ئاژه‌ڵه‌كانیشمان وه‌ك خۆمان سه‌رلێشێواون

 

بابه‌تی ژینگه‌ له‌ هه‌رێمی كوردستاندا خه‌مێكی بچوكه‌، خه‌م له‌ نان و له‌ ئاشتی، ماوه‌ نادات هاووڵاتیانی ئه‌م هه‌رێمه‌ كه‌مێك به‌ئاگا بن و له‌ بیری پاراستنی ژینگه‌دا بن. ده‌مێكه‌ ئه‌م میلله‌ته‌ به‌م شێویه‌ ده‌ژی و نه‌ په‌روه‌رده‌ و نه‌ سیاسه‌ت به‌شداری له‌ دروستكردنی كولتووری ژینگه‌پاریزیی ئه‌م كۆمه‌ڵگایه‌دا نه‌كردووه‌، به‌ڵكو به‌ پێچه‌وانه‌وه‌ هه‌موو كاردانه‌وه‌كان له‌ زیانی ژینگه‌ی كوردستاندا بووه‌، نه‌ په‌روه‌رده‌ و نه‌ حزبه‌كانیش نه‌یانتوانیوه‌ رۆڵ ببینن له‌ نه‌ریتی ژینگه‌پاریزی و هاندانی كۆمه‌ڵگه‌ بۆ ئه‌م بابه‌ته‌. ژینگه‌ی هه‌رێمی كوردستان له‌به‌رده‌م مه‌ترسیی پیسبوونێكی مه‌ترسیداردایه‌ و سه‌وزاییه‌كان خه‌ریكن ده‌بنه‌ سه‌وزایی تایبه‌ت. هه‌روه‌ك ئه‌وه‌ی كێ ویستی باخێك بۆ خۆی دروست بكات.


