رێبوار تاڵەبانی: تا ئێستاش فشارەكان لەسەرم بەردەوامن تەنانەت لە نووسینگەی عەبادییشەوە

"دەبێ ئەوانەی کەرکووکیان رادەستی حەشدی شەعبی کرد، سزا بدرێن"

رێبوار تاڵەبانی، سەرۆکی ئەنجومەنی پارێزگای کەرکووک، کە لەدوای رووداوەکانی ١٦ی ئۆکتۆبەر لە هەولێرە، لەم دیمانەیەی (باس)دا بە دوورودرێژی باسی لە بارودۆخی عێراق بەتایبەت کەرکووک و ناوچە کوردستانییەکان دەکات.

 

(باس) ڕووداوی یەك لەدوای یەك لە ناوچە كوردستانییەكان و كەركووك بەتایبەت ڕوویان دا، ئاخۆ چاوەڕوانكراو بوون؟
ڕێبوار تاڵەبانی: ڕووداوەكان چاوەڕوان نەكراو بوون، چونكە دەستووری عێراق جێی دڵنەوایی هەموو تاكێكی عێراق بوو، مادەیەك لەو دەستوورەدا جێگیر كراوە، كە مادەی 9یە و بەپێی ئەو مادەیە نابێ هێز بۆ هیچ كەیسێكی سیاسی بجوڵێنرێت، ئیتر باسی ئەوەش ناكەین كێ پابەند دەبێ بەو دەستوورە، یان كێ پابەندی نابێ، یان كێ بۆخۆی هەڵدەچنێ، یان كێ بەدڵی نییە پشتگوێی دەخات، بەگشتی بەدرێژایی مێژوو، عێراق پابەندی دەستوور نەبووە و یاساكانی پێشێل كردووە.

 

(باس) دوای هەڵكردنی ئاڵای كوردستان و بڕیاری ئەنجامدانی ڕیفراندۆم لە كەركووك، عێراق چەند بڕیارێكی دەركرد، لەوانە بڕیاری داگرتنی ئاڵا و بڕیاری لابردنی دكتۆر نەجمەدین کەریم و... هتد، ئەوانە پێشەکی نەبوون بۆ رووداوەکانی ١٦ی ئۆکتۆبەر و دواتر؟
ڕێبوار تاڵەبانی: نەخێر، چونكە لە كاتی كێشەكاندا دەبێ بگەڕێیتەوە بۆ دەستوور و یاسای 21ی هەمواركراو و یاساكانی دیكە كە دەرچوون، هەورەها دەبێ بگەڕێینەوە بۆ دادگا پەیوەندیدارەكان كە كێشەكان یەكلایی دەكەنەوە، شتێكی دیكەش كە جێگای دڵخۆشی بوو ئەوە بوو كە هەر كێشەیەك بكەوێتە نێوان پارێزگایەك و حكوومەتی ناوەند، یان هەرێمێك و حكوومەتی ناوەند ئەگەر بێت و ئەو كێشەیە لە بەرژەوەندیی پارێزگایەكە یان هەرێمەكەدا بێت، ئەو لایە دەیباتەوە، جا ئەوەش بۆ ئێمە جێگای دڵنەوایی و متمانە بوو، كاتێكیش ئێمە چووینە ناو كەیسی ئاڵاوە، پاڵپشت بووین بە مادەی 140، مادەی 111، مادەی 114، مادەی 110، مادەی 112ی دەستوور، چونکە بەو پێیە ئێمە دەسەڵاتی خۆمان دەزانی.

