ژ ئه‌گه‌رێ هه‌بونا بنگه‌هێن پارتا كرێكارێن كوردستانێ (په‌كه‌كێ) ، رۆژانه ل پتریا ده‌ڤه‌رێن سنورێن هه‌رێما كوردستانێ ژ لایێ فروكێن سوپایێ توركیا ڤه دهێنه بوردومانكرن و ئه‌ڤرۆ ژى ل سنورێ قه‌زا زاخو ژ ئه‌گه‌رێ دژواریا بوردومانا فروكێن توركیا، خه‌لكێ گونده‌كێ سه‌ر ب قه‌زا زاخو ڤه نه‌چار بون گوندێ خو چول بكه‌ن و قه‌ستا سه‌نته‌رێ زاخو بكه‌ن.
زێره‌ڤان مۆسا شه‌ره‌فانى، رێڤه‌به‌رێ ناحیا (ده‌ركارێ) یا سه‌ر ب قه‌زا زاخو ڤه د داخویانیه‌كا تایبه‌ت دا بو (باسنیۆز) دا دیاركرن: ل سنورێ قه‌زا زاخو ب گشتى و ناحیا ده‌ركارێ ب تایبه‌تى به‌رده‌وام بوردومانا فروكێن توركیا دهێته ئه‌نجام دان و ئه‌ڤه بو وێ چه‌ندێ د زڤریت كو ل سنورێ ناحیا ده‌ركارێ بنگه‌هێن په‌كه‌كێ لێ هه‌نه و زیان هه‌ر ب خه‌لكێ وێ ده‌ڤه‌رێ ڤه دگه‌هیت و گوت ژى: "ئه‌ڤرۆ رێكه‌فتى 1/4/2019 فروكێن سوپایێ توركیا ب توندى بوردومانا گوندێ (شه‌رانشێ) ل سنورێ ناحیا ده‌ركارێ كریه و بویه ئه‌گه‌ر كو زیانێن مه‌زن بگه‌هنه خه‌لكێ وى گوندى".
هه‌مان رێڤه‌به‌رى ئه‌و چه‌نده ژى بو (باسنیوز) دوپاتكر: "خه‌لكێ گوندێ (شه‌رانشێ) كو (20) مالان ب خوڤه دگریت و نه‌چار بوینه ئه‌ڤرۆ هه‌مو خه‌لكێ وى گوندى، مال و گوندێ خو چول بكه‌ن و قه‌ستا سه‌نته‌رێ زاخو بكه‌ن چونكه مانا وان ل گوندێ وان بویه جهێ دلگرانیا وان چونكه بوردومانا توركیا مه‌ترسیه‌كا مه‌زن ل سه‌ر ژیانا وان په‌یدا كریه".
لدیڤ گوتنێن ، زێره‌ڤان موسا شه‌ره‌فانى ، رێڤه‌به‌رێ ناحیا ده‌ركارێ ل سنورێ قه‌زا زاخو ئه‌و چه‌نده ژى رێكا (باسنیوز) هات پشتراستكرن: نها چو كه‌س ل گوندێ (شه‌رانشێ) نه‌مانه كو هه‌مو خه‌لكێ نیشته‌جێ ل گوندێ ناڤبرى كوردێن (كریستیان) بونه و قه‌ستا سه‌نته‌رێ زاخو كریه و ئه‌ڤه د ده‌مه‌كێ دا یه كو به‌رى چه‌ند رۆژان توپه‌كا سوپایێ توركیا ل مالا كه‌سه‌كێ كریستیان ل گوندێ ناڤبرى ڤه كه‌فت بو لێ زیانێن مادى بتنێ هه‌بونه لێ ئه‌ڤرۆ ژ به‌رده‌وامیا بوردومانا توركیا بو سه‌ر بنگه‌هێن په‌كه‌كێ خه‌لكێ وى گوندى نه‌چار بون گوند و مالێن خو بهیلن.
دوماهى په‌یڤا خو دا، رێڤه‌به‌رێ ناحیا ده‌ركارێ ئه‌و چه‌نده بو (باسنیوز) نه‌ڤه‌شارت، ل سنورێ ناحیا ده‌ركارێ ل گوندێ (شه‌رانشێ) زور په‌كه‌كه هه‌نه و خو د ناڤ مالان د ڤه‌شێرن و ئه‌و چه‌نده بویه ئه‌گه‌ر كو توركیا گوندێن سنورێ ناحیا ده‌ركارێ بوردومان بكه‌ت.
