مەکتەبی سیاسیی پارتی دیموکراتی کوردستان و ئەنجومەنی سیاسیی کۆمەڵی ئیسلامی کۆ دەبنەوە.

 

میدیای فەرمییەکانی کۆمەڵ بڵاویان کردووەتەوە، کە کۆبوونەوەکە ئەمڕۆ سێشەممە 12-2-2019 لە شاری هەولێر، ئەنجام دەدرێت.

 

لە کۆبوونوەکەدا، هەروەک ئەو میدیایانە باسیان کردووە، مەکتەبی سیاسیی پارتی و ئەنجومەنی سیاسیی کۆمەڵ، چەند تەوەرێک تاوتوێ دەکەن، کە بریتین لە؛

 

- بارودۆخی سیاسی و ئابووریی هه‌رێمی كوردستان.

- په‌یوه‌ندییه‌كانی‌ هەولێر و بەغدا.

- گرنگیی یه‌كریزی ناوخۆیی بۆ ده‌سته‌به‌ركردنی‌ مافه‌كانی‌ كورد.

- هه‌وڵدانی‌ هه‌مه‌لایه‌نه‌ بۆ باشتركردنی‌ گوزه‌رانی‌ خه‌ڵك .

- وه‌لانانی‌ ناكۆكی سیاسی له‌ پێناو به‌رژه‌وه‌ندی گشتی‌.

 

هەرچەندە میدیاکانی کۆمەڵ ئاماژەیان بە پێکهێنانی کابینەی نوێی حکوومەتی هەرێمی کوردستان نەکردووە، بەڵام چاوەڕوان دەکرێ پێکهێنانی حکوومەتی نوێ و پشکی حزبەکان، تەوەری سەرەکیی کۆبوونەوەکە بێت.

 

رۆژی 30ـی ئەیلوولی 2018، هەڵبژاردنی خولی پێنجەمی پەرلەمانی کوردستان ئەنجام درا و رۆژی سێشەممە 30/10/2018، ئەنجومەنی باڵای دادوەری لە هەرێمی کوردستان ئەنجامەکانی پەسەند کرد.

 

ژمارەی کورسیی لایەنەکان لە خولی پێنجەمی پەرلەمان:

 

- پارتی دیموکراتی کوردستان، 45 کورسی.

 

- یەکێتیی نیشتمانیی کوردستان، 21 کورسی.

 

- بزووتنەوەی گۆڕان، 12 کورسی.

 

- نەوەی نوێ، 8 کورسی.

 

- کۆمەڵی ئیسلامی، 7 کورسی.

 

- بەرەو ئیسڵاح (یەکگرتوو و بزووتنەوەی ئیسلامی)، 5 کورسی.

 

- ئازادی، 1 کورسی.

 

- سەردەم، 1 کورسی.

 

پێکهاتەکان (ژمارەی کورسییەکانیان جێگیرە):

 

- تورکمان، 5 کورسی.

 

- مەسیحی و کلدان ئاشووری، 5 کورسی.

 

- ئەرمەن، 1 کورسی.