عیرفان کەرکووکلی: داوا دەکەین دەرگای ناونووسکردن بۆ گەنجانی تورکمان لە ریزی پێشمەرگە بکرێتەوە

”کەرکووک ئێستا تەعریب دەکرێ“

14/11/2017 - 10:51 بڵاوکراوەتەوە لە چاوپێكەوتن

 

عیرفان کەرکووکلی، سەرۆکی پارتی گەلی تورکمان، لە دیمانەیەکی تایبەتی (باس)دا قسە لەسەر بارودۆخی کەرکووک دەکات و راشی دەگەیەنێت، کە  لەگەڵ گەڕانەوەی کەرکووکدان بۆ سەر ھەرێمی کوردستان و دروستبوونی دەوڵەتی کوردین.

 

(باس) بارودۆخی ئێستای کەرکووک چۆن ھەڵدەسەنگێنن؟

 

عیرفان کەرکووکلی: کەرکووک ئێستا ڕووبەڕووی پرۆسەیەکی مەترسیدار بووەتەوە، کە ئەویش پرۆسەی تەعریبە، بارۆدۆخی شارەکە زۆر ناخۆشە و لەدوای ١٦/١٠وە ژیان تێیدا زۆر بەزەحمەت بەڕێوە دەچێت، ئەو حزبە تورکمانییانەی کە نیشتمانپەروەرن بارەگانیان تاڵان کراوە و سووتێنراوە، بە تایبەت بارەگاکەی ئێمە کە لەلایەن سەرایای سەلام و عەسائیبی ئەھلی ھەقی سەر بە حەشدی شەعبییەوە داگیر کراون، کەرکووک شاری برایەتی و پێکەوەژیانی ئاشتییانەوە بوو، بەداخەوە وای لێ بکرێت، ئەوەی کە لە کەرکووک دەکرێت ھەرگیز مایەی قەبووڵکردن نییە، دەبێت لەپێناو شارەکە لایەنە کوردستانییەکان ریزەکانیان یەک بخەنەوە، بۆ ئەوەی ڕێگری لەو مەترسییانە بکرێت کە ڕووبەڕووی کەرکووک دەبنەوە.

 

(باس) وەکوو پارتی گەلی تورکمان، لەگەڵ ئەوەدان کە کەرکووک بگەڕێتەوە سەر ھەرێمی کوردستان؟

 

عیرفان کەرکووکلی: بەڵێ، نەک ئێستا، بەڵکوو لەوکاتەی کە پارتەکەمان لە ١٩٨٧ دامەزرا دانمان بەوەدا ناوە کە کەرکووک بەشێکی دێرینە لە ھەرێمی کوردستان و ئێستاش دووپاتی دەکەینەوە کە ئەوە پرۆژەی ئێمەیە کەرکووک بگەڕێتەوە سەر ھەرێمی کوردستان، چونکە لەو کاتەدا مافی تورکمان زیاتر زامن دەبێت نەک لەگەڵ بەغدا، کەرکووک بگەڕێتەوە سەر ھەرێمی کوردستان ئەو کاتە ئێمەی تورکمان ڕێژەمان زیاتر دەبێت لە کوردستان و دەتوانین لە دەزگاکانی ھەرێمی کوردستان کار و چالاکییەکانی خۆمان مسۆگەر بکەین، چونکە کەرکووک بەشێکی دانەبڕاوی ھەرێمی کوردستانە و ئێمەش گەڕانەوەی بۆ سەر ھەرێمی کوردستان بە دەستکەوتێکی گەورە دەزانین و سازشی لەسەر ناکەین.

 

(باس) چی بەو تورکمانانە دەڵێن کە دژی گەڕانەوەی کەرکووکن بۆ سەر ھەرێمی کوردستان؟

 

عیرفان کەرکووکلی: ئەو لایەنە تورکمانانەی کە ئەجێندای دەرەکی جێبەجێ دەکەن و وەکوو نوێنەری تورکمان خۆیان دادەنێن و لەملاو لەولا لێدوانی ئەوە دەدەن کە کەرکووک بەشێک نییە لە ھەرێمی کوردستان و شارێکی عێراقییە و نابێت بگەڕێتەوە سەر ھەرێمی کوردستان، ئەوانە خزمەت بە ئەجێندایەک دەکەن کە خزمەت بە تورکمان و کەرکووک ناکات، ئەوانە کە ئەو لێدوانانە دەدەن تەنیا خزمەت بە بەرژەوەندیی خۆیان دەکات و ھیچ خزمەتێک بە بەرژەوەندیی تورکمان ناکات، چونکە بەرژەوەندیی تورکمان لەوەدایە کە کەرکووک بگەڕێتەوە سەر ھەرێمی کوردستان.

 

(باس) ئێوە چ داواکارییەکتان لە ھەرێمی کوردستان ھەیە؟

 

عیرفان کەرکووکلی: ئێمە لە ڕێگەی (باس)ەوە داوا لە حکوومەتی ھەرێمی کوردستان دەکەین کە دەرگای خۆبەخشی بۆ گەنجە تورکمانەکانمان بکاتەوە، تا ببنە پێشمەرگە و بەرگری لە خاکی پیرۆزی کوردستان بکەن، چونکە ئێمە شانازی بە ھێزی پێشمەرگەوە دەکەین و بە ھی خۆمانی دەزانین.

 

(باس) چی بەو تورکمانانە دەڵێن کە چوونەتە ناو ریزەکانی حەشدی شەعبییەوە؟

 

عیرفان کەرکووکلی: ئێمە  لەگەڵ ئەوەدا نین کە ڕۆڵەکانمان پەیوەندی نەک بە تەنیا حەشدی شەعبی، بەڵکوو بە ھیچ لایەکی دیکەوە بکەن، تەنیا ھێزی پێشمەرگە نەبێت و لە شوێنەکانی دیکەدا ببن بە شتی دیکە، کە لە بەرژەوەندیی خەڵکی کەرکووکدا نەبێت، بەرژەوەندیی ئێمە لەوەدایە کە ببینە پێشمەرگە.

 

(باس) تا چەند لەگەڵ ئەوەدان کە کورد دەوڵەتی ھەبێت؟

 

عیرفان کەرکووکلی: ئەگەر ھەرێمی کوردستان ببێت بە دەوڵەت، ئەوا ئێمەی تورکمان زیاتر مافەکانمان دەستدەکەوێت و دروستبوونی دەوڵەتی کوردیمان پێخۆشە و پشتگیریشی لێ دەکەین و ھەرچیش بە ئێمە بکرێت بۆ دروستبوونی دەوڵەتی کوردی ئەوا ئامادەین لەو پێناوەدا بیکەین.