 

(باس) كاتێك ئاڵای كوردستان لە 16ی ئۆكتۆبەر لەلایەن حەشدی شەعبییەوە داگیرا، هەستتان چۆن بوو؟ 
ڕێبوار تاڵەبانی: هەستێكی زۆر ناخۆش و بێتاقەتكەر بوو، بۆ ئێمە كارەساتێك بوو کە مرۆڤ وا گوزارشتی لێ دەكات و دەڵێت ئەگەر جەرگێكم لێ بڕۆشتایە بەقەد ئەوە ناخۆش بوو، لەبەر ئەوەی ئاڵاكە نەك بەتەنیا لە دڵی كەركووكییەكان و كوردانی باشووری كوردستاندا، بەڵكوو لە دڵی كوردانی هەر چوار پارچەی كوردستان و كوردانی هەموو جیهاندا، ئیعتبارێکی گەورەی هەیە.


من داوای هاوكاریم لە زۆر لەو كەسانەی لە یاسا نێودەوڵەتییەكان تێدەگەن كردووە، بۆیە ئەبێ لێكۆڵینەوە لە بابەتی داگرتنی ئاڵای كوردستان لە كەركووك بكرێت، چونكە ئێمە بەپێی دەستوور و بە پرۆسەیەكی دیموكراسی ئاڵای كوردستانمان لە كەركووك هەڵكردووە و ناكرێ بە هێز ئەو ئاڵایە بهێنرێتە خوارەوە، بۆیە دەتوانین لە دادگای نێودەوڵەتیدا ئەوە  تۆمار بكەین، تا ببێتە كەیسێك و ببێتە وانەیەك بۆ ئەوانەی ئەو جۆرە كارانە دەكەن.

 

(باس) حەیدەر عەبادی و مالیكی و بەشێك لە سیاسییەكانی دیكەی عێراق دەڵێن، ئەگەر گرووپێکی ناو یەكێتی نەبوایە، نەمان دەتوانی بەئاسانی بچینە كەركووك و ناوچە كوردستانییەكان بگرین، ئایا ئێوەش ئەوە بە هۆكاری سەرەكیی كەوتنی كەركووك دەزانن؟
ڕێبوار تاڵەبانی: دەیان كەس ئەم بابەتەیان بڵاو كردووەتەوە، بەڵام من نموونەیەكی مامە ڕیشە ئەهێنمەوە كە لە ساڵانی هەشتاکانی سەدەی رابردوودا یەكێك بوو لە پێشمەرگە قارەمانەكانی كوردستان و وەك ئەفسانەیەك بۆ نەوەكانی ئێستا و داهاتوو دەگێڕدرێتەوە، لە شەڕی (تەپەلو) كە یەكێەكە لە ناوچەكانی كەركووك، كاتی خۆی سەدام حوسێن زیاتر لە 400 دەبابە و كۆپتەری بۆ گرتنی خۆی و مەفرەزەكەی نارد، كە نزیكەی 70 كەس بوون، بەڵام بە ماوەی چەند مانگێكیش نەیانتوانی شوێنە بەسیتەكە لە سنووری سەربازیدا زۆر سادەیە، نەیانتوانی بگرن، ئەوەش لە ئەنجامی ئەو متمانەیە بوو كە بە میللەتەكەی خۆی هەیبوو.


ئەگەر مرۆڤ بڕوای بە ئامانج و میللەتی خۆی هەبوو هیچ تۆپ و تەیارەیەك ناتوانێت بیڕوخێنێت. سەدامیش ئەزموونی باشی لەوە وەرگرت، بۆیە فیعلەن ئەم بێ بەرگرییە و ئاگادارنەكردنەوەی خەڵك و تەنانەت فەوجەكانی خۆشیان ئاگادار نەكردبووەوە، بۆیە كاتێك پاشەكشەیان بە هێزەكان كرد پێشمەرگەكان دەستیان بە گریان كرد، بەوەشدا دیار بوو كە نەیانزانیبوو پاشەكشەیان پێ دەكرێت. هەندێك كەس لە ڕاگەیاندنەكانەوە قسەیان كرد و گوتیان لێكۆڵینەوە لە ڕووداوەكان دەكەن، بەتایبەتیش ئێستا لەناو یەكێتیدا خۆیان دەیانەوێت بگەنە ئەنجامێك لەسەر چۆنیەتیی ئەو ڕووداوانە و حاڵەتی پاشەكشەكە، بۆیە ئێمەش چاوەڕێی ئەوانین لێكۆڵینەوەیەكی سەربازی، یان سیاسیی بكەن، چونكە بە فیعلی ئەو باڵەی ناو یەكێتی بەشێكی زۆرن لەو ڕووداوانە.