یه‌كێك له‌ هاوڕێیه‌كانم له‌ رێكخراوێكدا كار بۆ پاراستنی ژینگه‌ ده‌كات، باسی له‌ سنووربه‌ندیی به‌شێكی ناوچه‌كانی هه‌رێمی كوردستان كرد، چۆن به‌رپرسان و به‌شێك له‌و ده‌وڵه‌مه‌ندانه‌ی كه‌ به‌پرسانی سیاسی له‌پشتیانه‌وه‌ن بوونه‌ته‌ خاوه‌نی هه‌موو ئه‌و زه‌ویانه‌ و ته‌لبه‌ندیان كردووه‌، سنوور بۆ ناوچه‌كانی (سیته‌ك و مێرگه‌پان و شه‌قلاوه‌...) دیاری كراوه‌، زۆربه‌ی ئه‌م زه‌ویانه‌ دیاری كراون كه‌ ئه‌بێت به‌ده‌ست كێوه‌ بن. زه‌ره‌رمه‌ندی یه‌كه‌میش ئاژه‌ڵه‌كانی ئه‌م ناوچانه‌ن كه‌ سه‌ریان لێ شێواوه‌، له‌به‌رئه‌وه‌ی خاك و زه‌وی و ئاسمانی ناوچه‌كه‌یان داگیر كراوه‌ و دۆخه‌كه‌ وای لێ كردوون كه‌ هه‌ڵبێن. ئه‌م هاوڕێیه‌مان زۆر به‌داخ بوو بۆ بارودۆخی ئه‌م ناوچه‌ سنووربه‌ندانه‌، ڕه‌نگه‌ ئێمه‌ به‌داخ بین بۆ ئه‌وه‌ی ئه‌م موڵكانه‌ له‌ بنه‌ڕه‌تدا ئه‌بێت هی حكوومه‌ت بێت نه‌ك دیهاتییه‌كان و ئه‌مانه‌ی ئێستا به‌ ده‌ستیانه‌وه‌یه‌، به‌ڵام ئێستا به‌سه‌ر چه‌ند كه‌سێكدا یان فرۆشراون یان دابه‌ش كراون. بۆچی خاك و زه‌ویی ئه‌م وڵاته‌ وای به‌سه‌ر هات؟ بۆچی زۆربه‌ی سه‌ردانی هاووڵاتیان بۆ ئه‌و ناوچه‌ په‌رژینكراو یان ته‌لبه‌ندكراو یان سنووربه‌ندكراوانه‌ سنوورداره‌ و وه‌ك جاران نییه‌ سه‌یرانگای هه‌زاران بێت! به‌ڵكو سه‌یرانگای ده‌یان كه‌متر له‌ سه‌دان كه‌سه‌. له‌ مێژووی دروستبونی ته‌لبه‌ندكردنی ئه‌م ناوچانه‌وه‌، سه‌ره‌تای دروستبونی جیاوازیی چینایه‌تییه‌كی مه‌ترسیدار دروست بوو. ئه‌وه‌ی واسته‌ و پاره‌ی هه‌یه‌ فه‌رموو ئه‌وه‌نده‌ دۆنم بۆ باخه‌كه‌ت، ئه‌وه‌شی فه‌رمانبه‌ری حكوومی یان خه‌ڵكی ئاساییه‌، چاوه‌ڕێ بێت له‌ مووچه‌وه‌ بۆ نیوه‌ مووچه‌كه‌ی. ئێمه‌ له‌خه‌می گه‌شتوگوزار و له‌ خه‌می نه‌مانی زه‌ویداین كه‌ موڵكی حكوومه‌ت و موڵكی گشتی بێت بۆ شوێنی سه‌یرانگاكان و له‌ خه‌می ئاینده‌دا بووین كه‌ حكوومه‌ته‌كه‌مان له‌ ئاست ئه‌م گرفته‌دا خه‌مساردیی نواندووه‌ له‌ بنه‌ڕه‌تدا، به‌ڵام هاوڕێ ژینگه‌دۆسته‌كه‌مان له‌ خه‌می گه‌وره‌ی ئاژه‌ڵه‌كاندا بوو، ئه‌و ده‌یگوت: به‌ هه‌مان شێوه‌ ئاژه‌ڵه‌كانیش ژینگه‌یان نه‌ماوه‌ به‌تاڵترین ناوچه‌ی ئاژه‌ڵان ئه‌م سنووربه‌ندایه‌. ره‌نگه‌ ئه‌مه‌ سه‌ره‌نجێكی ورد و بابه‌تێكی زۆر هه‌ستیار بێت، به‌ڵام بۆچی ئه‌وه‌نده‌ ئاساییه‌، ئه‌مڕۆ له‌ كوردستان به‌رامبه‌ر خه‌می بێئاوی و بێمووچه‌یی و بێكاره‌بایی و بێده‌رمانی، كێ ئاژه‌له‌َكانی ئه‌م ناوچانه‌ی بیره‌؟ كێ له‌ خه‌می چۆله‌كه‌ و گورگ و سه‌گ و رێوی و پشیله‌ و پڵنگ و به‌راز و مار و كیسه‌ڵدایه‌؟ له‌م كۆمه‌ڵگه‌یه‌دا ماوه‌ی ژیان بۆ مرۆڤه‌كان یه‌كجار بچووك كراونه‌ته‌وه‌، ئیتر ئه‌بێت بارودۆخ و ژیانی ئاژه‌ڵه‌كان چۆن بێت! ئێمه‌ نوێنه‌رمان هه‌بوو له‌ زمان خران، كه‌س نییه‌ به‌رگری له‌ مافه‌كانمان بكات، ئه‌ی ئه‌بێت ئه‌وان (مه‌به‌ستم ئاژه‌ڵه‌كانه‌) دۆخیان چۆن بێت كه‌ نوێنه‌ریان نییه‌. كاتێك له‌گه‌ڵ ژینگه‌دۆستان ده‌دوێیت ئه‌و ساته‌ ده‌زانیت مه‌هزه‌له‌ی حوكمڕانی چی به‌ هه‌رێمی كوردستان ده‌كات! ئاوی پیسبوو، هه‌وای پیس و بێدارستانی و خاكی پشتگوێخراو یان خاكی داگیركراو بۆ باخ و ڤێلای فیسار و فڵان، ئایا ئه‌م گوزه‌رانه‌ چی به‌سه‌ر ته‌ندروستیماندا دێنێت؟ له‌ كوردستان نه‌ك ته‌نها مرۆڤه‌كان، به‌ڵكو ئاژه‌ڵه‌كانیش بێ ژینگه‌ و سه‌رلێشێواون.