رٍێڤەبەرێ ڕاگەھاندنا بەڕەڤانیا باژێڕی ل دھۆکێ، دیار کر کو ب ڕۆیدانەکا ئاگر بەربوونێ ل دھۆکێ، مالا پێشمەرگەکێ ھاتە سۆتن و زیانەکا مەزن یا ماددی ب دویف خۆ ڕا ھێلا.
بێوار عەبدولعەزیز، رٍێڤەبەرێ ڕاگەھاندنا بەڕەڤانیا باژێڕی ل دھۆکێ، بۆ (باسنیوز) ڕاگەھاند: "ئەڤرۆ سێ شەمبێ 2017/2/7ێ، د ڕۆیدانەکا ئاگر بەربوونێ دا ل بەڕۆژکێ، ئاگر ب مالا پێشمەرگە جوتیار ئەسکەندەر ناڤشکی کەفت و د ئەنجام دا مالا وی ھاتە سۆتن و زیانەکا مەزن یا ماددی ب دویف خۆ ڕا ھێلا".
دیار ژی کر: "ژ ئەگەرێ وەرگەڕیانا سۆپا گازێ ئەڤ ڕۆیدانا ئاگر بەربوونێ ھاتە پێش کو د ئەنجام دا مالا پێشمەرگێ ناڤبری ھاتە سۆتن، لێ تیما بنگەھێ بەڕەڤانیا باژێڕی ل بەڕۆژکێ ل جھێ ڕۆیدانێ ئامادەبوون و کونتڕۆل ل سەر ڕۆیدانێ کر، ب خۆشحالی ڤە چ زیانێن گیانی نە بوون".
رٍێڤەبەرێ ڕاگەھاندنا بەڕەڤانیا باژێڕی ل دھۆکێ، گوت ژی: " ژبەر کو ڤێ ڕۆیدانێ زیانەکا مەزن یا ماددی گەھاندە مالا ڤی پێشمەرگەیی، لەوما پێدڤی ب ھاریکاریێ یە".