ئەندامی سەرکردایەتیی یەکگرتووی ئیسلامی: لەگەڵ هەموو هەنگاوێکی چاکسازیداین

"ململانێی سیاسی لە سلێمانی و هەڵەبجە و گەرمیان و ڕاپەڕین، وای کردووە ئەو دەڤەرانە لە رووی خزمەتگوزاری پێش نەکەون"

19/02/2020 - 16:56 بڵاوکراوەتەوە لە چاوپێكەوتن

خەدیجە عەبدولجەبار، ئەندامی سەرکردایەتیی یەکگرتووی ئیسلامیی کوردستان و ئەندامی ئەنجوومەنی پارێزگای سلێمانی، لە گفتوگۆیەکی تایبەتی (باس)دا، قسە لەبارەی چەند پرسێکی سیاسی دەکات، هاوکات هۆکاری کێشە و گرفت و خزمەتگوزارییەکانی پارێزگای سلێمانییش روون دەکاتەوە. رای دەگەیەنێت، پشتیوانیی چاکسازی دەکەن و دووپاتيشی دەکاتەوە، یەکگرتوو بۆ ئەوە نەبووەتە ئۆپۆزسیۆن، کە دوژمنایەتیی حکوومەت بکا. جەختیش دەکاتەوە، زۆریی ململانێی سیاسی لە سلێمانی و هەڵەبجە و گەرمیان، زیانی لە خەڵک و خزمەتگوزارییەکان داوە.


خەدیجە عەبدولجەبار، سەرەتا پشتیوانیی خۆی بۆ هەنگاوەکانی چاکسازی دەربڕی کە لە لایەن حکوومەت دەستیان پێ کراوە، گوتی: "ئێمە وەکوو یەکگرتوو لەگەڵ هەموو هەنگاوێکی چاکسازیداین، لەگەڵ چاکسازیی ڕاستەقینەداین، نەک چاکسازیی ڕووکەشی، دەمانەوێت هەنگاوەکانی چاکسازی بە ئاراستەی چاکسازیی ڕاستەقینە بن".


ئەو پێی وایە، یاسای چاکسازی یاسایەکی باشە، بەڵام لەبەرئەوەی سەرنج و تێبینییان هەبووە، بۆیە فراکسیۆنی ئەوان لە پەرلەمان دەنگی پێ نەداوە.


ئەو ئەندامەی سەرکردایەتیی یەکگرتوو، باس لەوە دەکات، ئەوان بۆ ئەوە ئۆپۆزسیۆنبوونیان هەڵنەبژاردووە، تاوەکوو دژایەتیی حکوومەت بکەن، دەشڵێت: “ئۆپۆزسیۆنبوونی یەکگرتوو بە مانای دوژمنایەتیکردن لەگەڵ حکوومەت نایەت، نەهجی ئێمە بە جۆرێکە، ئەگەر حکوومەت کارێکی باش بکات پێی دەڵێین دەبوایە باشترت بکردایە، حکوومەت خۆی ئەرکیەتی کاری باش بکات، ئۆپۆزسیۆن بۆ ئەوە نییە حکوومەت هەر هەنگاوێکی باشی نا دژی بوەستێتەوە، بەڵکوو چاودێریی حکوومەت دەکات بۆ ئەوەی کارەکانی پێشێلکاریی یاسایی و مافەکانی هاووڵاتییانی لێ نەکەوێتەوە، ئەگەر کاری نایاساییش بکات، ئەوا بەدیلی کارە ناباشەکانی پێ دەدەین، بۆ ئەوەی لە کێبڕکێی کاری دەسەڵات و ئۆپۆزسیۆن، سەرەنجام هاووڵاتی سوودمەند دەبێت".


ئەو هاتە سەر پرسی خزمەتگوزاریی پارێزگای سلێمانی و پێی وایە، ئەگەر حکوومەت لێی بەرپرس بێت، ئەوا بەرپرسانی ئیدارەی ناوچەکەش بەرپرسیاریەتیی زۆرتری خراپیی حزمەتگوزارییەکانیان کەوتووەتە سەر، گوتی: "پارێزگای سلێمانی بە دەڤەرەکانی هەڵەبجە و گەرمیان و ڕاپەڕینەوە، لە ڕووی خزمەتگوزارییەوە، دوو جار قوربانیین، جارێک بەهۆی خراپیی خزمەتگوزارییەکە، لە روویەکی تریشەوە بە حوکمی فرەڕەنگیی سیاسیی دەڤەرەکە بە بەراورد بە دەڤەرەکانی تر، زۆرترین ململانێی سیاسیی تێدا بووە، ئەوەش وای کردووە ئەو دەڤەرە لە رووی خزمەتگوزاری پێش نەکەوێ".


