بەرپرسێكی باڵای پێنتاگۆن، بەرلە كۆبوونەوەی نێوان دۆناڵد ترەمپ سەرۆكی ئەمریكا و رەجەب تەییب ئەردۆغان سەرۆك كۆماری توركیا، كە بڕیارە ئەمڕۆ ئێوارە سەعات ٨ ئەنجام بدرێت، لێدوانێكی بۆ رۆیتەرز داوە و دەڵێت ئەمریكا هیچ نییەتێكی نییە پەیوەندییەكانی لەگەڵ هەسەدە بپچرێنێت.
پێشتر ئەردۆغان بۆ میدیاكانی توركیا قسەی كرد و ئاماژەی دا، كە یەكێك لەو تەوەرانەی لەگەڵ ترەمپ باسی دەكات، بە تیرۆریست ناساندنی هەسەدەیە لەلایەن ئەمریكاوە، بەڵام بەرپرسێكی باڵای پێنتاگۆن كە نەیویستووە ناوی خۆی ئاشكرا بكات، دەڵێت بە هیچ شێوەیەك ئەو داوایەی ئەردۆغان قبووڵ ناكرێت و ئەمریكا پەیوەندیی لەگەڵ هەسەدە بەردەوام دەبێت.
ئەو بەرپرسەی ئەمریكا دەڵێت: "ئەوەی گرنگە لە كۆبوونەوەكەی نێوان ترەمپ و ئەردۆغاندا باسكردنە لەبارەی كڕینی مووشەكی بەرگریی S400 كە توركیا لە رووسیای كڕیوە. پێویستە لەو كۆبوونەوەیە ترەمپ و ئەردۆغان ئەو كێشەیە چارەسەر بكەن، چونكە ئەمە ناكۆكیی خستووەتە نێوان توركیا و ئەمریكا".
باسی لەوەش كردووە ئەمریكا هاوكارییەكانی بۆ هەسەدە نابڕێت و كەمیشی ناكاتەوە، ئەردۆغانیش داوایەكی لەو شێوەیە بكات، رەت دەكرێتەوە.
