وامان ده‌زانی له‌ به‌رزاییه‌كانی شارین

 

یاده‌وه‌رییه‌كانی منداڵی، ئه‌و یاده‌وه‌رییانه‌ن كه‌ به‌شێوه‌یه‌ك له‌ بیره‌وه‌ریماندا تۆمار بووه‌، به‌ئاسانی ناسڕێنه‌وه‌، هه‌ر كاتێكیش بمانه‌وێت زۆر به‌ئاسانی به‌ناو بیره‌وه‌رییه‌كانماندا گوزه‌ر ده‌كه‌ن، وه‌ك فیلمێكی سینه‌مایی وێنه‌كانی ئه‌وه‌نده‌ جوان و پاك دێنه‌وه‌ به‌رچاومان، وا هه‌ست ده‌كه‌ین به‌دیار فیلمێكه‌وه‌ دانیشتووین و هه‌ر ده‌رفه‌تێكیش بڕه‌خسێت، زۆر به‌ئاسانی ده‌یگێڕینه‌وه‌، ئه‌وه‌ی كه‌ منداڵی جاران له‌ ئێسته‌ جیا ده‌كاته‌وه‌، ئه‌وه‌بوو كه‌ له‌ منداڵییه‌وه‌ ببێته‌ كه‌سێك خۆی پشت به‌ توانا و بیركردنه‌وه‌كانی خۆی ببه‌ستێت، هاوكات ئه‌و كه‌ره‌سته‌ سادانه‌ی یاریكردنیان بوو كه‌ خۆیان دروستیان ده‌كرد، كه‌ سه‌یری كه‌ره‌سته‌ی یاریی منداڵانی ئێسته‌ ده‌كه‌م، جیاوازییه‌كه‌ به‌ راده‌یه‌كه‌ كه‌ ناكرێت به‌راوردی بكه‌یت، بۆیه‌ منداڵی ئه‌مڕۆ ئه‌وه‌ی هزری ماندوو نه‌كات، ته‌نها جووڵه‌ و كاركردنه‌، هه‌میشه‌ به‌دیار شاشه‌یه‌كی بچووكه‌وه‌ دانیشتووه‌ و ته‌نها چاو و په‌نجه‌كانی ده‌جووڵێت، هه‌موو یاری و شته‌كانی له‌ ڕێگه‌ی ئینته‌رنێته‌وه‌ دێته‌ به‌رده‌ستی، بۆیه‌ زۆر له‌و منداڵانه‌ كه‌سایه‌تیی بێزار و ماندووییان لێ ده‌رده‌چێت.