 

(باس) ئەو كەسانەی كە لە كەوتنی كەركووك تێوە گلاون، ئەگەر بێت و بەبێ سزا دەربازیان بێت، ئێوە بێدەنگ دەبن؟
ڕێبوار تاڵەبانی: بەدڵنیاییەوە بێدەنگ نابین و دەبێ دادگایی بكرێن، وەك چۆن لە حاڵەتی كەوتنی مووسڵ داوا كرا ئەو سەركردانەی دەستیان لە ڕادەستكردنی مووسڵ هەبوو دادگایی بكرێن و ئێستاش بۆ یەكێك لەوانە كە لەدەرەوەی عێراقە سزای لەسێدارەدان دەرچووە، دەبێ ئەو لێكۆڵینەوەیەش بۆ كەركووك بكرێ، لەبەر ئەوەی ماڵی خەڵك وێران بووە و چەندین كەس شەهید بوون، ئەمانە كێ قەرەبوویان دەكاتەوە، بۆیە ئیلا دەبێ بەشێك لەوانە سزا بدرێن.

 

(باس) لە كاتی رووداوەكانی کەرکووکدا هەموو لایەنەكان بەبێ شەڕ ئەو شوێنەیان چۆڵ كرد، پێت وایە هۆكاری چۆڵكردنەكەیان لاوازییان بوو بەرامبەر هیزە عێراقییەكان و سوپای پاسداران، یان هۆكاری دیكەی هەیە؟
ڕێبوار تاڵەبانی: كورد دەڵێت (چەپڵە بە یەك دەست لێ نادرێت)، بۆیە ناكرێت لەلایەك هێزێك بكشێتەوە و لەلایەكی دیكە هێزێكی دیكە بەرگری بكات، چونكە ئەوە لە ڕووی سەربازی و سیاسییشەوە هەڵەیە، ئەگەر كەركووك دڵی كوردستان، یان قودسی كوردستانیش بێ، وای بۆ دەچم موئامەرەكە زۆر لەوەش گەورەتر بووە، بۆیە ئەوەی دەستی لە كەوتنی كەركووكدا هەبووبێت جا عێراقییە و كوردستانییە دەبێ سزا بدرێت.


بۆ ئەوەی بشزانین ئەم ڕووداوانە چۆن ڕوویان داوە دەبێ چاوەڕێی لێكۆڵینەوەكان بكەین، هەورەها یەكێـتیی نیشتمانییش ئەوەی ڕاگەیاندووە كە داوای لێكۆڵینەوە لەو كەسانە دەكەن كە بەشێك بوون لەو ڕووداوانە. پێشتریش عەبادی لە زاری خۆیەوە ئەوەی گوتووە كە پێش دوو مانگ عێراق، ئێران و توركیان پیلانیان بۆ ئەم ڕووداوانە داناوە، بۆیە ئێمە دەبێ ملی عەبادی و ئەو كەسانە بگرین كە بەكاریان هێناون دژی دەستوور، بۆیە ئەوەش كەیسێكە كوردستانییان دەتوانین بیكەینە مەلەفێك، خۆمان لێكۆڵینەوەی لەسەر بكەین.

