۆین چۆن ده‌ژین هه‌تا ناو جێگاكه‌شم وێنه‌ گرت، ویستمان له‌ فه‌یسبووك بڵاوی بكه‌ینه‌وه‌، به‌ته‌ما بووین بۆ په‌یجه‌كانی كوردانی ئه‌ڵمانیا، یاخود ئه‌و په‌یجانه‌ی كه‌ وا له‌ كوردستان لایكیان زۆر بوو بنێرین، هه‌ر له‌ناو مۆبایله‌كه‌ی خۆم هه‌ڵم گرت، جگه‌ له‌ وێنه‌ی خواردنه‌كه‌، وێنه‌ی قه‌ره‌وێڵه‌كان و جێگا و رێگای هۆڵه‌كه‌شم گرت بۆ یادگاری و بۆ ئه‌وه‌ی خه‌ڵكیش بمان بینێت كه‌ حاڵمان چۆنه‌، به‌تایبه‌ت گه‌نجه‌كانمان، به‌ڵام هیچ كامێكیانم بڵاو نه‌كردنه‌وه‌.