یه‌كێك له‌و یاده‌وه‌رییانه‌ی كه‌ هه‌رگیز بیرم ناچێته‌وه‌، یاریی (قاپ قاپ) بوو. ئه‌م یارییه‌ تایبه‌ت نه‌بوو ته‌نها به‌ كچان، به‌ڵكو كوڕانیش ئه‌م یارییه‌یان ده‌كرد، واته‌ یارییه‌ك بوو بۆ هه‌ردوو ره‌گه‌ز، چونكه‌ زیاتر پێویستی به‌ توانای كوڕان بووه‌ بۆ دروستكردنی، به‌ڵام ئه‌گه‌ر كچان حه‌زیان له‌ پێڵاوی به‌رز بوایه‌، خێرا ئه‌م یارییه‌یان ده‌كرد، هه‌رچه‌نده‌ ده‌ستكه‌وتنی قوتووی دۆشاوی ته‌ماته‌ زۆر ئاسان نه‌بوو، چونكه‌ زۆربه‌ی ماڵان خۆیان دۆشاویان ده‌كرد و كه‌متر قوتووی دۆشاویان ده‌كڕی، به‌ڵام هه‌ر جارێكیش دایكم دۆشاوی به‌ قوتوو بكڕیایه‌، دوای ته‌واوبوونی خێرا قوتووه‌كه‌مان پاك ده‌شت و هه‌ڵمان ده‌گرت، ده‌وه‌ستاین تا ده‌بوو به‌ دووان و به‌ سیان و به‌ چوار. پاشان ده‌مه‌كه‌یمان هه‌ڵده‌هێنایه‌وه‌ و سه‌ره‌كه‌ی تریشی دوو كونمان تێدا ده‌كرد و په‌تێكی درێژ ئه‌وه‌نده‌ی بگاته‌ لای ده‌ستمان، له‌مسه‌روسه‌ری كونه‌كه‌وه‌ ده‌رمان ده‌هێنا، گڕێمان ده‌دا و ده‌مانگرت به‌ده‌ستمانه‌وه‌، هه‌ر به‌پێلاوه‌كانی پێمانه‌وه‌ ده‌چووینه‌ سه‌ر قوتووه‌كان، چونكه‌ ده‌می سه‌ره‌كانی زۆر تیژ بوون و نه‌مان ده‌توانی به‌ پێی په‌تی بچینه‌ سه‌ری، په‌ته‌كانیشمان توند به‌ ده‌ستمانه‌وه‌ ده‌گرت و به‌ هێواشی ده‌ڕۆیشتین، ئیتر ئه‌وه‌نده‌ دڵمان پێی خۆش بوو، وامان ده‌زانی له‌سه‌ر به‌رزاییه‌كانی شار وه‌ستاوین، هه‌رچه‌ند گه‌لێ جاریش ده‌ترساین بكه‌وین، جگه‌ له‌وه‌ی كه‌ زیاتریش حه‌زمان له‌ ته‌قه‌ته‌قی ده‌نگه‌كه‌ی بوو، بۆیه‌ هه‌رشوێنێك چیمه‌نتۆ یان كاشی بوایه‌، ده‌چووینه‌ ئه‌و شوێنه‌، چونكه‌ له‌سه‌ر خۆڵه‌كه‌ ده‌نگی نه‌ده‌هات.


ئه‌م شێوه‌ یارییه‌ به‌ جۆرێك له‌ یاده‌وه‌ریمدا مایه‌وه‌، كه‌ گه‌وره‌ بووم و چوومه‌ بواری كاری شانۆ و دراماوه‌، هه‌ر به‌و یاده‌وه‌رییه‌ جوانه‌ی جارانه‌وه‌، هه‌مان قاپ قاپم له‌ یه‌كێك له‌ كاره‌ شانۆییه‌كانمدا به‌كار هێنا. جگه‌ له‌وه‌ش بیرمه‌ ئه‌و قوتووانه‌ یان قوتووی شیری منداڵ، هه‌ردوو سه‌ریمان هه‌ڵده‌هێنایه‌وه‌ و بۆ زۆر له‌ رووناكیی كاره‌ شانۆییه‌كانمان به‌كارمان ده‌هێنا تا وه‌ك وێنه‌ی پڕجكتۆر گورزی ڕووناكییه‌كه‌ی كۆ بكاته‌وه‌، هه‌رچه‌نده‌ له‌ كاتی داگیرساندندا قوتووه‌كه‌ی زۆر گه‌رم ده‌كرد، نه‌مان ده‌توانی ده‌ستی لێ بده‌ین، به‌ڵام به‌ ڕاده‌یه‌كی باش سوودی لێ وه‌رده‌گیرا.


ئه‌وكاته‌ زۆربه‌ی پێداویستییه‌كانی شانۆ زۆر ساده‌ بوو، ساده‌ییه‌كه‌شی ره‌نگدانه‌وه‌ی ژیانی ئه‌وكاته‌ی كۆمه‌ڵگا بوو، به‌پێی ئاستی هۆشیاری و قۆناغی كۆمه‌ڵایه‌تی و ئابووری، له‌به‌رئه‌وه‌ی جاران وه‌ك ئێسته‌ خه‌ڵك ده‌وڵه‌مه‌ند نه‌بوون، به‌ڵكو ئاستی ده‌رامه‌تیان دیاریكراو بوو، له‌گه‌ڵ ئه‌وه‌شدا خوێنه‌ر و هه‌وادارانی هونه‌ر به‌ جۆرێك بوو كه‌ شانۆییه‌كان زۆرترین بینه‌ریان هه‌بوو.