 

(باس) گرتنی كەركووك لەلایەن حەشد و هێزە عێراقییەكانەوە بە داگیركردن دەزانی؟
ڕێبوار تاڵەبانی: ئەوەی كردوویانە نادەستووری و نایاسییە، چونكە لە مادەی 9ی دەستوور ڕێگە بە كەس نادات، كە هێز بۆ چارەسەركردنی كێشە سیاسییەكان بەكار بهێنێت، سەدام حوسێینش و حكوومەتەكانی دیكەی عێراق لە مەلەكییەكانەوە تا عەبدولكەریم قاسم بەو هۆیەوە شكستیان هێنا، بۆیە ئێستا عەبادییش كەوتە هەمان هەڵەوە، ئەمە لەكاتێكدا دەیتوانی مادەی 140 جێبەجێ بكات و هیچ كێشەیەكیشی بۆ دروست نەدەبوو. ئێمەی كەركووكی و ئەنجومەنەكەشمان بە دەنگ داوامان لە عەبادی كرد بۆ جێبەجێكردنی مادەی 140، بەڵام ئەو بەفەرمی وەڵامی دایەوە و گوتی ناتوانم جێبەجێی بكەم، بۆیە دەبێ بە دەستوور عەبادی و مالیكی بدەینە دادگا.

 

(باس) پەشیمان نیت لەوەی لە ریفراندۆمدا بەشدارییت كردووە؟
رێبوار تاڵەبانی: ئەگەر خاڵێك لە ژیانمدا هەبێ و شانازیی پێوە بكەم ئەوەیە كە دەنگم بە (بەڵێ) بۆ دەوڵەتی كوردستان داوە، نەك تەنیا بۆ ڕاپرسییەك، بەڵكوو بۆ دەوڵەتەكەش دەنگم داوە، چونكە ئەوە ئامانجی سەرەكیی هەم لیستەكەمان و هەم حزبە كوردستانییەكان بووە، هەروەها حزبەكەی خۆشم لە هەموو كۆنگرەكاندا جەختی لەوە كردووەتەوە، لەبەر ئەوە بە خاڵێكی درەوشاوەی مێژووی خۆمی دەزانم كە ئەو راپرسییە هەم لە كەركووك كرا و هەم خۆشم دەنگم پێ دا.

 

(باس) هەندێك باس لە ئەنجامی ریفراندۆم دەكەن و دەڵێن بووە بە تاپۆی ڕەشی عوسمانی، ئەم قسەیە دروستە؟
ڕێبوار تاڵەبانی: 100% ئێستا ڕیفراندۆم وەك تاپۆی ڕەشی عوسمانییە لەلای ئێمە، بۆیە نە بۆ عەبادی و نە بۆ كەسی دیكە نییە، ئەو مافە لە میللەتی كورد وەربگرێتەوە، چونكە سوڵتەی گەل لەسەرووی دەسەڵاتی عەبادی و یەكێتی و پارتی و هەموو حزبەكانی دیكەشەوەیە، لە ساڵی 2005 گەل دەنگی بە دەستوور داوە، بۆیە كەس ناتوانێت یەك بڕگەی دەستووریش بگۆڕێ، تەنیا لە كاتێك نەبێ كە دیسانەوە 36 ملیۆن خەڵكی عێراق بانگ بكەن تا دەنگی پێ بدات. بۆیە كاتێك باسی سڕكردن و هەڵوەشاندنەوەی ریفراندۆم دەكەن، ئەوا دەیانەوێت خۆیانی پێ بپەڕێننەوە، موتڵەقەن شتی وا نابێت، هەروەها كاتێك خەڵكی كوردستان و حزبە كوردستانییەكان و هەموو سەركردەكانیش پەنجەیان مۆر دەكرد و دەنگیان بە ریفراندۆم دا و لەسەر شاشەكانەوە دڵخۆشیی خۆیان دەردەبڕی كە دەنگیان داوە، ئەبێ دووبارە ئەو هەموو خەڵكە بێنەوە سەر سندووق و بڵێن دەوڵەتمان ناوێ ئەو كاتە بۆیان هەیە ڕیفراندۆم هەڵبوەشێننەوە. لە راستیدا ئەم رووداوانە سەلماندییان كورد دوژمنی زۆرە. 

