فەرماندەیەکی باڵای وەزارەتی ناوخۆی عێراقی لە بەغدای پایتەخت دەڕفێندرێت.
ژمارەیەک چەکدار بە چوار ئۆتۆمبێلی بێ ژمارە، لیوا یاسر عەبدولجەبار، بەڕێوەبەری گشتیی پەیمانگای باڵای وەزارەتی ناوخۆی عێراقییان لە شەقامێکدا راگرت و رفاندیان.
ئەمڕۆ پێنجشەممە 14-11-2019، گرتەی ڤیدیۆیی ساتی رفاندنی لیوا یاسر عەبدولجەبار لە تۆڕە کۆمەڵایەتییەکان بڵاو کرایەوە.
بەهۆی ناکارایی هێزە ئەمنی و سەربازییەکانی عێراق، دەیان گرووپ و میلیشیای چەکداریی توندڕەو، تاوانکاری و تیرۆریستی لە بەغدا و شارەکانی دیکەی ئەو وڵاتە بڵاو بوونەتەوە، کە بە ئارەزووی خۆیان و بەپێی بەرژەوەندیی ئەو لایەنەی کاری بۆ دەکەن، کردەی تاوانکاری و تیرۆریستی ئەنجام دەدەن.
