ئه‌و شه‌هیده‌ی به‌ كوردستاندا گوزه‌ری كرد

 

بۆ ئه‌و شه‌هیده‌ی به‌ كوردستاندا گوزه‌ری كرد و سوور بوو كه‌ ببێته‌ به‌شێك له‌ خاكه‌كه‌ی، شه‌هید دكتۆر سلێمان.


ئه‌و كه‌سێكی ئاسایی نه‌بوو، هه‌رچه‌نده‌ شه‌هیدان نه‌ پۆست و نه‌ پایه‌ و نه‌ میدالیایان هه‌یه‌ و پله‌ی باڵای ئه‌وه‌یه‌ كه‌ (شه‌هیده‌)، كوردستانیش تژییه‌ له‌ شه‌هیدان، له‌به‌ر زۆریی شه‌هیدانی ئه‌م وڵاته‌، ئیدی ژماره‌یان پڕاوپڕی وڵاتی ونبوومانه‌ یان وڵاتێك هێشتا كه‌ به‌ خوێنی شه‌هیدان به‌ره‌نگاری ده‌كات بۆ ئه‌وه‌ی پێگه‌یه‌ك یان قه‌واره‌یه‌ك بۆ نه‌ته‌وه‌كه‌ به‌ده‌ست بهێنێت.


شه‌هیدانی كورد تایبه‌تمه‌ندن، خۆ ره‌نگه‌ تایبه‌تمه‌ندییه‌كه‌یان له‌وه‌وه‌ سه‌رچاوه‌ی گرتبێت كه‌ ئه‌وان به‌ دڵگه‌رمییه‌وه‌ شه‌هید ده‌بن، نه‌ك به‌ ناچاری. هه‌ڵبه‌ت دكتۆر سلێمان كه‌ ده‌ستی له‌ خه‌باتی شاخ هه‌ڵگرت و له‌ ئه‌وروپادا گیرسایه‌وه‌، خوێن له‌ رۆحیدا ئۆقره‌ی نه‌گرت، به‌ڵكوو خوێنه‌كه‌ی هه‌ر له‌ جمیندا بوو، ئه‌وی ئاراسته‌ كرد و هه‌ر زوو گه‌ڕایه‌وه‌ تا پله‌یه‌كی مه‌زن به‌ده‌ست بێنێت و له‌ مێژووشدا ناوێكی نه‌مر بێت. به‌ده‌گمه‌ن یه‌كێ له‌ ئێمه‌ ده‌توانێ كچه‌كه‌ی و ژیانی خۆشگوزه‌رانی جێ بهێڵێت و سه‌رله‌نوێ رێی خه‌بات و تێكۆشان هه‌ڵبژێرێته‌وه‌، پاش ئه‌وه‌ی له‌ خه‌بات داده‌بڕێت، ئه‌و خه‌باته‌ی كه‌ به‌ نیاز بوو خه‌ونی ئازادی بۆ خۆی و نه‌ته‌وه‌كه‌ی به‌ده‌ست بهێنێت. شه‌هید ته‌نیا ئازادی هه‌ڵده‌بژێرێ. ئازادی ئه‌وه‌یه‌ بگه‌یته‌ ئه‌و شوێنه‌ی كه‌ كۆتایی نایه‌ت، ته‌نیا شه‌هیدیش ده‌گاته‌ ئه‌و مه‌نزڵه‌. ئه‌و ڤیزای نه‌مریی وه‌رگرتووه‌، له‌وه‌ش كه‌س شان له‌ شانی نادات. شه‌هیدانی ئێمه‌ به‌م جۆره‌ن، ئه‌وان مۆری خۆیان له‌ لاپه‌ڕه‌ی مێژوویه‌ك داوه‌، كه‌ هێشتا مه‌ره‌كه‌به‌كه‌ی وشك نه‌بووه‌ته‌وه‌، مۆری (باڵایی) خه‌ڵات و به‌شی ئه‌وانه‌.