 

(باس) پێشتر باسی ئەوەت كرد لە ئەنجومەنی پارێزگای هەولێر كۆبوونەوە دەكەن و خۆتان ئامادە دەكەن بۆ گەڕانەوە بۆ كەركووك، پێش ئەوەش ئەبێ ڕێكکەوتنێك بكەن؟
ڕێبوارتاڵەبانی: تا ئێستا هیچ ڕێككەوتنێك نەكراوە و هیچ كۆبوونەوەیەكی ئەنجومەنی پارێزگای كەركووك لەدوای 16ی ئۆكتۆبەرەوە نەكراوە، هەروەها لیستی برایەتی دەستەیەكی داناوە كە لە سێ كەس پێكهاتووە، ئەوانیش من لە یەكگرتوو، محەمەد كەمال لە پارتی و ئەحمەد عەسكەری لە یەكێتی، ئەم سێ كەسەش بەپێی پەیڕەوی لیستی برایەتی كار دەكەین و هەر بڕیارێك بدەین بە كۆی دەنگ دەیدەین. ئێستا نامەیەكمان ئاراستەی هەموو حزبە كوردستانییەكان كردووە، پێمان گوتوون فەرموون بارودۆخی كەركووك وەك پێش 16ی ئۆكتۆبەر لێ بكەنەوە، ئێمە ئامادەین بگەڕێینەوە كەركووك، چونكە كەركووك كوردستانییە و هی خۆمانە، بەڵام بەبێ دەستەبەركردنی ئارامی و قەرەبووكردنەوەی هاووڵاتییان و چوونەوەی بارەگای حزبە سیاسییەكان و بەبێ دەركردنی حەشد و سوپای عێراقی پێم وایە گەڕانەوە بۆ كەركووك هەڵەیەكی زۆر گەورەیە.

 

(باس) بەرپرسانی یەكێتی لە كەركووك بانگەشە بۆ گەڕانەوەی خەڵك دەكەن و دەڵێن هیچ مەترسییەك نییە لەسەر ژیانیان، دوو ئەندامی فراكسیۆنی یەكگرتووش گەڕاونەتەوە كەركووك، ئێوەش بەنیازن بگەڕێنەوە؟
ڕێبوار تاڵەبانی: كەس حەز بەوە ناكات لە شاری خۆی دەربچێت، ئێستاش كە هەموومان لە شاری خۆمان ئاوارە بوون ئەم حاڵەتەمان پێ خۆش نییە، بەڵام لە هەر یەكێك لە ئێمە بپرسی لەوانەی بەرپرسیاریان هەیە یان تا دەگاتە ئەوانەی تاكێكی سادەن، هەمووی ئەترسێت و زەرەرمەند بووە، لەگەڵ ئەوەشدا جاسووسی جۆراوجۆر هەیە هەواڵیان لێ دەدەن و ئەچنە سەر ماڵەكەكان، بۆ نموونە خەلك هەبووە گەڕاوەتەوە ماڵی خۆی، بەڵام هەڕەشەی لێ كراوە و دووبارە ماڵ و بنەی پێچاوەتەوە و ئاوارە بووەتەوە، خۆزگە ئەوە راست بوایە كە مەترسی نەبوایە، بەڵام وا نییە و تا ئێستا 175 هەزار كەس ئاوارە بوون، ئەگەر منیش هەڵە بم یان 10 كەس هەڵە بێ ئێ خۆ ئەو ئاوارەبوونە هەزارانی تێپەڕاندووە و بابەتەكە لە گومان دەرچووە، من ماڵەكەم لەلایەن حەشدی شەعبییەوە كراوەتە بارەگا، هی بەرپرسانی دیكەش بە هەمان شێوە، لەگەڵ ئەوەشدا كە ئێمە هەموومان كە لەدەرەوەی كەركووكین وەرقەی هەڕ‌ەشەمان هەم لە داعشەوە هەم لە حەشدەوە بۆ هاتووە.


