بەڕێوەبەری گشتیی خانەنشینان: لە بەرنامەی حكوومەتدایە سندوقی خانەنشینی دابمەزرێت

"مانگانە زیاتر لە 2 ملیار دینار دەدرێتە مووچەی خانەنشینی پلەی تایبەت"

09/10/2019 - 16:31 بڵاوکراوەتەوە لە چاوپێكەوتن

حازم ئیسماعیل، بەڕێوەبەری گشتیی خانەنشینانی هەرێمی كوردستان، لە بەدواداچوونێكی تایبەتی (باس)دا، سەبارەت بە یاسای چاكسازی و پرسی خانەنشینی لە هەرێمی كوردستان، چەند زانیارییەك دەخاتە ڕوو. رای دەگەیەنێت، بڕیارە سندوقی خانەنشینی دابمەزرێت و مووچە و دۆسێی خانەنشینانیش بەئەلیكترۆنی بكرێت.


سەرەتا ئومێدی خۆی بە كابینەی ئێستا پیشان دا، بەوەی كە چاكسازی لە بواری خانەنشینیدا دەکرێت و حكوومەت پێداگرە لێی.


روونیشی كردەوە، لە وەزارەتی دارایی بۆچوونی ئەوانیان لەبارەی پڕۆژەی چاكسازی وەرگرتووە، گوتی: "ئێمە گوتوومانە لە كوردستان 7 بۆ 8 یاسای خانەنشینی هەیە، داوامان كردووە یاسای خانەنشینی یەكگرتووی عێراق ژمارە 9ی ساڵی 2014 لە هەرێمی كوردستان پەسند بكرێت، ئەو كاتە كەمترین مووچەی خانەنشینی دەبێتە 400 هەزار دینار، هاوكات دەبێت هەركەس خانەنشین ببێت، تەمەنی 50 ساڵ بێت و 15 ساڵیش خزمەتی كەمتر نەبێ، ئەوە لێرە رەچاو نەكراوە".


راشی گەیاند، بۆ ئەوەی كەمترین مووچەی خانەنشین بكرێتە 400 هەزار دینار، بڕی 40 ملیار دیناریان پێویستە.


روونیشی كردەوە: ”مانگانە زیاتر لە 2 ملیار دینار دەدرێتە مووچەی خانەنشینیی پلەی تایبەت، کە دەیانیان پلەی وەزیرن، سەدان پەرلەمانتار و كەسی پلە تایبەت".


ئاشكراشی كرد، لەنێو پلە تایبەتەكان، خەڵكی نایاسایی هەیە، بەڵام خەڵكی یاساییش زۆرە: "لەنێو پلە تایبەتەكان هەیە 20 ساڵ خزمەتی هەبووە، بەڵام یاسای چاكسازی ئەو كەسانە دەگرێتەوە، كە چەند ساڵێك خزمەتیان هەبووە، یان هەر پلەیان نەبینیوە، بەڵام بە پلەی تایبەت خانەنشین كراون، ناكرێت كەسێك هیچ خزمەتێكی نەكردبێت و مووچەیەكی زەبەلاحی بدرێتێ، لە كاتی جێبەجێكردنی یاسای چاكسازی، ژمارەیەكی زۆری خانەنشینی نایاسایی كەم دەبێتەوە".


حازم ئیسماعیل، لەمیانەی قسەكانیدا ئاماژەی بەوە كرد، داوایان كردووە سندوقی خانەشینی دابمەزرێت، گوتیشی: "راستە پارە لە فەرمانبەر بە ناوی تەوقیفاتی خانەنشینی وەردەگیرێت، بەڵام سندوقی خانەنشینی نەبووە، بەڵام لەو كابینەیە لە بەرنامەی حكوومەتدایە سندوقی خانەنشینی دابمەزرێنێت، ئەو سندوقە زۆر گرنگە و پێداگریمان لەسەر دامەزراندنی كردووە".


ئەوەشی خستە ڕوو، لەپاڵ بەئەلیكترۆنیكردنی مووچەی خانەنشینان، دۆسێی خانەنشینانیش بەئەلیكترۆنی دەكرێت، گوتیشی: "دۆسێی خانەنشینان بەئەلیكترۆنی دەكرێت، لەگەڵ رێكخراوێكی سەر بە نەتەوەیەکگرتووەکان شەش مانگ كارمان كردووە لەسەر ئەو پرسە، لە ساڵی داهاتوودا دەست بە جێبەجێكردنی دەكرێ".

 

بەڕێوەبەری گشتیی خانەنشینان، بێ ئاگایی خۆی لە لە رێكارەكانی چۆنیەتیی خانەنشینكردنی سەربازی پیشان دا و گوتی: "ئێمە نازانین ئەوانەی بە پلەی سەربازی خانەنشین كراون، یان دەكرێن چۆنە، تەنیا مووچەكانیان لای ئێمەیە، خانەنشینی مەدەنی لای ئێمەیە، ئەگەر یەكێك 14 ساڵ و 11 مانگ و 29 رۆژی هەبێت، ئێمە دەسەڵاتمان نییە یەك رۆژی بۆ زیاد بكەین، تاوەكوو خانەنشین بێت، ئەوەی پێشمەرگە هیچ لای ئێمە نییە و ئاگاداری نین".


ئەوەشی روون كردەوە، بە رێنمایی ئەنجومەنی وەزیران، درێژكردنەوەی ماوەی خزمەتی فەرمانبەرانی راگرتووە، بۆیە ئەوەی ماوەی یاسایی تەواو بكات، خانەنشین دەكرێت.


ئەو بە دیاریكراوی كێشەی خانەنشینی نایاسایی دیاری كرد و گوتی: "هەیە یەك رۆژ خزمەتی نەكردووە خانەنشین كراوە و پارەی خانەنشینی نەداوە، فەرمانبەران مانگانە لە مووچەكانیان دەبڕدرێت، کەچی ئەوان هیچیان نەداوە".


حازم ئیسماعیل، ئاماژەی بەوەش دا، لە ماوەی ساڵانی قەیرانی دارایی، زیاتر لە 20 هەزار فەرمانبەر خانەنشین كراون، گوتیشی: "ساڵانە 5 هەزار یان 5 هەزار و 200 فەرمانبەر خانەنشین كراون".


روونیشیی كردەوە، مووچەی پەرلەمانتاری خانەنشین لە كوردستان 6 ملیۆن و 580 هەزار دینارە، بەڕێوەبەری گشتیی خانەنشین پێی وایە: "مووچەی خانەنشینی پەرلەمانتاران زۆرە، بەڵام چونكە بە یاسا لە لایەن پەرلەمان دەركراوە، بۆیە جێبەجێ دەكرێت و دەبێت بە یاسا كەم بكرێتەوە”.


ئەو گوتیشی: “بەگشتی مووچەی خانەشینی شارستانی لە كوردستان مووچەیەكی كەمە، بە تایبەت چینێك هەیە لەوانە چینی كرێكاران، كە مووچەی خانەنشینییان 220 هەزار دینارە، تەنانەت شێوەی پێدانی مووچەكانیشیان بۆ ئێمە جێی نیگەرانییە، لە هەموو كۆبوونەوەیەك گوتوومە، زستان و هاوینان كە مووچە بە خانەنشینان دەدەین، سزایان دەدەین، هاوینان لەبەر گەرما و زستانیش لەبەر سەرما مووچەیان پێ دەدەین، بۆیە دەكرێتە ئەلیكترۆنی و بڕیاریشە لە یاسای چاكسازیدا مووچەی خانەنشینییان بكرێتە 400 هەزار دینار".