ئەندامەکەی ئەنجوومەنی پارێزگای سلێمانی باسی لە کەموکوڕییەکی یاسایی کرد و گوتی: "پارێزگاری سلێمانی لەلایەک پابەندە بە بڕیارەکانی سەرووی خۆی، کە وەزارەتی ناوخۆیە، لە لایەکی دیکەوە پێویستە پابەند بێت بە بڕیار و راسپاردەکانی ئەنجوومەنی پارێزگاوە، کە لەژێر چاودێریی ئەواندایە، بەپێی ناوەڕۆکی یاسای پارێزگاکان، تا ئێستا مەرجەعی ئەنجوومەنی پارێزگاکان لە ستراکچەری ئیداریی حکوومەتدا ڕوون نییە".


زیاتر گوتیشی: "لە ئەنجوومەنی پارێزگای سلێمانیدا، دەیان ڕاپۆرتی پێشێلکاری و گەندەڵی ئاڕاستەی ئەنجوومەنی وەزیران و پەرلەمان و دەستەی نەزاهە و فەرمانگەی داواکاری گشتی کراون و زۆر لە هەوڵەکان ئەنجامیان هەبووە، هەرچەند لە ئاستی خواستی ئێمە و داخوازیی هاووڵاتییاندا نییە".


خەدیجە باوەڕی وایە، ئەگەر بیانەوێت چارەسەری ڕیشەیی کێشەی ئیدارەی پارێزگاکان بکرێت، دەبێت دەسەڵاتی لامەرکەزی بچەسپێت و یاسای ژمارە 3ی ساڵی 2009ی پارێزگاکان هەموار بکرێتەوە.


ئەندامەکەی سەرکردایەتیی یەکگرتوو، لە تەوەرێکی تری گفتوگۆکاندا، باسی لە کێشەکانی عێراق کرد و گوتی: "لەدوای ڕووخانی ڕژێمی بەعس ساڵی 2003، پێمان وا بوو عێراق دەبێتە عێراقێکی فیدراڵیی دیموکراسی و هەموو پێکهاتەکان بەشداری دەکەن و کوردیش بەم تێڕوانینەوە بەجدی بەشداریی کرد، بەڵام بەداخەوە تا ئێستا دیموکراسی لە عێراق نە وەک کولتوور و نە وەک میکانیزمی حوکمڕانی جێی خۆی نەگرتووە، جگە لە ساختەکاری، کێشەی تائیفی و سیاسی و کولتووری و جۆری حوکمڕانی قووڵتر بوونەتەوە، کێشەی قۆرخکردنی دەسەڵات و نەمانی هەیبەتی دەوڵەت، نەمانی متمانەی خەڵک بە حکوومەت و دەسەڵات پەرەی سەندووە، کە خۆی لە ناڕەزایەتیی خەڵک و خۆپیشاندانەکانەوە بینییەوە و ئێستاش خۆپشاندانەکان بەردەوام دەبن".


زیاتر دەشڵێت: "ئێمە وەکوو کورد کێشەی دەستووریمان هەیە لەگەڵ عێراق هەیە، مافمان هەیە لە دەستووردا، بەڵام جێبەجێ نەکراوە، وەکوو کورد پێویستە خۆمان رێک بخەینەوە، سەرەتا هەماهەنگیی نێوان نوێنەرانمان لە سەرۆکایەتیی کۆمار و وەزیر و پۆستە حکوومییەکان لەگەڵ ئەندامانی ئەنجوومەنی نوێنەران لەلایەک و تەنسیق و راوێژی بەردەوامی نێوان حکوومەتی هەرێم و نوێنەرە کوردەکانمان لە پەرلەمانی عێراق هەبێت، ئەویش لەسەر بنەمای بەرژەوەندیی نەتەوەیی و نیستمانیی دوور لە بەرژەوەندیی حزبی و شەخسی".


ئەو بە پێویستی دەزانێت، کورد بە ستراتیژیەتێکی نەتەوەیی و نیشتمانیی هاوبەش خۆی رێک بخاتەوە و بچێتەوە بەغدا، ئەویش بۆ سێ خاڵی گرنگ: "یەکەم


بۆ بەدەستهێنانی مافە جێگیرکراوەکانمان لە دەستوور، دووەم، چارەسەرکردنی کێشەکانمان لەگەڵ بەغدا وەکوو کێشەی بودجە و پێشمەرگە و کێشە یاسایی و ئیدارییەکان بەگشتی، سێییەم کارکردن بۆ قۆستنەوەی حزووری کورد لە کابینەی حکوومەت و ئەنجوومەنی نوێنەران، لە بەرژەوەندیی کورد و عێراقیش".