هەروەها پێكهاتەكانی دیكەش، ئەوانەی كە بۆچوونیان كوردستانیبوونی كەركووكی هەیە، هەموویان ئاوارە بووە، هەرچەندە یەكێـتیی ئێستا تاكە لایەنە لە كەركووك ماوە و لە ساڵی 1976وە یەكێك لە دروشمەكانی كە لەلایەن مام جەلاوە دانراوە، ئەویش ئەوەیەكە مافی چارەی خۆنووسینە، بەڵام ئێستا حالییەن ئەو لە قەوسی معادەلە سیاسییەكە دەرچووە، لەوانەیە یەكێـتی كەمترین هەڕەشەی لەسەر بێ لە حزبەكانی دیكە كە داوای كوردستانیبوونی كەركووك دەكەن، هەرچەندە ئەوانیش خۆیان و بارەگاكانیان ناتوانن بە چەكەوە لە كەركووك بگەڕێن، چونكە هەموو بارەگاكانیان لە لایەن پۆلیسەوە پاسەوانی ئەكرێ.

 

(باس) هەرچەندە بە هاوكاریی گرووپێكی یەكێتی، حەشد هاتە كەركووك و ناوچە كوردستانییەكان، كەچی ئەو باڵەش لەلایەن حەشدەوە چەك كرا، ئێوە دەڵێن چی؟
ڕێبوار تاڵەبانی: بەڵێ، بەداخەوە ئەگەر ئێمە بە درێژایی 100 ساڵ لە حكوومەتی عێراق تێنەگەشتبین كەی تێ دەگەین؟ حكوومەتی عێراق پێكدێ لەو كۆمەڵگایەی تێیدا دەژین، ئەو كۆمەڵگایە لە 1963 حەرەس قەومی ماڵی كوردی تاڵان دەكرد، هەروەها لە هاتنە سەر حوكمی سەدامیش تا 2003 هەمان شەخسیات و هەمان دەموچاوەكان حوكمیان دەكرد، تائێستاش بە هەمان عەقڵییەتەوە كار دەكەن.

 

(باس) ئەو پێشێلكارییانەی كراون، هەوڵی تۆماركردنیتان داوە تا لە دادگای نێودەوڵەتیدا دژی حکوومەتی عێراق بەكاریان بێنن؟
ڕێبوار تاڵەبانی: ئەو كارە پێویستی بە دامودەزگایەكی دەستووری و یاساییە كە شارەزایی تەواوی هەبێ لە بوارەكەدا، بەڵام حكوومەتی هەرێمی كوردستان بە درێژایی 26 ساڵ نەیتوانیوە دامودەزگایەكی وا دروست بكات كە بتوانێ لەم حاڵەتانەدا كەیسەكان تۆمار بكات، ئەو بێ ئیتفاقییەی كویش خەڵك ماندوو دەكات. هیوای من ئەوەیە كە ئەو كەیسە بجوڵێنێ و بۆ ئەو مەبەستەش سەردانی زۆر شوێنم كردووە، بەڵام بە راستی بەدەمەوەهاتن لەلایەن حكوومەتی هەرێمەوە نییە، ئێستا زۆر كەس كە شارەزان لەدەرەوە ئامادەباشیی ئەوەیان دەربڕیوە كە بەس ئەو كەیسانەیان پێ بگات بابەتەكە لە دادگای نێودەوڵتیدا دەجوڵێنن و حكوومەتی عێراقی پێ قەرزار بار دەكەن.