ئاسمانی كوردستان تژییه‌ له‌ رۆحی نه‌مران، رۆحی دكتۆر سلێمان نووری زۆر بوو، بۆیه‌ هه‌مووان فرمێسكیان بۆ شه‌هیدبوونه‌كه‌ی باراند. ئایا پله‌ی شه‌هیدبوون تا ئه‌و راده‌یه‌ شیرینه‌، كه‌ ئیدی كۆچی یه‌كجاره‌كی ده‌كه‌ینه‌ بڕیار و ماڵئاوایی له‌ جگه‌رگۆشه‌كانمان ده‌كه‌ین؟
عه‌بدوڵا په‌شێوی شاعیر جوانی گوتووه‌ كه‌ له‌ چامه‌یه‌كیدا ده‌ڵێ:


(كه‌ وه‌فدێك ئه‌چێته‌ شوێنێ.. بۆ سه‌ر گۆڕی سه‌ربازی ون… تاجه‌ گوڵینه‌یه‌ك دێنێ… ئه‌گه‌ر سبه‌ی وه‌فدێ بێته‌ وڵاتی من… لێم بپرسێ كوانێ گۆڕی سه‌ربازی ون؟
ئه‌ڵیم گه‌وره‌م، له‌ كه‌ناری هه‌ر جۆگه‌یه‌… له‌سه‌ر سه‌كۆی هه‌ر مزگه‌وتێ… له‌ به‌رده‌رگای هه‌ر ماڵێ… هه‌ر كڵیسا یا ئه‌شكه‌وتێ… له‌سه‌ر گابه‌ردی هه‌ر شاخێ… له‌سه‌ر دره‌ختی هه‌ر باخێ… له‌م وڵاته‌، له‌سه‌ر هه‌ر بسته‌ زه‌مینێ… له‌ژێر هه‌ر گه‌زه‌ ئاسمانێ… مه‌ترسه‌، كه‌مێ سه‌ر داخه‌ و… تاجه‌ گوڵینه‌كه‌ت دانێ).


ئه‌و ژنه‌ش هه‌ڵه‌ی نه‌كردووه‌، كاتێ كه‌ شێخ سه‌عید له‌سێداره‌ درا، ئه‌و گوتی: ئێمه‌ بسكمان ئیدی شانه‌ ناكه‌ین، روومه‌تیشمان ئیدی ده‌بێته‌ رێچكه‌ی هه‌میشه‌یی فرمێسك، په‌رده‌ی حه‌ریم له‌سه‌رمان لاده‌ده‌ین، ته‌نیا شه‌هید نامووسی نه‌ته‌وه‌كه‌مانه‌.


زۆر كه‌س له‌ كوردستاندا شه‌هید بوون، زۆر كه‌سیش نه‌ترسان چونكه‌ شه‌هیدان​ له‌وێن، ئه‌نفالیش رۆژی قیامه‌تی شه‌هیدانمان بوو، ئه‌و ماڵباته‌ی كه‌ ناسناوی بنه‌ماڵه‌ی شه‌هیدانیان به‌ خۆیان به‌خشی، بارزانییه‌كان په‌ناگه‌ی نه‌ته‌وه‌ و ئامێزی ئه‌ون، بۆیه‌ شه‌هید دكتۆر سلێمان به‌ كوردستاندا تێپه‌ڕی، بۆ ئه‌وه‌ی وچانی خوێن بدات، كه‌ ئیدی وا سنوور ده‌كێشێ، له‌ دهۆكیش ماڵئاوایی له‌ یه‌كه‌مین پێشمه‌رگه‌ و سه‌رۆك ده‌كات، بۆ ئه‌وه‌ی ببێته‌ میوانی زێده‌كه‌ی، ئه‌و گونده‌ی له‌ باكووردا تێیدا له‌دایك بوو.


سڵاو له‌ تۆ ئه‌ی شه‌هیدی مه‌زن، تۆ ته‌نانه‌ت له‌ دوایین رۆژی خۆشتدا هه‌ر مه‌زن بووی، وه‌ك چۆن له‌ ژیانی خۆشتدا هه‌ر تایبه‌تمه‌ند بووی، ئێمه‌ تۆمان له‌ كیس چوو، چونكه‌ نه‌ته‌وه‌ تۆی پێویست بوو، تۆ چووی و به‌ رۆح له‌ نێوماندا نه‌مری.