دادگای فیدڕالیی عێراقی وادەی گفتوگۆ لەبارەی تانەیەکی کورد لە دژی یاسایەکی پەرلەمانی عێراق، پێش دەخات.
دوای پەسەندکردنی پرۆژەیاسای هەڵبژاردنی ئەنجومەنی پارێزگاکانی عێراق، کە هاووڵاتییە ئاوارەکانی ناوچە کوردستانییەکانی دەرەوەی ئیدارەی هەرێمی کوردستان لە دەنگدان بێ بەش دەکات، پەرلەمانی کوردستان، پارتی دیموکراتی کوردستان و چنەد حزبێکی دیکە، لە دادگای فیدڕالی تانەیان لەو یاسایە دا.
جوان یونس رۆژبەیانی، سەرۆکی لێژنەی ناوچە کوردستانیەکانی دەرەوەی ئیدارەی ھەرێمی کوردستان لە پەرلەمان، بە (باسنیوز)ی راگەیاند، دوای تانەکە، دادگای فیدڕالی بڕیاری دا رۆژی 18-11-2019 تانەکانی لێژنەکەی پەرلەمان و حزبەکانی کوردستان بە یەک دانیشتن، تاوتوێ بکات.
جوان رۆژبەیانی هەروەها رایگەیاند، کە رۆژی یەکشەممە 3-11-2019، دادگاکە بە لێژنەکەیانی راگەیاند، بەهۆی ئەوەی تانەکەی ئەو لێژنەیەی پەرلەمانی کوردستان تەنیا لەسەر ئو بڕگەیە بووە، کە خەڵکی ناوچە کوردستانییەکان لە دەنگدان بێ بەش دەکات، بڕیاریان داوە چاوخشاندنەوە بە تانەکەی لێژنەکەی پەرلەمان، بۆ رۆژی 12-11-2019 پێش بخەن.
