رێبوار تاڵەبانی: ئاگاداری ڕێککەوتنی ئەم دواییەی یەکێتی و حکوومەتی عێراق نین

عەرەب و تورکمانەکان رێگری لە ئەنجامدانی هەڵبژاردن دەکەن لە کەرکووک

 

 سەرۆکی ئەنجومەنی پارێزگای کەرکووک رای دەگەیەنێت، ئەنجومەنی پارێزگا ئاگاداری وردەکاریی ڕێککەوتنە نەوتییەکانی ئەم دواییەی یەکێتی و عێراق نییە و تا ئێستا حکوومەتی هەرێمی کوردستان 85 ملیۆن دۆلار پارەی پترۆ دۆلاری داوەتە کەرکووک.

 

ئاماژە بەوەش دەدات، لە 2006ەوە ئەنجومەنی پارێزگا داوای پاڵاوگەی نەوتی بۆ کەرکووک کردووە و ئەوەی لە ماوەی ڕابردوودا ڕووی دا مەبەست لێی، دروستکردنی پاڵاوگە نەبووە.

 

رێبوار تاڵەبانی، سەرۆکی ئەنجومەنی پارێزگای کەرکووک بە وەکالەت، بۆ (باسنیوز) ئاشکرای کرد، "تا ئێستا حکوومەتی هەرێمی کوردستان لەدوای ڕێککەوتنی لەگەڵ حکوومەتی عێراق بۆ هەناردەکردنی نەوتی کەرکووک، بڕی 85 ملیۆن دۆلاری وەکوو پارەی پترۆ دۆلار رەوانە کردووە، بەڵام حکوومەتی عێراق هیچ بڕە پارەیەکی نەناردووە، سەرەڕای ئەوەی نیوە بە نیوە نەوتەکە فرۆشراوە."

 

 گوتیشی: "عێراق زیاتر لە یەک ترلیۆن دینار قەرزاری کەرکووکە و پارەکەی نەداوە، بەڵام حکوومەتی هەرێمی کوردستان پابەندی رێککەوتنەکەی بووە و پارەی پترۆ دۆلاری رەوانەی شاری کەرکووک کردووە. ئەوەی لە ماوەکانی رابردووش روویدا لە رەوانەکردنی هێز بۆ سەر کۆمپانیای نەوتی باکوور، مەبەست لێی دروستکردنی پاڵاوگەی نەوت بۆ کەرکووک نەبووە، چونکە ئەنجومەنی پارێزگای کەرکووک لە ساڵی ٢٠٠٦ەوە داوای دروستکردنی پاڵاوگەی کردووە، بەڵکو ئەوەی رووی داوە پەیوەندی بە چەند بەڵێنێکی حکوومەتی عێراقەوە بووە کە پێوەی بابەند نەبووە."

 

سەرۆکی ئەنجومەنی پارێزگای کەرکووک جەختی لەسەر ئەوەش کردەوە، حکوومەتی عێراق بەڵێنی زۆر دەدات و جێبەجێیان ناکات، بەڵام لەگەڵ ئەوەشدا بەکارهێنانی هێز بۆ چارەسەری کێشەکان بە هەنگاوی باش نازانن، گوتی "دەکرێ بەدیلی دیکە هەبن بۆ چارەسەری کێشەکان، هەموو هەنگاوەکان لە دەستووردا هەن، لەگەڵ ئەوەشدا حکوومەتی عێراق زۆر متمانەی نەماوە و ڕەنگە بەکارهێنانی هێز پەیوەندیی بە نەبوونی متمانەوە هەبێت بۆ ئەو بەڵێنانەی کە حکوومەتی عێراق لەسەر نەوتی کەرکووک داویەتی بە یەکێتی."

 

لەبارەی پێشنیازی هەڵوەشاندنەوەی ئەنجومەنی پارێزگای کەرکووکیش، کە فراکسیۆنی یەکێتی داوای کردووە، رێبوار تاڵەبانی رای گەیاند، ئەو پێشنیازە نەگەیشتووەتە ئەنجومەنەکەیان، بابەتێکی فەرمی نەبووە و تەنیا لێدوانی چەند ئەندامێکی ئەنجومەن بووە، گوتی "ئەوە بابەتێکە دەبێت پەرلەمانی عێراق بڕیاری لەبارەوە بدات."

 

راشی گەیاند، "کێشەی بەردەم ئەنجام نەدانی هەڵبژاردن لە کەرکووک بۆ ئەنجومەنی پارێزگا، تورکمان و عەرەبەکانن، گوتی ”عەرەب دەڵێت حەویجە ئازاد نەکراوە و نفوسی زۆری ئەوانی لێیە و تورکمانەکانیش بیانووی دیکەیان هەیە، چونکە ئەنجامدانی هەڵبژاردن لە بەرژەوەندی ئەو دوو پێکهاتەیەدا نابێت لە قۆناغی ئێستادا کورسی زۆیان لەدەست دەدەن."