وەزیرى تەندروستى حکوومەتى هەرێمی کوردستان رایگەیاند ئەنجوومەنى وەزیران رەزامەندى نیشانداوە بەرەوانەکردنى ژمارەیەک لە بەرکەوتووانى چەکى کیمیایى بۆ دەرەوەى وڵات بەمەبەستى وەرگرتنى چارەسەریى.
د. سامان بەرزنجى وەزیرى تەندروستى حکوومەتى هەرێمى کوردستان بە(باسنیوز) ى راگەیاند: "بەمەبەستى چارەسەرکردنى بەرکەوتوانى چەکى کیمیایى پێشنیازێکمان دابوو بەئەنجوومەنى وەزیران، بەسوپاسەوە سەرۆکوەزیرانى هەرێمى کوردستان رەزمەندى نیشاندا بۆ رەوانەکردنى ئەو نەخۆشانە بەدوو قۆناغ بۆ دەرەوەى وڵات، لە قۆناغى یەکەم 47 بەرکەوتوو رەوانەى دەرەوە دەکرێن و بەڕێوەبەرى گشتى تەندروستى پارێزگاى هەڵەبجەش یاوەریان دەبێت".
راشیگەیاند: "لەقۆناغى دووەم ژمارەیەکى دیکە رەوانەى دەرەوە دەکرێن بۆ وەرگرتنى چارەسەریى، بەشێکى زۆرى ئەوکەسانە چەند جارێک رەوانەى دەرەوە کراون بەڵام چارەسەرییان پێویستى بەچەند جەلەسەیەک هەیە و بەردەوام دەبێت لەژێر چاودێریى پزیشکیدابن".
لەبارەى کاتى رەوانەکردنى ئەو کەسانە بۆ دەرەوە وەزیرى تەندروستى حکوومەتى هەرێم ئاماژەى بەئەوە کرد" هەموو ئامادەکارییەکان کراون تەنیا بایەتى خۆئامادەکردن و کۆکردنەوەى ئەو کەسانەیە بۆبەرێکەوتن بۆ دەرەوەى وڵات".