 

(باس) وڵاتانی هاوپەیمان و ئەوانەی خۆیان بە دۆستی كورد ئەزانی لە رووداوەكانی ئەم دواییە بۆ بێ دەنگ بوون؟
ڕێبوار تاڵەبانی: هەر لەسەر ئەوەش خۆم سەردانی چەند كۆنسوڵخانەیەكم كرد، لەوانە ئەمەریكا، رووسیا، هەروەها نەتەوە یەکگرتووەکان، بەڵام ئەوان لەلایەن حكوومەتی عێراقەوە چەواشە كراون بەوەی كوردستان دەستووری پێشێل كردووە، بۆیە تا ئێستاش پاڵپشتییەكانیان لە ئاستی پێویستدا نییە بۆ هەرێمی کوردستان. دەبێ ئێمە هەمان چەك لەڕێگەی پەیوەندییەکانمان و دۆستانمانەوە، لەبەرامبەر عێراق بەكار بهێنین و بە جیهان بڵێین ئەوەی پێشێلی دەستووری كردووە كوردستان نییە، بەڵكوو عێراقە.

 

(باس) هەرێمی كوردستان داوای گفتوگۆی كرد و دەیكا، بەڵام بەغدا هێزی سەربازیی بەكار هێنا، پێت وایە ئێمە لەسەر مێزی گفتوگۆ براوە بین؟
ڕێبوار تاڵەبانی: ئەگەر سوودمان لەپێشتر وەرنەگرتبێت، بەدڵنیاییەوە هەر بە عەقڵەكەی پێشترەوە بچینە سەر مێزی گفتوگۆ وا نازانم براوە بین، بەڵام ئەگەر بە ستراتیژیی تازە بڕۆین سەركەوتوو دەبین.

 

(باس) دوو شەو پێش وادەی ڕیفراندۆم لەلایەن گرووپێکی یەکێتی و ئێرانەوە فشارت لەسەر بووە تا ریفراندۆم لە كەركووك نەكرێت، ئەو رووداوە چۆن بوو؟
ڕێبوار تاڵەبانی: ئەو فشارە تا ئێستاش بەردەوامیی هەیە، ئەوان دەیانەوێت رۆڵی خۆم لە ئاساییكردنەوە كە ناویان ناوە گەڕانەوەی ئیداراتی شاری كەركووك، بەڵێ فشارێك هەبوو كە لە كەركووك ڕیفراندۆم نەكرێت و كەركووك لە ڕیفراندۆمەكە بێ بەش بكرێت، بەڵام داوای كۆدەنگیی نیشتمانیم كرد، پێم گوتن نابێ تەنیا باڵێك، یان لایەنێك یان مەڵبەند و ناوچەیەك بڕیار لەسەر ئایندەی كەركووك بدات، ئەوەبوو فشارەكان گەیشتنە ئەو رادەیەی سەركردایەتیی كوردستان هاتن لە كەركووك لەگەڵ لایەنەكان كۆبوونەوە و دواتریش ڕیفراندۆم بە خۆشی ئەنجام درا و بوو بە ڕۆژێكی مێژوویی. كەركووك بەتەنیا هی لایەنێكی دیاریكراو نییە كە بیەوێت بەتەنیا خۆی بڕیاری لەسەر بدات، بەڵكوو هی هەموو كوردێكە، تائێستاش فشارەكان لەسەر من بەردەوامییان هەیە، تەنانەت لە نووسینگەی عەبادییشەوە فشارم لەسەرە.

 

(باس) پێوەن بە دۆخی کەرکووک، هیچی نوێ هەیە؟
ڕێبوار تاڵەبانی: بەگشتی دەڵێم بارودۆخەكە بەو شێوەیە بەردەوام نابێ، حكوومەتی عێراقیش ناتوانێت لەناو كەكووكدا بمێنێـتەوە، چونكە حاڵەتێكی نامۆیە، مانەوەی حەشد و سوپا نامۆیە و خەڵكیش ئەوە قبووڵ ناكات، توركمان، عەرەب و مەسیحییەكانیش ئەوە قبووڵ ناكەن.